Taruparea̧ Ma̧ȩ 27
27
Icha judi chjadëri̧ cjo̧ro̧pea̧ ma̧ȩ oa yürürëremȩdejȩ jibëa̧ ja oa, jënȩ chjadëri̧ cjo̧ro̧rea̧mi̧ dari̧
1Ado Icha judi ütama̧i̧ tjamo̧padäräa̧mȩrȩ cjo̧ro̧rëremȩde da cotope baga̧mȩrȩ. Ja̧dëa ji̧ ado cja̧rȩmo̧ doremȩrä jibëa̧ ja yabomȩ ju̧i̧ ëna̧diärëremȩdejȩ, Echau pio ju̧i̧. Ado yo̧a̧dejȩ:
—Ca̧ ja.
Ado Echau judi dëbë yo̧mȩrȩ yo̧a̧dejȩ:
—Aja̧, ¿tjana̧ yo̧nȩ ama̧i̧? —yo̧a̧dejȩ.
2Ja̧dëa ji̧ yo̧a̧dejȩ Icha judi:
—Danȩ, ütama̧i̧ tjamo̧padäräa̧requede. Ado pio dibë a̧dë ja̧bopai̧ dari̧ cjiarequede. 3Pio ju̧i̧iä goë jaevä. Na̧ tjibato oa mitëvä na̧ yipjatëbo oa. Ae tai̧tä earequedemȩ chirirä cjo̧ro̧mȩ jurarea̧ pio ju̧i̧ apea̧ oa. 4Ja̧dëa ji̧ mȩnȩ aea̧ pio ju̧i̧ goa ma̧na̧emȩrenȩ. Ado ja̧di dari̧ japa ëte jabechji̧ chumȩ yürüemȩrenȩque juru goae tjamo̧ oa. 'Aja̧, ca̧ ama̧i̧ judi ja̧di dari̧ chuma̧ oa goae tjamo̧diji̧da' quëna̧ jo̧rȩtamȩrȩ chumȩ yürüemȩrenȩque. Ja̧dëa ji̧ cüdë ju̧i̧ jura ëte, jabechji̧ Ütë tjamo̧ judi pio mȩa chjadëri̧ japabëmi̧ chjadëri̧ cjo̧ro̧pea̧ ma̧ȩ oa yürüparequedemȩ. Jabechji̧ cüdë ja̧bobea yaboi̧ jabërä yürüparequedemȩ pio jiro ma̧ȩ oa —yo̧mȩrȩ yo̧rëremȩdejȩ joja yabomȩ oa Icha judi.
5Jabo Rebeca jini̧ jachidëyi̧rȩ goadi ta̧rërëreyi̧nȩjȩ Icha ju̧i̧, jënȩ joja oa yo̧a̧ pio ju̧i̧. Tjamo̧ davä. Judi yo̧a̧ ji̧, "Aja̧, chirirä cjo̧ro̧mȩ jurarea̧ pio ju̧i̧ ae yürütä earequedemȩ" yo̧a̧ pio ju̧i̧ goadi ta̧rëa̧nȩjȩ. Ado Echau judi chiriräpȩ tai̧a̧ ji̧, 6Rebeca jini̧ chjaodëri̧ yo̧a̧nȩjȩ joja durimȩ pio ju̧i̧:
—Danȩ, goadi ta̧rëa̧requede na̧ amai̧ judi na̧ ayima̧i̧ oa ni̧bä chjaoa̧ pio ju̧i̧. Ja̧di ta̧rëri̧ yo̧a̧dejȩ Echau ju̧i̧: 7“Goë jaevä. Na̧ tjibato oa mitëvä, na̧ yipjatëbo” yo̧a̧dejȩ. “Ae tai̧tä earequedemȩ chirirä cjo̧ro̧mȩ jurarea̧ pio ju̧i̧ apea̧ oa. Ja̧dëa ji̧ mȩnȩ aea̧ pio goa ma̧na̧emȩrenȩ. Juru goae tjamo̧ oa chumȩ yürüemȩrenȩque” yo̧a̧dejȩ. “Ado ja̧dëa ji̧ cüdë jura ëte, jabechji̧ Ütë tjamo̧ judi pio mȩa chjadëri̧ japabëmi̧ chjadëri̧ cjo̧ro̧pea̧ ma̧ȩ oa yürüparequedemȩ, cüdë ja̧bobea yaboi̧. Jeova pio ju̧i̧ ja̧ dachoro yürüparequedemȩ ma̧ȩ oa” yo̧mȩrȩ yo̧a̧dejȩ na̧ ama̧i̧ judi na̧ ayima̧i̧ pio ju̧i̧. Ja̧di ta̧rëri̧ ni̧bäa̧dejȩ. 8Ja̧di tara yo̧requedemȩ ca̧ ja. Danȩ, chjadëri̧ japavä cüdë mȩa yo̧a̧mi̧. 