JUAN 16

1“Mädä wecammajä’a äwwäiñe ejääduqueejö’da aweichöcoomo wetä aneecamjödööcomo jonno. 2Ñanno edä nono de’woncomo ayu’caato’de töjaadäiñe aweichöcoomo jonno. Äcuude tönwanno aja’ato’de, Wanaadi wwä aashichaato töwwäiñe tödööaatäi. 3Mädä äjääcäiñe nödööaato’de Jaaja towaanäcäiñe’da yeichomjäcä, öwö dhowaanäcäiñe’da weijäcä mmaja. 4Mädä wecammajä’a äwwäiñe; yaawä chu’nädö aca yä’döa’jäcä chö’tajai maato wa’deuwö’jödö jäcä.

Epíiditu Santo tadaawaajui

“Awa’deene yääje a’deuwö’da wä’jaaquene äwwäiñe, ajaadäiñe weijäcä. 5Eduuwaane wöta yaanontänei’jödö döiña; änwanno yeecamma’jo’da maato: ¿Äsha mötaanä? ca’da. 6Wentumje mma mä’döjaato mädääje äwwäiñe wa’deuwödö weijäcä. 7Chäänöngato mädä wecammaadö, aashicha äwwäiñe eijai ña öötädö. Tä’da weiya’jäcä Ä’wa’täneichomo eejö’da eijai ña yaawä. Dha’da ööta’jäcä öwö wanonta’de äwwadäädäiñe. 8Töwö ye’a’jäcä edä nono de’woncomo wwä neneeja’de choone’nadiiyöcoomo, chäänönge weiñä mmaja, Wanaadi töne’jodheincha yeichö mmaja. 9Öwö yeecamjö’da weiñä yää choone’nadiiyöcoomo; 10Jaaja döiña öötädö yää chäänönge weiñä eneejotoojo; ööta’jäcä änwanno yeene’da maato’de. 11Odo’sha chaana’ca’jödö yää Wanaadi töne’jodheincha yeichö eneejotoojo.

12“Jooje dea na äwwäiñe täcammajä’emö, etaajai’chaane maato eduuwa. 13Yaawääne’, Epíiditu Santo we’a’jäcä, ñäädä chäänöngato a’deu edhaajä, töwö odhoowanoomaato’de chäänöngato a’deu jäcä. Töwö töjääcä mma a’deuwö’da na’de; töneeta’jödö queene na’deuwa’de. Töwö odhoowanoomaato’de tameedä töweeja’dä’emö jäcä. 14Töwö aashicha weichö neneeja’de. Öwwono wu’a’de chäwwä, yää äwwäiñe töwö neneeja’de. 15Tameedä Jaaja wwono öwwonooje mmaja na dea; yääje yeijäcä yääje wä’döaanä: Öwwono wu’a’de Epíiditu Santo wwä, yää äwwäiñe töwö neneeja’de; quee wä’döannö.

Wentumje cöweichöcoomo ca’cwaniiyöcoomoje töweecamjiyaacaamöje yeichö

16“Eduuwaiche mma yeene’da maato’de; yäätonno numa’da mma cäneeato’dede, Jaaja döiña öötädö weijäcä; quee cönä’döaacä Jesuuquidiito.

17Yaawä dhantai ñoowanoomadö cönä’döa’to tönwannoje dea:

—¿Aaquene töwä’dö’se yeichö mädä: Eduuwaiche mma yeene’da maato’de; yäätonno numa’da mma cäneeato’dede, Jaaja döiña öötädö weijäcä; quee nä’döannö? 18¿Aaquene töucwadööje yääje nä’döaanä, “eduuwaiche mma” quee? Cowaanäcäiñe’da na mädä na’deuwaadö; quee cönä’döa’to Jesuuquidiito nowaanomaadö.

