Pomulanya 25

Sarita Mangkonong Wiyaa i Abraham to Yusa

1Wali yako etu i Abraham ia mangoko wo’u samba’a tau we’a damawali indo nu ananya. Sanga ntau we’a etu i Ketura. 2Wali i Ketura etu mampoanaka ono mba’a ana to langkai yako i Abraham, sanga nsira i Simran, Yoksan, Medan, Midian, Isbak, pasi i Suah. 3Panewa yako etu, tempo i Yoksan mawali baemo, ia mawali pa’a i nSyeba sira dua i Dedan. Wali i Dedan, makumpu i Abraham etu, wiyaanya to Asyur, to Letus pasi to Leum. 4Pasi i Midian, ana i Abraham sira dua i Ketura etu, ana to si ia, etu semo i Epa, Eper, Henokh, Abida pasi i Eldaa. Wali samparia tau to etu paka wiyaa i ngKetura sira dua i Abraham.

5Wali yako etu i Abraham tu’a kojomo. Tempo etu ia manganto’o ojo i Ishak semo to damangarata pantanya. 6Pei ane ngananya to yako resi indo nu ananya to yusa, ri katawanya ia mate yau ia mangawaika seja sira sora yako ri kasuginya. Panewa roo ia mangansoraka sira etu ia mampokau sira yau damaroo nja’u tana to tondo mata nu eo. Naka pei ia mampokau sira yau etu apa ia taa rani sira maroo siwaka pei i Ishak.

Sarita Mangkonong Kapate i Abraham

7-8Wali i Abraham masae pasi masanang katuwunya panewa tempo ia satu pitu mpuyu pei lima nto’u ia puramo nosanya. Wali ia mate yau ri raya ngkasanang ndaya, 9-10panewa ia napongkeli yau nu ngananya, i Ishak sira dua i Ismael. Sira dua mampoduli yau lembanya nja’u raya mbayau mbatu ri woto mpantana ri Makhpela to mosu ri Mamre. Etu semo tana to naoli i Abraham seore yako i Epron, ana i nSohar to Het. Wali i Abraham rapongkeli yau siwaka pei indo nu ananya, i Sara, nja’u raya nu wayau mbatu etu. 11Wali ojo kapate yau i Abraham etu, i Pue Allah mampakasanang katuwu nu ananya, i Ishak. Tempo etu i Ishak maroo mosu ri sumur to rato’oka Sumur Lahai-Roi.

Sarita Mangkonong Wiyaa i Ismael

12Wali si’i sarita mbiyaa i Ismael. I Ismael etu ia semo ana i Abraham sira dua i Hagar, to Mesir. I Hagar etu ia to papolaong i nSara.

13Wali tempo i Ismael baemo ia re’e indo nu ananya panewa yako etu ia riana. Sampuyu pei dua mba’a ananya etu. Wali si’i semo sanga nu ngana i Ismael, mula yako to tu’anginya rataka to purinya. To tu’anginya etu i Nebayot, panewa re’e i Kedar, Adbeel, Mibsam, 14Misyma, Duma, Masa, 15Hadad, Tema, Yetur, Napish, pasi i Kedma. 16Wali etu semo sanga nu ngana i Ismael. Wali tau sampuyu pei dua etu, wiyaa nsira mawali yau sampuyu pei dua suku. Pasi suku-suku etu ane mangansangaka kampu-kampu nsira pasi tampa-tampa to nakayore nsira ri raya mpalinjanya, sira mangampake sanga ntau sampuyu pei dua to bue nsira etu. Wali to imba tau sampuyu pei dua etu to bue ntau samba’a suku, sanga to etu semo to napake ntau suku etu mangansangaka lipu nsira.

17-18Wali i Ismael maroo ri tana to tondo mata nu eo yako ri tana to nakaroo ntua’inya. Pasi ngananya pei wiyaa nsira mangkaroos pada bone to yako nja’u lipu to rato’oka Hawila rata njo’u lipu to rato’oka Syur. Syur etu mosu ri tana Mesir, pasi nja’u ria semo jaya ane yau njo’u tana Asyur. Wali i Ismael masae katuwunya. Satu pei togo mpuyu pitu nto’u panewa ia mate yau.

Sarita Mangkonong Pampoana i Esau Sira Dua i Yakub

19Wali si’i sarita mbiyaa i Ishak. I Ishak etu ia ana i Abraham. 20Wali tempo i Ishak baemo, ojo kagananya opo mpuyu nto’u, ia rapasiwaka pei i Ribka. I Ribka etu ia ana i Betuel to yako ri tana Padan-Aram. Pa’anya etu samba’a tau to rato’oka to Aram. Pasi i Ribka etu sintua’i pei i Laban, to Aram seja.