9Jabechji̧ yo̧a̧ri̧ chivo chjadë tjamo̧ i̧ra̧ jäeno̧vä. Guna̧ ëte ara janeno̧vä. Na̧ ama̧i̧ judi jënȩ ea̧ juru pio pio ju̧i̧ chuma̧e yürüpareconȩ. 10Pio mȩnȩ na̧ ama̧i̧ pio ju̧i̧iäpȩ goa jäparenȩ jurarea̧ oa judi pio mȩa ma̧ȩ yürütä jënȩ ja̧bobea yaboi̧. Aja̧, mȩnȩ chjadëri̧ cjo̧ro̧pea̧ ma̧ȩ pio ju̧i̧ yürütä goa jäpea̧ chiarenȩ jurarea̧ oa —yo̧yi̧rȩ yo̧rëreyi̧nȩjȩ joja oa joji̧ri̧ pio jini̧.
11Jabo Jacobo judi dëbë yo̧rëremȩdejȩ jibëa̧ ai̧ ji̧:
—Jabo cjäri̧ maquë, ca̧ ayima̧i̧ pio judimi̧ dadëquë —yo̧a̧dejȩ—. Icjara nö̧tai̧ oa i cö̧ chiamȩdi jabo ja̧didëquë cüdë. I chja maeaquë. 12Ado ca̧ ama̧i̧ judi coa ga̧re tararä judi, cjäri̧ madicoa, ‘u̧i̧patadicoada’ quëna̧ jo̧rȩtapai̧ dadicoa. Ado ërecjia tjamo̧pe jäpai̧ dadicoa ji̧dëri̧. Ado ja̧dëa ji̧ pio coa chjadëri̧ cjo̧ro̧pea̧ ma̧ȩ oa yürütärea̧ ji̧, cjäri̧ madicoa, chjai̧dëri̧ cjo̧ro̧pea̧ ma̧ȩ oa yürüpai̧ dadicoa —yo̧mȩrȩ dëbë yo̧a̧dejȩ jo̧ji̧ri̧iäpȩmo̧ Jacobo judi.
13Jabo jibëa̧ ai̧ jini̧ yo̧rëreyi̧nȩjȩ:
—Danȩ, judi pio mȩaiäpȩmo̧ chjai̧dëri̧ cjo̧ro̧pea̧ ma̧ȩ oa yürürä judi, jabechji̧ pio coaiäpȩmo̧ ma acji cjatätädique chjai̧dë üdë, pio mȩaiäpȩmo̧dë. Jabomo̧ ta̧rë ta̧rë japeno̧coe. Jäeno̧vä chivo i̧ra̧. Jo̧ȩra̧pevä —yo̧yi̧rȩ yo̧a̧nȩjȩ Jacobo ju̧i̧.
14Ado joji̧ri̧ pio ji̧iä ta̧rëa̧ oaiä, jabechji̧ jäeno̧a̧dejȩ chivo i̧ra̧ goa ma̧na̧pea̧ oa. Ado yürüa̧dejȩ joji̧ri̧ ji̧. Ado jini̧ goae tjamo̧pe bagari̧ chuma̧nȩjȩ juru oa. Icha judi ea juru pio ju̧i̧ chuma̧nȩjȩ jënȩ jurarea̧ pio ju̧i̧. 15Ado ja̧dëa ji̧ jurarea̧ oa chuma̧ ëte, jäeno̧a̧nȩ Echau ja̧ chjiboremȩ oa mitëpea̧ oa. Chjibo chjadë oa mitëa̧nȩjȩ bërä boea̧ oa cjiamȩ oa. Ado ja̧dëa ji̧ joja yabomȩ ja̧ chjiboremȩra̧ pio ju̧ri̧ra̧ ano̧ mire ina̧ tänȩa̧nȩjȩ Jacobo ju̧i̧, jibëa̧ ja durimȩ pio ju̧i̧. 16Ado chivo ja̧remȩ ira̧ pio ju̧ri̧ra̧ puri cji̧däa̧nȩjȩ Jacobo ja̧ ichi ju oa, gürü jubo. Ja̧di dari̧ cji̧däa̧nȩjȩ cö̧ ji̧ra̧ri̧ chiamȩmi̧ dari̧. 17Ja̧di dari̧ japa ëte yürüa̧nȩjȩ Jacobo ju̧i̧ jurarea̧ goae tjamo̧ oa. Chja̧pebo yürüa̧nȩjȩ.
