Taruparea̧ Ma̧ȩ 30

1Ado Dea jini̧ Jacobo ja̧ u̧ri̧ ji̧ra̧ oa ëba ara̧ oaiä, jabechji̧ ana̧ri̧ jo̧rȩtayi̧pea̧nȩ Raque jini̧. 'Jabo cjäri̧ macuni̧da, ëba aradëa̧cuni̧da, cja̧rȩmȩ coi̧ yürüdëa̧cuni̧da, ca̧ ami̧ pio jini̧mo̧rȩ ëba ara̧ni̧ji̧da' quëna̧ jo̧rȩta̧ oaiä, ana̧ri̧ jorȩtayi̧rȩ quëbayi̧pea̧nȩjȩ jo̧ȩra̧mi̧ pio ji̧. Ado pio ju̧i̧iä ja̧di ta̧rëri̧ yo̧a̧nȩjȩ Jacobo ju̧i̧:

—Goë jaecoe. Ëba mo̧a̧coe cüdë bori̧ ji̧ri̧ ararea̧mi̧ dari̧. Jabechji̧ cüdë bori̧ ji̧ri̧ ararea̧ dadërä judi, ¿tjana̧ japaparequede? Ja̧boparequede —yo̧a̧nȩjȩ ëbamȩ ju̧i̧.

2Pio ju̧i̧ ta̧rëa̧ oaiä ërecjiapea̧dejȩ Jacobo judi jibëa̧ iei̧ duriyi̧ pio ji̧iäpȩmo̧. Ado yo̧a̧dejȩ:

—Jabo cjäri̧ maquë, cüdë ma ja̧didë jabo Ütë tjamo̧ pio judide. Jabechji̧ pio judi tuti japea̧ oaiä bomairea̧mi̧dëri̧ cjo̧ro̧ jiromȩ. ¿Tjana̧ japabëquë cüdë?

3Ja̧dëa ji̧ Raque jini̧ dëbë yo̧a̧nȩjȩ Jacobo ju̧i̧:

—Goë jaevä ado ja̧di, jabechji̧ ca̧ mu̧i̧tjoi̧ pio ji̧ ano̧ mire ëba mo̧a̧jȩ Bija quȩyi̧ pio ji̧. Pio ji̧iä cüdë ara̧mi̧ dari̧ ëbaparequede. Ca̧ mu̧i̧tjoi̧ pio ji̧iä ëbarea̧ daparequedejȩrȩ ca̧ pumȩ ji̧ri̧. Pio ji̧ nö̧ta ëba mo̧a̧vä —yo̧a̧nȩjȩ.

4Ado jënȩ yo̧a̧mi̧ yürürëreyi̧nȩjȩ Jacobo ju̧i̧ jibëa̧ mu̧i̧tjoi̧ ji̧, Bija quȩyi̧ ji̧ ëbapea̧ oa. Ado Jacobo judi ëba mo̧a̧rëremȩdejȩ jibëa̧ iei̧pea̧yi̧ ji̧. 5Ado Bija jini̧ boma̧i̧yi̧pea̧nȩ. Ado japamitë chjätä ëte ëba ararëreyi̧nȩjȩ üi̧ boi̧ oa Jacobo ju̧i̧. 6Ja̧dëa̧ ji̧ Raque jini̧ yo̧rëreyi̧nȩ: "Aja̧, cüdë ni̧bäyi̧ i̧a ta̧rë ja̧boa̧ jirodique Ütë tjamo̧ judi. Chjadëri̧ ütara ëte yürüa̧dique ca̧ ja oa" yo̧a̧nȩ. Ja̧di tara Da̧de quȩra̧ pio ju̧ri̧ra̧ quȩpea̧nȩjȩ üi̧ boi̧ oa. "Ütara̧ oa cjia" yo̧mȩ quȩra̧ pio ju̧ri̧ra̧ quȩpea̧nȩjȩ Raque jini̧ jibëa̧ mu̧i̧tjoi̧ jini̧ ara̧ pio ju̧i̧. 7Ji̧dë duri oa japamitë chjätä ëte Bija jini̧, Raque ja̧ mu̧i̧tjoi̧ pio jini̧ ado cja̧rȩmo̧ üi̧ boi̧ oa ëba ara̧nȩjȩ Jacobo ju̧i̧. 8Ja̧dëa̧ ji̧ Raque jini̧ yo̧rëreyi̧nȩ: "Aja̧, ca ami̧ ji̧ dëbëpe chjoami̧ dari̧ japarëreyi̧requedejȩ, jabo yaba̧ boadärärea̧mi̧ dari̧ japea̧requedejȩ" yo̧yi̧rȩ yo̧a̧nȩ. Ja̧ditara Netari quȩra̧ pio ju̧ri̧ra̧ quȩpea̧nȩjȩ. "Dëbë japarea̧" yo̧mȩ quȩra̧ pio ju̧ri̧ra̧ quȩpea̧nȩjȩ.

