Taruparea̧ Ma̧ȩ 28

Chjadëri̧ ëbatä eamȩrȩ jieno̧rëremȩdejȩ Jacobo ju̧i̧ Icha judi

1Ja̧dëa ji̧ Icha judi ëna̧diärëremȩdejȩ jibëa̧ ja oa, Jacobo pio ju̧i̧. Ado chjadëri̧ cjo̧ro̧pea̧ ma̧ȩ oa a̧de yürürëremȩdejȩ. Ado jiro ma̧ȩ oa yürüa̧ duri oa yo̧a̧dejȩ ja̧di ta̧rëri̧ yo̧mȩrȩ:

—Danȩ, pio yoa chiriri cjo̧ro̧yi̧ iei̧ pio ji̧ ëbatä eadërequedemȩ. Jabechji̧ a̧ro̧rȩ cjo̧ro̧mȩ chiririyi̧ ji̧, Canaa̧ quȩmȩ chiririyi̧ ji̧ ëbadëpea̧de. 2Jabechji̧ baätä earequedemȩ na̧ jiama̧i̧ ja̧ bëräpȩ. Betue ja̧ bëräpȩ, na̧ jiama̧i̧rȩ cjo̧ro̧mȩräpȩ baätä earequedemȩ Padanarama quȩmȩräpȩ. Pio idëpȩ cjo̧ro̧mȩ judi na̧ jademai̧de. Aba̧ quȩmȩde. Pio ju̧i̧ ja̧ jojabi ji̧ ëbaemȩrenȩ. 3A̧dë chjäte ju chiamȩ Ütë pio judi chjadëri̧ a̧dotädimȩ. Pio judi chjadëri̧ a̧doa̧ oa no̧i̧dë tjamo̧pe jätädirȩ na̧ea̧ri ja̧ji̧ri̧ pio judiro̧, chiriräpȩti̧ oa cjo̧ro̧rea̧mi̧ dari̧. 4Judi na̧ jadama̧i̧rea̧ pio ju̧i̧iäpȩmo̧ yürürërea̧ ma̧ȩra̧ pio ju̧ri̧ra̧ yürütädimȩ mȩnȩ chjadëri̧ cjo̧ro̧pea̧ ma̧ȩ oa, na̧ea̧ri ja̧ji̧ri̧ pio ji̧ri̧iäpȩmo̧bo. Pio yoa chiri oa chjätäti̧ cjiaji̧ri̧mi̧ dari̧ cjo̧ro̧rea̧rȩ, jabo pio mȩa yürütädimȩ pio yoa chiri oa, na̧ea̧ri ja̧ji̧ri̧ pio ji̧ri̧iäpȩmo̧bo. Aja̧, Abaraa̧ pio ju̧i̧ yo̧rërea̧mi̧ yürütädidibe mȩnȩro̧ chiri ana̧ji̧ri̧pe järea̧mi̧ dari̧ —yo̧a̧dejȩ Icha judi Jacobo pio ju̧i̧iäpȩmo̧.

5Ja̧di ta̧rëri̧ yo̧mȩrȩ chjadürëremȩdejȩ Jacobo ju̧i̧ Padanarama quȩmȩ chiriräpȩ, jojaderë cjo̧ro̧mȩräpȩ. Aba̧rë cjo̧ro̧mȩräpȩ, Rebeca ja̧ omȩ pio ju̧i̧iäpȩ chjadüa̧dejȩ. Ado Rebeca ji̧ nö̧rimȩ pio judi, jabechji̧ Betue quȩmȩ pio judide. Tjamo̧ davä. Jacobo arayi̧ pio ji̧ nö̧rimȩ judi, Echau arayi̧ pio ji̧ nö̧rimȩ judi, Betue pio judide. Arameo pumȩde. Ado peaja̧di nö̧rirëremȩdejȩ Rebeca ja̧ omȩ oa, Aba̧ quȩmȩ pio ju̧i̧.

