Taruparea̧ Ma̧ȩ 25

Abaraa̧ judi ja̧boa̧de

7Abaraa̧ judi 175 ui goamȩpea̧de jënȩ cjo̧ro̧rërea̧ ji̧. 8Ado ja̧di ui goamȩrȩ, 175 ui goamȩrȩ, ütama̧i̧ tjamo̧padärä ëte ja̧boa̧de. Jabechji̧ jibëa̧ ütëti̧rea̧ judiro̧ ja̧boa̧mi̧ ja̧borëremȩde. Japamitë ana̧ri̧ cjo̧ro̧rëremȩrȩ, goae tarari̧ cjo̧ro̧rëremȩrȩ ja̧boa̧de. 9,10Ado Icha judi, Ichamae pio judiborë na̧ra̧rëreji̧ri̧diro̧jo̧ȩ. Macapera quȩmȩ ta̧dë cjararä ju̧ri̧ na̧ra̧diro̧jo̧ȩ. Mamare quȩmȩ bë ma̧ri̧ri pio judiri dorë cjitëmȩräpȩmo̧ china̧mȩ ta̧dë cjararä ju̧ri̧ na̧ra̧diro̧jo̧ȩ jibëa̧ ama̧i̧rea̧ ju̧i̧, Abaraa̧ pio ju̧i̧. Chara pio ji̧rea̧ ja̧ yuroro na̧ra̧diro̧jo̧ȩ. Ado pio jiro ta̧dërë china̧mȩräpȩ üdë Epjoro̧ quȩmȩ pio ju̧i̧ ja̧ chirirëremȩde pearä judi. Ado Epjoro̧ judi Choaro quȩmȩ pio ju̧i̧ ja̧ jojade. Itita quȩji̧ri̧ pumȩdirȩ. Jabo Abaraa̧ judi jabë cjo̧ro̧rä judirä pio jiro pumȩ pio ji̧ri̧iä gatërëremȩdejȩ pio jiro chiri oa. Aja̧, pio ju̧ri̧pȩ na̧ra̧ oa cjiadiärëremȩde Abaraa̧ judi jibëa̧ iei̧rea̧ ja̧ yuroro. 11Ado Abaraa̧ judi ja̧boa̧ duri oa, Ütë tjamo̧ judi chjadëri̧ a̧dorëremȩdejȩ Icha ju̧i̧. "Cjo̧ro̧mȩ Ütë pio judi dadique" yo̧mȩ tade puëräpȩ ju̧ri̧ cjo̧ro̧mȩpea̧mȩ oa chjadëri̧ a̧dorëremȩdejȩ, Negebo quȩ chiriräpȩmȩ oa.

Icha judi nö̧rirëremȩdejȩrȩ Echau ju̧i̧, Jacobo ju̧i̧

19Pio yoa ma̧ȩ üdë Icha pio ju̧i̧ chjiari go̧ȩpea̧ oa cjiade, Abaraa̧ pio ju̧i̧ ja̧ ja pio ju̧i̧ chjiari. 20Icha judi 40 ui goamȩrȩ ëbarëremȩdejȩ jibëa̧ iei̧ ji̧, Rebeca ji̧. Aja̧, Betue quȩmȩ jojabi pio ji̧, Aba̧ quȩmȩ ja̧ oyi̧ pio ji̧ ëbarëremȩdejȩ, Arameo quȩji̧ri̧ pumȩ pio ji̧ri̧ ja̧ pumȩyi̧ ji̧. Aja̧, Padanaramaräpȩ cjo̧ro̧ji̧ri̧ ja̧ pumȩ pio ji̧ ëba̧dejȩ. 21Jabo Rebeca jini̧ bomaiyi̧rȩ cjo̧ro̧tärea̧ ji̧ bomairea̧ dadëa̧nȩ. Pio ju̧i̧iä Icha judi goë cjo̧dërëremȩdejȩ Jeova pio ju̧i̧iä jibëa̧ iei̧ pio ji̧ chjiari, bomaipe järea̧ datä. Ado Jeova judi ta̧rë ja̧boa̧dejȩ Icha judi cjo̧dëa̧ ju̧i̧. Ja̧dëa̧ ji̧ jibëa̧ iei̧ jini̧ bomaiyi̧rȩ cjo̧ro̧yi̧pea̧nȩ. 22Aja̧, chjara bomaiyi̧pea̧nȩ. Ado u̧i̧ ja̧ma̧ cä joëräji̧ri̧ pio judiro̧ jibëa̧ dëbëti̧ra̧ chia japatäami̧ dari̧ jape chjaorëreji̧ri̧dirȩ gatë gatë gua chjaomi̧ dari̧. Pio ju̧i̧iä bücjüri̧ cjia tjamo̧pea̧nȩ Rebeca jini̧. ‘¿Jabo tjana̧pea̧ ji̧ ja̧di dari̧ japacjivadiro̧coa' quëna̧ jo̧rȩtayi̧rȩ iëno̧ë ta̧rërëreyi̧nȩjȩ Jeova pio ju̧i̧iä, ja̧di ta̧rëri̧ yo̧yi̧rȩ:

—¿Jabo tjana̧pea̧ oa japate chjaomi̧ dari̧ japadiro̧coe —iëno̧ë ta̧rëa̧nȩjȩ.