9Ado Dea jini̧ jo̧rȩta̧ oaiä, 'Jabo cjäri̧ maquëda, boma̧irea̧mi̧dëpea̧quëda' quëna̧ jo̧rȩtayi̧pea̧ oaiä, jabechji̧ mitëa̧nȩjȩ jibëa̧ mu̧i̧tjoi̧ ji̧, Chipa quȩyi̧ ji̧. Ado yürüa̧nȩjȩ Jacobo ju̧i̧ judi ëbatä, ëba mo̧a̧tä. 10Ado japamitë chjätä ëte Chipa quȩyi̧ pio jini̧borë ëba ararëreyi̧nȩjȩ üi̧ boi̧ oa Jacobo ju̧i̧. 11Ja̧dëa̧ ji̧ Dea jini̧ yo̧a̧nȩ: "Chjadëri̧ jida̧ oa cjiarequede" yo̧yi̧rȩ yo̧a̧nȩjȩ. Ja̧di tara Gada quȩra̧ pio ju̧ri̧ra̧ quȩpea̧nȩjȩ. Aja̧, "Chjadëri̧ jida̧ oa cjia" yo̧mȩ quȩra̧ pio ju̧ri̧ra̧ quȩpea̧nȩjȩ Dea jini̧ jibëa̧ mu̧i̧tjoi̧ jini̧ ara̧ pio ju̧i̧.

12Ji̧dë duri oa, japamitë chjätä ëte Chipa jini̧ ado cja̧rȩmo̧ üi̧ boi̧ oa ëba ararëreyi̧nȩjȩ Jacobo ju̧i̧. 13Ja̧dëa̧ ji̧ Dea jini̧ yo̧a̧nȩ: "Yaba̧ ivi jini̧ro̧ pio coa chjiari darä, jabechji̧ ma̧ chiadëri̧ cjia tjamo̧mȩ yo̧pani̧ro̧coe." Ja̧di ta̧rëri̧ yo̧yi̧rȩ yo̧a̧nȩ Dea jini̧. Ja̧di tara Ache quȩra̧ pio ju̧ri̧ra̧ quȩpea̧nȩjȩ. Aja̧, "Ma̧ chiadëri̧ cjiarea̧" yo̧mȩ quȩra̧ pio ju̧ri̧ra̧ quȩpea̧nȩjȩ Dea jini̧.

14Ado tirigo cho oa budorea̧ doro Rubȩ judi järëremȩde chiriräpȩ. Ado tai̧mȩrȩ daea̧dejȩ chiriräpȩ cjo̧ro̧mȩ toi̧ oa, ma̧darago quȩmȩ toi̧ oa. Ado goa baäa̧dejȩ jibëa̧ ara̧yi̧ ji̧ yürüpea̧ oa, Dea quȩyi̧ pio ji̧. Ado Raque jini̧ pio jiro ma̧darago oa daea̧ ji̧, cjo̧dëno̧a̧nȩjȩ jibëa̧ ami̧ ji̧iä:

—Damȩ ami̧, na̧ ja judi goa jana̧ chjaparȩrea̧ pio ju̧i̧ jabëtari̧mi̧ yürücoa —yo̧a̧nȩjȩ.

