JUAN 10
10
Oweeja cudaadaichomo dö’seeno
1“Chäänönge yääje wä’döa äwwäiñe, ñäädä oweeja cudaadaichomo nata’tadö ai omomjönö, aneetajaacocoono womoomödö, tämeenato ñäädä, chäänöngemjönö mmaja. 2Ñäädä oweeja edai’chäneichomo mmaane mönaatata ai yoomomöödö. 3Ñäädä wwääne mönaatata edai’chänei na’duca; oweeja töneeta weneeneto töwö dha’deddu. Töwö täcöntomo oweeja töna’dejjaiñe weneeneto chäätöcoomo ai, tömja’canö’joiñe yaawä. 4Tameedä ija’canö’ja’comjäcä dhowaajoiñe töötä yaawä töwö. Oweeja nötaato yaawä inchäcä, dhowaanäcäiñe yeijäcä dha’deddu. 5Towaanojöncomo ncäcä mmaane tä’da weneeneto ñanno oweeja; töwääneje mma näänejeeaato, dhowaanäcäiñe’da yeijäcä anejja a’deddu; quee cönä’döaacä Jesuuquidiito.
6Jesuuquidiito mädääje cöna’deuwöi chäwwäiñe yö’seeno joi; tönwanno dhowaanäcäiñe’da cönäätaacä.
Jesuuquidiito oweeja edai’chäneichomo aashichaatoje yeichö
7Edääje mmaja Jesuuquidiito cönä’döa’dea chäwwäiñe:
—Chäänönge yääje wä’döa äwwäiñe, öwö ñäädä mönaatata, oweeja womonto’como. 8Tameedä yoowajoodä cönä’ja’todö tämeena’como ñanno, chäänöngemjöncomo mmaja. Oweeja aneeta’da cöneiya’to dha’dedducoomo. 9Mönaatata öwö; ñäädä öwö yaiño womoomödö nääwanaaca’de. Töwö cudaada aca nomonga, töweeja’ca mmaja, täwanshiñö töneedantä yaawä.
10“Tämeenato ne’a ememme’que mma, ema mmaja, imaaminchaiñe mmaja; öwö mmaane we’ne chäwwäiñe yeicho’como töweiye yeichö wetä töwä’caamöje’da. 11Öwö ñäädä oweeja edai’chäneichomo aashichaato. Edai’chänei aashichaato töweichö nu’a oweeja jäcäinchädäiñe. 12Ñäädä täjeemadö jäcäinchädä mma oweeja edai’chänei mmaane to’nomja mma oweeja ne’nomjaato mado weejödö edanta’jäcä; näänejeea yaawä, oweeja edai’chänei ñeeneje’da töweijäcä, töwwonooje’da yeichomjäcä mmaja ñanno oweeja. Yaawä ñäädä mado oweeja neecajä’aato, nemeecantajaato dea. 13Ñäädä ewaacaajä näänejeea anontaajäje mma töweijäcä; oweeja tujunne’da naato chäwwä.
14-15“Öwö ñäädä oweeja edai’chäneichomo aashichaato. Jaaja owaanäcä wa öwö; öwö mmaja Jaaja yoowanääcä na dea. Mädääje mmaja sootoi, ñanno oweeja nönga’como; yoowanääcä naato dea, öwö dhowaanäcäiñe mmaja wa dea. Chääjäcäinchädäiñe weichö wu’a’de. 16Anejja oweeja töweiye mmaja naato dea öwwä, edä cudaada acancomoojönö; tönwanno mmaja täne’emje naato dea. Tönwanno netaato’de ya’deddu; tooni mma na’de cudaada, tooni mmaja oweeja edai’chäneichomo.
17“Jaaja jummatä weneene weichö tunu’e weijäcä, nudä weichö wetä mmaja yaawä yää ’jeje. 18Anejja yeemajai’cha na; öwö woije dea weichö wu’a. Öwö dea weichö u’jai wa, öwö mmaja eijai wa dea. Mädääje Jaaja yaanontäne; quee cönä’döaacä Jesuuquidiito.
19Yää eta’jäcä töwwäiñe äänönge’da judhío tö’tajäätödööcomo cönä’jaacä. 20Dhantai cönä’döa’to:
—Odo’sha ’je na; tö’jeta na. ¿Ane’cotoojo dha’deddu metaato? quee.
21Anejjacoomo ’quene cönä’döa’to:
—Mädääje a’deuwö’da tö’jetaato töweiye nai. ¿Aaquene mmaja odo’sha tänuuquemjönö enuudu aneejichö’tädö deaade’ ? quee cönä’döa’to.