Echau judi jibëa̧ ivi ji̧ri̧ a̧de ëbarëremȩdejȩrȩ

6,7Ado Echau judi goë goë ta̧rërëremȩde jäjarë Jacobo ju̧i̧iäpȩmo̧ ma̧ȩ yürüa̧ pio ju̧i̧. "Aja̧, Jacobo ju̧i̧ ma̧ȩ yürüa̧diji̧da, jënȩ chjadëri̧ cjo̧ro̧pea̧ ma̧ȩ oa yürüa̧diji̧da, Padanarama quȩmȩ chiriräpȩ chjadübea yaboi̧ ma̧ȩ yürüa̧diji̧da, jabechji̧ Canaa̧ quȩmȩ chiririyi̧ pio ji̧ ëbadëpea̧de yo̧a̧diji̧da, ado jäjäarë yo̧a̧ oa ta̧rëdiämȩrȩ baäa̧dida" yo̧a̧ oa ta̧rëremȩde. 8Ado pio jiro ma̧ȩ oa goë goë ta̧rëa̧ oaiä, jabechji̧ jo̧rȩtamȩpea̧de Echau judi. 'Aja̧, ca̧ ama̧i̧ judi Canaa̧ quȩmȩ chiririyi̧ pio ji̧ ëbatä eadëdicoada, jabo cjäri̧ maquëda, pio jiro ivi maea oa ëbamȩrȩ dopaquëda, ja̧di dari̧ ëbatä eadëdicoada' quëna̧ jo̧rȩtamȩpea̧de. 9Ja̧di tara järëremȩde jibëa̧ pumȩiäpȩ, Abaraa̧ joja pio ju̧i̧iäpȩ, Ichamae pio ju̧i̧iäpȩ. Ado Ichamae jojabi pio ji̧ a̧de ëbarëremȩdejȩ Marata quȩyi̧ ji̧, Nebato quȩmȩ pio ju̧i̧ ja̧ oyi̧ pio ji̧. Jabechji̧ Canaa̧ quȩmȩ chiririji̧ri̧ pio ji̧ri̧ ëbamȩrȩ a̧de ëbarëremȩdejȩ Ichamae jojabi pio ji̧. Aja̧, ja̧di dari̧ ëbamȩrȩ cjo̧ro̧rëremȩde Echau judi.

Ütë tjamo̧ judi na̧rȩrëremȩdejȩ Jacobo ju̧i̧ Bete quȩmȩräpȩ

10Ado Jacobo judi Berecheba bë ma̧ri̧ri pio judiri go̧dümȩrȩ mitërëremȩde Ara̧ quȩmȩräpȩ järea̧ no̧ oa. 11Ado jachipadäräa̧mȩ oa gȩnȩpea̧dejȩ. Ja̧di tara pio ju̧ri̧ cjiadiäa̧de mo̧a̧pea̧ oa. Dorë bira̧ oaiä pio ju̧ri̧pȩ cjiadiäa̧de. Ado ju̧ri̧pȩ mo̧a̧pea̧ oa, jibëa̧ tjübë oa pacho cjia mo̧a̧pea̧ oa, mitërëremȩdejȩ ta̧dë oa. Ado daburo a̧rȩmȩrȩ mo̧a̧mȩpea̧de. 12Ado Ütë tjamo̧ pio judi tänȩa̧ oa darämi̧ cjie canȩjä canȩjä mo̧a̧rëremȩde. Daburi pio judiri a̧dëräpȩ yuro cjiari̧ darämi̧ cjia̧dejȩ buarea̧ oa. Ado Ütë tjamo̧ ja̧ mu̧i̧tjoi̧ judiro̧, a̧dëriji̧ri̧ mu̧i̧tjoi̧ pio judiro̧ a̧dëri pio judiri biradiä biradiä cjiaji̧ri̧ oa darämi̧ cjie canȩjä canȩjä mo̧a̧rëremȩdejȩrȩ. Ado daburäpȩ yuro birana̧ra̧ ji̧ ado chjereno̧ bua̧dirȩ. Buadiä buadiä cjiaji̧ri̧ oa darämi̧ cjiarëremȩdejȩrȩ peaja̧di. 13Peaja̧di darämi̧ cjiarëremȩdejȩ Jeova pio ju̧i̧. Jibëa̧ yuroro cjiamȩ oa darämi̧ cjie canȩjä canȩjä mo̧a̧dejȩ. Ado pio jȩaiäpȩmo̧ ma̧ȩ yürüa̧mȩ ju̧i̧ ta̧rërämi̧ cjiarëremȩdejȩ. Ado ja̧di ta̧rëri̧ ni̧bämȩ oa ta̧rërämi̧ cjia̧dejȩ:

—Danȩ, Jeova pio judirequede. Na̧ jadama̧i̧rea̧ pio ju̧i̧rea̧ ja̧ Ütërequede cüdë. Aja̧, Abaraa̧ quȩmȩ pio ju̧i̧rea̧ ja̧ Ütërequede. Ado na̧ ama̧i̧ Icha pio ju̧i̧ ja̧ Ütërequede peaja̧di. Ado danȩ, pio mȩa, na̧ea̧ri ja̧ji̧ri̧ pio ji̧ri̧bo yürüparequededibe pio yoa chiri oa, mȩnȩ a̧rȩmȩ chiri oa. 14Ado a̧dë chjäte ji̧ra̧ri̧ cjiadiä tänȩparequedejȩrȩ na̧ea̧ri ja̧ji̧ri̧ pio ji̧ri̧. Jabechji̧ dabu pjo̧no̧i̧rȩ china̧ cjiami̧ dari̧ cjo̧ro̧padirȩ. Chiriräpȩti̧ oa chjuchjupechä cjo̧ro̧padirȩ. Ado mȩnȩ cjiamȩ chiriri pio judiri oëra̧ti̧ oa cjo̧ro̧padirȩ. Dorë cjitëmȩräpȩmo̧ a̧rȩmȩ chiri oa, dorë biramȩräpȩmo̧ a̧rȩmȩ chiri oa, dairäpȩmo̧ a̧rȩmȩ chiri oa oera̧ti̧ oa cjo̧ro̧padirȩ davä, pio na̧eari̧ ja̧ji̧ri̧ pio judiro̧. Ado danȩ, pio na̧ea̧ri ja̧ji̧ri̧ pio ji̧ri̧iä chjadëri̧ cjiadiärea̧ dapadirȩ pumȩ nö̧tai̧rȩ, oëra̧ti̧ oa cjo̧ro̧ji̧ri̧ pumȩ pio judiro̧. Jabechji̧ Ütë tjamo̧ pio judi tänȩa̧ oa chjadëri̧ cjiadiärea̧ dapadirȩ. 15Danȩ, mȩadimȩrequede cüdë a̧dë cjaraparea̧ decjiari̧. Jabechji̧ mȩnȩ eami̧räpȩ jäpamȩ oa, jabechji̧ chjadëri̧ jidaparequedemȩ. Ado pio cüdë tänȩa̧ oa, jabechji̧ ado chjereno̧ ma̧na̧ tänȩparequedemȩ pio yoa chiri oa. Jabechji̧, a̧dë baädëparequedemȩ. Ado cüdë pio mȩa yo̧a̧mi̧ nö̧tadäräri̧ japaparequedemȩ —yo̧mȩ oa ta̧rërämi̧ cjiarëremȩdejȩ Ütë tjamo̧ ju̧i̧ Jacobo judi.

16Ja̧dëa ji̧ Jacobo judi bëdüa̧ ji̧, canȩjä mo̧a̧remȩrȩ bëdüa̧ ji̧, jabechji̧ jo̧rȩtamȩpea̧de. 'Chia chia, Jeova pio judi pio yi cjiadida, jabo pio yi cjiadida daba quëna̧dëa̧cuni̧da' quëna̧ jo̧rȩtamȩpea̧de. 17Ado pio ju̧i̧iä uapa tjamo̧pe bagarëremȩde. Ado Jacobo judi uapa tjamo̧pea̧mȩrȩ, 'Aja, uapai̧ da tjamo̧räpȩ cjiaquëda, Ütë tjamo̧ ja̧ bëräpȩ cjia jiroquëda, a̧dëräpȩ yu̧a̧rea̧ joë yaräpȩ cjia jiroquëda' quëna̧ jo̧rȩtamȩpea̧de uapa tjamo̧mȩrȩ.

