JUAN 12

Juu shimi’jotoojo que Jesuuquidiito töjö’jödö

1Tooni amoojato anooto mmädä a’que cönä’jaacä Weja’dätä’jä anooto comjedensiyai’chädö tödöötojo aca yä’dötoojo. Yaawä Jesuuquidiito cöntämä Wetaaniya ña, Dáasado jataacäi, ñäädä yäämaajo jonno tönaadonca’jödö. 2Yäätä tujuumä cönääwashinchoicho Jesuuquidiito jäcä ta’cwaiñe töweichomjäcä. Maadata cönä’jaacä äwanshi tödööneije; Dáasado mmaane Jesuuquidiito jadoncomo wääwashinchädö jadä yaatajiimaajä cönä’jaacä. 3Yaawä Madía juu shimi’jotoojo täjeeto cönannäjöi, tooni tucuudi annaicho ’cäwa’cä. Chääque Jesuuquidiito ’judu cömjöi; i’judu cöncoccai yaawä tuju’jädö que. Tameedä maa weichö wa’cä ijoodö cömjotai. 4Yaawä Jesuuquidiito nowaanomaadö cöna’deuwöi, ñäädä Juudha Icaadiyoote täätö, Simón nnedö; ñäädä dea cönä’jaacä Jesuuquidiito u’neije töweiyemö. Töwö cönä’döaacä:

5—Mädä juu shimi’jotoojo täjeemajomje nä’jaanä juujatonnä sotooto ’cäwa’cä jödaata, chääje’jödö utuudu wetä yaawä wentumja’como wwä; quee cönä’döaacä Juudha Icaadiyoote.

6Wentumja’como jäcä chö’tajäätö’da töweichaame yääje Juudha cönä’döaacä, tämeene töweijäcääne. Ñäädä Juudha cönä’jaacä töjöödataichomo edhaajäje ñeewaacadööcomo; yää töneememme’que töweiye cönä’jaacä. 7Yaawä Jesuuquidiito cönä’döaacä chäwwä:

—Na’ñojo; töwö mädä nödöi nono aca yeewaacadö owaajo. 8Wentumja’como ajaadäiñe naato’de yeichöje; öwö mmaane yeichöje’da ajaadäiñe weichojo na; quee cönä’döaacä Jesuuquidiito.

Dáasado emaadö a’de’tä’jödö

9Jooje judhíocoomo cöneeta’to Jesuuquidiito Wetaaniya ña yeichö. Yaawä tönwanno cöneejoto Jesuuquidiito ene mma’da, Dáasado eneedö jadä mma, ñäädä Jesuuquidiito yäämaajo jonno ñaadonca’jödö. 10Yaawä Wanaadi wwä töwa’deuwaamo edhaajotoncomo Dáasado emaadö cöna’de’toicho. 11Tönwanno ema’se cönä’ja’to chääjäcäinchädä jooje judhío wwäiñe to’nomjadööcomo weijäcä Jesuuquidiito ecamjödö wetä.

Jeduusadén ña Jesuuquidiito wä’dö’jödö

12Jooje soto we’jumma’como cönä’ja’to yaawä Jeduusadén ña, yää Weja’dätä’jä anooto comjedensiyai’chädö tödönnamo. Yää jenamma naadöje tönwanno cöneeta’to Jesuuquidiito Jeduusadén ña yeejödö. 13Tönwanno wasai adö cönaacä’jätöicho; yää dha’me Jesuuquidiito wwadäädä cöntonto, edääje töcä’tömjä’ancädäiñe:

—Aashichaato ñäädä Wanaadi. Aashichaato määdhä Cädhaajotoncomo eetö joiño we’ajä. Aashichaato määdhä iisadaaediitacoomo Cajiichaanaichomo; quee cönä’döa’to.

14Jesuuquidiito cawaayu nnedö’cä ejoodöa’jäcä, ye’wä cönäncui. Yää cönä’jaacä Wanaadi a’deddu imennaajä wä’dödö nönge:

15Määcatoncatäi änwanno Siyon ñancomo.

Eneetäcä’ma, acaajichaanaichomo näänejoichö cawaayu nnedö’cä de’wä; quee imennaajä wä’dödö.