21Wali yako ri kasiwaka i Ishak sira dua i Ribka etu, masae sangkodi panewa manasa i Ribka ia apa. Wali see naka i Ishak mampokai-kaika ia marapi sawang resi i Pue Yawe see sira dua damangarata ana. Wali i Pue Yawe mangandonge pokai-kai Ishak etu see naka i Ribka mawali mayu’u. 22Pei ana to ri raya ngkomponya etu api. Wali yako etu, ri katawanya rapoanaka ana etu sira mapari kojo masijuju ri raya ngkompo nu indonya. Wali indonya moru kojo mampobuuka taa kojo biasa ewa wetu ane tau mangkeni koro. Wali ia rani mangansani sabanya naka pei ewa wetu see naka ia yau makai-kai resi i Pue Yawe, ia mampotanaka, “Maka pei palaong si’i mawali resi aku?”

23Wali i Pue Yawe mangansono, Ia manganto’o, “Naka pei mawali palaong etu apa ana to la’u raya ngkompomu etu ana api. Wali korom damampoanaka dua ana panewa ri tempo to darata wiyaa nu anamu to dua etu damawali yau dua suku pei suku dua etu taa datuwu masingkatao. Suku to wiyaa nu anamu to kadua, sira semo to roso-roso, wali sira damanganangi suku to wiyaa nu anamu to tu’anginya. Wali see naka wiyaa nu anamu to tua’nginya damawali to papolaong nu wiyaa ntua’inya.” Etu semo pasono i mPue Yawe resi i Ribka.

24Wali yako etu ratamo temponya i Ribka moana, panewa manasa api pu’u ana to la’u raya ngkomponya. Ana etu paka langkai. 25Wali ana to uyunya rapoanaka, ia mawaa pasi makambuyu koronya wali see naka ia rasangaka i Esau, apa Esau ane basa nsira mosu sewaju ewa santaa to batuanginya “makambuyu”. 26Wali ojo kasoyanya i Esau etu, panewa mansaka rapoanaka seja ana to kadua etu. Tempo soya ia re’e mangkongko tompo ntodu ntukakanya, see naka ia rasangaka i Yakub, apa Yakub ane basa Ibrani mosu sewaju ewa santaa to batuanginya “tompo ntodu”. #Ayat 26 Yakub ane basa Ibrani mosu sewaju seja ewa santaa to batuanginya “to pantipu”. Wali tempo i Ribka mampoanaka ana api etu, tempo etu i Ishak ia ono mpuyumo to’unya.

Sarita Tempo i Esau Mangabolosika Pangkoni Panta mPa’anya

27Wali ojo kabaenya ana dua etu, i Esau ia pande kojo manjoyong pasi ia masanang rayanya maroo-roo ri pada. Pei i Yakub ia si’a ewa wetu. Ia ngkai to rodo rayanya, masanang ojo maroo-roo ri tendanya. Pasi ia tau to taa majoli masusa. 28Wali pa’a nsira dua, i Ishak, ia masanang mangkoni nae to nakenika i Esau ia, wali see naka ia mamporayang kojo i Esau. Pei i Ribka mamporayang kojo i Yakub.

29Wali re’e seore i Yakub mangaluga tala’u. Tempo mananam, tempo etu rata muni i Esau yako ri pada. Ia mayu’u wukunya apa moro kojo komponya. 30Wali see naka ia manganto’oka i Yakub, “Waika aku sangkodi anu mawaa nuluga etu dakukoni, apa aku mayu’umo wukungku.” Etu semo to nato’oka i Esau tu’ainya. Wali apa saba ia rani mangkoni tala’u to mawaa etu see naka yako etu i Esau nato’oka wo’u ntau i Edom, apa batuanginya mawaa.

31Pei i Yakub manganto’o, “Waika aku ruyu panta mpa’anta to danutima ngkorom to tu’anginya panewa aku damangawaika korom pangkoni si’i.”

32Wali i Esau mangansono, ia manganto’o, “Matao, apa tare batuanginya resi aku nempo damangarata panta mpa’angku sakonya damate moro.”

33Pei i Yakub manganto’o, “Sumpa ruyu pei janjika aku monso pu’u korom damangawaika aku panta mpa’anta etu.” Wali i Esau mangansumpa pei mamparajanjika i Yakub, ia manganto’o, “Kuparajanjika korom dakuwaika yau resi korom panta mpa’angku to aku damangantima.”

34Wali roo see i Yakub mangawaika i Esau roti pasi tala’u etu panewa i Esau mangkoni pasi manginu. Roo see ia miyai muni. Wali yako palaong to etu manasa i Esau ia taa kojo manga’angga panta mpa’anya to re’e resi ia to tu’anginya.

Currently Selected:

Pomulanya 25: WNT

Highlight

Copy