15Ado Dea jini̧ ërecjiapea̧yi̧rȩ dëbë yo̧a̧nȩjȩ:

—Cjäri̧ mamȩ. Ma̧i̧ dari̧ jape chjaoma̧coa —yo̧a̧nȩjȩ—. Ca̧ üi̧ pio ju̧i̧ bae mitë chjaoma̧coa. Ado yaba̧ ca̧ jarë coa goa ma̧na̧ pio ju̧i̧bo baë mitëtämi̧ cjiamȩ. Ca̧ ma̧darago toi̧bo bae mitëtämi̧ cjiamȩ. Jabo cjäri̧ macama̧, yürüdëpacama̧ —dëbë yo̧a̧nȩjȩ.

Ado ja̧dëa ji̧ Raque jini̧ yo̧a̧nȩjȩ jo̧ȩra̧mi̧ pio ji̧iäpȩmo̧:

—Jabo damȩ, ano̧ mirepacama̧. Ano̧ miremi̧ dari̧ ëba mo̧a̧rea̧ yürüpacama̧. Pio yaba̧ gȩnȩrä pio mȩa nö̧ta ëba mo̧a̧ tänȩpacuni̧ Jacobo ju̧i̧. Ado cüdë ja̧di dari̧ japea̧ ba oa, jabechji̧ ma̧darago toi̧ pio ju̧i̧ yürüpea̧ chiamȩcoa —yo̧yi̧rȩ yo̧a̧nȩjȩ jo̧ȩra̧mi̧ pio ji̧.

16Ja̧dëa ji̧ genȩpe järä, Dea jini̧ järëreyi̧nȩjȩ Jacobo ju̧i̧. Judi chiriräpȩ tai̧remȩrȩ cuchupe ma̧na̧mȩ oa dëbëdiäa̧nȩjȩ jibëa̧ üi̧ pio ju̧i̧. Ado yo̧a̧nȩjȩ jibëa̧ üi̧ oa:

—Danȩ, pio yaba̧ pio coadi ëba mo̧a̧parenȩque. Gatëa̧mi̧ dari̧ japea̧requedemȩ ma̧darago toi̧ra̧ pio ju̧ri̧ra̧, ca̧ jarë goa ma̧na̧ra̧ pio ju̧ri̧ra̧. Ja̧di tara pio coadi ëba mo̧a̧pea̧ chiarenȩque yaba̧. 17Ado judiro̧ ëba mo̧a̧ oaiä jabechji̧ ado chjereno̧ boma̧iyi̧pea̧nȩ Dea jini̧. Ado japamitë chjätä ëte ëba ara̧nȩjȩ üi̧ boi̧ oa. Aja̧, jadüchiami̧ oa ëba ararërea̧ ji̧, cja̧rȩichimo̧ oa ëba ara̧nȩjȩ Jacobo ju̧i̧. Jabechji̧ Dea jini̧ Ütë tjamo̧ pio ju̧i̧iä cjo̧dëa̧ oaiä, jabechji̧ ta̧rë ja̧bomȩrȩ ararea̧ yürüa̧dejȩ. 18Ja̧dëa̧ ji̧ Dea jini̧ ara ëte yo̧a̧nȩ. "Jabechji̧ Ütë tjamo̧ judi chjadëri̧ yürüa̧dique. Cüdë no̧mȩ judi ca̧ mu̧i̧tjoi̧ i̧a Jacobo ju̧i̧ ano̧ mire ëba mo̧a̧pea̧ oa yürüa̧ ba oa, jabechji̧ chjadëri̧ ba ano̧a̧dique yaba̧. Ado pio ju̧i̧iä jabechji̧, Ichaca quȩmȩra̧ pio ju̧ri̧ra̧ quȩparecone" yo̧a̧nȩ Dea jini̧. Aja̧, “Ba ano̧a̧” yo̧mȩ quȩra̧ pio ju̧ri̧ra̧ quȩpea̧nȩjȩ jini̧ pea a̧ra̧ pio ju̧i̧.

