Popular Bible Verses from Taruparea̧ Ma̧ȩ 24

Share

Ado ja̧dëa ji̧ Abaraa̧ ja̧ mu̧i̧tjoi̧ judi taruparëremȩde Ütë tjamo̧ pio ju̧i̧ ni̧bäpea̧ ji̧, ja̧di ta̧rëri̧ yo̧mȩrȩ: —Jeova Ütë, ni̧bärequedemȩ. Aja̧, Abaraa̧ ja̧ Ütë oa, ca̧ ano̧mȩ ja̧ Ütë oa ni̧bärequedemȩ. Jabechji̧ cjäri̧ri̧ cjia datä earequedemȩ ca̧ ano̧mȩ ju̧i̧, Abaraa̧ pio ju̧i̧. Jabechji̧ pio ju̧i̧ ja̧ joja pio judi chjadëri̧ ëbarea̧ dapea̧ oa na̧era̧pea̧requede iei̧ i̧a. Ado pio ju̧i̧iä yo̧requedemȩ Ano̧mȩ. Jabechji̧ chjadëri̧ a̧docoe cüdë badëri̧ jana̧chea̧ oa —yo̧mȩrȩ cjo̧dërëremȩdejȩ Ütë tjamo̧ pio ju̧i̧iä.

Ado danȩ, chjadëri̧ na̧rȩcoe. 'Icha ja̧ iei̧payi̧ pio jini̧ni̧da' quëna̧pea̧ oa chjadëri̧ na̧rȩtä earequedemȩ. Danȩ, iei̧ pëi̧ chja i̧a cjo̧dëparequedejȩ, ui oa jana̧payi̧ i̧a. "Aja̧, ui yürücoa cüdë jarapea̧ oa" yo̧mȩrȩ cjo̧dëparequedejȩ. Ado coa dëbë yo̧payi̧ pio jini̧, "Aja̧, ui oa yürüparequedemȩ, ado na̧ cameyo pio judiro̧borë chjadëri̧ jarapea̧ oa yürüparequedejȩrȩ peaja̧di" dëbë yo̧payi̧ pio jini̧, jabechji̧ pio jini̧tänȩ Icha ja̧ iei̧payi̧ jini̧. Aja̧ Ütë, ‘Icha ja̧ iei̧payi̧ pio jini̧ni̧da' quëna̧rea̧mi̧ dari̧ tuti japavä. Na̧ mu̧i̧tjoi̧ ja̧ oa, Icha ja̧ oa chjadëri̧ tuti japavä. Ado mȩnȩ ja̧di dari̧ tuti japea̧ oaiä dabaparequede mȩa chiari. 'Jabechji̧ ca̧ ano̧mȩ Abaraa̧ pio ju̧i̧ ea tjamo̧diji̧da, ji̧dë ma eamȩrȩ cjäri̧ri̧ cjia dadiji̧da, goarijädëmȩ earea̧ra̧ eadiji̧da' quëna̧ dabaparequede pio mȩa chjiari —yo̧mȩrȩ cjo̧dëreremȩdejȩ Ütë tjamo̧ ju̧i̧iä.

Ja̧dëa ji̧ Icha judi ëba baärëremȩdejȩ Rebeca ji̧ jibëa̧ ai̧rea̧rȩ cjo̧ro̧rërea̧ jo̧räpȩ. I maeara̧ japea̧ jo̧räpȩ ëba baäa̧dejȩ. Ado pio ji̧ ëba baädärä ëte ëbarëremȩdejȩ. Ado Rebeca jini̧ Icha ja̧ iei̧pea̧nȩ. Ea tjamo̧rëremȩdejȩ. Ado ji̧ ëba̧ oaiä, jabechji̧ cjatäcjie jo̧rȩtarea̧ damȩpe bagarëremȩde joji̧ri̧rea̧ pio ji̧ ana̧ri̧ jo̧rȩtarërea̧ ji̧.

Ado Rebeca ja̧ oti̧ pio judiro̧ ma̧ȩ yürüa̧diro̧jȩ jënȩ baäbea yaboi̧. Chjadëri̧ cjo̧ro̧pea̧ ma̧ȩ oa yürüa̧diro̧jȩ, ja̧di ta̧rëri̧ yo̧ji̧ri̧rȩ: "Ibëa̧ oyi̧, ütarami̧dëri̧ cjiatädiro̧ na̧ea̧ri ja̧ji̧ri̧ pio judiro̧ a̧dë chjäte ji̧ra̧ tjamo̧pe järea̧mi̧ dari̧. Ado chjadëri̧ boadärärea̧ da matädiro̧ji̧ri̧ jibë eadëji̧ri̧ pio ji̧ri̧." Aja̧ ja̧di ta̧rëri̧ yo̧ji̧ri̧rȩ yo̧a̧diro̧jȩ jibëa̧ oyi̧ i̧a, baäpayi̧ ji̧.

Ado ja̧dëa ji̧ na̧ ichi üdë go̧ioa̧ oa cjiarä, jabechji̧ tjamo̧i̧ cjiari̧ yo̧mȩrȩ ma̧ȩ yürütä earequedemȩ teracabari̧ yo̧rea̧ decjiari̧. Aja̧, Jeova pio ju̧i̧ jo̧rȩtamȩrȩ, a̧dë oa ado dabu oa Pareapamȩ pio ju̧i̧ jo̧rȩtamȩrȩ tjamo̧i̧ cjiari̧ yo̧mȩrȩ ma̧ȩ yürütä earequedemȩ, ma̧ȩ chjádë yürüdëmȩ pio ju̧i̧ jo̧rȩtamȩrȩ. Danȩ, ca̧ ja pio judi chjadëri̧ ëbapea̧ oa, jabechji̧ iei̧ chjadë oa cjo̧dë yürütä earequedemȩ. Jabo Canaa̧ quȩmȩ chirirä cjo̧ro̧yi̧ iei̧ i̧a ëbatä eadëreconȩ. A̧ro̧rȩ pio ji̧ri̧ ja̧ chjarerä cjo̧ro̧räbo, jabechji̧ pio ji̧ri̧ ja̧ pumȩ i̧a ëbatä eadëreconȩ ca̧ ja oa. Ado pio ju̧i̧iä jabechji̧, cüdë pearä cjo̧ro̧rërea̧räpȩ jätä earequedemȩ. Ado pio ju̧ri̧pȩ go̧düdärä ëte, jabechji̧ ca̧ pumȩ pio ji̧ri̧iä cjo̧dëtäremȩrenȩ. Ado pio judiro̧ yürüa̧ oa chjadëri̧ ëbarea̧ datäremȩde Icha judi, ca̧ ja pio judi. Aja̧, jätä earequedemȩ —yo̧mȩrȩ yo̧rëremȩdejȩ Abaraa̧ judi jibëa̧ mu̧i̧tjoi̧ pio ju̧i̧iäpȩmo̧.