Génesis 19

Sodomateli bä nofi lä

jushuano wei tä a̦

1Sodomateli bä nija, a̦jele täcöbö lä cui, täcöbö fama weyade waloquema. Ö̦jö bä alabö nacö yoca lä joleono wei jamö, Lodo a weyade loo däjä, täcöbö waloquema. Lodonö täcöbö fa dalalönö, a ubladou mö balayoma. Dodijidawä täcöbö waloamabä, mashita jamö, a möfe deialiyoma. Abinaja a cuma.

2—Bada wafäcö. Cäcöbö jayublou showadao dicoo dijä. Camiyä nija wafäcö mio fe jalubä. ¿Ö̦jö tawä? Bäfäcö a̦ juabä ya waiquiwä. Wafäcö mamicö ca̦i fa yalumolunö, dodijidawä wafäcö cuobä. ¿Ö̦jö tawä? Wafäcö la̦a fa fenablalunö, wafäcö juu fenao co̦ofälöbä —a cuma.

—Ma. Eja yafäcö cuo fe jaluu bädao weicätä —täcöbö cuma.

3Ö̦jö ma cui, Lodo a wa̦ fe fa blacäjonö, ya̦cumö cama nija täcöbö yauquema. Lodo yafibö jamö täcöbö fa falönö, cama ebä nija, nii bä bluca tamaö bufima. Ji̦bä ca̦i laamaö showadao fa bufinö, bä bluca iyalayoma. 4Ö̦jö ma cui, bä mio showaono mlai ja, ö̦ja bä wa̦lo bluca lä bälöono wei bä lä cui, Lodo e yano jamö, bä bluca fa waloicunö, e yafi fe didi fa̦yoblalemaje. Oshe bä ma cui, fiya bä ma cui, wa̦lobada bä ma cui, Sodomateli bä bluca fa yododoalunö, 5Lodo nija bä a̦ i̦cali comöblaloma.

—Cafä nija wa̦lo cäcöbö lä waloicufe, ¿wedi jamö bei cäcöbö li? Cäcöbö da famalö, yama bä juwämabä —Lodo nija bei bä cuma.

6Ö̦jö bä nija Lodo a fa falöfälönö, yoca laa mö yabaquema. 7Abinaja bä nowa tama.

—Iba wamacö, wamale a̦ da ji̦lilä, ¿ö̦jö tawä? Inaja bä cuaa dijä. Tä nö doblobö malä mlai. 8Bei. Tääyä bolacabö cäcöbö cua lä cule, wa̦lo bänö cäcöbö jubaö dao lä mlajei. Cafä wamacö nija ¿ö̦jö ya cöbö yai famabä tawä? Wamacö cuaaö lä bufio weinaja wamacö cuaabä. Ö̦jö ma cui, fei wa̦lo täcöbö lä cui, täcöbö juwäma dijejä. Iba yafi jamö dodijidawä ya täcöbö li tamabobä, täcöbö malä waloqueno wei —bä nowa tama ma cui,

9—¡Uo! ¡Mijamö! A da bayäcälö —bä jushuo ca̦i cuma—. Cafä shomiteli wanö, yamalecö a̦fa tabä wa malä mlai. Inaja wa cuu dicoo ja, cama yama cäcöbö juwämaö ayao mlai, fei däjä cafä bäfä nia yai juwäaö dodijio —bä cuma.

Inaja bä fa cunö, Lodo a i̦cali fa ja̦ilöjenö, bei yoca wa̦liaö showadaobeje bä bluca ajededou showalayoma. 10Ö̦jö ma cui, a̦jele täcöbö fama lä cuinö, lobe beli yoca fa caloblabölönö, imicö fa waliblaicunö, cama täcöbö nija Lodo a faböa co̦malema. Lobe yoca laa fa co̦böcönö, 11bei yoca sibo jamö bä lä co̦camono wei bä bluca jubäbömabölalema. Bä ma oshe wei ma cui, bada bä ma cui, bä bluca fa jubäbömabölalönö, beli yoca wa̦liabeje, yoca jo̦sisaö ma cuaano wejei ma cui, bä doblonomi.

Soala jamö, Lodo a

docua lä yaclälayono wei tä a̦

12Ö̦jö däjä, a̦jele täcöbö fama lä cuinö, Lodo ai ebä wa̦liböma.

—Eiteli bä nija ¿afä aifä bä bälöa coyocoa daanö? Afä fecamafä bä ma cui, ijilufä bä ma cui, tääfä bä ma cui, aifä bä bädawä ma cui, ö̦jö wa bä bluca fa co̦alalönö, bä ca̦i aa da showalö. 13Ei yafä bä mö nia malä watäblaö wei. Jeobaa nija bä wa̦no ji̦limou wa̦liyoblou yalo, yafälecö shömölema, yafä bä mö bluca watäblabä —täcöbö cuma.

14Inaja täcöbö cuu ja, bä tää ecöbö nia lä däaböno wei cäcöbö yömölabä, Lodo a didi aa showalayofälöma. Abinaja bei fecama ecöbö nowa tayoluma.

—Bei. Bämacö docuu da showadaofälö. Jeobaanö ei tä mö ulifi nia jo̦wa watäblaö tai —cäcöbö nowa ma tano wei ma cui, jai a wa̦ biyäcou bädao, a wa̦ ji̦liböö cuoma.

