Génesis 16
16
Isimali a oshe lä
wawälayono wei tä a̦
1Bei. Ablamö bei suwäbö Salai e ijilubö cudalou fa mlacunö, Ablamö a ijilubö cuonomi. Salai a nosie juamobä, Ejidoteliyoma a moco taboma. Ö̦jö a moco lä cui, Acala a wa̦fa cuoma. 2Ablamö nija abinaja Salai a cuma.
—Wale a̦ da ji̦lilä. Ijilu ya wawämabä, Jeobaanö wale doblamaboimi waiquiwä. ¿Ö̦jö tawä? Ejidoteliyoma ya moco lä tabole, afä a da dälä. Ö̦jö nija, ijilu a cua bädaquei ja, ya e nia tabou —a cuma.
Salai a lä cuno wei, Ablamönö a wa̦ julema. 3Canaana tä ulifi jamö, Ablamönö lasha 10 a faa fa waiquimalönö, bei suwäbö Salai a lä cuinö, a nosie juamobä a moco lä tabono wei, bei fe̦yalobö nija a nabä shömöquema. Ablamönö Ejidoteliyoma Acala a wa̦fa lä cuono wei, a dälema.
4Acala nija, Ablamönö ijilu a fa tacönö, a shibönabölayoma. A shibönabö nö fa ö̦jöbömolunö, Salai a nö waiblama. A nosie juamobä e ma cuono wei ma cui, a nö waiblaö dicoblaoma. 5Ö̦jö däjä, Salainö bei fe̦yalobö e a̦fa lajumama.
—Fei däjä camiyä ya nö lä bleaale, cafä wa mayo dodijiwä. Ya nosie juamobä ya lä tabou wei a lä cui, camiyänö ya nabä ma shömöqueno wei ma cui, a shibönaböa fa ayalönö, wale nö waiblaö majöa dicoa. “Camiyä ya mayomi”, wa bufi cuu dicoo ja, ¿wedi bei mayo li, ö̦jö lä? Camiyä mayo malä mlai. Jeobaa a lä cuinö tä cadejeblabä, ö̦jö lä —a nowa tama.
6Ablamönö a wa̦ julema.
—Bei. Wa nosie juamobä, afä a malä cui. Wa tamaö lä bufio weinaja, a da taama —a cuma.
Ö̦jö däjä, Salainö a nö fa blemalalönö, Acala a doculayoma.
7Acala a docufälöbä jamö, Jeobaa etä a̦jele lä cuinö, a mö bamalema. Shulu tä ulifi lä bloqueono wei jamö, bei yo lä fale jamö, ö̦jö yo casö jamö u fe lä jojole jamö, a suwä dalalema. 8A fa dalalönö a wa̦lima.
—Acala. Salai a nosie juamobä wa lä cui, ¿wedi ja wa culanö, eja wa li juu cuboyoi? ¿Wedi jamö wa nia fa junö bei wa?
Abinaja a suwä cuma.
—Salainö wale lä tabole a lä cuinö, wale nofi fa wa̦libonö, ya docuu lä cufe —a cuu mö feduoma.
9—Wa lä tabole nijamö, a co̦jamö da co̦o —Jeobaa etä a̦jele cuma—. Dodijidawä wa nosie juabä. 10Afä ijilufä ya bä nodiwä balamaö fe fa balojoonö, bä fa blucablalunö, jai bä nö wabamou doblobimi bä nia cublou.
11Abinaja Jeobaa etä a̦jelenö a nowa ca̦i tama.
—Ijilufä wa lä didibole, wa̦lo a wai. Isimali wa wa̦fa nia jilaö. Jeobaanö wa wa̦ nö bleaaö ji̦lilema yalo, Isimali wa wa̦fa jilabä. 12Ulifi jamö bä yalo lä juu wei, bä wasömamou dao lä mlainaja, bä ca̦i yömölamou dao lä mlainaja, ö̦jö bä lä culenaja, ijilufä a nia cublou. Bluca täbä nija, a nö nia nabämou. Bluca bänö, a nö nia nabämaö mö feduoje. Cama bä mashi ma cui, dodijidawä bä ca̦i nia cuo dobloimi —Jeobaa etä a̦jele cuma.
13Jeobaa e a̦ a̦jele ji̦lilema yalo, Acala a wa̦ bädaliyoma.
—¡Joo yai! Yai Bada bei ya etä a̦jele ma dalalöfe, ¡ya nofi demi lä showai! —a cuma.
Inaja Acala a cuma yalo, Täbä lä dablaö wei a dodijiwä, Yai Bada a wa̦fa jilaa showadaquema, a wa̦ lä wayomano wei a lä cui. 14Ö̦jö cudeenö, Tä cua shi lä wa̦lile tänö wale lä dablale cou, uca wa̦fa ca̦i jilaquemaje, Cadesiteli, Beledeteli bä lä bälöo wei jamö, uca lä möamobe uca lä cui.
15Acalanö bei ijilubö e tablalema, Ablamönö a lä taqueno wei. Ö̦jö bei ijilubö a lä tablaleno wei, Ablamönö Isimali e a̦fa jilaquema. 16Ablamönö lasha 86 a fa famalönö, Acala nija bei ijilubö e wawäblamalema, Isimali a wa̦fa lä jilaqueno wei.
Currently Selected:
Génesis 16: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