18Ado dopea̧rä, Jacobo judi mo̧a̧remȩrȩ cjitëa̧de peadai̧ tjamo̧ro. Ado jënȩ tjübë oa pacho cjiarea̧ ta̧dë oa uëräpȩmo̧ cjiari̧ arë cji̧därëremȩdejȩ. Ja̧dëa ji̧ arë cjaräa̧dejȩ ta̧dë oa yo̧ra̧ pio ju̧ri̧ra̧ chjadëri̧ na̧rȩpea̧ oa. 'Aja̧, Ütë tjamo̧ pio ju̧i̧iäpȩmo̧ jo̧rȩtapea̧dida' quëna̧ na̧rȩpea̧ oa arë cjarärëremȩdejȩ yo̧ra̧ pio ju̧ri̧ra̧. 19Ado Jacoborë mo̧a̧rea̧räpȩ üdë, "Uche" quȩmȩrëremȩde pearä judi, pio jiro quȩmȩ bë ma̧ri̧ üdë pio ju̧ri̧pȩ a̧rȩrëremȩ oaiä. Jabo Jacobo judi a̧no̧ mire quȩpea̧dejȩ Bete quȩmȩra̧. "Ütë tjamo̧ ja̧ bëde" yo̧mȩ quȩra̧ pio ju̧ri̧ra̧ ano̧ mire quȩparëremȩdejȩ.

20Ja̧dëa ji̧ Jacobo judi tjamo̧ri̧ yo̧rea̧ oa yo̧mȩrȩ ma̧ȩ yürürëremȩdejȩ Ütë tjamo̧ ju̧i̧:

—Danȩ, Ütë tjamo̧ pio judirenȩ. Ado mȩnȩ coa chjadëri̧ ëba järä judi, ca̧ jademai̧ ja̧ bëräpȩ yuro chjadëri̧ ëba järä judi, pio coa chjadëri̧ jidarä judi, cüdë chjadëri̧ jurapea̧ oa yürürä judi, cüdë chjadëri̧ ina̧pea̧ oa yürürä judi, jabechji̧ 'Jeova judi ca̧ Ütëpadida' quëna̧ jo̧rȩtaparequedemȩ. 21Tjamo̧ davä. Mȩnȩ coa chjadëri̧ baädärärea̧ yürürä judi, cüdë, coa nö̧rimȩ ja̧ bëräpȩ ado chjereno̧ chjadëri̧ baädärärea̧ yürürä judi, cüdë ju chiamȩrȩ, gito oa taradëmȩrȩ chjadëri̧ baädärärea̧ yürürä judi, jabechji̧ 'Jeova judi ca̧ Ütëpadida' quëna̧ jo̧rȩtaparequedemȩ —yo̧mȩrȩ yo̧rëremȩdejȩ Ütë tjamo̧ ju̧i̧ Jacobo judi. 22Ado ji̧dë uëri̧ a̧de yo̧a̧dejȩ:

—Aja̧, pio jiro ta̧dë üdë cüdë uëräpȩmo̧ cjiari̧ arë cji̧däa̧ ta̧dë üdë, jabechji̧ pio mȩaiäpȩmo̧ chjacjiamȩri̧ jo̧rȩtarea̧räpȩ cjiapade. Ado mȩnȩ coa yürüa̧ pio ju̧i̧, jabechji̧ ado chjereno̧ yürüparequedemȩ. Cüdë eami̧ oa goarä judi, ichi chjö̧na̧i̧ oa goarä judi, jabechji̧ cja̧rȩmȩ oa yürüparequedemȩ ado chjereno̧. Tjamo̧ davä. Cüdë ichi chjö̧na̧i̧ baca oa goarä judi, jabechji̧ cja̧rȩmȩ oa china̧chjari̧ tutipareconȩ pio mȩaiäpȩmo̧ yürüpea̧ oa. Ja̧di maea oa japamȩrȩ cjo̧ro̧parequede cüdë —yo̧mȩrȩ yo̧rëremȩdejȩ Ütë tjamo̧ ju̧i̧iäpȩmo̧ Jacobo judi.

Currently Selected:

Taruparea̧ Ma̧ȩ 28: Pume

Highlight

Copy