16Awa’deene Jesuuquidiito nowaanomaadö yää imennaajä äntö’tammecö’da cönä’ja’to. Jesuuquidiito wöta’jäcä caju ña yaawääne cöntö’taicho yää imennaajä Jesuuquidiito jäcä yeichö; yää weja’dätä’jödö jäcä cöntö’taicho dea.

17Ñanno soto, yäämaajo jonno Dáasado adoncadaawä Jesuuquidiito jadoncomo’jödö, cöneecammajäätöicho yää jäcä, Dáasado adonca’jödö jäcä. 18Yääje yeijäcä soto cöntonto Jesuuquidiito döiña töwwäiñe eta’jödö weijäcä aashichaato tödö’jödö chäwwä. 19Yaawä jaadiseeo cönä’döa’to tönwannoje dea:

—Tödöötojo ’je’da na; tameedä soto Jesuuquidiito nijummaato; quee cönä’döa’to.

Quidiiyeeco wwäiñe Jesuuquidiito uji’jödö

20Yäätä Jeduusadén ña cönä’ja’to anejjacoomo quidiiyeecocoomo, Weja’dätä’jä anooto comjedensiyai’chädö tödönnamo we’a’como. 21Tönwanno cöntonto Jediipe döiña, ñäädä Wesaada ñano, Caadideea ñano jataawono. Tönwanno cönä’döa’to chäwwä:

—Jesuuquidiito ene’se ñaa na; quee.

22Yaawä Jediipe cöntämä; cöneecammai yaawä Antedé wwä. A’nädä cöntonto yaawä Jesuuquidiito wwä ecamma. 23Jesuuquidiito cönä’döaacä chäwwäiñe:

—Eduuwa chu’nädö aca nä’döi Soto nnedö aashichaatoje töweichö eneejotoojo. 24Chäänönge yääje wä’döa äwwäiñe, äiña adöödö ñaatö’taajä e’mo’da yeiya’jäcä a’tajai’cha na yaawä. Dha’da ye’moa’jäcä yaawääne a’tajai ña; jooje chääjedöödö töweiye na yaawä. 25Ñäädä töweichö ewontänei, töweichö nennanö’ca’de; ñäädä edä nono de’wä töweichaame töweichö ewontäneijönö mmaane, töweichö neneea’de. 26Ñäädä sootoije töwei’shato waanontädö woije nödö’ñojo; öwö weichö dö’tä mmaja sootoi ña’de. Ñäädä öwö woije tödöönei jäcä Jaaja nödööa’de aashichaato.

Töwäämatoojo jäcä Jesuuquidiito necammajäätö’jödö

27“Eduuwa cone’da wa yeewanö jäcä. ¿Aaquene ä’döjai wanä? Yääje ä’döjai’cha wa Jaaja wwä: “Cowontäcä mädä jääcä töweeja’dä’emö jonno;” quee ä’döjai’cha wa, mädä shinchääne we’eetö’da. 28Jaaja, aashicha aweichö eneejocä; quee cönä’döaacä Jesuuquidiito.

Yaawä a’deu cönäätaacä caju ña:

—Öwö aashicha weichö töneenejo wäänene; eduuwa weneeja’dede; quee cönäätaacä a’deu.

29Yäätoncomo soto cöneeta’to a’deu; yeetötöömadö nönge cöne’ta’to. Anejjacoomo mmaane cönä’döa’to:

—¿Amoode’da na’deuwöi chäwwä? quee.

30Yaawä Jesuuquidiito cönä’döaacä chäwwäiñe:

—Öwö jääcäinchädä’da mädä a’deu näätaanä, änwanno äjääcäinchädäiñeene. 31Eduuwä nä’döi edä nono de’woncomo emmencato’como aca. Eduuwä nä’döi edä nono de’wono waanontädö u’catoojo, ñäädä odo’sha. 32Öwö edä nono jonno waatannä’ja’jäcä tameedä soto wene’aato’de öwwadäädä; quee cönä’döaacä Jesuuquidiito.

33Töwö yääje cönä’döaacä cuduusa jäcä töwäämatoojo jäcä ecammancädä. 34Yaawä soto cöneccujä’a’to; cönä’döa’to:

—Ñaa jajeedai necamma yeichöje Äwaanacaanei weichojo. ¿Aaquene yääje mä’döaanä, Soto nnedö natannä’ja’de; quee? ¿Änääcö ca ñäädä Soto nnedö? quee cönä’döa’to ñanno soto.

