Taruparea̧ Ma̧ȩ 24

Abaraa̧ judi chjadüa̧ oa järëremȩde jibëa̧ mu̧i̧tjoi̧ judi Icha ja̧ iei̧payi̧ pio ji̧ na̧pea̧ oa

1Jabechji̧ Abaraa̧ judi ütama̧i̧ tjamo̧pea̧mȩrȩ cjo̧ro̧rëremȩde. Ütë tjamo̧ judi ji̧dë ma chjadëri̧ jape chjaoa̧ oaiä, jabechji̧ chjadëri̧ cjo̧ro̧rëremȩde jabëdiärea̧ decjiari̧. 2Ado japamitë chjätä ëte Abaraa̧ judi ma̧ȩ yürürëremȩdejȩ jibëa̧ mu̧i̧tjoi̧ tjamo̧ oa, ütama̧i̧pea̧mȩ oa. Jibëa̧ oa, chjö̧na̧i̧ oa chjadëri̧ jidamȩ pio ju̧i̧ ma̧ȩ yürüa̧dejȩ, ja̧di ta̧rëri̧ yo̧mȩrȩ:

—Danȩ, ca̧ yai taru ëtemo̧ go̧iovä na̧ ichi oa pio coa chjadëri̧ na̧rȩpea̧ oa —yo̧a̧dejȩ—. Jabechji̧ cüdë chjadëri̧ quëna̧pea̧ oa, 'Aja̧, cüdë yo̧a̧mi̧ nö̧tadäräri̧ ta̧rë ta̧rë japapadida, oëra̧ japadëpadida, jabo cüdë yo̧a̧mi̧ chjadëri̧ japapadida' quëna̧ jo̧rȩtapea̧ oa, chjadëri̧ na̧rȩcoe. Danȩ, na̧ ichi oa go̧iovä ca̧ yai taru ëtemo̧ —yo̧a̧dejȩ—. 3Ado ja̧dëa ji̧ na̧ ichi üdë go̧ioa̧ oa cjiarä, jabechji̧ tjamo̧i̧ cjiari̧ yo̧mȩrȩ ma̧ȩ yürütä earequedemȩ teracabari̧ yo̧rea̧ decjiari̧. Aja̧, Jeova pio ju̧i̧ jo̧rȩtamȩrȩ, a̧dë oa ado dabu oa Pareapamȩ pio ju̧i̧ jo̧rȩtamȩrȩ tjamo̧i̧ cjiari̧ yo̧mȩrȩ ma̧ȩ yürütä earequedemȩ, ma̧ȩ chjádë yürüdëmȩ pio ju̧i̧ jo̧rȩtamȩrȩ. Danȩ, ca̧ ja pio judi chjadëri̧ ëbapea̧ oa, jabechji̧ iei̧ chjadë oa cjo̧dë yürütä earequedemȩ. Jabo Canaa̧ quȩmȩ chirirä cjo̧ro̧yi̧ iei̧ i̧a ëbatä eadëreconȩ. A̧ro̧rȩ pio ji̧ri̧ ja̧ chjarerä cjo̧ro̧räbo, jabechji̧ pio ji̧ri̧ ja̧ pumȩ i̧a ëbatä eadëreconȩ ca̧ ja oa. 4Ado pio ju̧i̧iä jabechji̧, cüdë pearä cjo̧ro̧rërea̧räpȩ jätä earequedemȩ. Ado pio ju̧ri̧pȩ go̧düdärä ëte, jabechji̧ ca̧ pumȩ pio ji̧ri̧iä cjo̧dëtäremȩrenȩ. Ado pio judiro̧ yürüa̧ oa chjadëri̧ ëbarea̧ datäremȩde Icha judi, ca̧ ja pio judi. Aja̧, jätä earequedemȩ —yo̧mȩrȩ yo̧rëremȩdejȩ Abaraa̧ judi jibëa̧ mu̧i̧tjoi̧ pio ju̧i̧iäpȩmo̧.

5Ado Abaraa̧ ja̧ mu̧i̧tjoi̧ judi pio jiro ma̧ȩ oa ta̧rë ëte dëbë yo̧rëremȩdejȩ:

—Jabo danȩ, mȩnȩ cjo̧ro̧rërea̧ chiriräpȩ cjo̧ro̧yi̧ iei̧ pio jini̧ jauëräpȩmo̧ ma̧na̧rea̧ taradërä judi, ¿yö̧ta japapea̧de? Na̧ ja oa ëba järä judi, mȩnȩ cjo̧ro̧rërea̧ chiriräpȩ ëba järä judi, ¿jabechji̧dëde? —yo̧mȩrȩ iëno̧ë ta̧rëa̧dejȩ Abaraa̧ ju̧i̧.

6Jabo Abaraa̧ judi dëbë yo̧a̧dejȩ:

—Cjäri̧ made, ca̧ ja oa ëba jädëpea̧de —yo̧a̧dejȩ—. Cüdë cjo̧ro̧rërea̧räpȩ ëba jädëpea̧de. 7Jabechji̧ pio jiro chiriri pio judiri go̧dü tänȩrëremȩdique Jeova judi. Ca̧ ai̧ jini̧ coa ara̧ chiriri pio judiri go̧dü tänȩrëremȩdique a̧dëräpȩ cjiamȩ Ütë pio judi. Pio yoa chiri oa cjo̧ro̧pea̧ oa go̧dü tänȩrëremȩdique. Ca̧ ama̧i̧ ja̧ bëri pio judiri go̧dü tänȩrëremȩdique, ca̧ oti̧ ja̧ bëri pio judiri. Ado ju̧i̧ uëri ja̧di ta̧rëri̧ yo̧a̧dique Jeova judi: "Aja̧, pio yoa chiri oa yürüparequedejȩrȩ na̧ea̧ri ja̧ji̧ri̧ pio ji̧ri̧" yo̧mȩrȩ ma̧ȩ yürüa̧dique. Aja̧, jënȩ yo̧a̧mi̧ japapea̧ maea oa yürürëremȩdique ma̧ȩ oa. Ado danȩ, pio jiro ma̧ȩ oa yürüa̧mȩ judi a̧dëri pio judiri chjadüpadejȩ jibëa̧ mu̧i̧tjoi̧ oa pio mȩa chjadëri̧ a̧dopea̧ oa, ca̧ ja ja̧ iei̧payi̧ pio ji̧ chjadëri̧ ëba ma̧na̧pea̧ ji̧. 8Jabo pio judiriyi̧ iei̧ pio jini̧ mȩa nö̧ta ma̧na̧dëri̧ cjiarä judi, jabechji̧de ado ja̧di. Jini̧ ma̧na̧dëri̧ cjiarä judi, jabechji̧ cüdë yo̧a̧mi̧ tarë ta̧rë japadëpea̧ chiarenȩ. Jabechji̧ ëba ma̧na̧dëpea̧ chiarenȩjȩ. Jabo danȩ, ca̧ ja oa ja̧dira̧ ëba jädëpea̧de. Cüdë cjo̧ro̧rërea̧ chiriräpȩ jätä ea tjamo̧dëreconȩ ca̧ ja oa —yo̧a̧dejȩ jibëa̧ mu̧i̧tjoi̧ oa.