19Ado ji̧dë duri oa japamitë chjätä ëte, ado boma̧i̧yi̧pea̧nȩ Dea jini̧. Ado japamitë chjätä ëte ararëreyi̧nȩjȩ üi̧ boi̧ oa. Ca̧i̧ta̧ra̧ ichimo̧ oari bori̧ ji̧ri̧ ëbarërea̧ ji̧, ca̧i̧ta̧ra̧ ichiri cja̧rȩmȩ bori̧ ji̧ri̧ ebayi̧pea̧nȩ. 20Ado ara ëte yo̧a̧nȩ Dea jini̧: "Chjadëri̧ yürüa̧dique ca̧ ja oa Ütë tjamo̧ judi. Ado yaba̧ ji̧dë u̧i̧ ba chia dapadique ca̧ üi̧ judi. Jabechji̧ cüdë ca̧i̧ta̧ra̧ ichiri cja̧rȩmȩ oari bori̧ ji̧ri̧ ëba ara̧ pio oaiä, jabechji̧ ji̧dë u̧i̧ ba chia dapadique yaba̧. Ja̧di tara Cheburo̧ quȩmȩra̧ pio ju̧ri̧ra̧ quȩpareconȩ" yo̧yi̧rȩ yo̧a̧nȩ Dea jini̧. Aja̧, ja̧di dari̧ quȩpea̧nȩjȩ, “ba chia da” yo̧mȩ quȩra̧ pio ju̧ri̧ra̧.

21Ado japamitë chjätä ëte Dea jini̧ ado arayi̧rȩ ararëreyi̧nȩjȩ iei̧ boi̧ ji̧. Ado Dina quȩra̧ pio ju̧ri̧ra̧ quȩpea̧nȩjȩ. Ado judiri ara̧dëa̧nȩ.

22Ado judirä Ütë tjamo̧ judi jo̧rȩtamȩrȩ darëremȩdejȩ Raque ji̧. Ado pio jȩaiä cjo̧dë chjaoa̧yi̧ i̧a bomairea̧ yürürëremȩdejȩ. Jibëa̧ bori̧ ji̧ri̧ nö̧rirea̧ yürüa̧dejȩ. 23Ado Raque jini̧ boma̧i̧yi̧pea̧nȩ. Ado japamitë chjätä ëte, ararëreyi̧nȩ. Üi̧ boi̧ oa ara̧nȩ. Ado ara ëte yo̧a̧nȩ Raque jini̧: "Aja̧, cüdë bo ararea̧ dadëa̧ oaiä, idëri̧ cjia tjamo̧yi̧rȩ cjiadiäa̧requede, jabo yaba̧ Ütë tjamo̧ judi chjadëri̧ tuti japea̧ oaiä, idëri̧ cjiadëyi̧pea̧requede. Jabechji̧ ara̧requede. 24Ado yaba̧ japamitë chjätä ëte, jabechji̧ ado cja̧rȩmo̧ üi̧ boi̧ oa ararea̧ yürütädique Ütë tjamo̧ judi." Aja̧ ja̧di ta̧rëri̧ yo̧yi̧rȩ yo̧a̧nȩ Raque jini̧. Ado pio ju̧i̧iä, 'Aja̧, ado cja̧rȩmo̧ ja oa yürüpai̧ dadicoada' quëna̧ jo̧rȩta̧ oaiä, Joche quȩra̧ pio ju̧ri̧ra̧ quȩpea̧nȩjȩ joja yabomȩ oa. "Ado cja̧rȩmo̧" yo̧mȩ quȩra̧ pio ju̧ri̧ra̧ quȩpea̧nȩjȩ.