18Ado ja̧dëa ji̧ Jacobo judi jäeno̧a̧dejȩ jäja ju̧i̧iäpȩmo̧, Icha pio ju̧i̧iäpȩmo̧. Ado yo̧a̧dejȩ:
—Ama̧i̧ —yo̧a̧dejȩ.
Ado Icha judi dëbë yo̧a̧dejȩ:
—Pio yirequede. ¿Chjianȩ ca̧ ja? —dëbë yo̧a̧dejȩ.
19Ado Jacobo judi yo̧a̧dejȩ:
—Echau pio judirequede. Na̧ ja yabomȩ pio judirequede —yo̧a̧dejȩ—. Japeno̧a̧requede mȩnȩ coa yo̧a̧ pio ju̧i̧. Cjitëvä. Jureno̧vä. Cüdë gu̧na̧ pio ju̧i̧ juravä. Ado jura ëte yürücoe ma̧ȩ oa, cüdë chjadëri̧ cjo̧ro̧pea̧ ma̧ȩ oa —yo̧mȩrȩ yo̧a̧dejȩ.
20Ado Icha judi dëbë yo̧a̧dejȩ:
—¿Jabo yö̧ta dari̧ japeno̧a̧nȩ ca̧ ja, chjaodëri̧ japeno̧pea̧ oa?
Ado Jacobo judi dëbë yo̧a̧dejȩ:
—Yö̧ta dari̧dë, jabechji̧ Jeova pio judi, na̧ Ütë pio judi chjadëri̧ a̧doa̧ oa, chjaodëri̧ japeno̧a̧requede —yo̧mȩrȩ dëbë yo̧a̧dejȩ jibëa̧ ama̧i̧ ju̧i̧.
21Jabo Icha judi yo̧a̧dejȩ:
—Pio coaiäpȩ jana̧vä mȩa ga̧re tararea̧mi̧ dari̧. 'Jabechji̧ Echau pio judi tjamo̧dida, ado cja̧rȩmo̧dëdida' quëna̧rea̧mi̧ dari̧ ga̧re taratämi̧ cjiarequedemȩ chjadëri̧. Jana̧vä.
22Ja̧dëa̧ ji̧ jäjarë yo̧a̧mi̧ irä jädäräa̧dejȩ jibëa̧ ama̧i̧ ju̧i̧. Ado Icha judi jibëa̧ ichira̧ pio ju̧ri̧ra̧ ga̧re taramȩrȩ yo̧a̧dejȩ jibëa̧ ja oa:
—Jacobo pio ju̧i̧ ja̧ ma̧ȩmi̧ ta̧rëri̧ ta̧rërequedemȩ, jabo Echau pio ju̧i̧ ja̧ ichide. I cö̧ ji̧ra̧ri̧ chiade —yo̧a̧de.
23Jabo Echau ja̧ ichi ju cö̧mi̧ da pio ju̧i̧ ga̧re tara̧ oaiä, 'jabechji̧ Jacobo pio judidida' quëna̧dëa̧dejȩ. Jabo Icha judi chjadëri̧ cjo̧ro̧pea̧ ma̧ȩ oa yürüparemȩrȩ 24ado iëno̧ë ta̧rëa̧dejȩ:
—¿Echau pio judi tjamo̧nȩ? —iëno̧ë ta̧rëa̧.
—Aja̧, Echau pio judi tjamo̧requede —yo̧mȩrȩ dëbë yo̧a̧dejȩ jibëa̧ ama̧i̧ ju̧i̧ Jacobo judi.
25Ja̧dëa ji̧ Icha judi yo̧a̧dejȩ:
—Danȩ ca̧ ja, yürücoe mȩnȩ aea̧ jurarea̧ oa cüdë jurapea̧ oa. Ado jura ëte mȩnȩ chjadëri̧ cjo̧ro̧pea̧ ma̧ȩ oa yürüparequedemȩ.
