Génesis 18
18
Ablaamö nija a̦jele täbä
lä damolaliyono wei tä a̦
1Bei. Mamle efibä bada lä ublajaono wei jamö, ö̦jamö lä, Ablaamö nija Jeobaa bei tä damolaliyoma. Motoca a caöblou däjä, bei yoca lä joleono wei jamö, a möfe boo ca̦i loo däjä, bei a bädaliyoma. 2Ablaamönö tä fa mödalönö, cama a mö yaiobä jamö, fama 3 bä ublaa dalalema. Lobe a fa ubladalunö, bä nabä läläa showaquema. Dodijidawä bä waloamaö ja, mashita jamö a möfe deialiyoma.
3Ai a nija, abinaja a cuma.
—Bada tä. Wamacö jayublou shi jalio mlai ja, wamale nofimaö ja, wamale nofi lobou jayuaö da balöo. ¿Ö̦jö tawä? Cafä bäfä a̦ juabä ya malä cui. 4Mau ya ubä wajaquemi fa nacalänö, wamacö mamicö li yalumamou balöo mlai, ¿ö̦jö tawä? Wamacö mamicö ya̦lömou fa balölönö, fii defi lä ublale jamö, tä si lä ajile jamö, wamacö washimi jolou däjä, 5afä nii ya wai wajaquemi däabä. Camiyä nija wamacö malä cule. Wamacö jayublou showao no mlai ja, wamacö iyaö fa balölönö, wamacö bufi lojodoblou co̦obä —a cuma.
—Inaja lä waiquiwä —cama bä cuu mö feduoma.
6Lobe Ablaamö a fa falönö, bei suwäbö Sara e shömölema.
—Bei. Lobe, lobe. Ji̦bä yai lä dodijidai ji̦bä ja, 3 wa ji̦bä fa jiquelänö, wa ji̦bä fa jumölalönö, ji̦bä lamöblaö da showadalo —a cuma.
7Baca bä lä cuono wei jamö, Ablaamö a läläa fa nomöjölönö, ocalo a yai lä daböono wei a yalo fa yailönö, a nosie juamobä e nija a shämabä, a nabä shömöquema. Ö̦jö a lä cuinö, lobe a yalo fa cobelalönö, bä löböblalema. 8Bä fa löböblalönö, Ablaamönö yalo bä löbö fa däalalönö, fama bä nija bä baaquema. Bä defiabeje, yalo bä sujubä yädämaquema, dabö dabö bä ca̦i yädämaquema. Fii defi cotä jamö cama bä iyaö ca̦i loo däjä, Ablaamö a ublao yädäo showaoma.
Ablaamö bei ijilubö e a̦fa
wäyäö lä balöono wei tä a̦
9Ablaamö nija, bei suwäbö e wa̦limaje.
—¿Wedi jamö suwäböfä Sara bei a li?
—Ei yano jamö, a cua lä cule —Ablaamö a cuma.
10Fama bä nija Jeobaa tä fa coyocoicunö, abinaja e cuma.
—Sara a fa shibönabölönö, obi, ei a belibo cublou co̦o däjä, bei ijilubö e nia tabou. Bejedi lä ya wa̦. Wafä a ijilu tabou däjä, ya nia juu co̦o —Jeobaa a cuma.
Ablaamö mabucabö jamö, bei yoca lä cuono wei jamö, Sara a ublaa fa ja̦toalunö, a yömöca dadio ja̦tooma.
11¿Ö̦jö tawä? Ablaamö a wa̦lobadaoma. Sara a suwäbadaoma. Cäcöbö nö dedewä dodijiwä waiquiwä cudeenö, Sara a loo mladou waiquilayoma. 12A suwäbada waiquioma yalo, bei bufi jamö a i̦cablalou ja̦tooma. “Inaja ya cublou mlaicätä”, a bufi cudaliyoma. “Ya wa̦lidio waiquio däjä, iba wa̦lo a wa̦lobada ma waiquii, ¿wedi tä tabä yafäcö li möyou cuquei?”, a bufi cuma.
13Ablaamö nija Jeobaa a wa̦ faa showalayoma.
—¿Wedi tä tabä Saranö wale noca li i̦cablalaö dicoo cufe? ¿Wedi tä tabä, “Ya suwäbada ma waiquii, ¿ijilu ya li taa fe yadiquei”, a li cuu dicoo? 14Camiyä Jeobaa yale doblamaö mlaobä tä cuami. Obi, ei a belibo cublou co̦o däjä, bäfä fe waloo co̦o weicätä. Ya wa̦ nö wäo malä waiquiofe. Ö̦jö däjä, Saranö bei ijilubö e nia tabou —a cuma.
15Sara a quilima yalo, a wa̦ mojodumoma.
—Ma, ya i̦clablalonomi—a jole cuma ma cui,
—Ma mlai, wa malä i̦clablalofe —a cuu mö feduoma.
Sodomateli bä nija Jeobaa
a nia lä ishono wei tä a̦
16Bä fa iyalönö, Ablaamönö bä ca̦i falayofälöma. Bä fa bayäcäblaludunö, tä möö cuaamaje. Cama bä lä ublaono wei tä bebi ja, Sodomateli bä shabonobö bebiblaa dalalemaje.