Jacobo judi joja̧ȩtȩborë jibëa̧ dëbëti̧ra̧ chia u̧i̧papea̧ ji̧ järitarëreji̧ri̧dirȩ

25Raque jini̧ Joche boi̧ pio ju̧i̧ ara̧ duri oa Jacobo judi yo̧rëremȩdejȩ jojade ju̧i̧, Aba̧ pio ju̧i̧:

—Chja ja̧di chjadücoe. Ca̧ chiriräpȩ baäpea̧ ji̧ chjadücoe —yo̧a̧dejȩ—. 26Ca̧ bori̧ ji̧ri̧, ca̧ ivi pio ji̧ri̧ chjadëri̧ yürücoe. Jabechji̧ pio ji̧ri̧ mitëpea̧ ji̧ chjadëri̧ ja̧bepë yürüa̧requedemȩ. Chjadëri̧ ba ano̧a̧requedemȩ davä cüdë ja̧bepea̧ra̧ pio ju̧ri̧ra̧. Ado pio ju̧i̧iä jabechji̧, chjadëri̧ chjadütä earequedemȩ yaba̧ —yo̧mȩrȩ yo̧rëremȩdejȩ jojade pio ju̧i̧.

27Jabo Aba̧ judi dëbë yo̧mȩrȩ yo̧rëremȩdejȩ:

—Danȩ, cjäri̧ri̧ cjia jo̧rȩtacoe. Jabechji̧ pio yi ëba cjiadiäcoe —yo̧a̧dejȩ—. Mȩnȩ pio coadi ëba cjo̧ro̧a̧ pio ju̧i̧iä, 'jabechji̧ Jeova pio judi chjadëri̧ yürü chjaoa̧dicoada' quëna̧ jo̧rȩtarequede cüdë. 28Ja̧di tara jabechji̧ ëba cjiadiätä earequedemȩ. Danȩ, chjadëri̧ ba ano̧parequedemȩ mȩnȩ cjiadiäpea̧ oa. Aja̧, chjadëri̧ yo̧coe. ¿Napai̧ ba ano̧tä earema̧coe? Ba ano̧parequedemȩ chjadëri̧ —yo̧a̧dejȩ.

29Ja̧dëa ji̧ Jacobo judi yo̧a̧dejȩ:

—Danȩ jademai̧, chjadëri̧ dabarenȩ pio coa chjiari. 'Aja̧, chjadëri̧ ja̧bepë yürüa̧dicoada, ado ca̧ea̧ üdë, judi chjadëri̧ a̧doa̧ oaiä ji̧dë u̧i̧ ji̧ra̧pe baga̧dida, ca̧ oveja üdë, ca̧ chivo üdë, ji̧ra̧ tjamo̧pe baga̧diro̧da, chjadëri̧ ja̧bepë yürüa̧dicoada' quëna̧ dabarenȩ. 30Jabechji̧ cüdë pio yoaiä pearä ma̧na̧rërea̧ ji̧, jabechji̧ ji̧ra̧ oa dadëa̧requede davä na̧ea̧ oa. Na̧ oveja oa ji̧ra̧ oa, na̧ chivo oa ji̧ra̧ oa dadëa̧requede. Jabo ja̧didëde yaba̧. Ji̧ra̧ tjamo̧pe baga̧de. Jabechji̧ pio coaiä chjadëri̧ a̧doa̧dimȩ Jeova judi. Jabo yaba̧ jabechji̧ ca̧ea̧ pio ju̧i̧ ano̧ mire ja̧bepatämi̧ cjiarequede. Ca̧ pumȩ ji̧ri̧ chjadëri̧ ëba goapea̧ oa, ca̧ ivi pio ji̧ri̧, ca̧ bori̧ pio ji̧ri̧ chjadëri̧ ëba goapea̧ oa, ca̧ea̧ pio ju̧i̧mo̧i̧ ano̧ mire ja̧bepatämi̧ cjiarequede yaba̧. Jadi tara jabechji̧ chjadüibe —yo̧mȩrȩ yo̧rëremȩdejȩ joja̧ȩtȩ oa.

