JUAN 11
11
Dáasado wääma’jödö
1Dhanwa cädäije cönä’jaacä, Dáasadooje chäätö. Töwö ijaatadö cönä’jaacä Wetaaniya ña, yää Madía jataadö, ijaichö Maadata jataadö mmaja. 2Ñäädä Madía cönä’jaacä juu shimi’jotoojo accanei’jödö Jesuuquidiito ’judu de’cäcä, tuju’jädö que choccanei’jödö mmaja; ñäädä jiyö cädäije cönä’jaacä. 3Ñanno Dáasado jadui’chomo soto cönaanontoicho Jesuuquidiito döiña, edääje ecamma:
—Owaanomaanei, aweichacoono cädäije na; quee ecamma.
4Jesuuquidiito wwä eta’jäcä töwö cönä’döaacä:
—Yää chäädäichö wäämato’jönö mma, jäduuje Wanaadi weichö eneejotoojoone, jäduuje Wanaadi nnedö weichö eneejotoojo mmaja; quee cönä’döaacä.
5Jesuuquidiito jooje tumjumma cönä’jaacä Maadata, ijaichö Madía mmaja, ijiiyötoncomo Dáasado mmaja. 6Yääje yeichaame Dáasado cädäije yeichö eta’jäcä Jesuuquidiito wwä, yäätäädä töwö cönä’jaacä aacä anooto, Dáasado döiña tä’da. 7Yää ’jeje aacä anoototo ai töwö cönä’döaacä tönoowanoomadö wwäiñe:
—Judheea ña cöötätäiyede; quee.
8Yaawä ñoowanoomadö cönä’döa’to:
—Owaanomaanei, eduuwaiche mma judhíocoomo täju que äwääjätö’se cönä’ja’to; ¿yääje yeichaame äätä’se mannea iiña mmaja? quee cönä’döa’to.
9Jesuuquidiito cönä’döaacä chäwwäiñe:
—Chääwa’cä na anooto numa yeichö. Ñäädä anooto wäämannäjöödö eju’cätä’da na, töwö töneene yeijäcä anooto nawaananö’cadö. 10Ñäädä tööjano’tacaano wäämannäjöödö mmaane töweeju’cä’e, yeijotoojo ’je’da yeijäcä; quee cönä’döaacä Jesuuquidiito.
11Yää ’jeje edääje mmaja Jesuuquidiito cönä’döa’dea:
—Cöjimmotoncomo Dáasado nönö’ca; öwö wöta iiñöcöödö jonno emjaca; quee.
12Ñoowanoomadö cönä’döa’to yaawä:
—Iiñöcöödö mma yeiya’jäcä töwö ä’jäjai ña; quee.
13Jesuuquidiito cöna’deuwacä Dáasado wäämadö jäcä; tönwanno cöneecanö’a’to iiñöcöödö jäca ya’deuwaatäi. 14Yaawä Jesuuquidiito sa’donna cöna’deuwöi chäwwäiñe:
—Dáasado töwääma na. 15Dhamma jeene chääjadä’da wä’jaaquene; äjääcäinchädäiñe yääje wä’döa, mecaanö’täiye. Queenetantäiye eduuwa; quee cönä’döaacä Jesuuquidiito tönoowanoomadö wwäiñe.
16Yaawä Tomá, ñäädä Canaacuje chäätö cönä’ja’dö, cöna’deuwöi töjimmä wwäiñe, ñanno Jesuuquidiito nowaanomaadö wwäiñe. Töwö cönä’döaacä chäwwäiñe:
—Cöötätäiye cönwanno, chääjadä cä’ja’täiye; quee cönä’döaacä.
Jesuuquidiito do’ta edhaajäje yeichö
17Yaawä Dáasado döiña Jesuuquidiito wä’döa’jäcä aacäichea anooto cönä’jaacä ewaaca’jödö jonno yeichö. 18Yää Wetaaniya ñano cönä’jaacä amoinche’da Jeduusadén ñano jäcä, tooni shii wä’seca’jödö wötäänä ’cäwa’cä mma amoinche yeichö. 19Yääje yeijäcä jooje judhío Jeduusadén ñancomo cöntonto Wetaaniya ña, Maadata, Madía döiñaiñe, ya’dädööcomo wetä ijiiyötoncomo wääma’jödö jäcä. 20Yaawä Jesuuquidiito weejödö eta’jäcä Maadata cöneeja’cai a’dejja; Madía cöno’nomjoi ä’saca. 21Yaawä Maadata cönä’döaacä Jesuuquidiito wwä:
—Owaanomaanei, amäädä eetä mei’jo jiiyö ääma’da eichö cöneiyacä. 22Yääje yeichaame yoowanääcä na Wanaadi u’jai yeichö tameedä chäwwä ane’catäädö; quee cönä’döaacä.
