JUAN 9

Tänuuquemjönö ejiichö’tä’jödö

1Yaawä töötädaawä Jesuuquidiito dhanwa cöneedantäi; tänuuquemjönö cönä’jaacä, yennu’jödö jonnoto’jödöödä. 2Yaawä ñoowanoomadö Jesuuquidiito cöneecamma’joicho:

—Owaanomaanei, ¿änääcö cone’nadiiyö jo’tädööje tänuuque’da määdhä cönennui, yuumö’ja, töwööne? quee cönä’döa’to.

3Jesuuquidiito cöneccujä’a’to:

—Töcoone’nadiiyö jo’tädööje’da määdhä tänuuque’da cönennui, yuumö, yeenö cone’nadiiyö jo’tädööje’da mmaja, Wanaadi töjäädudu ñeenejooto’meene. 4Öwö tödööjai wa yaanontänei’jödö tadaawaajui ano naadawäädä; coijaicho ne’a wetaadawa’cajooto’jönö. 5Edä nono de’wä weichawäädä edä nono de’woncomo yeijoneichomooje wa; quee cönä’döaacä Jesuuquidiito.

6Yääje töwä’dö’jeje nono jo cönääta’däi yaawä; nono cönsoco’näi yaawä tätaacudu que. Yää tänuuquemjönö enuudu jäcä cönaajoijoi; 7cönä’döaacä chäwwä:

—Äjäänë; adheecoccata Siidoé cu’jäi aca; quee. Anontaajä; quee töwä’dö’se yeichö yää Siidoé, quee naadö.

Ñäädä tänuuquemjönö cöntämä yaawä; chu’jä aca cöneecoccai. Yaawä iiñano’jödö töwä’döa’jäcä töneene cönä’jaacä. 8Yaawä ijimmä mmaja, tänuuque’da yeichö enennamo’jödö mmaja, cönä’döa’to:

—¿Määdhäjöönö ca ñäädä, shuucu jödaata tönaateme’que cönä’ja’dö? quee cönä’döa’to.

9Anejjacoomo cönä’döa’to:

—Ñäädä mma’ne; quee.

Anejjacoomo ’quene cönä’döa’to:

—Ng’jn, ñäädäjöönö, ñöngato mma; quee.

Töwö jaiñoone cönääcammaacä:

—Öwö ñäädä; quee cönä’döaacä.

10Yaawä ñanno soto cöneecamma’joicho:

—¿Aaquene mmaja töneene mä’döi chea? quee cönä’döa’to.

11Töwö cöneccujä’a’to:

—Ñäädä Jesuuquidiitoje chäätö naichö nono nishooco’näi; yeenudu jäcä nödöi yaawä. Töwö nä’döaanä öwwä: “Siidoé cu’jäi aca adheecoccata;” quee. Weiya yaawä iiña; yeecoccai. Töneene wä’döi yaawä; quee cönä’döaacä ñäädä tänuuquemjönö’jödö.

12Yaawä ñanno cöneecamma’joicho dea:

—¿Äsha ca ñäädä nai eduuwa? quee cönä’döa’to.

Töwö cönä’döaacä:

—Ödha, yoowanääcä’da na; quee.

Jaadiseeo wwäiñe tänuuquemjönö’jödö ecamma’jojäätö’jödö

13Yääje mma yaawä tönwanno ñäädä tänuuquemjönö’jödö cönaadoicho jaadiseeo döiñaiñe. 14Wäädeetatoojo anooto awä cönä’jaacä socoojato tödöödawä Jesuuquidiito wwä tänuuquemjönö enuudu jäcä. 15Yääje yeijäcä ñanno jaadiseeo tänuuquemjönö’jödö cöneecamma’joicho:

—¿Aaquene töneene mä’döi? quee cönä’döa’to.

Töwö cönä’döaacä:

—Yeenudu jäcä socoojato nödöi; yeecoccai yaawä. Eduuwa töneene wa; quee cönä’döaacä.

16Yaawä anejjacoomo jaadiseeo cönä’döa’to:

—Wanaadi anoonöje’da na ñäädä dhanwa, yääje ayöödöichö, wäädeetatoojo anooto onnontä’da naadö naane’; quee cönä’döa’to.

Anejjacoomo ’quene cönä’döa’to:

—¿Aaquene mmaja dhanwa conemjönö ene’ju’tojo ännödö deaade’ ? quee.

Äänönge’da chö’tajäätödööcomo cönä’jaacä. 17Yaawä tänuuquemjönö’jödö cöneecamma’joicho dea:

—¿Änääcöje nichö’taanä äwwä ñäädä adheenudu choonecaanei’jödö? quee cönä’döa’to.

Ñäädä cöneccujä’a’to yaawä:

—Wanaadi anoonöje öwwä nichö’ta; quee.

18Judhíocoomo aneecamjö’da cönä’ja’to tänuuque’da yeichö jonno yääjichö’tä’jödö. Yääje yeijäcä tönwanno cöna’dejjaicho tänuuquemjönö’jödö umö, yeenö mmaja; 19cöneecamma’joicho:

—¿Ñäädä ca määdhä ännacontoncomo, tänuuque’da yennu’jödö mecamma’quennö? ¿Aaquene mmaja töneene nai chea eduuwa? quee cönä’döa’to.