31Jabo Aba̧ judi cjiadiädëri̧ cjiamȩrȩ ado iëno̧ë ta̧rëa̧dejȩ:

—Jabo yo̧coe. ¿Napai̧ ba ano̧tä earema̧coe? Chjadëri̧ yo̧coe —yo̧tea̧dejȩ.

Jabo Jacobo judi dëbë yo̧a̧dejȩ:

—Cjäri̧ marequedemȩ, ba ano̧tä eadërequedemȩ. Jabo danȩ jademai̧, chjadëri̧ ta̧rëcoe. Cüdë pio mȩa nö̧ta tjamo̧ri̧ cjiadiätä earä judi, na̧ oveja oa tjamo̧ri̧ jidatä earä judi, jabechji̧ ja̧di dari̧ mitërea̧ yürütäremȩrema̧coe. 32Danȩrȩ, oveja o oamo̧i̧ mitëtäremȩrequede ca̧ea̧pe bagari̧. Pio yaba̧ yu̧a̧tämi̧ cjiarequede na̧ oveja ja̧ chjarerä ca̧ ovejapaji̧ri̧ pio ji̧ri̧ mitëpea̧ oa. Aja̧, na̧ chivo chjö̧na̧i̧ oa, na̧ oveja chjö̧na̧i̧ oa ütarë datämi̧ cjiarequedejȩrȩ. Ado danȩ, na̧ oveja ma̧ri̧ oa, joarijoaria oa, jabechji̧ chjö̧na̧i̧ oa mitëtäremȩrequedejȩrȩ ca̧ea̧pe bagari̧. Ado na̧ oveja bori̧ oa, bureburea maea oa peaja̧di chjö̧na̧i̧ oa mitëtäremȩrequedejȩrȩ ca̧ea̧ mape järi̧. Ado na̧ chivo oa, joarijoaria oa peaja̧di mitëtäremȩrequede chjö̧na̧i̧ oa. Aja̧ jadema̧i̧, cüdë ja̧di dari̧ mitërea̧ darä judi, mȩnȩ coa ja̧di dari̧ mitërea̧ yürürä judi, jabechji̧ chjadëri̧ cjiadiätäremȩrequede cüdë mitëa̧ ba oa ja̧bepapea̧ ji̧. 33Ado ja̧dëa ji̧ eami̧ doro mȩnȩ ütarë jo̧rȩtarä judi, ‘jabo cjäri̧ madida, ca̧ ja̧ȩtȩ judi chjadëri̧ mitëdëdida, a̧dë chjäte mitëa̧dida, jibëa̧dëbo a̧de mitëa̧dida' quëna̧rä judi, jabechji̧ chjaodëri̧ ütararea̧ daparenȩ. Tjamo̧ davä. Cüdë mitëa̧ oveja pio ji̧ri̧ ütare daparenȩ. Ado oveja bori̧ oa, burebureadë oa darä judi, 'Aja̧, bae mitëa̧dicoada' quëna̧parenȩque. Ado oveja joarijoariadë oa darä judi, chivo joarijoariadë oa darä judi, 'Aja̧, garüa̧dida' quëna̧ ütarë jo̧rȩtaparenȩque peaja̧di. Aja̧ jademai̧, ja̧di dari̧ japarea̧ jo̧rȩtarequede cüdë. ¿Yö̧ta dari̧ jo̧rȩtanȩ mȩnȩ? —yo̧mȩrȩ iëno̧ë ta̧rëa̧dejȩ Jacobo judi joja̧ȩtȩ pio ju̧i̧iäpȩmo̧.