Judhío wwäiñe Jesuuquidiito jo’ma’jödö
22Tu’que yeichö cönä’jaacä yaawä; Jeduusadén ña judhíocoomo comjedensiya cönnöa’to, yää Wanaadi weichojo amä’jödö jäcä tö’tajo’tojo anootoi’chädö. 23Yaawä Jesuuquidiito cönäämannä’acä Wanaadi weichojo taca, ijeesai chawä, Saadomón namääjo’jödö tawä. 24Judhío chäwwadäädä cöntonto yaawä; cönä’döa’to chäwwä:
—¿Ächännauwä’coto mädä ñaa wwä ääcamma’da maadö? Äwaanacaaneije aweiya’jäcä tooniye ääcammacä; quee cönä’döa’to.
25Yaawä Jesuuquidiito cönä’döaacä chäwwäiñe:
—Wääcammane deeade äwwäiñe; änwanno aneecamjö’da meiya’quene. Yää Jaaja woije tönnöe wääneneedö yää nene’ju’ja chäänöngatooje weichö. 26Yääje yeichaame aneecamjö’da maato, sootoije’da aweichomjäcä, jenaadä wä’döaaquennöje dea. 27Öwö sootoi ya’deddu töneeta weneeneto, tädhaajä a’deddu oweeja töneeta töweiye naichodööje. Yoowanääcä tönwanno; tönwanno öncäcä töötä weneeneto. 28Öwö wu’a chäwwäiñe töwaatamemjönö weichojo. Tönwanno ännamjö’da naato’de yeichöje. Anejja sootoi che yenwajiiñajai’cha na. 29Jaaja cuntuicho öwwä, ñäädä tameedä o’jodhaato; anejja sootoi che Jaaja enwajiiñajai’cha mmaja na dea. 30Öwö mmaja, Jaaja mmaja, ñäädä dea ñaa; quee cönä’döaacä Jesuuquidiito.
31Yää ’jeje yaawä judhío täju cönannä’jätöicho Jesuuquidiito töwääjätöödö wetä. 32Yaawä töwö cönä’döaacä chäwwäiñe:
—Jooje aashichaato wödööne aneenedööcomooje, Jaaja jäduudu woije; ¿äshono jo’tädööje wääjätö’se maato?
33Judhío cönä’döa’to yaawä chäwwä:
—Aashichaato tödö’jödö jo’tädööje’da äwääjätö’se ñaa na, Wanaadi jäcä cone’da awa’deuwödö jo’tädööjeene. Sotooje aweichaame Wanaadije äwäätä’tädö; quee cönä’döa’to judhíocoomo.
34Jesuuquidiito cönä’döaacä:
—Edääje imennaajä äwwäiñe naadö nä’döa: “Wanaadi yääje nä’döa: Wanaadija’como änwanno;” quee. 35Ñäädä Wanaadi ta’deddu tödönnamo wanaadija’comooje cöne’ta’to; cowaanäcäiñe na Wanaadi a’deddu imennaajä töquiiñeme’quemje’da yeichö. 36Jaaja ye’täne edä nono de’cäi töwe’emööje. Yääje yeijäcä ¿ane’que’nei cone’da Wanaadi jäcä wa’deuwödö me’taato iiñedööje wäätä’tädö weijäcä? 37Jaaja nödöödö nönge mmaja ännö’da weiya’jäcä yaawääne yeecamjö’da eijai maato. 38Dha’da Jaaja nödöödö nönge mmaja öwwä tödööa’jäcä önnödööne ecaanö’jai maato, öwö ya’deddu aneecamjö’da aweichaameiñe. Mädääje odhoowanääcäiñe eijai ña Jaaja yaaca yeichö, öwö dhaca weichö mmaja; quee cönä’döaacä Jesuuquidiito chäwwäiñe.
39Yää ’jeje mmaja judhío ajäi’she cönä’ja’to dea, töwäädä Jesuuquidiito dhantawonnoiñe cöneeja’caiñe’.
40Yaawä Jesuuquidiito cönennacai chea Joodadán mänsemjona, Juan Wautiita wautisaaje tönnöe yei’jödö doiña; yäätä cönä’jaacä yaawä. 41Jooje soto töötä cönä’ja’to yöiña. Tönwanno cönä’döa’to:
—Juan Wautiita ene’ju’tojo ännö’da cöneiyacä, yääje yeichaame Jesuuquidiito jäcä tameedä ya’deuwö’jödö chäänönge na; quee cönä’döa’to.
42Jooje yäätoncomo Jesuuquidiito cöneecamjöicho.
Currently Selected:
JUAN 10: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
