JUAN 15

Natö nönge töweichö Jesuuquidiito necamma’jödö

1Edääje Jesuuquidiito cönä’döaacä:

—Öwö ñäädä chääjö, chäänöngato wejössataadö; chuu dänei nönge Jaaja na. 2Tameedä dhajäädö täjössemjönö Jaaja najääca; täjössato mmaane Jaaja nichooneca, jooje’cä yeejössataadö wetä. 3Änwanno töcooneca maato eduuwa a’deu töwa’deuwe wääneneedö que. 4Jaadäädä eichäcä, ajaadäiñeedä waadöje mmaja. Chääjö jonno dhajäädö waajäca’jäcä töwoije ejössataajai’cha töweiye nai. Yääje mmaja änwanno, jaadä’da aweiya’comjäcä aashicha aweichöcoomo ejaamö’da eijai ña yaawä.

5“Öwö chääjö nönge wa, änwanno yaajädö nönge maato. Ñäädä öwö jaadäädono, öwö chääjadä weiya’jäcä mmaja, ñäädä nödöödö nejanga’de, täjösse weiñä töweiye naichöje; öwö jaadä’da mmaane tödööjai’cha maato. 6Ñäädä öwö jaadäädonoojönö nätäämaja yaawä, dhajäädö yu’taajä tödöödö naichöje. Yää dhajäädö yu’taajä soto ni’jummaato yaawä wa’to nwaca yau’cwadö wetä.

7“Jaadä dea aweiya’comjäcä, neecammajäätödö chö’taqueejö’da aweiya’comjäcä mmaja, yaawä tameedä ane’catäädöcoomo äwwäiñe nä’tua’de. 8Ännödööcomo wejanga’jäcä aashicha Jaaja weichö eneejojai maato; yaawä sootoi chäänönga’comooje äänejoojai maato. 9Jaaja jummaadöje mmaja mämjummaato öwö; umjummadööje dea eichäcä. 10Öwö waanontädö tödööa’jäcä äwwäiñe umjummadööje dea eijai maato, Jaaja nijummadööje waadöje mmaja, ñaanontädö tönnöe weijäcä.

11“Mädääje äwwäiñe ya’deuwa öwö ya’cwaniiyö ’je aweichöcoomo wetä, chäänönge jeene adha’cwaniiyöcoomo eiye. 12Edä yää öwö waanontädö: Ä’jummatääcä öwö mämjummaatoodöje mmaja. 13Töweichacoono junnei wäämanä yää yää wä’jummanä chäänöngato; anejja ’je’da na yää nöngato wä’jummanä e’jodhaato. 14Änwanno jimmäje maato öwö waanontädö tödööa’jäcä äwwäiñe. 15Yaanonööje adhe’tätäiñe’da wa eduuwa. Dhanoonö dhowaanäcä’da töweiye nai tädhaajä wwä tödöötojo. Jimmäjeene mane’taato eduuwa, äwwäiñe ecamma’jödö weijäcä tameedä Jaaja wwä neeta’jödö. 16Änwanno yei’cha meiya’quene; öwööne maneichäne. Öwö mane’tätääne aweejössataadöcoomo wetä, yeichöje adheejedöödöcoomo yeichö wetä. Tameedä öwö yeetö joi Jaaja wwä ane’catäädöcoomo, töwö nu’a’de. 17Edääje manaanontaato: Ä’jummatääcä.

Edä nono de’woncomo Wanaadi sotoi ämjumma’da yeichöcoomo

18“Edä nono de’woncomo wwä aquiiñeme’ca’comjäcä odhoowajoodäiñe’cä chäwwäiñe quiiñemeecö’jödö mmaja chö’tamme’täcä’de. 19Edä nono de’woncomo jimmäje meicho’jo yaawääne äjummajaiñe naato, töjimmotoncomo tumjumma weneenetoodöje dea. Tönwanno aquiiñeme’cato töjimmotoncomooje’da aweijäcäiñe, chääjadäiñe aweichöcoomo jonno ayu’ca’jocoomo weijäcä öwwä. 20Ätö’tatääcä äwwäiñe wa’deuwö’jödö jäcä: Dhanoonö tädhaajä e’jodhe’da töweiye nai; quee wä’dö’jödö jäcä. Ñanno öwö maaminchaneetodö, amaaminchatantäi’chede; ñanno ya’deddu etannamo’jödö, adha’dedducoomo mmaja netaato’dede. 21Tönwanno mädääje ayöödöaato’de sootoije aweichöcoomo jo’tädööje, towaanäcäiñe’da yeijäcä yaanontänei’jödö.

22“Öwö eejö’da wei’jo, chäwwäiñe aneecammajäätö’da wei’jo mmaja, yaawääne äächädääjemma choone’nadiiyöcoomo eichö. Eduuwa ya’deuto’como ’je’da na töcoone’nadiiyöcoomo jäcä. 23Ñäädä öwö quiiñeme’nei, Jaaja quiiñemeecödö wa’cä mmaja na dea. 24Dhantawäiñe jooje aashichaato ännö’da wei’jo äächädääjemma choone’nadiiyöcoomo eichö. Tönwanno cöneenea’to yää önnö’jödö; yääje yeichaame quiiñeme’caato, Jaaja nichiiñeme’caato dea. 25Tönwanno mädääje naato töjaajedaichomo imennaajä wä dödö nönge: “Tönwanno quiiñeme’caato ijo’tädööje’da mmädä;” quee imennaajä wä’dödö naichö nönge.

26“Ä’wa’täneichomo we’a’jäcä, ñäädä äwwadäädäiñe wanonta’dedö, töwö aashicha necammajä’a’de öwö jääcä. Jaaja nanontädö ñäädä Epíiditu Santo, chäänöngato a’deu edhaajä. 27Änwanno mmaja jääcä mecammajä’ato’dede, yaajäntä’jödö jonnoto’jödöödä jaadä aweichomjäcä.

Currently Selected:

JUAN 15: MCH

Highlight

Copy