9Ja̧dëa ji̧ Abaraa̧ ja̧ mu̧i̧tjoi̧ judi go̧iorëremȩdejȩ jibëa̧ ichi oa jibëa̧ ano̧mȩ ja̧ yai taru ëtemo̧. 'Ta̧rë ta̧rë japajarequedemȩ' yo̧mi̧ dari̧ na̧rȩrëremȩdejȩ ja̧di dari̧ japea̧ oaiä. Ado go̧ioa̧ oa cjiamȩrȩ ma̧ȩ yürüa̧dejȩ Abaraa̧ ju̧i̧ jibëa̧ mu̧i̧tjoi̧ judi:

—‘Aja̧, mȩnȩ yo̧a̧mi̧ nö̧tadäräri̧ ta̧rë ta̧rë japapacuni̧da’ quëna̧ jo̧rȩtamȩrȩ yo̧requedemȩ. Jabechji̧ Jeova pio ju̧i̧ jo̧rȩtamȩrȩ, ma̧ȩ chjádë yürüdëmȩ pio ju̧i̧ jo̧rȩtamȩrȩ tjamo̧i̧ cjiari̧ yo̧mȩrȩ ma̧ȩ yürürequedemȩ teracabari̧ yo̧rea̧ decjiari̧. Na̧ ja judi ëbarea̧ dapea̧ oa jäparequede mȩnȩ yo̧a̧mi̧ —yo̧mȩrȩ yo̧a̧dejȩ Abaraa̧ ju̧i̧, jibëa̧ ano̧mȩ pio ju̧i̧.

10Ja̧dëa̧ ji̧ mu̧i̧tjoi̧ judi Abaraa̧ pio ju̧i̧ nö̧ta ni̧bä chjao ëte, Abaraa̧ pio ju̧i̧ ja̧remȩ ji̧ra̧ oa, dami̧ti̧ oa mitërëremȩde, ba chiati̧ oa. Jabechji̧ Icha ja̧ iei̧payi̧ pio ji̧iäpȩmo̧ yürüpea̧ oa mitërëremȩdejȩ. Ado jiro ba chia oa mitë ëte jëdano̧rëremȩde jäpea̧ ji̧. Jënȩ chjadëri̧ chia jäpea̧ oa mitërëremȩdejȩrȩ cameyo oa. Ichi chjö̧na̧i̧ oa mitëa̧dejȩrȩ putu ju choco pio ji̧ri̧. Ado jëdano̧ ëte chia go̧dürëremȩde jibëa̧ jadü pio ji̧ri̧ nö̧ta. Abaraa̧ pio ju̧i̧ ja̧ omȩ ja̧ bë tjamo̧i̧ jäpea̧ oa, Nacoro quȩmȩ bë ma̧ri̧räpȩ jäpea̧ oa go̧dürëreji̧ri̧dirȩ Mechopotamia quȩmȩ chiriräpȩmo̧. 11Do ji̧ra̧ri̧ chjätä ëte gȩnȩpe järä go̧düdärärëreji̧ri̧dirȩ Nacoro ja̧ bë ma̧ri̧ queri̧räpȩ, tade puërë cjiamȩräpȩ. Ado pio jiroräpȩ cjo̧ro̧ji̧ri̧ ivi jini̧ro̧ pio jiro tade puëräpȩ jädiäa̧rä go̧düdärärëreji̧ri̧dirȩ. Ado Abaraa̧ ja̧ mu̧i̧tjoi̧ pio judi peaja̧di cjiadäräa̧de tade puë yuroro. Cameyo judiro̧ ui jarapea̧ oa, järätä chjapapea̧ oa cjiadärärëremȩde. 12Ado ja̧dëa ji̧ Abaraa̧ ja̧ mu̧i̧tjoi̧ judi taruparëremȩde Ütë tjamo̧ pio ju̧i̧ ni̧bäpea̧ ji̧, ja̧di ta̧rëri̧ yo̧mȩrȩ:

—Jeova Ütë, ni̧bärequedemȩ. Aja̧, Abaraa̧ ja̧ Ütë oa, ca̧ ano̧mȩ ja̧ Ütë oa ni̧bärequedemȩ. Jabechji̧ cjäri̧ri̧ cjia datä earequedemȩ ca̧ ano̧mȩ ju̧i̧, Abaraa̧ pio ju̧i̧. Jabechji̧ pio ju̧i̧ ja̧ joja pio judi chjadëri̧ ëbarea̧ dapea̧ oa na̧era̧pea̧requede iei̧ i̧a. Ado pio ju̧i̧iä yo̧requedemȩ Ano̧mȩ. Jabechji̧ chjadëri̧ a̧docoe cüdë badëri̧ jana̧chea̧ oa —yo̧mȩrȩ cjo̧dërëremȩdejȩ Ütë tjamo̧ pio ju̧i̧iä.