23Yaawä Jesuuquidiito cönä’döaacä Maadata wwä:
—Ajiiyö naadonca’de; quee.
24Maadata cöneccujä’acä:
—Yoowanääcä na yaadoncatoojo, yä’ja’a’como waadoncato’como anooto awä, anooto wataamedaawä; quee cönä’döaacä.
25Jesuuquidiito cönä’döaacä chäwwä:
—Öwö ñäädä töwäämaajo jonno weja’canä edhaajä, do’ta edhaajä mmaja. Ñäädä yeecanö’nei, töwääma’jödö weichaame naadonca’de. 26Ñäädä öwö yeecanö’nei ääma’da na’de yeichöje. ¿Yääje yeichö mecaanö’anä amäädä? quee cönä’döaacä Jesuuquidiito.
27Maadata cönä’döaacä chäwwä:
—Ee, Owaanomaanei, öwö wecaanö’a Äwaanacaaneije aweichö, Wanaadi nnedööje aweichö, edä nono de’cäi töwe’emööje cönä’ja’dö; quee cönä’döaacä Maadata Jesuuquidiito wwä.
Dáasado ewaadö dö’tä Jesuuquidiito waamo’jödö
28Yääje töwa’deuwö’jeje Maadata cöntäma töjiishö Madía a’dejja. Tacaade’da cöna’deuwöi chäwwä; cönä’döaacä:
—Owaanomaanei nä’döi; adha’dejjaanä; quee cönä’döaacä.
29Töwwä eta’jäcä Madía cönammöi yaawä; Jesuuquidiito döiña cöntämä. 30Jataaca ä’dö’da dea Jesuuquidiito cönä’jaacä; yäätä dea cönä’jaacä, Maadata acä töwoojodö’jocoomo dö’täädä. 31Tamjä’ne Madía weja’cadö judhíocoomo cöneenea’to, ñanno chääjadä maa tacancomo’jödö, ijiiyötoncomo wääma’jödö jäcä ya’dännamo’jödö. Tönwanno cöneeja’caicho yaawä inchäcä; äwa döiña töwaamodö wetä iichaatäi cöneecanö’a’to.
32Yaawä Jesuuquidiito döiña Madía wä’döa’jäcä tä’mudhe cönädöi ije’taca; cönä’döaacä:
—Owaanomaanei, amäädä eetä mei’jo jiiyö ääma’da eichö cöneiyacä; quee cönä’döaacä.
33Yaamodö eneea’jäcä Jesuuquidiito wwä, judhío chääjadoncomo weejö’jödö waamodööcomo eneea’jäca mmaja, wentumje cönä’döjoi yaawä; jooje cone’da cönä’jaacä. 34Töwöcönä’döaacä chäwwäiñe:
—¿Äsha mewaacatääne?
Tönwanno cönä’döa’to:
—Ä’cäde, meneiye; quee.
35Yaawä Jesuuquidiito cönaamoi. 36Yaawä judhío cönä’döa’to:
—Joojeene tumjumma cönä’jaacä; quee.
37Anejjacoomo judhío cönä’döa’to:
—Tänuuquemjönö ejiichö’tänei’jödö määdhä; ¿aaquene Dáasado anaadonca’da cönä’jaacä, ääma’da yeichö wetä? quee cönä’döa’to.
Dáasado adonca’jödö
38Yaawä Jesuuquidiito cone’da cönä’döjoi chea; cönä’döi yaawä äwa döiña. Yää cönä’jaacä ya’tadö mmädä; täju cönä’jaacä ye’wä, dha’dutuuje tödööajä. 39Jesuuquidiito cönä’döaacä:
—Täju eseecatääcä; quee.
Yaawä Maadata, ñäädä yäämaajä jaduichömjödö, cönä’döaacä:
—Owaanomaanei, töcääque na töwö eduuwa; aacäichea anooto nä’döi eduuwa yääma’jödö jonno yeichö; quee cönä’döaacä.
40Yaawä Jesuuquidiito cönä’döaacä chäwwä:
—¿Yääje jönca wä’döaanä äwwä, ecaanö’a’jäcä äwwä Wanaadi jäduudu meneea’de; quee jönca wä’döaanä? quee cönä’döaacä Jesuuquidiito.