Ado Jacobo judi jurarea̧ oa yürüa̧dejȩ. Ërü oa peaja̧di yürüa̧dejȩ bino quȩmȩ oa. Ado Icha judi jura̧de. Jara̧de. 26Ado ja̧dëa ji̧ yo̧a̧dejȩ jibëa̧ ja oa:
—Queri̧ jana̧coe ca̧ ja. Ya i̧bucoe chama̧choro.
27Ado Jacobo judi jäja pio ju̧i̧ queri̧ jäa̧mȩ oa, chama̧choro ya i̧bua̧mȩ oa, jabechji̧ pji̧dä tara̧dejȩ jibëa̧ chjibo oa. Ado pio ju̧i̧ pji̧dä tara̧ oaiä, ‘jabechji̧ Echau pio judi tjamo̧dida’ quëna̧ jo̧rȩtamȩpea̧de. Ja̧dëa ji̧ Ütë tjamo̧ judi chjadëri̧ japabëmi̧ chjadëri̧ cjo̧ro̧pea̧ ma̧ȩ oa yürürëremȩdejȩ. Ja̧di ta̧rëri̧ yo̧mȩrȩ yo̧a̧dejȩ joja pio ju̧i̧:
—Aja̧, ja̧di tarari̧ goaeri̧ pjȩa̧ cjiade ca̧ ja judi. Jeova pio judi chjadëri̧ cjiadiä tänȩa̧ chiri üdë goaeri̧ pjȩa̧ cjiami̧ tarari̧ cjiade. 28Aja̧ ca̧ ja, na̧ tjado oa chjadëri̧ cjü tänȩtädejȩ Ütë tjamo̧ judi. Na̧ jurarea̧ üdë, na̧ tirigo cho üdë, na̧ uva to üdë ji̧ra̧ tjamo̧pe baga tänȩtädejȩ. 29Ado pumȩ judiro̧ no̧i̧dërë na̧ mu̧i̧tjoi̧ maearë ja̧bepë yürütädiro̧mȩ. Chiriräpȩti̧ oa cjo̧ro̧ji̧ri̧ pio judiro̧, na̧ oti̧ pio judiro̧borë na̧ dëbëräpȩ ju chatura̧ tjätjäpë china̧därätädiro̧mȩ. Jabechji̧ na̧ chja̧oerä cjo̧ro̧tädirȩ pumȩ judiro̧. Tjamo̧ cjo̧ro̧mȩmi̧ dari̧ cjo̧ro̧tärenȩ. Ado mȩa chjai̧dëri̧ japaji̧ri̧ pio judiro̧, jabechji̧ chjai̧dëri̧ cjo̧ro̧tädirȩ. Ado mȩa chjadëri̧ japaji̧ri̧ pio judiro̧ chjadëri̧ cjo̧ro̧tädirȩ —yo̧mȩrȩ yo̧rëremȩdejȩ Jacobo ju̧i̧ Icha judi. Aja̧, judi chjadëri̧ cjo̧ro̧pea̧ ma̧ȩ oa yürürëremȩdejȩ judi ja̧di dari̧ cjo̧ro̧bëmi̧.
Chjadëri̧ cjo̧ro̧pea̧ ma̧ȩ oa yürütä cjo̧dëtarëremȩde Echau judi jäjäa pio ju̧i̧iä
30Ado Icha judi joja durimȩ oa ma̧ȩ yürüa̧ duri oa, Jacobo judia̧dë baäeno̧a̧dejȩ. Ado pea a̧dë baäeno̧a̧ ji̧, jojadi judi, Echau pio judi ara ma̧na̧de chiriräpȩ tai̧rëremȩrȩ. 31Ado jënȩ aea̧ pio ju̧i̧ chumȩ yürürëremȩdejȩ jäja pio ju̧i̧. Chume yürüa̧dejȩ juru goae tjamo̧ oa. Ado ja̧dëa ji̧ goa jäa̧dejȩ jäja oa. Ado yo̧a̧dejȩ:
—Goë jaevä ama̧i̧ —yo̧a̧dejȩ—. Cjitëvä. Juravä. Na̧ ja judi chirirä cjo̧ro̧mȩ pio ju̧i̧ aea̧ pio ju̧i̧ juravä. Ado jura ëte cüdë chjadëri̧ cjo̧ro̧pea̧ ma̧ȩ oa yürütä earequedemȩ. Cjitëvä —yo̧a̧dejȩ.
