JUAN 17

Tösootoi jäcäiñe Jesuuquidiito Wanaadi wwä ya’deuwö’jödö

1Yääje töwa’deuwö’jeje Jesuuquidiito Tumö wwä cöna’deuwöi, caju ña ene’mancädä. Töwö cönä’döaacä:

—Jaaja, eduuwa nä’döi chu’nädö aca. Aashicha Ännedö weichö eneejocä, aashicha mmaja aweichö eneejoiyede töwö. 2Amäädä Ännedö wwä mu’ne tameedä soto e’jodheiñe yeichojo, yeichöödoto weiñä utuiye yaawä tameedä chäwwä mu’netoodö wwäiñe. 3Yeichöödoto weiñä yää tooniyaano Wanaadi chäänöngato towaanäcä tödöödö, Jesuuquidiito towaanäcä tödöödö mmaja, ñäädä menno’janeedö.

4“Aashicha aweichö weneejone edä nono de’wä weichö. Öwö wä’cane taadawaajui mu’nedö jäcä. 5Eduuwa, Jaaja, adöiña mmaja wennaca’jäcä, aashicha weichö eneejocä, yää dea, ajaadä weichö aashicha wä’jaaquennö dea, edä nonoodö amoode’nädö owaajodä.

6“Aashicha aweichö öwö weneejone ñanno edä nono de’woncomo antawonnoiñe öwwä mu’netoodö wwäiñe. Amäädä äwwoncomooje cönä’ja’to; öwwä mu’neto yaawä. Tönwanno adha’deddu woije cönnöicho. 7Eduuwa tönwanno dhowaanäcäiñe na tameedä öwwä mu’nedö ojonnoto we’ajääje yeichö. 8Öwö wowaanomaaneto äwwä yoowanooma’jödö que; tönwanno aashicha cöneeta’to. Tönwanno dhowaanäcäiñe na ojonno weejö’jödö weichö; necaanö’aato dea äwwä yaanontä’jödö.

9“Ñanno jäcäinchädäiñe äwwä ya’deuwa eduuwa; edä nono de’woncomo jäcäiñe mmaane a’deuwö’da wa. Öwwä mu’netoodö jäcäiñeene ya’deuwa, amäädä äwwoncomooje yeichomjäcä. 10Tameedä öwö öwwoncomo amäädä äwwoncomooje naato dea; tameedä amäädä äwwoncomo öwö öwwoncomooje naato dea. Tönwanno chaiñe täne na aashicha weichö.

11“Edä nono de’wä o’somjo’da wa; canno mmaane no’somjaato edä nono de’wä, öwö ’quene adöiña wöta. Jaaja aashichaato, canno öwwä mu’netoodö edai’chocooto amäädä äjäädudu que, tooni mmaane chö’tajäätödööcomo eiye, cöwö cötö’tajäätödö naadöje mmaja. 12Chääjadäiñe edä nono de’wä weichö amäädä äjäädudu que töneedai’chäiñe wä’jaaquento canno öwwä mu’netoodö. Tooni’chä ännamjo’da na; ñäädä mma cönännamjöi, töwännanö’emööje cönä’ja’dö mma, adha’deddu imennaajä wä’dödö nönge yeichö wetä.

13“Eduuwa wöta adöiña; edä ya’deuwa edä nono de’wä dea weichö, öwö ya’cwaniiyö dea töweiye yeichö wetä chäwwäiñe. 14Öwö adha’deddu wecammane chäwwäiñe; yääje yeijäcä tönwanno töwä’quiiñeme’jo weneeneto edä nono de’woncomo wwä, edä nono de’woncomoojönööje töweichomjäcä, öwö waadöje mmaja, edä nono de’wonooje’da. 15Edä nono de’wonno adääcoto, quee a’dö’da wa äwwä; Odo’sha wwä ewontäcooto, queene wä’döa. 16Tönwanno edä nono de’woncomoojönö, öwö edä nono de’wonooje’da waadöje mmaja. 17A’deu chäänöngato que shoomacooto; adha’deddu yää a’deu chäänöngato. 18Edä nono de’cäi canontäneedöje mmaja wanontäneeto dea tönwanno, tameedä yeichö wa’cä. 19Tönwanno chääjäcäinchädäiñe chäänönge wa, tönwanno mmaja chäänönge eiyetoode a’deu chäänöngato que.

20“Canno jäcäiñe mma’da ya’deuwa, ñanno jäcäiñe mmajaane, canno necammajäätödööcomo etaadö’jo yeecanö’nenaamo. 21Äwwä we’ca’a äänönge chö’tajäätödööcomo weichojo, cöwö caadöje mmaja. Amäädä taaca maadö naane’, öwö mmaja ataaca; mädääje mmaja cöjaadä yeicho’como we’ca’a äwwä. Mädääje yeiya’comjäcä edä nono de’woncomo ecaanö’jai ñaato yaawä yaanontänei’jödööje aweichö. 22Yää aashichaato öwwä mu’nedö chäwwäiñe wu’ne dea, tooni mma chö’tajäätödööcomo yeichö wetä, cöwö caadöje mmaja. 23Öwö wa chaacaiñe, amäädä ma taaca, tooniñooje yeichöcoomo wetä, edä nono de’woncomo dhowaanäcäiñe eiye yaawä yaanontänei’jödööje aweichö, dhowaanäcäiñe eiyede ijummadööcomo äwwä, öwö cujummaadö ’cäwa’cä mmaja.

24“Jaaja, canno öwwä mu’netoodö öwö weichojo dö’tä mmaja yei’sheiñe waato, o’jodhe weichö eneiyeto yaawä, yää äwwä jummadö weijäcä öwwä mu’nedö edä nono tödöödö owaajodä. 25Jaaja chäänöngato, edä nono de’woncomo dhowaanäcäiñe’da ma; öwö mmaane yoowanääcä ma, canno mmaja dhowaanäcäiñe na dea yaanontänei’jödööje aweichö. 26Aweichö weneejone chäwwäiñe; eneejodööje dea wa’de, wä’jummanä ’je eiyeto, amäädä cujummaadöje mmaja, öwö dhacaiñe weichö wetä mmaja; quee cönä’döaacä Jesuuquidiito Tumö wwä töwa’deuwödaawä.

Currently Selected:

JUAN 17: MCH

Highlight

Copy