41Yaawä täju cöneesecaicho yäämaajä a’duaajä de’wonno. Caju ña ene’mancädä Jesuuquidiito cönä’döaacä:
—Jaaja, ta’cwaiñe wa ya’deddu töneeta aweijäcä. 42Öwö yoowanääcä na wa’deuwödö töneeta aweichö. Canno eetä naatoodö netaadöcoomoje ya’deuwa äwwä, tönwanno ecamjöiyeto yaanontänei’jödööje aweichö; quee cönä’döaacä Jesuuquidiito.
43Yääje töwa’deuwödö’jo täta cöna’deuwöi:
—Dáasado, adheeja’cacä; quee cönä’döaacä.
44Yaawä ñäädä yäämaajä’jödö cöneeja’cai. Dhamäädö, i’judu mmaja tömööjä’e cönä’jaacä yäämaajä iwontotoojo que. Ijeedö töwonque cönä’jaacä jaañaweeda que. Yaawä Jesuuquidiito cönä’döaacä soto wwäiñe:
—Yoncatääcä eduuwa, oojoimaiye; quee.
Jesuuquidiito ajäichö a’de’tä’jödö
45Yaawä jooje judhío, ñanno Madía döiñancomo weejö’jödö, Jesuuquidiito cöneecamjöicho yääje iiñödö eneedö’jo. 46Dhantai mmaane jaadiseeo döiñaiñe cöntonto; chäwwäiñe cöneecammajäätöicho Jesuuquidiito nödö’jödö. 47Yaawä jaadiseeo cöne’jummaicho Wanaadi wwä töwa’deuwaamo edhaajotoncomo jadäiñe, äcamma’jonnamo jadäiñe mmaja. Tönwanno cönä’döa’to:
—¿Aaquene tödööjai caato? Ñäädä dhanwa jooje ene’ju’tojo tönnöe weneene. 48Ännö’da cöweiya’comjäcä tameedä soto ecaanö’jai ñaato yaawä. Yaawä domaanocoomo e’jai ñaato Wanaadi weichojo cönaamo’jocoomo chaadaca, cöja’eiñe mmaja; quee cönä’döa’to.
49Yaawä Caijaasa cöna’deuwöi; ñäädä cönä’jaacä Wanaadi wwä töwa’deuwaamo edhaajotoncomooje yää wedu awä. Töwö cönä’döaacä:
—Chö’tajäätö’da deja maato dea änwanno. 50¿Aaquene äntö’tammecö’da maato dea tooni dhanwa mma äämajai yeichö tameedä judhíocoomo wä’jajoodöcoomo queiñe? quee cönä’döaacä Caijaasa.
51Töwö towoinchadä yääje cönä’döaacä. Töwö Caijaasa yää wedu awä Wanaadi wwä töwa’deuwaamo edhaajotoncomooje yeijäcä Wanaadi yääje cöna’deujojoi judhío jäcäinchädäiñe Jesuuquidiito wäämadö jäcä. 52Judhío jäcäinchädäiñe mma’da Jesuuquidiito wäämadö; tameedä soto jäcäinchädäiñeene, tameedä Wanaadi nnacoomo wäämecanta’como i’jummadööcomo wetä. 53Yää anooto jonnoto’jödöödä ñanno judhío täneejuca’como töntö’tamme’que cönä’ja’to Jesuuquidiito emaadö.
54Yääje yeijäcä tacaade Jesuuquidiito äämannäjö’da töweiye cönä’jaacä judhío döiñaiñe. Judheea ñanno töwö cöntämä anejja jataaca, jata ’jemjönö jäcä amoinche’da; Eujadaín ñano cönä’jaacä yää jata. Yäätä töwö cönä’jaacä tönoowanoomadö jadäiñe.
55Yaawä amoinche’da cönä’jaacä Weja’dätä’jä anooto comjedensiyai’chädö, yää judhío we’jummato’como cu’nädö. Jooje soto cöntonto Jeduusadén ña töwaatamoichadööcomo wetä yää anootoi’chädö owaajo. 56Tönwanno Jesuuquidiito cunuujiya’to. Yaawä Wanaadi weichojo taca töweichöcoomo tönwannoje dea cönä’döa’to:
—¿Aaquene nichö’taanä äwwäiñe, eejö’da ca Jesuuquidiito eichai’che comjedensiya döe? quee cönä’döa’to.
57Ñanno jaadiseeo, Wanaadi wwä töwa’deuwaamo edhaajotoncomo mmaja, cönä’döa’to:
—Jesuuquidiito eneea’jäcä äwwäiñe ecammatantäcä’de ñaa wwä, jedeesoje ñaa tödöiye yaawä; quee.
Currently Selected:
JUAN 11: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