32Jabo Icha judi iëno̧ë ta̧rëa̧dejȩ:
—¿Jabo chjianȩ ca̧ ja?
Ado Echau judi dëbë yo̧a̧dejȩ:
—Chjiadërequede, Echau pio judirequede. Na̧ ja yabomȩ pio judirequede —yo̧a̧dejȩ.
33Pio ju̧i̧ ta̧rëa̧ oaiä ana̧ tjamo̧ri̧ jo̧rȩtamȩpea̧de Icha judi i ma̧na̧ gura cjiamȩrȩ. Ja̧dëa ji̧ ma̧ȩ järäjäräamȩrȩ dëbë yo̧a̧dejȩ Echau ju̧i̧:
—Jabo mȩnȩ Echaurä judi, ¿chjiaremȩde pio coa juru goae oa pea goa jana̧remȩ judi? Jënȩ aea̧ pio ju̧i̧ yürüa̧dique na̧ yaboi̧. Jura̧reconȩ. Ado judi chjadëri̧ cjo̧ro̧pea̧ ma̧ȩ oa yürüa̧reconȩ peaja̧di. Pio judi, jabechji̧ chjadëri̧ cjiadiäa̧de yaba̧. Cüdë pio ju̧i̧iäpȩmo̧ chjadëri̧ cjo̧ro̧pea̧ ma̧ȩ oa yürüa̧ oaiä, jabechji̧ chjadëri̧ cjiadiäa̧de tuti japarea̧mi̧dëri̧. Yudiri yürürea̧mi̧dëde —yo̧mȩrȩ yo̧rëremȩdeje Icha judi jibëa̧ ja yabomȩ pio ju̧i̧iäpȩmo̧. 34Pio ju̧i̧ ta̧rëa̧ oaiä Echau judi ëcarami̧ tarari̧ jo̧rȩtamȩpea̧de. Ana̧ri̧ ejaro cjiamȩpea̧de, gito ana̧ri̧ jo̧rȩtamȩrȩ. Ado ja̧dëa̧ ji̧ jäja pio ju̧i̧iäpȩmo̧ to̧bari̧ yo̧a̧dejȩ:
—Ca̧ ama̧i̧, pio coabo yürücoe. Ütë tjamo̧ judi pio coaiäpȩmo̧bo chjadëri̧ japabëmi̧ chjadëri̧ cjo̧ro̧pea̧ ma̧ȩ oa yürücoe pio coabo. Yürüpea̧ chiarenȩque —yo̧tea̧dejȩ.
35Jabo Icha judi dëbë yo̧mȩrȩ yo̧a̧dejȩ:
—Cjäri̧ marequede. Japarea̧mi̧dërequede —yo̧a̧dejȩ—. Yürürea̧mi̧dërequede. Na̧ yaboi̧ jana̧de na̧ ayi̧ma̧i̧ judi. U̧i̧pea̧dique. Ado cüdë mȩa yürüparemȩ ma̧ȩ üdë pio ju̧i̧iäpȩmo̧ cjiadiäa̧ maeade yaba̧. Pio na̧ea̧täremȩ ma̧ȩ üdë, mȩnȩ chjadëri̧ cjo̧ro̧pea̧ ma̧ȩ üdë, pio ju̧i̧iäpȩmo̧ ma ano̧ mire cjiadiäa̧de pio mȩaiäpȩmo̧ yo̧rea̧ decjiari̧ —yo̧a̧dejȩ.
36Ado ja̧dëa ji̧ yo̧a̧de Echau judi jäja ju̧i̧iäpȩmo̧:
—Ca̧ ayi̧ma̧i̧ oa Jacobo quȩra̧ quȩparërea̧ ji̧, jabechji̧ chjadëri̧ quȩpea̧renȩjo̧ȩ u̧i̧pamȩ tara. Yo̧a̧ri̧ co u̧i̧pamȩrȩ chjai̧dëri̧ japea̧dique. Pearä u̧i̧parërea̧ ji̧, yabomȩrȩ mitërea̧ pio ju̧i̧ bae ano̧ mirea̧dique. Ado yaba̧, ca̧ ama̧i̧ judi pio coa chjadëri̧ cjo̧ro̧pea̧ ma̧ȩ oa yürütärea̧ ji̧, cjäri̧ madique, ado chjereno̧ japea̧dique. Jabo ama̧i̧, cüdë chjadëri̧ cjo̧ro̧pea̧ ma̧ȩ oa yürütä ea tjamo̧requedemȩ jabo. Pio coabo chjadëri̧ cjo̧ro̧pea̧ ma̧ȩ oa ¿yürürea̧mi̧dëde? —iëno̧ë ta̧rëa̧dejȩ.