17Abinaja Jeobaa a bufi cuma. “Ya nia lä cuaaö wei tä ja, Ablaamö ya mojodumabobä ami. 18Cama ebä fa blucablalunö, bä nia bälöjou lojodoo malä yaiblamou wei. Bluca bä lä yaiblai, cama nija bä nia bayeliblamou fe malä dolemou wei. 19Ya mojodumabou mlaicätä. Cama bei ijilubö ebä fa yömölabonö, ebä cadidou juo nomöjöobä, ya malä yaileno wei. Cama ebä bluca lä cuinö, Jeobaa wale a̦ juaö nodiablalobeje. Ya tä tamaö lä bufii wei tä tabeje. Inaja bä cuaaö showao däjä, ya bä bluca bayelibobä. Ya wa̦ nö wäo lä balöono wei däjä, ya lä cuno weinaja showawä”, a bufi cuma.
20Einaja Jeobaa a bufi fa cudalunö, Ablaamö nija a wa̦ fama.
—Sodomateli, Comolateli bä a̦ wa̦no ji̦limou wa̦lioblou ja, tä lä taö wejei tä doemi dodijiwä yalo, 21öjamö ya nia dömöbaliyofälöö. Camiyä nija, bä nofi a̦fa jushuaö lä wäyäö wejei, ya bä a̦ bejedi möbä. Inaja tä cua ja, ya tä dablaö cuquei —a cuma.
22Einaja a fa cunö, Sodomateli bä nijamö, ai täcöbö fama lä cui, täcöbä jayublaliyoma ma cui, Jeobaa nija, Ablaamö a ublao juo showaoma. 23Ö̦jö däjä, Ablaamö a icua fa ajedeicunö, a wa̦lii cadidioma.
—Bä doblou lä mlai wa bä waicaö däjä, ai bä lä dodijaö wei, ¿wa bä mö ca̦i watäblaö showao mö feduobä tawä? 24Sodomateli bä nija bä lä dodijaö wei, 50 bä bluca coyocoa ja̦toa bäa fa cule. Inaja bä bluca cua ja, ¿wa bä nofi bluca asibobä tawä? Inaja bä bluca ma cule ma cui, ¿wa bä mö bluca jödödöwä watäblaö showaobä tawä? 25Inaja cafä wa nö cuaabö mlai. Bä doblou lä mlai wa bä waicaö däjä, bä lä dodijaö wei wa bä waicaö coyocabä wa malä mlai. Bä nofi jushuaö ma mlai ma cui, jai cama bä nofi ca̦i jushuaö mö feduo, cafänö wa bä nö taamabö mlai. Inaja a cuu dicoo dijä. Bluca täbä lä bälöjöi, wa täbä jömabä wa. Wa täbä jömaö däjä, wa wa̦ cadidou showawä —a cuma.
26Jeobaa a wa̦ julayoma.
—Sodomateli bä nija, bä lä dodijaö wei, 50 ya bä coyocoa dablaö ja, ö̦jamö lä ya bä nofi bluca asiblalei. Bä lä dodijaö wei bä coyocoa ja, ö̦jö täbä nowa ja, ya bufi läo weicätä —a cuma.
27Ablaamö a wa̦ faö co̦oma.
—Shädayai. Camiyä yanowamö ya bädawä lä cui, cafä Bada wa nija ya wa̦ fabä ya mlai ma cui, ya wa̦ wabäo da co̦o. 28Bä lä dodijidai 50 bä cuami ja, 45 bä cua bädaa ja, ¿wa bä mö bluca watäblaö showaobä daanö? —a cuma.
Bada tänö a wa̦ jua co̦lema.
—Sodomateli bä nija, bä lä dodijaö wei 45 ya bä coyocoa dablaö ja, ya bä mö bluca watäblaö fe yadio mlaicätä.
29Ablaamö a wa̦ faö co̦oma.
—Cuwi. Bä lä dodijidai 40 bä shino coyocoa bäa fa cule —a cuma.
—Ja̦o. Ö̦jö 40 bä lä dodijaö wei bä cua ja, ö̦jö täbä nowa ja, ya ishou mlaicätä —Bada tä cuma.
30Ö̦jö däjä,
—Shädayai. Ya wa̦ faö co̦o ja, a jushuo dicoo dijä. Bä lä dodijaö wei, 30 bä shino coyocoa bäa fa cule —a cuma.
A wa̦ jua co̦lema.
—Ö̦jö 30 bä lä dodijaö wei bä cua ja, ya ishou mlaicätä —a cuma.
31Abinaja Ablaamö a cuu co̦oma.
—Shädayai. Camiyä yanowamö ya bädawä lä cui, cafä Bada wa nija ya wa̦ fabä ya mlai ma cui, ya wa̦ wabäo da co̦o. Bä lä dodijaö wei, 20 bä shino coyocoa bäa fa cule.
Bada tänö a wa̦ julema.
—Ö̦jö 20 bä lä dodijaö wei bä cua ja, ya bä mö bluca watäblaö mlaicätä —a cuma.
32Ö̦jö däjä, abinaja Ablaamö a cuma.
—Shädayai. Ya wa̦ faö co̦o ja, a jushuo dicoo dijä. Moli ya wa̦ nia faö co̦o. Bä lä dodijaö wei, 10 bä shino coyocoa bäa fa cule.
—Ö̦jö 10 bä lä dodijaö wei bä ca̦i cua ja, ya bä mö bluca watäblaö mlaicätä —a cuma.
33Ö̦jö däjä, Jeobaa a wa̦ faa co̦daanomi. Ablaamö a yömölaa fa jödödöblalönö, a alayoma. Ablaamö a ca̦i co̦a showalayoma.
Currently Selected:
Génesis 18: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