13Ado Ütë tjamo̧ pio ju̧i̧iä ji̧dë u̧i̧ cjo̧dëmȩrȩ ja̧di ta̧rëri̧ a̧de ni̧bärëremȩdejȩ:

—Aja̧ Ano̧mȩ, pio yi cjiadiärequede tade puëräpȩ ivi jini̧ro̧ ui oa jana̧mi̧ nö̧ta. 14Ado danȩ, chjadëri̧ na̧rȩcoe. 'Icha ja̧ iei̧payi̧ pio jini̧ni̧da' quëna̧pea̧ oa chjadëri̧ na̧rȩtä earequedemȩ. Danȩ, iei̧ pëi̧ chja i̧a cjo̧dëparequedejȩ, ui oa jana̧payi̧ i̧a. "Aja̧, ui yürücoa cüdë jarapea̧ oa" yo̧mȩrȩ cjo̧dëparequedejȩ. Ado coa dëbë yo̧payi̧ pio jini̧, "Aja̧, ui oa yürüparequedemȩ, ado na̧ cameyo pio judiro̧borë chjadëri̧ jarapea̧ oa yürüparequedejȩrȩ peaja̧di" dëbë yo̧payi̧ pio jini̧, jabechji̧ pio jini̧tänȩ Icha ja̧ iei̧payi̧ jini̧. Aja̧ Ütë, ‘Icha ja̧ iei̧payi̧ pio jini̧ni̧da' quëna̧rea̧mi̧ dari̧ tuti japavä. Na̧ mu̧i̧tjoi̧ ja̧ oa, Icha ja̧ oa chjadëri̧ tuti japavä. Ado mȩnȩ ja̧di dari̧ tuti japea̧ oaiä dabaparequede mȩa chiari. 'Jabechji̧ ca̧ ano̧mȩ Abaraa̧ pio ju̧i̧ ea tjamo̧diji̧da, ji̧dë ma eamȩrȩ cjäri̧ri̧ cjia dadiji̧da, goarijädëmȩ earea̧ra̧ eadiji̧da' quëna̧ dabaparequede pio mȩa chjiari —yo̧mȩrȩ cjo̧dëreremȩdejȩ Ütë tjamo̧ ju̧i̧iä.

15Ado Abaraa̧ ja̧ mu̧i̧tjoi̧ judi Ütë tjamo̧ ju̧i̧ jabë ni̧bädärädëa̧rä, jädärärëreyi̧nȩ iei̧ jini̧ dabu yocodë arayi̧rȩ, Rebeca quȩyi̧rȩ. Betue quȩmȩ pio ju̧i̧ ja̧ jojabi pio jini̧ jädäräa̧nȩ. Ado Betue quȩmȩ judi ¿chjiade? Chjiadëde, jabechji̧ Mica quȩyi̧ pio ji̧ ja̧ jojade. Abaraa̧ pio ju̧i̧ ja̧ omȩ pio ju̧i̧ ja̧ jade. Nacoro quȩmȩ pio ju̧i̧ ja̧ jade Betue judi. 16Ado Rebeca jini̧, jabechji̧ chjacjiayi̧ tjamo̧rëreyi̧nȩ. Ado üi̧ pio ju̧i̧ nö̧ta cja̧rȩmȩ co ëba mo̧a̧dërëreyi̧nȩ. Pio jini̧ tade puëräpȩ jädäräa̧nȩ. Ado jibëa̧ dabu yocodë tjuriri̧ cjiari̧ ui ji̧ cjarä ëte cuchupea̧nȩ. 17Ado Abaraa̧ ja̧ mu̧i̧tjoi̧ judi baguramȩrȩ nö̧tadiäa̧dejȩ Rebeca ji̧. Ado yo̧a̧dejȩ:

—Cjäri̧ri̧ cjia dacoa. Ui jabëtari̧mi̧ yürücoa dabu yocodëri ja̧ ui oa.

18Ado dëbë yo̧a̧nȩjȩ Rebeca jini̧:

—Goë jaevä. Jaravä —dëbë yo̧a̧nȩjȩ. Ado jibëa̧ ca̧tori judiri bira tänȩa̧nȩjȩ dabu yocodë oa. Ado arë yürüa̧nȩjȩ ui oa jënȩ chjadëri̧ jarapea̧ oa. 19Ado Abaraa̧ ja̧ mu̧i̧tjoi̧ judi jaradäräa̧mȩ oa yo̧a̧nȩjȩ:

—Ado na̧ cameyorë peaja̧di chjadëri̧ jarapea̧ oa go̧dü tänȩ yürüparequedemȩ ui oa —yo̧a̧nȩjȩ.

20Ado dabu yocodërä cjiadiäa̧mȩ ui oa arë cjareno̧a̧nȩjȩ cameyorë jarapea̧ chararä. Ado ja̧di dari̧ japa ëte jäeno̧a̧nȩ tade puëräpȩ ado ui ji̧ mu̧i̧ go̧dü tänȩpea̧ oa. Ado mu̧i̧ go̧dü tänȩ ëte, arë maneno̧a̧nȩjȩ chararä ado arë cjaräpea̧ oa. Ado cameyorë ütëborë chjadëri̧ jara̧rä yuro jädiä jädiä cjiëno̧a̧nȩ Rebeca jini̧. 21Ja̧dëa̧ ji̧ jini̧ jädiä jädiä cjia̧ nö̧ta, jabechji̧ cjapi dae charëremȩdejȩ Abaraa̧ ja̧ mu̧i̧tjoi̧ judi. 'Dabaquiji̧da, pio ji̧ni̧täyi̧ jironi̧da, tjamo̧ri̧ dabadëquëda, jabo Jeova pio judidida, jabechji̧ pio ji̧ ëba baätä ea jirodicoada, Icha ja̧ iei̧ tjamo̧payi̧ pio jini̧ jironi̧da' quëna̧ jo̧rȩtamȩrȩ dae charëremȩdejȩ cjapi maearë. 22Ado cameyo judiro̧ jara ano̧a̧rä, mu̧i̧tjoi̧ judi yürürëremȩdejȩ Rebeca ji̧ i̧bu puërä go̧iorea̧ chjiparari ba chia oa, oro maea oa, ca̧i̧ ta̧ra̧ ichiri cja̧rȩmȩ gramo chacha oa. Ado cji̧de yürürëremȩdejȩ jibëa̧ i̧bu puërä. Ja̧dëa ji̧ yo̧a̧ri̧ ichi cara märärea̧ oa, ba chia tjamo̧ oa yürürëremȩdejȩ peaja̧di. Ichi cararä go̧iopea̧ oa a̧de yürüa̧dejȩ oro maea oa, 100 gramo chacha oa. 23Ja̧di dari̧ yürü ëte iëno̧ë ta̧rëa̧dejȩ:

—¿Chjia ja̧ jojabimȩ mȩnȩ? Ado na̧ ama̧i̧ judi, jibëa̧ bëräpȩ ¿mo̧a̧rea̧ jo̧ tjo oa goadëdi? Cüdë, ca̧ jadüborë mo̧a̧pea̧ oa ¿jo̧ tjo chia oa goadëdi? —iëno̧ë ta̧rëa̧dejȩ.

24Ado Rebeca jini̧ dëbë yo̧a̧nȩjȩ:

—Danȩ, Betue quȩmȩ ja̧ jojabirequede. Ado ju̧i̧ nö̧rimȩ judi Nacoro quȩmȩ pio judide. Ado ju̧i̧ arayi̧ jini̧ Mica quȩyi̧nȩ. 25Ado mȩnȩro̧ ca̧ ama̧i̧ ja̧ bëräpȩ mo̧a̧tämi̧ cjiarä judi, jabechji̧de. Nö̧tade jo̧ tjo üdë. Ado na̧ cameyo judiro̧ peaja̧di chjadëri̧ mo̧a̧pea̧ oa cärä ga oa goarea̧rȩ. Ado judiro̧ jurapea̧ oa peaja̧di goarea̧rȩ —yo̧yi̧rȩ yo̧rëreyi̧nȩjȩ Rebeca jini̧ Abaraa̧ ja̧ mu̧i̧tjoi̧ pio ju̧i̧iäpȩmo̧.

26Ja̧dëa ji̧ mu̧i̧tjoi̧ judi Jeova pio ju̧i̧iäpȩmo̧ juchatura̧ tjätjäpë china̧därärëremȩde jibëa̧ daito oa daburäpȩ yuro cjiari̧. Ado china̧mȩrȩ ni̧bärëremȩdejȩ, chjacjiamȩri̧ jo̧rȩtamȩrȩ. 27Ado yo̧a̧dejȩ:

—Jeova, chjadë tjamo̧renȩ. Ca̧ ano̧mȩ Abaraa̧ ja̧ Ütë judi chjadë tjamo̧renȩ. Mȩnȩ yo̧a̧mi̧ chjadëri̧ japea̧renȩjo̧ȩ. Jabechji̧ ca̧ ano̧mȩ pio ju̧i̧ ji̧dë ma eamȩrȩ cjäri̧ri̧ cjia darenȩjo̧ȩ, goarijämȩ earea̧ra̧ earea̧ decjiari̧. Ado ca̧ ano̧mȩ pio ju̧i̧ ja̧ pumȩiäpȩ chjadëri̧ go̧düna̧ra̧rea̧mi̧ dari̧ a̧doa̧renȩque chjadëri̧ —yo̧mȩrȩ yo̧rëremȩdejȩ.

28Ja̧dëa ji̧ Rebeca jini̧ bagureno̧rëreyi̧nȩ joji̧ri̧ ja̧ bëräpȩmo̧ chjö̧na̧i̧ oa ni̧bä chjaopea̧ oa. 'Aja̧, pio jiro üi̧ judi ja̧di dari̧ yo̧a̧dicoada, ja̧di dari̧ yürüa̧dicoada' quëna̧yi̧rȩ ni̧bä chjaorëreyi̧nȩjȩ jibëa̧ ai̧ ji̧. 29,30Ado Rebeca jini̧ jibëa̧ omȩ oa ëbarëremȩnȩjȩ Aba̧ quȩmȩ pio ju̧i̧. Ado pio judi darëremȩdejȩ davä jibëa̧ oyi̧ ja̧ i̧bu puërä cji̧däa̧ oa cjiamȩ chjiparari ba chiati̧ oa, ichi cararä chaärea̧ oa. Peaja̧di ta̧rëa̧de jibëa̧ oyi̧ jini̧ ni̧bä chjaoa̧ ji̧, "Aja̧, üi̧ judi ja̧di dari̧ yürüa̧dicoa" yo̧a̧ pio jii̧. Ado pio ju̧i̧iä bagureno̧a̧de tade puëräpȩmo̧ pio jiro üi̧ pio ju̧i̧ irä dapea̧ oa. Ado tade puëräpȩ cjiamȩ oa, jibëa̧ cameyo pio ji̧ri̧ nö̧tamȩ oa, jäeno̧a̧dejȩ Abaraa̧ ja̧ mu̧i̧tjoi̧ pio ju̧i̧iäpȩ. 31Ado yo̧a̧dejȩ:

—Jaeibe. Ca̧ bëräpȩ baätärȩ. Jabechji̧ Jeova judi chjadëri̧ a̧doa̧ pio ju̧i̧ yo̧requedemȩ. ¿Tjana̧pea̧ ji̧ ibëa̧ bë dairäpȩ dae cjiarenȩ. Danȩ, jëdano̧a̧ oa goarea̧ro̧jo̧ȩ ibëa̧ bë oa ütëbo ja̧ oa, na̧ cameyo ja̧bo. Jaeibe. Ca̧ bëräpȩ baätärȩ —yo̧a̧dejȩ Abara̧ ja̧ mu̧i̧tjoi̧ oa Aba̧ quȩmȩ judi.