37Jabo Icha judi dëbë yo̧mȩrȩ yo̧a̧dejȩ:
—Cjäri̧ marequede ca̧ ja, chjadëri̧ cjo̧ro̧pea̧ ma̧ȩ chjö̧na̧i̧bo oa yürüa̧reconȩ na̧ ayi̧ma̧i̧ oa, pio mȩaiäpȩmo̧ ado chjereno̧ yürürea̧mi̧dëri̧ —yo̧a̧dejȩ—. Jabechji̧ pio ju̧i̧ ja̧ chja̧oerä cjo̧ro̧parenȩ. Pio judi tjamo̧ cjo̧ro̧mȩmi̧ dari̧ cjo̧ro̧pade, mȩnȩdë. Aja̧, "ju̧i̧ ja̧ oti̧ judiro̧ jibëa̧ mu̧i̧tjoi̧ maearë cjiadiäpadirȩ" yo̧mȩrȩ ma̧ȩ yürüa̧reconȩ na̧ ayi̧ma̧i̧ pio ju̧i̧. Peaja̧di jibëa̧ jurarea̧ üdë ji̧ra̧ tjamo̧pe bagatä, jibëa̧ tirigo cho üdë, jibëa̧ uva üdë, ji̧ra̧ tjamo̧pe bagatä yo̧a̧requede. Ado judiri yo̧rea̧ decjiade. Pio mȩaiäpȩmo̧ chjadëri̧ cjo̧ro̧pea̧ ma̧ȩ oa yürürea̧mi̧dëde. Pio ju̧i̧iäpȩmo̧ ma yürüa̧reconȩ —yo̧mȩrȩ yo̧rëremȩdejȩ Echau ju̧i̧ Icha judi, gito ana̧ri̧ jo̧rȩtamȩrȩ.
38Jabo Echau judi to̧bari̧ yo̧mȩrȩ yo̧tea̧dejȩ jibëa̧ ama̧i̧ ju̧i̧:
—Cüdë chjadëri̧ cjo̧ro̧pea̧ ma̧ȩ oa yürücoe. Cja̧rȩmȩ ma̧ȩ chjadërë cjiadiäa̧ jirode pio coaiäpȩmo̧ yürüpea̧ ji̧. Ma̧ȩ yürücoe cüdëborë chjadëri̧ cjo̧ro̧pea̧ oa —yo̧tatea̧dejȩ.
Ado ja̧di ta̧rëri̧ yo̧ta ëte ma̧i̧ dari̧ ëna̧ quirati̧ cjia eamȩpea̧de. 39Ja̧dëa ji̧ Echau judi ji̧dë ma yo̧a̧ oaiä ja̧di ta̧rëri̧ yo̧mȩrȩ ma̧ȩ yürürëremȩdejȩ Icha judi:
—Danȩ, jurarea̧ chjadëri̧ yürümȩ chiri queri̧räpȩ cjo̧ro̧dëparenȩ. Chiri chjadëdëräpȩ cjo̧ro̧parenȩ cjü ji̧ra̧dëräpȩ. 40O judiro̧ mȩa ja̧bo tänȩchea oa dëbëribo jo̧dë chiamȩ tjapënȩra̧ pio ju̧ri̧ra̧ järimȩrȩ cjo̧ro̧parenȩ dëbëpe chjaomȩrȩ. Na̧ omȩ pio ju̧i̧ ja̧ mu̧i̧tjoi̧mi̧ dari̧ cjo̧ro̧parenȩ. Jabo mȩnȩ järi tjamo̧mȩpea̧rä pio ju̧i̧ ja̧ chja̧oeri pio judiri go̧dürea̧ daparenȩ —yo̧mȩrȩ ma̧ȩ yürürëremȩdejȩ joja yabomȩ oa jënȩ chjadëri̧ cjo̧ro̧pea̧ ma̧ȩ oa yürütärea̧ ji̧.