34Ado Aba̧ judi dëbë yo̧mȩrȩ yo̧a̧dejȩ:

—Yö̧ta dari̧ jo̧rȩtadë, jabechji̧ chjadëde coaiä. Jabechji̧ ja̧di dari̧ japatärȩ. Mȩnȩ yo̧a̧mi̧ japatärȩ —yo̧a̧dejȩ.

35Jabo Aba̧ judi ya maeara̧ yo̧remȩrȩ chjaodëri̧ go̧dü tänȩno̧a̧dejȩrȩ ja̧di da cjiaji̧ri̧ pio ji̧ri̧, Jacobo judi mitëpatea̧ pio ji̧ri̧. Tjamo̧ davä. Joja̧ȩtȩ ju̧i̧ nö̧ta ni̧bä chjaoa̧ domȩ pio ju̧i̧iä chjaodëri̧ go̧dü tänȩno̧a̧dejȩrȩ Aba̧ judi. Chivo oari chjö̧na̧i̧ oa, joarijoaria oa chjaodëri̧ go̧dü tänȩa̧dejȩrȩ chivo ivi joarijoariabo. Oveja bori̧ oa, bureburea oa, peaja̧di go̧dü tänȩno̧a̧dejȩrȩ ütëbo oa. Jacobo ja̧täremȩ pio ju̧i̧ chjö̧na̧i̧ oa go̧dü tänȩno̧a̧dejȩrȩ. 36Ado ja̧di dari̧ japa ëte, jabechji̧ jachi tjamo̧ oa ma̧ȩ baätä yo̧rëremȩdejȩrȩ jibëa̧ u̧ri̧ ji̧ri̧. "Aja̧, Jacobo pio judi dadärächea oa, jabechji̧ tjarari̧ do järea̧ nö̧ta oa ma̧ȩ baätä earequededibe" yo̧mȩrȩ yo̧a̧dejȩrȩ. Peaja̧di chjadëri̧ jidatä yo̧a̧dejȩrȩ.