35Jesuuquidiito cönä’döaacä chäwwäiñe:

—Numa’da mma ajaadäiñe weiyu weichojo na eduuwa. Äämannä’täcä weiyu ajaadäiñe naadawäädä, ätööjanto’no. Ñäädä tööjano’tacaano wäämannäjöödö towaanäcä’da naadema. 36Weiyu ecaanö’täcä ajaadäiñe naadawäädä, tawaanato awoncomooje meichäiye; quee cönä’döaacä Jesuuquidiito.

Yääje töwa’deuwö’jeje Jesuuquidiito cöntämä yäätonno, etoone’tädööcomooje mma.

Jesuuquidiito aneecamjö’da judhío wei’jocoomo

37Ñeenedööcomooje jooje ene’ju’tojo tödö’jödö weichaame Jesuuquidiito wwä, ñanno judhíocoomo aneecamjö’da dea cönä’ja’to. 38Tönwanno cönä’ja’to Isaía nimennä’jödö nönge, ñäädä Wanaadi wa’deuwödö ecammanei. Edääje cömmennäi Isaía:

Cajiichaana, ¿änääcö ñaa necammajäätödö cöneecamjöi?

¿Änääcö wwä Cajiichaana cöneenejoi töjäädudu? quee cömmennäi Isaía.

39Yääje yeijäcä ecaanö’jai’cha cönä’ja’to. Edääje mmaja Isaía cömmennäi chea:

40Tänuuque’da Wanaadi cönnöicho, töwäätuujacoone’daiñe mmaja,

tänuuducoomo que mma aneene’noto,

täwaanöcoomo jäcä mma chö’tajäätö’noto,

töweichöcoomo mma änsa’dumincha’noto,

öwö waneewanaaca’noto yaawä; quee cömmennäi Isaía.

41Ñäädä Isaía yääje cömmennäi Jesuuquidiito jäduudu ene’jödö weijäcä töwwä; Jesuuquidiito jäcä cöna’deuwacä.

42Dhantai judhíocoomo Jesuuquidiito aneecamjö’da yeichaameiñe anejjacoomo cöneecamjöicho, cajiichaanacoomo jadä’jödöödä. Tacaade’da mma cöneecamjöicho, jaadiseeo nontädööcomooje, judhío jadä töweichöcoomo jonno tu’cadööcomo queiñe. 43Tönwanno aashicha soto wa’deuwödö töjääcäiñe tumjumma cönä’ja’to jooje’cä, Wanaadi wa’deuwödö e’jodhe’cä.

Jesuuquidiito a’deddu Wanaadi woijatooje yeichö

44Yääje mma yaawä Jesuuquidiito töcä’de cöna’deuwöi; cönä’döaacä:

—Ñäädä öwö yeecanö’nei, öwö mma’da necaanö’a, yaanontänei’jödö mmajaane. 45Ñäädä öwö yeenenei, neneea dea yaanontänei’jödö. 46Öwö edä nonoodö de’cäi we’ne weiyuuje, tööjano’taca’da yeecanö’nei yeichö wetä. 47Ñäädä ya’deddu etaataame ännöjöönö, öwwä’daane nätämmencaja’de; öwö we’ne edä nono de’woncomo emmencaiñe’da, ewaanacaiñeene. 48Ñäädä quiiñeme’nei, ya’deddu ämjummajöönö, nätämmencaja’de. Anooto wataamedaawä töwö nätämmencaja’de yää eduuwa töwa’deuwe wääneneedö eta’jödö weijäcä töwwä. 49Öwö woije mma a’deuwö’da wa; ñäädä Jaaja, yaanontänei’jödö, cuntui öwwä wa’deutojo, noowanoomatoojo mmaja. 50Yoowanääcä na Jaaja waanontädö yeichöödäje weichojooje yeichö. Yääje yeijäcä Jaaja waanontädö woije töwa’deuwe wäänene; quee cönä’döaacä Jesuuquidiito.

Currently Selected:

JUAN 12: MCH

Highlight

Copy