15Tä mö jaba lä wacacaaimano wei däjä, a̦jele täcöbö fama lä cuinö, Lodo nija täcöbö a̦ fe blacäjoma.

—Bei, bei. Lobe, lobe. Suwäböfä wa fa nacalänö, afä tääfä cäcöbö lä cule, wa cöbö ca̦i fa yaumalänö, bä ca̦i docuu da showadaofälö, täbä mö lä watäblamou wei tänö, wa nö bleaaö mö feduo mlaobä —täcöbö cuma.

16A icudaloimi ja, a̦jele täcöbönö boco fa däbölönö, bei suwäbö e boco ca̦i däa fa showabölönö, bä tää ecöbö boco ca̦i däböa mö fa fedulänö, lobe bä öböbölefälöma. ¿Ö̦jö tawä? Bejedi lä, Jeobaanö Lodo a nofi ojodaboma. Ö̦jö cudeenö, cama ebä ca̦i öböa fa showamalänö, bä sibomalema. 17Bä siboa fa waiquimabölönö, a̦jele ai a mö feduwä lä cuinö, abinaja Lodo a nowa tama.

—Wamacö demiobä, bä docua da showalö. Tä möö mö yabaa dijejä. Ei tä yalö lä blaucui tä ja, bä yanöcödo dijä. Quiji jefu bä jamö, bä da doculufälö, wamacö mö ca̦i watäblou mö feduo mlaobä —a nowa tama.

18Inaja Lodo a nowa ma tano wei ma cui,

—Ushu —a cuma—. Bada tä, inaja dicoo mlai. 19¿Ö̦jö tawä? Cafä bäfä a̦ juabä ya lä cui, wale nofi ojodabou malä waiquile. Ya demi cuobä, wale bayeliblaö ma waiquiono wei ma cui, quiji wa bä jefu lä jömafe jamö, ya nö waloobimi. Yedu tä wayu fa biyäblalunö, ya waloo mlai ja, camiyä ma cui ya nia ca̦i nomalayou. 20Quiji tä da möbla. Ö̦jö tä shabono wajaquemi wai lä cule, tä blajaami. Ö̦jamö lä ya fa co̦blalunö, ¿ya nofi shino yai yashuobä tawä? Tä shabono malä wajaquemi wei. Ö̦jamö lä ya nowamöo ja, ya nia shino yai nomaimi —a cuma.

21Abinaja a̦jele a cuu mö feduoma.

—Jo. Inaja lä tä cuobä. Bäfä a̦ malä ji̦liale. Ö̦jö wa wa̦fa wai shabono lä wäyäfe, ya mö watäblaö mö feduo mlaicätä. 22A da jaöfälö, ö̦jamö lä. Ö̦jamö lä a da docufälö. Wa waloo showao mlao däjä, eja ya ishou juo dao malä mlai —a cuma.

Lodonö a wa̦fa shabono wajaquemi wäyäma yalo, Soala a wa̦fa shabono jilabou showaomaje.

Cowa yaitawä wacöbänö bä

mö lä watäblaleno wei tä a̦

23Motoca a wawäaö waiquio däjä, Soalateli bä nija Lodonö cama ebä ca̦i co̦blou fa fenalonö, 24Sodomateli bä nijamö ma cui, Comolateli bä nijamö ma cui, Jeobaanö cowa yaitawä wacöbä blälämaö nodio juoma, wacöbä nö u̦cucamou lä nacli wei wacöbä lä cui. Fedu jamö a culanö, wacöbä nö quiliwä fa blälämalalönö, 25jödödöwä tä mö bluca watäblalema. Sodomateli bä ma cui, Comolateli bä ma cui, ö̦jö bä yafibö bluca ma cui, ö̦jö tä yalöwä lä blaucui ma cui, tä ulifi jödödöwä befi ca̦i watäblaö showalayoma. 26Ö̦jö däjä, Lodo bei suwäbö e nojaobä jamö, a möö fa yabadalunö, bei a cofibödou showalayoma. A fa sayublalunö a jifudou showalayoma.

27Ablaamö a lä cui, a aa fa fenalönö, Jeobaa sho cäcöbö jaba lä ublaono wei jamö, a waloa fa co̦icunö, 28tä möö mö wädäama. Sodomateli bä ulifibö möö fa cuaanö, Comolateli bä ulifibö möö fa cuaanö, ö̦jö tä ulifi lä yalöi tä möö jödödou fa cuaanö, tä waqueshi tolucaö dalalema. Cowa wacö bada waumodou lä cuo weinaja, waqueshi bä bada ushujuwä ulelou cuaama.

29¿Ö̦jö tawä? Inaja tä fa cublalunö, tä ulifi lä yälöi jamö, Yai Bada tänö bä mö bluca lä watäblaleno wei däjä, Ablaamö a nofi jaducubou showaoma. Lodo a nowamama. Lodonö bä ca̦i lä bälöono wei, bä mö ma watäblaleno wei ma cui, Lodo a docua fa balömalönö, a shino ishou juoma.

Currently Selected:

Génesis 19: GUU

Highlight

Copy