Ado Aba̧ judi chjai̧dëri̧ japea̧ nö̧ta, Jacobo judi chjadëri̧ jidarëremȩdejȩrȩ oveja pio ji̧ri̧, chivo pio ji̧ri̧. Aja̧, cjiadiäa̧ji̧ri̧ pio ji̧ri̧ chjadëri̧ jida̧dejȩrȩ, ja̧di dari̧ jo̧rȩtamȩrȩ: 37'Jabo cjäri̧ madida, ca̧ jademai̧ judi chjai̧dëri̧ japea̧dicoada' quëna̧ jo̧rȩtamȩrȩ järëremȩde gäräpȩ. Ado to a̧ ji̧ra̧ oa tuti dea̧dejȩ. Aramo̧ quȩmȩ to a̧ oa, aramȩdoro quȩmȩ to a̧ oa, ado catano̧ quȩmȩ to a̧ oa tuti dea̧dejȩ uchja maea oa. Ja̧dëa ji̧ to i pënȩi̧ jujuai̧ oa mu̧i̧ ia ëte mu̧i̧a̧dejȩ. Ado cja̧rȩmo̧ pënȩi̧ oa pënȩi̧ oa mu̧i̧a̧dejȩ, peaja̧di tocoi̧ jachi chja oa. Tjomo̧ ja̧ pio ju̧i̧mo̧i̧ a̧dë mu̧i̧a̧dejȩ. Ado cja̧rȩmo̧ pënȩi̧ oa, ado cja̧rȩmo̧ pënȩi̧ oa mu̧i̧a̧dejȩ ji̧ra̧ chja oa. I decjiarä ja̧ üdë to i bërebërea maearë cjiadiäa̧de. Aja̧, ja̧di dari̧ japamȩrȩ mu̧i̧a̧dejȩ to a̧ pio ju̧i̧. 38Pio jiro a̧ ji̧ra̧ oa guë cji̧däa̧dejȩ tade puëräpȩ ju̧ri̧, ovejarë jaramȩräpȩ ju̧ri̧, jënȩro̧ boa chjaomȩräpȩ ju̧ri̧. 39Ado oveja buba üdë, chivo buba üdë go̧düdäräa̧rä, boa chjaoa̧diro̧jȩrȩ ivi ji̧ri̧. To a̧rȩ cjiamȩräpȩ pio ju̧ri̧ boa chjaoa̧diro̧jȩrȩ. Ado ja̧dëa ji̧ japamitë chjätä ëte, bori̧ pio ji̧ri̧ ara̧rä, joarijoaria maea oa ara̧ni̧ro̧jȩrȩ. 40Ado jiro bori̧ pio ji̧ri̧ go̧dü tänȩa̧dejȩrȩ Jacobo judi. Ja̧dëa ji̧ japamitë chjätä ëte, jibëa̧ oveja ivi pio ji̧ri̧, jibëa̧ chivo ivi ji̧ri̧ boa chjaopea̧ doro, jibëa̧ jadü yürüa̧dejȩrȩ Jacobo judi Aba̧ pio ju̧i̧ ja̧ oa. Cada budo chia maea oa, bureburea oa boa chjao tänȩa̧dejȩrȩ. Ja̧di dari̧ japarëremȩde Jacobo judi jibëa̧ oveja pio ji̧ri̧ mitëpea̧ oa, jibëa̧ chivo pio ji̧ri̧ mitëpea̧ oa. Ado cja̧rȩmo̧räpȩmo̧ goaremȩdejȩrȩ jibëa̧ oa Jacobo judi. Aba̧ pio ju̧i̧ ja̧ oveja pio ji̧ri̧ nö̧ta goadëa̧de, jabo tjaoëräpȩ goaremȩdejȩrȩ. 41Ado ju yagidërë jabo chjacjiamȩrȩ, ju chiarë boa chjaoa̧ ji̧, to a̧ oa guë cji̧dëno̧a̧de Jacobo judi judiro̧ to a̧rȩ cjiamȩräpȩ boapea̧ oa. 42Jabo cja̧ri̧darë, chjacjiamȩdërë boa chjaoa̧ ji̧, to a̧ oa guë cji̧dädëa̧de. Ja̧di tara ju to̧badëji̧ri̧ pio jini̧ro̧ ara̧ ji̧, jabechji̧ Aba̧ ja̧ maea oa ara̧ni̧rȩ chjacjiamȩdë maea oa. Jabo chjadë jini̧ro̧ ara̧ ji̧, Jacobo ja̧ maea oa ara̧ni̧rȩ joarijoaria oa. 43Ja̧di dari̧ japamȩrȩ ji̧ra̧ tjamo̧ri̧ goamȩpe bagarëremȩde Jacobo judi. Aja̧, oveja no̧i̧dëti̧ oa, chivo ji̧ra̧ tjamo̧ oa goamȩrȩ cjo̧ro̧mȩpea̧de. Ado cameyo buba oa, buro ji̧ra̧ tjamo̧ oa goamȩpea̧de peaja̧di. Ado pio ji̧ri̧mo̧dë jabo jibëa̧ mu̧i̧tjoi̧ pio ji̧ri̧bo goarëremȩdejȩrȩ no̧i̧dë tjamo̧ oa. Jabechji̧ pio jȩa chjadëri̧ ja̧bepë yürüpea̧ oa goarëremȩdejȩrȩ. Oari mu̧i̧tjoi̧ ji̧ri̧, ivi mu̧i̧tjoi̧ ji̧ri̧ goarëremȩdejȩrȩ ji̧ra̧ oa. Aja̧, ja̧di dari̧ cjo̧ro̧rëremȩde Jacobo judi.

Currently Selected:

Taruparea̧ Ma̧ȩ 30: Pume

Highlight

Copy