32Pio ju̧i̧ ta̧rëa̧ oaiä baärëremȩde bëräpȩmo̧ Abaraa̧ ja̧ mu̧i̧tjoi̧ judi. Ütëborë baäa̧dirȩ cameyo judiro̧borë. Ado cameyo judiro̧ chacha oa chia ma̧na̧ pio ju̧i̧ bira tänȩa̧dejȩ Aba̧ judi. Ado cameyo ji̧ri̧ jurarea̧ oa chjadëri̧ yürü ëte, jabechji̧ ui yürüa̧dejȩrȩ pumȩ ji̧ri̧ jibëa̧ ta oa chjadëri̧ joapea̧ ji̧. Aja̧, Abaraa̧ ja̧ mu̧i̧tjoi̧ pio ju̧i̧, ado pio ju̧i̧ ja̧ jadü pio ji̧ri̧bo ui yürüa̧dejȩrȩ jibëa̧ ta oa chjadëri̧ joapea̧ oa.

33Ja̧dëa ji̧ jurarea̧ yürütea̧diro̧jȩrȩ, jabo Abaraa̧ ja̧ mu̧i̧tjoi̧ judi yo̧a̧dejȩrȩ:

—Jabërequede. Cüdë jurabea yaboi̧, jabechji̧ chjadëri̧ ni̧bä chjaotämi̧ cjiarequededibe cüdë jana̧ pio ju̧i̧ chjiari —yo̧a̧dejȩrȩ.

Ja̧dëa ji̧ yo̧a̧dejȩ Aba̧ judi:

—Jaevä. Ni̧bä chjaoibe.

34Ja̧dëa ji̧ ni̧bä chjaorëremȩdejȩrȩ Abaraa̧ ja̧ mu̧i̧tjoi̧ judi. Ja̧di ta̧rëri̧ yo̧mȩrȩ ni̧bä chjaoa̧dejȩrȩ:

—Danȩrȩ, cüdë, Abaraa̧ pio ju̧i̧ ja̧ mu̧i̧tjoi̧requede. 35Jeova pio judi a̧dë chjäte chjadëri̧ japarëremȩdejȩ ca̧ ano̧mȩ ju̧i̧, Abaraa̧ pio ju̧i̧. Pio judi tänȩa̧ oa ji̧ra̧ri̧ go̧amȩpea̧de. Aja̧, pio judi yürüa̧ oa ji̧ra̧ri̧ goamȩpea̧de oveja oa, baca oa, cameyo oa, buro oa. Ado oro quȩmȩ chjiparari oa peaja̧di ji̧ra̧ri̧ goade, parata quȩmȩ chjipararibo. Jibëa̧ mu̧i̧tjoi̧ buba oa goade peaja̧di. Oari mu̧i̧tjoi̧ pio ji̧ri̧, ivi mu̧i̧tjoi̧ pio ji̧ri̧bo goamȩrȩ dopade ca̧ ano̧mȩ judi. Jabechji̧ Jeova pio judi yürüa̧ oa ji̧ra̧ri̧ goamȩpea̧de. 36Ado ca̧ ano̧mȩ ja̧ iei̧ jini̧, Chara quȩyi̧ pio jini̧ ëba ararëreyi̧nȩjȩ üi̧ boi̧ oa. Ütai̧ tjamo̧pea̧yi̧borë ëba ara̧nȩjȩ. Abaraa̧ joja pio ju̧i̧ ara̧nȩjȩ Icha quȩmȩ oa. Ado ca̧ ano̧mȩ judi jibëa̧remȩ pio ju̧i̧ chjö̧na̧i̧därä oa yürüa̧dejȩ joja pio ju̧i̧iäpȩmo̧. Jibëa̧ baca oa, jibëa̧ cameyo oa, chjö̧na̧i̧däräti̧ oa yürüa̧dejȩ Icha pio ju̧i̧. 37Ado ca̧ ano̧mȩ Abaraa̧ pio judi yo̧a̧dique: ‘’Danȩ, Canaa̧ quȩmȩ chiririyi̧ iei̧ pio ji̧ tjamo̧ri̧ ëba tänȩdëpareconȩ ca̧ ja oa. Tjamo̧ davä. Cüdë cjo̧ro̧mȩ chiririyi̧ pio ji̧ ëbarea̧mi̧dëde. Ja̧di tara pio coaiäpȩmo̧ tjamo̧i̧ cjiari̧ yo̧tä earequedemȩ” yo̧a̧dique. Jabechji̧ ma̧ȩ chjádë yürüdëmȩ Ütë pio ju̧i̧ jo̧rȩtamȩrȩ tjamo̧i̧ cjiari̧ yo̧mȩrȩ ma̧ȩ yürütä earequedemȩ teracabari̧ yo̧rea̧ decjiari̧. 'Aja̧, ca̧ ano̧mȩ judi ja̧di dari̧ japatä eadicoada, ado judi yo̧a̧ pio ju̧i̧ nö̧tadäräri̧ ta̧rë ta̧rë japapacuni̧da' quena̧mȩrȩ yo̧tä earequedemȩ ma̧ȩ chjádë yürürea̧ decjiari̧” yo̧a̧dique. 38“Jabechji̧ ca ama̧i̧rea̧rȩ cjo̧ro̧rërea̧räpȩ, ca̧ oti̧rȩ cjo̧ro̧mȩräpȩ jätä earequedemȩ jachi tjamo̧räpȩ” yo̧a̧dique. “Pio ju̧ri̧pȩyi̧ ji̧, iei̧ pëi̧ chjayi̧ ji̧, ca̧ oti̧ ja̧ pumȩyi̧ pio ji̧ mitëtä earequedemȩ ca̧ ja üdë ëbapea̧ oa” yo̧a̧dique. Aja̧, ja̧di ta̧rëri̧ yo̧mȩrȩ yo̧a̧dique ca̧ ano̧mȩ judi, Abaraa̧ pio judi. 39Ja̧dëa ji̧ iëno̧ë ta̧rëa̧reconȩ ca̧ ano̧mȩ ju̧i̧: “Jabo iei̧ jini̧ pio coa nö̧ta ma̧na̧dëri̧ cjiarä judi, ¿yö̧ta japapea̧de?” iëno̧ë ta̧rëa̧reconȩ. 40Ado dëbë yo̧a̧dique: “Danȩ, Jeova pio judi yo̧a̧ ma̧ȩrä cjo̧ro̧mȩrȩ cjo̧ro̧requede. Ado judi, jabechji̧ a̧dëri pio judiri chjadüpadejȩ jibëa̧ mu̧i̧tjoi̧ oa pio mȩa chjadëri̧ a̧dopea̧ oa, ca̧ ja ja̧ iei̧payi̧ pio ji̧ chjadëri̧ daräräpea̧ oa. Aja̧, ca̧ oti̧ pio ji̧ri̧ ja̧ pumȩyi̧ ji̧, ca̧ ama̧i̧rea̧ pio ju̧i̧rea̧ ja̧ pumȩyi̧ pio ji̧ dadäräpea̧ ji̧ chjadëri̧ a̧dopadimȩ a̧dërimȩ mu̧i̧tjoi̧ pio judi” yo̧a̧dique. 41“Jabo danȩ, ca̧ oti̧ pio judiro̧ chjadüdëri̧ cjiarä judi, iei̧ pëi̧ chja pio ji̧ chjadüdëri̧ cjiarä judi, jabechji̧ japadëpea̧de ado ja̧di. Judiro̧ chjadüdëri̧ cjiarä judi, jabechji̧ cüdë yo̧a̧mi̧ ta̧rë ta̧rë japadëpea̧ chiarenȩ” yo̧a̧dique. Aja̧, ja̧di ta̧rëri̧ yo̧mȩrȩ yo̧a̧dique Abaraa̧ judi —yo̧a̧dejȩrȩ Abaraa̧ ja̧ mu̧i̧tjoi̧ judi.

42Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:

—Danȩrȩ, Abaraa̧ pio ju̧i̧ ja̧ ma̧ȩrä go̧düna̧ra̧requede yaba̧ domȩ oa. Ado tade puëräpȩ go̧düna̧ra̧mȩrȩ ni̧bäa̧reconȩ Abaraa̧ pio ju̧i̧ ja̧ Ütë oa, Jeova pio ju̧i̧. Ado ja̧di ta̧rëri̧ yo̧a̧reconȩ: “Danȩ Jeova, chjadëri̧ a̧docoe cüdë badëri̧ jana̧chea oa. 43Pio yi cjiarequede tade puë yuroro. Jidaparequedejȩ iei̧ pëi̧ chja i̧a, ui oa jana̧payi̧ i̧a, mu̧i̧ go̧dü tänȩpayi̧ i̧a jidaparequedejȩ eami̧ iei̧ i̧a. Ado jana̧payi̧ pio ji̧iä cjo̧dëparequedejȩ ui oa, dabu yocodë oaiä jararea̧ yürütä. 44Ado pio coa dëbë yo̧payi̧ jini̧, ‘Aja̧ ui oa yürüparequedemȩ, ado na̧ cameyo pio judiro̧borë chjadëri̧ jarapea̧ oa yürüparequedejȩrȩ peaja̧di' dëbë yo̧payi̧ pio jini̧, jabechji̧ pio jini̧tänȩ Icha ja̧ iei̧payi̧ jini̧” yo̧a̧reconȩ Ütë oa. “'Aja̧, cüdë, Icha ja̧ iei̧payi̧ pio jini̧ tjamo̧ni̧da' quëna̧rea̧mi̧ dari̧ tuti japavä Ütë, na̧ mu̧i̧tjoi̧ ja̧ oa” yo̧mȩrȩ yo̧a̧reconȩ Jeova pio ju̧i̧. 45Ja̧dëa ji̧ cüdë Ütë oa jäbë ni̧bärä, bë ma̧ri̧ri pio judiri jana̧na̧ra̧nȩ Rebeca jini̧ dabu yocodë oa arayi̧rȩ. Ado jäa̧nȩ tade puëräpȩ ui mitëpea̧ oa. Ado ja̧dëa̧ ji̧ yo̧a̧requedejȩ, “Ui yürücoa”. 46Ado dabu yocodë oa chjaodëri̧ bira tänȩyi̧ pio jini̧ yo̧a̧ni̧que: "Goë jaevä. Jaravä" yo̧a̧ni̧que. "Ado na̧ cameyorë jarapea̧ oa peaja̧di yürüparequedejȩrȩ" yo̧yi̧rȩ yo̧a̧ni̧que. Ado jënȩ yo̧a̧mi̧ ui jarapea̧ oa yürüa̧ni̧que, cameyo pio ji̧ri̧bo. 47Ja̧dëa ji̧ iëno̧ë ta̧rëa̧requedejȩ. "Chjia ja̧ jojabimȩ?" Ado yo̧a̧ni̧que. "Danȩ, Betue quȩmȩ pio ju̧i̧ ja̧ jabirequede" yo̧a̧ni̧que. "Ado ju̧i̧ nö̧rimȩ judi Nacoro quȩmȩ pio judide. Ado pio ju̧i̧ arayi̧ jini̧ Mica quȩyi̧nȩ" yo̧a̧yi̧rȩ yo̧a̧ni̧que. Ja̧di ta̧rëri̧ yo̧yi̧rȩ dëbë yo̧a̧ni̧que. Ado ju̧i̧ ta̧rëa̧ oaiä cji̧däa̧requede chjiparari ba chiati̧ oa jibëa̧ i̧bu puërä. Ado peaja̧di yürüa̧requedejȩ yo̧a̧ri̧ ichi cara chaärea̧ oa, dëbëribo go̧iopea̧ oa. 48Ado juchatura̧ cjiamȩrȩ chjacjiamȩri̧ jo̧rȩtapea̧reconȩ Jeova pio ju̧i̧. Chjacjiamȩri̧ ni̧bäa̧reconȩ ca̧ ano̧mȩ ja̧ Ütë pio ju̧i̧, Abaraa̧ ja̧ Ütë pio ju̧i̧, Jeova pio ju̧i̧. 'Aja̧, cüdë ca̧ ano̧mȩ pio ju̧i̧ ja̧ oti̧ ji̧ri̧iäpȩ tjamo̧i̧ cjiari̧ go̧düna̧ra̧rea̧ yürüa̧coada, joja pio judi chjadëri̧ ëbapea̧ oa chjadëri̧ go̧düna̧ra̧rea̧ yürüa̧dicoada' quëna̧ jo̧rȩtamȩrȩ chjacjiamȩri̧ ni̧bäa̧reconȩ Ütë tjamo̧ pio ju̧i̧. 49Ado yaba̧ chjadëri̧ yo̧chji̧coe. ¿Ca̧ ano̧mȩ ju̧i̧, Abaraa̧ pio ju̧i̧ cjäri̧ri̧ cjia dadëparenȩro̧jo̧ȩ? Judi cjo̧dëa̧mi̧ ¿yürüdëparenȩro̧jo̧ȩ dibëa̧ jabi ji̧ Icha pio ju̧i̧ ëbapea̧ oa? Chjadëri̧ yo̧chji̧coe cüdë chjadëri̧ dabapea̧ oa, 'Aja̧, jadi dari̧ japapea̧dida' quëna̧ dabapea̧ oa —yo̧mȩrȩ yo̧rëremȩdejȩrȩ Abaraa̧ ja̧ mu̧i̧tjoi̧ judi.