Jacobo judi baärëremȩde Echau judi pio jȩa ja̧bo tänȩchea oa
41Ja̧dëa ji̧ pio judiri yurori, Echau judi ea tjamo̧dëa̧dejȩ joji̧ri̧ja pio ju̧i̧. 'Ca̧ ama̧i̧ judi pio coaiäpȩmo̧ ma̧ȩ yürütärea̧ ji̧, cüdë chjadëri̧ cjo̧ro̧pea̧ ma̧ȩ oa yürütärea̧ ji̧, u̧i̧pea̧diji̧da, pio coaiä bae mitëa̧dida' quëna̧ jo̧rȩtamȩrȩ darëremȩdejȩ jibëa̧ ayi̧ma̧i̧ oa, ma̧ cäa cäari̧ jo̧rȩta tjamo̧mȩrȩ. ‘Aja̧, ca̧ ama̧i̧ judi ja̧bopea̧ querediä jirodida, ado judi ja̧boa̧rä, jabechji̧ ca̧ ayi̧ma̧i̧ oa ja̧bo tänȩpacuni̧da, ama̧i̧ judi ibë a̧dë ja̧boa̧rä Jacobo pio ju̧i̧ ja̧bo tänȩpacuni̧da’ quëna̧ jo̧rȩtapea̧mȩde.
42Jabo Rebeca jini̧, "Echau judi ja̧di dari̧ jo̧rȩtade", yo̧a̧ oa ta̧rëa̧ oaiä ëna̧diëno̧rëreyi̧nȩjȩ Jacobo ju̧i̧, joja durimȩ pio ju̧i̧. Ado yo̧a̧nȩjȩ:
—Danȩ, na̧ ayima̧i̧ judi ja̧bo tänȩtämi̧ cjiadimȩ. Mȩnȩ pio ju̧i̧iäpȩmo̧ chjai̧dëri̧ japea̧ ba oa bape chjaotämi̧ cjiadimȩ. 43Ja̧di tara yo̧requedemȩ ca̧ ja. Chjadëri̧ ta̧rëcoe. Goadi baävä jo̧ȩra̧pe. Ara̧ quȩmȩ chiriräpȩ baävä ca̧ omȩ pio ju̧i̧iäpȩ, Aba̧ quȩmȩ pio ju̧i̧iäpȩ. 44Pio ju̧ri̧pȩ cjiadiävä japamitë ana̧ri̧ na̧ omȩ judi cjatäcjie jo̧rȩta̧rä yuro. 45Mȩnȩ pio jȩaiäpȩmo̧ chjai̧dëri̧ japea̧ pio ju̧i̧ a̧dë jo̧rȩtarä, cjatäcjie jo̧rȩtarea̧ darä, jabechji̧ ma̧na̧emȩrenȩ ado chjereno̧. Chjadëri̧ ma̧ȩ chjadüeyi̧requedemȩ mȩnȩ jabërä ma̧na̧chea oa. Jo̧ȩra̧pe baävä. Cüdë, ca̧ u̧ri̧ yo̧a̧ri̧borë cja̧rȩmȩ doro ja̧botä eadërequededibe. Baävä —yo̧yi̧rȩ yo̧rëreyi̧nȩjȩ Rebeca jini̧ joja durimȩ pio ju̧i̧.
46Ja̧dëa ji̧ ji̧dë duri oa Rebeca jini̧ yo̧rëreyi̧nȩjȩ ëbamȩ pio ju̧i̧iäpȩmo̧, Icha pio ju̧i̧iäpȩmo̧:
—Danȩ, goae tjamo̧dëpe bagura̧dique cjo̧ro̧pea̧ ji̧. Echau judi yoa chirirä cjo̧ro̧ji̧ri̧ ivi ji̧ri̧ ëba̧ pio ju̧i̧iä, itita quȩji̧ri̧ pio ji̧ri̧ ëba̧ pio ju̧i̧iä, jabechji̧ goae tjamo̧dëpe baga̧dique cjo̧ro̧pea̧ ji̧. Ado Jacobo judi peaja̧di pio yoa chirirä cjo̧ro̧yi̧ iei̧ pio ji̧ ëbarä judi, cjäri̧ marequede, cjarari̧ cjia tjamo̧pe bagapai̧ da jirorequede. Jabechji̧ Jacobo judi pio yoa chirirä cjo̧ro̧yi̧ iei̧ pio ji̧ ëba̧ pio ju̧i̧iä ji̧dë u̧i̧ chjadëtäremȩde cüdë bucho ana̧ ja̧bopea̧ ji̧.
Currently Selected:
Taruparea̧ Ma̧ȩ 27: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