23Ado Jeova judi dëbë yo̧a̧dejȩ:

—Damȩ, na̧ u̧i̧ ja̧ma̧ cä joëräji̧ri̧ pio judiro̧ jabechji̧ yo̧a̧ri̧ pumȩdiro̧ —yo̧a̧dejȩ—. Ji̧ri̧ ja̧ pumȩ judiro̧ no̧i̧dë tjamo̧padiro̧ jabo ji̧mo̧ cjo̧ro̧dëpadiro̧. Tjaoëpa bubapadiro̧. Durimȩ pio judiri ja̧ji̧ri̧ judiro̧ chiri tjamo̧ cjo̧ro̧ji̧ri̧mi̧ dari̧ cjo̧ro̧padiro̧. No̧i̧dërë cjo̧ro̧padiro̧ pio ji̧ri̧ ja̧ chja̧oerä. Jabo yabomȩ pio judiri ja̧ji̧ri̧ judiro̧, cjäri̧ madiro̧, ja̧di dari̧ cjo̧ro̧dëpadiro̧. Jabechji̧ durimȩ pio judiri ja̧ji̧ri̧ pio ji̧ri̧ ja̧ chja̧oerä cjo̧ro̧ mapadiro̧ —yo̧mȩrȩ yo̧rëremȩdejȩ Rebeca ji̧ Jeova judi.

24Ado japamitë chjätä ëte ararëreyi̧nȩ Rebeca jini̧. Cja̧rȩmȩ maea oa aradëa̧nȩ, jabo yo̧a̧ri̧ oa ara̧nȩ. Chjara ara̧nȩjȩrȩ. 25Yabomȩ pio ju̧i̧ ara̧ ji̧, icjara nö̧ta oa i cö̧ coëcoëa chia maea oa ara̧nȩjȩ. Ja̧di tara i cö̧ ji̧ra̧ chiamȩ tara, Echau quȩra̧ pio ju̧ri̧ra̧ quȩparëreji̧ri̧diro̧jo̧ȩ. Cö̧ ji̧ra̧ri̧ chiamȩ tara quȩmȩde. 26Ado yabomȩ ju̧i̧ ara̧ duri oa, chjaodëri̧ areno̧a̧nȩjȩ durimȩ pio ju̧i̧. Yabomȩ ja̧ ta ärä oa mitëmȩrȩ go̧düa̧de. Ja̧di tara Echau ja̧ ta ärä oa mitëmȩrȩ go̧düa̧ tara, jabechji̧ Jacobo quȩra̧ pio ju̧ri̧ra̧ quȩparëreji̧ri̧diro̧jo̧ȩ. Ado Icha judi 60 ui goarëremȩde Rebeca jini̧ chjara ararërea̧ ji̧.

Echau judi yabomȩrȩ mitërea̧ pio ju̧i̧ badë jo̧rȩtarëremȩdejȩ

27Japamitë ana̧ chjätä ëte chjara ara̧ judiro̧ yo̧a̧ri̧borë ütëchjape bagarëreji̧ri̧dirȩ. Ado Echau judi chiri oa tai̧ chjaomȩpea̧de. Cho̧mȩrȩ tjamo̧i̧ cjiari̧ a ëte, jurarea̧ oa goa ma̧na̧diärëremȩde. Jabo Jacobo judi chiri oa tai̧ chjaodërëremȩde. Jabechji̧ bërämo̧ cjo̧ro̧rëremȩde baca oa ja̧bepamȩrȩ. 28Ado Icha judi ea tjamo̧rëremȩdejȩ Echau ju̧i̧, jȩa goae tarari̧ jura tänȩmȩ pio ju̧i̧. Joja durimȩ pio ju̧i̧iä ji̧dë u̧i̧ earëremȩdejȩ joja yabomȩ pio ju̧i̧. Jabo Rebeca jini̧ ji̧dë u̧i̧ earëreyi̧nȩjȩ Jacobo pio ju̧i̧.