19Jesuuquidiito dhowaanäcä cönä’jaacä täcamma’jo’se yeichöcoomo. Töwö cönä’döaacä chäwwäiñe:

—¿Ane’cäämö jäcä mätääcamma’jaato, yääje wä’dö’jödö jäcä ’ja: Eduuwaiche mma yeene’da maato’de; yäätonno numa’da mma cäneeato’dede; quee wä’dö’jödö jäcä ca mätääcamma’jaato? 20Chäänönge yääje wä’döa äwwäiñe, änwanno maamoaato’de, wentumje maato’de. Edä nono de’woncomo mmaane ta’cwaiñe naato’de. Yääje yeichaame wentumje aweichöcoomo necamjiyaaca’de adha’cwaniiyöcoomoje. 21Wodi tönnedö ennujai yä’döa’jäcä niye’ma yaawä, chu’nädö aca yä’dö’jödö weijäcä. Tönnedö wennu’jeje mmaane yeetunu jäcä chö’tajäätö’da deja yaawä töwö; ta’cwaiñe mmaane na, tönnedö wennu’jödö weijäcä. 22Mädääje mmaja änwanno, eduuwa mma wentumje maato. Öwö maneeneaato’dede äcuude; yaawä ta’cwaiñe maato’de. Anejja adhenwajiiñajaiñe’da na’de yaawä adha’cwaniiyöcoomo que.

23“Yaawä änwanno ane’catä’da maato’de öwwä. Chäänönge yääje wä’döa äwwäiñe, Jaaja wwääne me’ca’ato’de; tameedä öwö yeetö joi ane’catäädöcoomo töwö nu’a’de äwwäiñe. 24Eduuwa naadö jona tödööene öwö yeetö joi ane’catä’da maato. Eduuwaane öwö yeetö joi ane’ca’täcä’de, chääwa’cä adha’cwaniiyöcoomo weichö wetä.

Jesuuquidiito edä nono de’wono e’jodheinchaneije yeichö

25“Eduuwa naadö jona tödööene äwwäiñe töwa’deuwe wä’jaaquene yö’seeno joi. Yaawä chu’nädö aca yä’döa’jäcä yö’seeno joi a’deuwö’da wa’de äwwäiñe; tätaane ya’deuwa’de Jaaja jäcä. 26Yaawä öwö yeetö joi me’ca’ato’de. Yääje ä’dö’da wa äwwäiñe, Jaaja wwä äjääcäiñe ya’deuwa’de; ca’da. 27Töwö Jaaja dea äjummaato, jummatä aweichomjäcä, töneecanö’e aweichomjäcä mmaja Wanaadi jonno weejö’jödö weichö. 28Jaaja joono we’ne edä nono de’cäi; eduuwa edä nono jonno wöta dea, Jaaja döiña mmaja; quee cönä’döaacä Jesuuquidiito.

29Yaawä ñoowanoomadö chäwwä cönä’döa’to:

—Eduuwaane täta jeene adha’deuwa, yö’seeno joi’cha jeene. 30Eduuwa ñaa owaanäcä na tameedä odhoowanääcä yeichö; anejja adheecamma’jojai’cha na. Yääje yeijäcä ñaa necaanö’a Wanaadi joono aweejö’jödö yeichö; quee cönä’döa’to.

31Jesuuquidiito cöneccujä’a’to:

—¿Mecaanö’ato dämma eduuwa? 32Amoinche’da na chu’nädö aca yä’dötoojo tooni nshai äwäämecantäto’como; jääcäjeene cönängato’de, jääcäjeene’da weichaame, Jaaja jaadä yeijäcä. 33Mädä wecammajäätöi äwwäiñe täncanoode’da aweichöcoomo wetä öwö jääcäinchädä. Edä nono de’wä aweichöcoomo mäntunaanö’ato’de; yääje yeichaame cone’da’daane eichäcä’de, öwö we’jodheinchane edä nono de’wono; quee cönä’döaacä Jesuuquidiito.

Currently Selected:

JUAN 16: MCH

Highlight

Copy