JUAN 14

Jesuuquidiito ääma neeneje yeichö

1“Cone’da’daane eichäcä adheewanööcomo jäcä. Wanaadi ecaanö’täcä, öwö mmaja cäcaanö’täcääde. 2Jaaja mmai chaca jooje weichojo na. Yääje’da ei’jo mmaane wecammadö äwwäiñe. Öwö wöta aweicho’como chooneca. 3Aweicho’como choonecaadö wä’ca’jäcä we’a’dede; yaawä manaadäaato’de, öwö weichojo dö’tä mmaja meichäiye. 4Änwanno odhoowanääcäiñe öötotoojo, chääma’tädö odhoowanääcäiñe mmaja; quee cönä’döaacä Jesuuquidiito.

5Yaawä Tomá cönä’döaacä:

—Owaanomaanei, ñaa owaanäcä’da na äätotoojo, ¿aaquene ñaa owaanäcä eichöde’ chääma’tädö? quee cönä’döaacä.

6Jesuuquidiito cönä’döaacä chäwwä:

—Öwö ñäädä ääma neene, chäänöngato a’deu mmaja, do’ta edhaajä mmaja. Jaaja wwadäädä täjai’cha weiñä na; öwö joi mma täjai. 7Öwö odhoowanääcäiñe weiya’jäcä Jaaja mmaja odhoowanääcäiñe yaawä. Eduuwa Jaaja odhoowanääcäiñe na, töneene aweichomjäcä; quee cönä’döaacä Jesuuquidiito.

8Yaawä Jediipe cönä’döaacä chäwwä:

—Cajiichaana, Oomo eneejocä ñaa wwä, täncanoode’da ñaa eiye yaawä; quee.

9Jesuuquidiito cönä’döaacä chäwwä:

—¿Numa ajaadäiñe weichaame odhoowanääcä’da dea wanä, Jediipe? Ñäädä yeenenei, töneene mmaja Jaaja. ¿Aaquene yääje mä’döaanä: “Oomo enoojocä;” quee? 10¿Aneecamjö’da ca manä Jaaja yaaca yeichö, öwö Jaaja aca weichö mmaja? Mädä töwa’deuwe wääneneedö öwö woije mma’da ya’deuwa. Määdhä Jaaja, yaaca naanei, määdhääne nödööja. 11Cäcaanö’täcä Jaaja aca weichö, Jaaja yaaca yeichö mmaja. Ya’deddu aneecamjö’da aweiya’comjäcä, önnödö jäcäinchädä cäcaanö’täcä. 12Chäänönge yääje wä’döa äwwäiñe, öwö yeecanö’nei, öwö önnödö nönge mmaja nödööa’dede. Önnödö e’jodhe’cä nödööa’de, Jaaja döiña öötädö weijäcä. 13Tameedä yeetö joi ane’catäädöcoomo öwö wödööa’de, aashicha Tumö weichö Iiñedö wwä eneejodö wetä. 14Öwö wödööa’de tameedä öwö yeetö joi ane’catäädöcoomo.

Epíiditu Santo enno’jatoojo Jesuuquidiito necamma’jödö

15“Äwwäiñe jumma’jäcä öwö waanontädö tödöötäcä. 16Jaaja wwä we’ca’a’de, töwö äwwäiñe nu’a’de yaawä Ä’wa’täneichomo, yeichöje ajaadäiñe töweiyemööje, ñäädä Epíiditu Santo, chäänöngato a’deu edhaajä. 17Edä nono de’woncomo ñäädä ijummajai’cha naato, aneene’da yeichomjäcä, dhowaanäcäiñe’da yeichomjäcä mmaja. Änwanno mmaane odhoowanääcäiñe na, ajaadäiñe yeijäcä; töwö yeichöje ataacaiñe na’de. 18Owö äjääcäjeeneiñe änäntäiñe’da wa; öwö we’a’de adöiñaiñe. 19Numa’da mma na eduuwa eetä weichojo, yäätonno yaawä edä nono de’woncomo yeene’da naato’de; änwanno mmaane cäneeato’de. Öwö nudä weijäcä änwanno nudä mmaja maato’dede. 20Yää anooto awä änwanno odhoowanääcäiñe na’de Jaaja aca weichö, öwö taaca aweichöcoomo mmaja, ataacaiñe weichö mmaja. 21Ñäädä öwö waanontädö etaanei, tödöönei mmaja, ñäädä ñäädä jummanei ñeene. Jaaja nijumma’de ñäädä jummanei; öwö mmaja wijumma’dede, wääneja’de chäwwä; quee cönä’döaacä Jesuuquidiito.

22Yaawä Juudha cönä’döaacä chäwwä, ñäädä Icaadiyootejöönö:

—Owaanomaanei, ¿ane’que’nei ñaa wwä mma määnejaanä’de, tameedä soto wwäiñe äänejo’da?

23Jesuuquidiito cöneccujä’acä:

—Ñäädä öwö jummanei ya’deddu woije nödööa; Jaaja nijumma’de ñäädä. Ñaa ne’a’de yöiña; chääjadä ñaa na’de. 24Ñäädä jummaneijönö mmaane ya’deddu woije ännö’da töweiye nai. Yää neecammajäätödö töneeta määnetäänedö öwö ya’deddujöönö yää, Jaaja a’dedduune, ñäädä yaanontänei’jödö.

25“Edä äwwäiñe wecammajä’a ajaadäiñe dea weichö. 26Öwö ne’catäädö woije Jaaja nanonta’de Ä’wa’täneichomo, ñäädä Epíiditu Santo. Ñäädä Epíiditu Santo odhoowanoomaato’de tameedäädä; ätö’tamme’jaato’de tameedä neecammajäätö’jödö.

27“Öötääje täncanoode’da aweicho’como wu’a, yää öwwono. Täncanoode’da weiñä edä nono de’wono nöngemjönö wu’a äwwäiñe. Cone’da’daane eichäcä adheewanööcomo jäcä; tösaade’da mmaja eichäcääde. 28Änwanno metaato äwwäiñe ya’deuwöichö: “Öwö wöta, yää ’jeje we’a’dede adöiñaiñe”; quee wä’döannö. Äwwäiñe jumma’jäcä ta’cwaiñe meichädö Jaaja döiña öötädö eta’jäcä, Jaaja ye’jodhe yeijäcä. 29Dhowaajodä dea mädä wecamma äwwäiñe, äwwäiñe eneea’jäcä mecaanö’täiye yaawä.

30“Mädä jonno jooje a’deuwö’da wa’de äwwäiñe, edä nono de’wono waanontädö weejödö weijäcä, ñäädä odo’sha; töwö ye’jodheinchajai’cha na. 31Yääje yeichaame mädä yeeja’do’tojo na, tameedä soto owaanäcäiñe yeichö wetä Jaaja tumjumma weichö, Jaaja waanontä’jödö tönnöe weichö mmaja. Ääma’tätääcä eduuwa; cöötätäiye; quee cönä’döaacä Jesuuquidiito.

Currently Selected:

JUAN 14: MCH

Highlight

Copy