50Ja̧dëa ji̧ Aba̧ judi, Betue pio judiborë dëbë yo̧ji̧ri̧rȩ yo̧a̧diro̧jo̧ȩ:

—Danȩ, Jeova pio judi tänȩa̧ oa pio ibëiäpȩ jana̧na̧ra̧rea̧ daea̧renȩ. Ado pio ju̧i̧iä mȩnȩ ni̧bä chjaoa̧ üdë, jabechji̧ dëbëparea̧mi̧dëde. 51Ja̧di tara danȩ, pio yi̧a̧je mitëjȩ Rebeca ji̧. Ado mitë ëte baächji̧vä. Jabechji̧ na̧ ano̧mȩ joja ja̧ iei̧tänȩ. Jabechji̧ Jeova pio judi yo̧a̧mi̧ jibëa̧ iei̧tänȩ —yo̧ji̧ri̧rȩ dëbë yo̧a̧diro̧jo̧ȩ Abaraa̧ ja̧ mu̧i̧tjoi̧ pio ju̧i̧.

52Ado Abaraa̧ ja̧ mu̧i̧tjoi̧ judi, jënȩro̧ yo̧a̧ pio ju̧i̧ ta̧rëa̧ oaiä, juchatura̧ china̧därärëremȩde Jeova pio ju̧i̧ jo̧rȩtamȩrȩ. Tjamo̧ davä, jibëa̧ daito üdë daburäpȩmo̧ cjiari̧ tjätjäpë china̧däräa̧de Jeova pio ju̧i̧ chjacjiamȩri̧ jo̧rȩtamȩrȩ. 53Ado ja̧di dari̧ ni̧bä ëte jënȩ goa jäa̧ pio ju̧i̧, yürürea̧ pio ju̧i̧ go̧dü tänȩrëremȩdejȩ ba chia oa. Oro quȩmȩ chjiparari oa, parata quȩmȩ chjiparari̧ ba chiati̧ oa, tjärichji ba chiati̧ oa go̧dü tänȩa̧de, chjibo ba chiabo. Rebeca pio ji̧ yürüa̧dejȩ. Ado ja̧ omȩ pio ju̧i̧bo oa yürüa̧dejȩ joji̧ri̧bo. 54Ado ja̧di dari̧ yürü ëte jabechji̧ jurarëremȩde Abaraa̧ ja̧ mu̧i̧tjoi̧ judi, jibëa̧ jadü pio ji̧ri̧ nö̧ta. Jararea̧ oa jara̧dirȩ. Ado jura̧ duri oa mo̧a̧dirȩ. Ado peadai̧rä bëdüa̧dirȩ ütëborë. Ado Abaraa̧ ja̧ mu̧i̧tjoi̧ pio judi yo̧a̧dejȩrȩ Rebeca ja̧ pumȩ ji̧ri̧:

—Danȩrȩ, chjadüchji̧coe. Baäparequede. Baätämi̧ cjiarequede ca̧ ano̧mȩ pio ju̧i̧iäpȩ.

55Jabo Rebeca joji̧ri̧ jini̧, jojadi pio judiborë yo̧a̧diro̧jo̧ȩ:

—Jabo ji̧dë duri oa baäeyi̧nȩ Rebeca jini̧ ichi chjö̧na̧i̧ do chjätä ëte. Jabechji̧ pio ibë nö̧ta japamitë boi̧chji̧ ëba cjiadiätä earea̧ro̧jȩ —yo̧ji̧ri̧rȩ dëbë yo̧a̧diro̧jo̧ȩ.

56Jabo Abara̧ ja̧ mu̧i̧tjoi̧ judi dëbë yo̧a̧dejȩrȩ:

—Danȩrȩ, pio coa cjiadiä tänȩdëchji̧coe. Ütë tjamo̧ pio judi chjadëri̧ a̧doa̧ oaiä badëri̧ jana̧dëa̧requede. Chjadëri̧ jana̧na̧ra̧requede. Ado chjadëri̧ dana̧ra̧requede Icha ja̧ iei̧payi̧ pio ji̧. Ja̧di tara yo̧requededibe ibë chjadëri̧ baä tänȩtä, ca̧ ano̧mȩ pio ju̧i̧iäpȩ chjadëri̧ baädäräpea̧ oa —dëbë yo̧a̧dejȩrȩ.

57Ja̧dëa ji̧ dëbë yo̧a̧diro̧jo̧ȩ Abaraa̧ ja̧ mu̧i̧tjoi̧ ju̧i̧:

—Danȩ, Rebeca pio ji̧iä chjadëri̧ ta̧rëtäreji̧ri̧rea̧rȩ. Jënȩ jo̧rȩta̧mi̧ yo̧eyi̧ni̧ibe.

58Ja̧dëa̧ ji̧ Rebeca pio ji̧ ëna̧diäa̧diro̧jȩ pio ji̧iä ta̧rëpea̧ oa. Ado ja̧dëa ji̧ iëno̧ë ta̧rëa̧diro̧jȩ:

—Pio yoa üi̧ nö̧ta ¿baätämi̧ cjiamȩ mȩnȩ? —iëno̧ë ta̧rëa̧diro̧jo̧ȩ.