29Ja̧dëa ji̧ ado cja̧rȩmo̧ doremȩrä, Jacobo judi bëräpȩ jurarea̧ oa chuma̧ charërea̧ ji̧, Echau judi baärëremȩde, chiriräpȩ tai̧remȩrȩ. Ta̧mȩcho̧ ja̧bo tjamo̧mȩrȩ go̧düdärärëremȩde acä queo queo eari̧. 30Ado Jacobo pio ju̧i̧iäpȩ go̧düdärämȩrȩ yo̧a̧dejȩ jibëa̧ ayi̧ma̧i̧ ju̧i̧:

—Jabechji̧ cjäri̧ri̧ cjia dacoe. Chjadëri̧ yürücoe pio jiro juru coëcoëa oa. Ja̧bopai̧ darequede. Acä maearequede. Yürücoe —yo̧a̧dejȩ.

Ado Echau judi "juru coëcoëa oa yürücoe" yo̧a̧ pio ju̧i̧iä, jabechji̧ Edo̧mo̧ quȩmȩ quȩra̧ pio ju̧ri̧ra̧ a̧de quȩparëreji̧ri̧diro̧jo̧ȩ yo̧a̧ri̧ quȩ chiape bagari̧. Aja̧, "coëcoëa" yo̧mȩ quȩra̧ a̧de quȩpea̧diro̧jo̧ȩ.

31Ado Jacobo judi dëbë yo̧mȩrȩ yo̧a̧dejȩ jibëa̧ ayima̧i̧ ju̧i:

—Aja̧, yürüparequedemȩ, jabo danȩ, juru ba oa ano̧ mire yürütä earequedemȩ yabomȩrȩ mitërea̧ pio ju̧i̧#25:31 Jäja üdë ja̧boa̧rä, jabechji̧ yabomȩ pio judide tjamo̧ mitëmȩ judi. Yabomȩ judi jäja ja̧remȩ pio ju̧i̧ tjamo̧ mitëmȩ pio judide, joji̧ri̧ja pio judiro̧dë. Dëdë, joji̧ri̧ja judiro̧ peaja̧di jibëa̧ ama̧i̧ ja̧remȩ oa mitëpadirȩ, jabo tjamo̧ mitëmȩ judi yabomȩ pio judide. Ado pio ju̧i̧ uëri jäja üdë ja̧bobea yaboi̧ chjadëri̧ cjo̧ro̧pea̧ ma̧ȩ oa yürürä, ji̧dë u̧i̧ ba chia oa yürüdejȩ yabomȩ pio ju̧i̧. —yo̧a̧dejȩ Jacobo judi.

32Ja̧dëa ji̧ dëbë yo̧a̧dejȩ Echau judi, yabomȩ pio judi:

—Danȩ, ta̧mȩcho̧ ja̧boa̧ pio oaiä bucho ana̧ ja̧bopai̧ darequede. Ado cüdë ja̧borä judi, jabechji̧ badëpadique davä yabomȩrȩ mitërea̧ üdë.

33Ja̧dëa ji̧ yo̧a̧dejȩ Jacobo judi:

—Chjadëri̧ yo̧coe. "Cüdë yabomȩrȩ mitërea̧ pio ju̧i̧ yürürequedemȩ" yo̧coe. Aja̧, Ütë tjamo̧ ja̧ dachoro tjamo̧i̧ cjiari̧ yo̧coe teracabari̧ yo̧rea̧ decjiari̧” yo̧mȩ ma̧ȩ pio ju̧i̧ chjadëri̧ yo̧coe —yo̧mȩrȩ yo̧a̧dejȩ Jacobo judi. Ado Echau judi Jacoborë yo̧a̧mi̧ yo̧rëremȩde, ja̧di ta̧rëri̧ yo̧mȩrȩ:

—Aja̧, chjadëri̧ yo̧requedemȩ ado ja̧di. Jabechji̧ cüdë yabomȩrȩ mitërea̧ pio ju̧i̧ yürürequedemȩ —yo̧a̧dejȩ—. Ütë tjamo̧ ja̧ dachoro tjamo̧i̧ cjiari̧ yo̧requedemȩ teracabari̧ yo̧rea̧ decjiari̧ —yo̧mȩrȩ yo̧rëremȩdejȩ.

34Pio ju̧i̧ ta̧rë ëte Jacobo judi yürürëremȩdejȩ carao chiamȩ juru oa. Chja̧pebo yürürëremȩdejȩ. Ado mairi̧ jura̧de Echau judi. Ado judi jura ëte, jara ëte, baäpamȩrȩ cjitërëremȩde, ana̧ri̧ jo̧rȩtadëmȩrȩ. Jabechji̧ yabomȩrȩ mitërea̧ pio ju̧i̧ ba chia jo̧rȩtatärea̧ ji̧, ba chia jo̧rȩtadërëremȩdejȩ, jabo jabechji̧ ana̧ri̧ jo̧rȩtadëmȩrȩ ano̧ mire yürürëremȩdejȩ Jacobo pio ju̧i̧, 'ano̧ mire yürüdëa̧täremȩcuni̧da' quëna̧rea̧ decjiari̧.

Currently Selected:

Taruparea̧ Ma̧ȩ 25: Pume

Highlight

Copy