20Yuumö cöneccujä’a’to yaawä:

—Ñaa owaanäcä na ñaa nnedööje yeichö, tänuuque’da yennu’jödö yeichö mmaja. 21Töneene yä’dö’jödö mmaane ñaa owaanäcä’da na; enu’tänei’jödö ñaa owaanäcä’da mmaja. Inchomo dajaane mä’dä, töwööne ecamma’jotääcä; töwö dea ääcammajai ña; quee cönä’döa’to tänuuquemjönö’jödö umö.

22Tönwanno yääje cönä’döa’to judhíocoomo nontädööje, yääje yä’dö’jocoomo weijäcä: “Anejja wwä Äwaanacaaneije Jesuuquidiito e’ta’jäcä tu’ca na’de yaawä cöjaadäiñe yeichö jonno;” quee yä’dö’jocoomo weijäcä. 23Yääje yeijäcä yuumö yääje cönä’döa’to: “Inchomo dajaane mä’dä, töwööne ecamma’jotääcä;” quee.

24Yää ’jeje cöna’dejjaicho dea ñäädä tänuuquemjönö’jödö; cönä’döa’to chäwwä:

—Wanaadi netaadöje ääcammacä; ñaa owaanäcä na ñäädä dhanwa conemjönööje yeichö; quee cönä’döa’to.

25Yaawä töwö cöneccujä’a’to:

—Yoowanääcä’da na aashicha yeichö, cone’da yeichö jeiñe mma. Yää mma yoowanääcä na, öwö tänuuque’da wä’jaaquene, eduuwaane töneene wa; quee.

26Yaawä cöneecamma’joicho dea:

—¿Aaquene ayöödöi? ¿Aaquene adheenu’täi? quee cönä’döa’to.

27Töwö cönä’döaacä chäwwäiñe:

—Wecammai cheeade’; yeeta’se’da mmaja mä’jaato deeade’. ¿Ane’cotoojo eta’se maato dea eduuwa? ¿Änwanno mmaja ca shootoije awei’sheiñe maato dea? quee cönä’döaacä.

28Yaawä tönwanno cönquiimajä’a’to; cönä’döa’to chäwwä:

—Amäädääne ’cännä shootoije ma. Ñaa mmaane Moisé sotoije ñaa na. 29Ñaa owaanäcä na Moisé wwä Wanaadi wa’deuwö’jödö. Ñäädä dhanwa mecammaadö mmaane yeejö’jödö jadä’jödöödä ñaa owaanäcä’da na; quee cönä’döa’to.

30Yaawä ñäädä tänuuquemjönö’jödö cönä’döaacä chäwwäiñe:

—¿Aaqueneeto mädä? Änwanno odhoowanääcäiñe’da töwö yeichaame yeenudu nichoonecai töwö. 31Cönwanno cowaanäcäiñe na Wanaadi aneeta’da yeichö conemjönö tödöönei a’deddu. Ñäädä a’deddu mmaane töneeta Wanaadi, tujummanei a’deddu, töwaanontä’jödö tödöönei a’deddu. 32Cönwanno aneeta’da dea caato soto wwä tänuuquemjönö wennuaajä ejiichö’tä’jödö. 33Ñäädä dhanwa Wanaadi anoonöje’da ei’jo tödööjai’chaane eijai; quee cönä’döaacä ñäädä tänuuquemjönö’jödö.

34Yaawä ñanno judhío cönä’döa’to chäwwä:

—¿Amäädä mmädä ñaa mowaanomannea, conemjönö acaano wennuaajä mmädä? quee cönä’döa’to.

Töjaadäiñe yeichö jonno cunu’caicho yaawä.

Tänuuque’da jaadiseeo wei’jocoomo

35Yääje mma yaawä Jesuuquidiito cöneetaacä tänuuquemjönö’jödö u’ca’jödö. Yaawä dhacä töwoojodööa’comjäcä töwö cönä’döaacä chäwwä:

—¿Mecaanö’anä Wanaadi nnedö? quee.

36Ñäädä cönä’döaacä yaawä:

—¿Änääcö töwö, wecamjöiye?

37Jesuuquidiito cönä’döaacä:

—Meneeaquenneeade’ töwö; öwö ñäädä, adhaacä ya’deuwaadö; quee cönä’döaacä.

38Yaawä tä’mudhe ñäädä cönä’döi Jesuuquidiito je’taca; cönä’döaacä chäwwä:

—Wecaanö’a, Cajiichaana; quee.

39Yaawä Jesuuquidiito cönä’döaacä:

—Öwö we’ne edä nonoodö de’cäi wätämmencajoonä ajäntojo, ñanno tänuuquemjöncomo töneene ä’döiyeto, ñanno tänuuca’como ’quene tänuuque’da ä’döiyeto; quee cönä’döaacä Jesuuquidiito.

40Yäätä cönä’ja’to anejjacoomo jaadiseeo. Tönwanno eöneeta’to yääje ya’deuwödö; cönä’döa’to:

—¿Tänuuque’da mmaja ca ñaa nai chea yääje yeiya’jäcä?

41Jesuuquidiito cönä’döaacä chäwwäiñe:

—Tänuuqueiñe’da meicho’jo mmaane ocoone’nadiiyöcoomo jo’tädööje täuwemje’da meichädö, töwäädä töneeneene töwäätä’tä määnetäänene’; yääje yeijäcä yää jo’tädööje täuwemje maato.

Currently Selected:

JUAN 9: MCH

Highlight

Copy