Ado Rebeca jini̧:

—Aja̧, pio oa nö̧ta baätämi̧ cjiarequede —yo̧a̧.

59Ja̧di ta̧rëri̧ dëbë yo̧a̧ oaiämo̧i̧ chjadüa̧diro̧jȩ jibëa̧ oyi̧ ji̧, Rebeca pio ji̧. Jënȩ boi̧chji̧ri ja̧ tjamo̧ jidarëreyi̧ pio ji̧bo chjadüa̧diro̧jȩ. Abaraa̧ ja mu̧i̧tjoi̧ pio ju̧i̧ nö̧ta, ju̧i̧ ja̧ jadü pio ji̧ri̧ nö̧ta baäpea̧ oa chjadëri̧ chjadüa̧diro̧jȩ. 60Ado Rebeca ja̧ oti̧ pio judiro̧ ma̧ȩ yürüa̧diro̧jȩ jënȩ baäbea yaboi̧. Chjadëri̧ cjo̧ro̧pea̧ ma̧ȩ oa yürüa̧diro̧jȩ, ja̧di ta̧rëri̧ yo̧ji̧ri̧rȩ:

"Ibëa̧ oyi̧, ütarami̧dëri̧ cjiatädiro̧ na̧ea̧ri ja̧ji̧ri̧ pio judiro̧ a̧dë chjäte ji̧ra̧ tjamo̧pe järea̧mi̧ dari̧. Ado chjadëri̧ boadärärea̧ da matädiro̧ji̧ri̧ jibë eadëji̧ri̧ pio ji̧ri̧."

Aja̧ ja̧di ta̧rëri̧ yo̧ji̧ri̧rȩ yo̧a̧diro̧jȩ jibëa̧ oyi̧ i̧a, baäpayi̧ ji̧.

61Ja̧dëa ji̧ Rebeca jini̧, jibëa̧ mu̧i̧tjoi̧ pio ji̧ri̧ nö̧ta bua̧ni̧ro̧jo̧ȩ cameyo oa. Ado cho̧rë baäa̧ni̧ro̧jo̧ȩ Abaraa̧ ja̧ mu̧i̧tjoi̧ pio ju̧i̧, jibëa̧ jadü pio ji̧ri̧ nö̧ta baämȩ oa. Ja̧di dari̧ japamȩrȩ ëba baärëremȩdejȩ Rebeca ji̧ Abaraa̧ ja̧ mu̧i̧tjoi̧ pio judi.

62Ado japamitë chjätä ëte Abaraa̧ ja̧ mu̧i̧tjoi̧ judi o pio ji̧ri̧ nö̧ta Canaa̧ quȩmȩ chiriräpȩ go̧düdäräa̧rä, peaja̧di pea go̧düdäräa̧ oa cjiarëremȩde Icha judi jibëa̧ bëräpȩ, Negebo quȩmȩ bë ma̧ri̧räpȩ. Jabechji̧ jachiräpȩ cjiamȩ tade puëräpȩ järemȩrȩ, 'Cjo̧ro̧mȩ Ütë pio judi dae chjaomȩde' quȩmȩ tade puëräpȩ järemȩrȩ, pea go̧düdäräa̧ oa cjiarëremȩde jibëa̧ bëräpȩ, Canaa̧räpȩ. 63Ado ja̧dëa ji̧ gȩnȩpea̧rä, Icha judi jibëa̧ bëri go̧dümȩrȩ järëremȩde chiriräpȩ tai̧pea̧ oa, Ütë tjamo̧ pio ju̧i̧iäpȩmo̧ ni̧bäpea̧ oa. Ado gatë dae cjiamȩrȩ darëremȩdejȩrȩ cameyo ji̧ri̧, jachiri ma̧na̧na̧ra̧ji̧ri̧ oa. 64Ado Rebeca jini̧ gatë daea̧ ji̧, peaja̧di darëreyi̧nȩjȩ Icha ju̧i̧. Ado pio ju̧i̧ da ëte bireno̧a̧nȩ cameyori pio judiri. 65Ado iëno̧ë ta̧reno̧a̧nȩjȩ Abaraa̧ ja̧ mu̧i̧tjoi̧ oa:

—¿Chjiade chiriräpȩ tai̧mȩ judi, pio jauëräpȩmo̧ jana̧mȩ judi?

—Chjiadëdi, ca̧ ano̧mȩ pio judidi, Icha pio judidi —yo̧mȩrȩ dëbë yo̧a̧dejȩ Rebeca ji̧.

Pio ju̧i̧ ta̧rëa̧ oaiä jo̧ȩra̧pe i̧bu ineno̧a̧nȩjȩ dacho cotoi̧rämo̧i̧. Ado ina̧ duri oa pio ji̧ri̧iäpȩ go̧düdärärëremȩde Icha judi.

66Ja̧dëa ji̧ mu̧i̧tjoi̧ judi chjö̧na̧i̧ oa ni̧bä chjaorëremȩdejȩ Icha ju̧i̧ jënȩ jäa̧ pio ju̧i̧ chjiari. Cjiadiädëri̧ ni̧bä chjaoa̧dejȩ ma̧ȩ ji̧ra̧ oa. 67Ja̧dëa ji̧ Icha judi ëba baärëremȩdejȩ Rebeca ji̧ jibëa̧ ai̧rea̧rȩ cjo̧ro̧rërea̧ jo̧räpȩ. I maeara̧ japea̧ jo̧räpȩ ëba baäa̧dejȩ. Ado pio ji̧ ëba baädärä ëte ëbarëremȩdejȩ. Ado Rebeca jini̧ Icha ja̧ iei̧pea̧nȩ. Ea tjamo̧rëremȩdejȩ. Ado ji̧ ëba̧ oaiä, jabechji̧ cjatäcjie jo̧rȩtarea̧ damȩpe bagarëremȩde joji̧ri̧rea̧ pio ji̧ ana̧ri̧ jo̧rȩtarërea̧ ji̧.

Currently Selected:

Taruparea̧ Ma̧ȩ 24: Pume

Highlight

Copy