Génesis 15
15
Yai Bada tänö Ablamö a nia
lä bayelibono wei tä a̦
1Inaja tä cuo waiquiono wei ja, Jeobaanö Ablamö a majalimomalanö, e a̦ bädaliyoma. Abinaja a majali cuma.
—Ablamö, a quili dijä. Cafä showadi bäfä lä nowamaö wei cä ya. Bäfä dobäa dodijilei —a cuma.
2Inaja a ma cuno wei ma cui, abinaja Ablamö a majali cuu mö feduoma.
—Jeobaa wa Bada lä ayainö, ¿wedi tä ja, bei wale nia dobäö dodijio, ö̦jö lä? Ya ijilubö cua bashia malä mlai. Ya bufi mlao däjä, shomi anö iba tä nofi nia tabou juo dicoo. Damacoteli Elieseli a lä cuinö, iba täbä bluca ca̦i nia jilao juo dicoo. 3¿Ö̦jö tawä? Camiyä ijilu a ja, wale bayeliblano malä mlai. Ya nosie juamobä, Elieseli ya tabou ma bäle ma cui, camiyä nija a oshe wawäblaliyoma yalo, ö̦jönö iba bä nia ca̦i cuo juo dicoo —a cuma.
4Ö̦jö däjä, Jeobaa a wa̦ wawäö co̦oma.
—Ma. Ö̦jö Elieseli wa wa̦fa lä wäyäfe a lä cuinö, afä bä ca̦i cuo juo mlaicätä. Ijilufä a yainö, afä bä ca̦i nia cuo juo —a cuma.
5Ö̦jö däjä, Jeobaanö Ablamö a ca̦i fa sibolunö, a wa̦ bädou co̦oma.
—Ösö jamö wa mö fa nonoicunö, shidicali bä da wabäbla. ¿Ö̦jö tawä? Bä nö wabamobimi malä cui. Ö̦jö shidicali bä bluca lä culenaja, ijilufä bä bluca cublou nodio wä —a nowa tama.
6Ö̦jö a wa̦ fa ji̦limolunö, Ablamönö a wa̦ bejedi bufiblaö showadalayoma. Cama Jeobaa a wa̦ bufiblamou fa damolalunö, jai a cadejewä waiquiwä, Ablamö bei a nofi tadaö showalayoma. 7Ö̦jö däjä, Ablamö a yömölaa co̦lema.
—Ulu tä ulifi jamö wa cuo showao däjä, bäfä lä nacano wei, ei Jeobaa ö̦jö ya showawä, cadeo bä lä jilale jamö wa lä cuono wei däjä. Ei afä ya tä ulifi jömöabä, bäfä luluboimama, wa tä nofi ulifi tabobä —a cuma.
8A cuma ma cui, abinaja Ablamö a cuu mö feduoma.
—Jeobaa wa Bada lä ayai wa nija, abinaja ya nia cuu. Ei ya tä ulifi nia jo̦wa lä tabou wei, ¿wedi jamö tänö, ya tä bejedi li dablabä, ö̦jö lä? —a cuma.
9Inaja a cuu ja, Jeobaanö a yömölaö co̦oma.
—Ei ya bä a̦fa yalo nia lä jayumaö wei, bä bluca da bälaquiyo. Baca suwä a ijilubö cuo dao lä mlai, shibo suwä a ijilubö ca̦i cuo dao lä mlai, oweja a ca̦i bada wa̦lo. Lasha 3 a famaö lä waiquiono wejei bä lä cui, wa bä yalo bälayolubä. Joya, joledo cäcöbö ca̦i da bälaquiyo —a cuma.
10Inaja a fa cunö, Ablamönö ö̦jö bä yalo bälaö showaoma, Jeobaa nija bä dodobobä. Bä yalo fa shäalalönö, bä bacäcäa mö fa fedudulalönö, acadaju bä mashi jilalema. Cäcöbö lä yäö wei cäcöbö lä cui, cäcöbö bacäcaö mlai ja, comi cäcöbö li blaquema. 11Bä yalo lä jilaono wei jamö, waduba bänö bä nabä itouje däjä, Ablamönö bä yashublaö nocamoma.
12Motoca a itou däjä, a malishi mia fa subladalunö, didi didi anö a fe fa̦yoblaö ja̦toa nö quililayoma. 13Ö̦jö däjä, Ablamö nija Jeobaa a wa̦ majali faö co̦oma.
—Wale a̦ ji̦lia da dodijilä. Afä bä nia lä nodiblou wei bä lä cui, shomi tä ulifi jamö bä nö nia bälöo bleaaö. Shomi täbä nosie juamobä, bä nia tabou dicooje. Bä shömaö fa cuaajenö, bä nö nia bleaamaö nö dedeaöje. Lasha 400 a nia famaö nodiablalouje. 14Bä nö nia bleaamaö nö ma dedeaö wejei ma cui, camiyänö, inaja showawä ya bä li taamaö mö feduo weicätä. Inaja ya bä taamaö däjä, afä ya bä famaö co̦o däjä, bloque ya bä nia documaimi. Madofi bä ma cui, yalo bä ma cui, ö̦jö bä nia ca̦i bluca faö co̦ofälööje.
15’¿Ö̦jö tawä? —a cuma—. Cafä wa lä cui, wa wa̦lobada fa jödödöblalunö, wa bufi nia ya̦cumö mlao. Bufi yanöcöwä wa fa mladalunö, wa nia didiaöje. 16Afä bä lä nodiblou wei bä lä cuinö, lasha 400 a fa famalöjenö, obi eja bä waloo co̦o wä. Obi shino. Eja amoleo bä lä bälöblai bä lä cui, bä nofi ma jushuaö wei ma cui, ya ishou showadaobä, tä cubloimi showawä —Jeobaa a majali cuma.
17Ö̦jö däjä, motoca a queo fa jödödöonö, tä mö fa dödölönö, ö̦jö däjä wa̦queshi a befi ca̦i bädaliyoma. Fii defi wacö lä wao wei defi ca̦i. Yalo bä mashi jilao mö lä feduduono wei jamö, wacö jayuaö möamoablalou cuaama. 18Ö̦jö lä däjä, Jeobaanö Ablamö a nia lä dobäno wei tä ja, tä a̦ wäa cadidiquema.
—Afä bä nia lä nodiblou wei bä nija, ei ya tä ulifi jöböäö. Ejido tä ulifi jamö u lä jayule u lä cui jamö, tä mashi fe wädöobä. Ai tä mashi mö feduwä lä cui, bada u ja, Euflade u lä cui jamö, ai tä mashi fe wädöo mö feduobä. 19¿Ö̦jö tawä? Seneo bä ulifibö ma cui, seneseo bä ca̦i ulifibö ma cui, camoneo bä ca̦i ulifibö ma cui, afä ijilufä nodiwä bä nija ö̦jö ya bä ulifibö jöböäö. 20Edeo bä ca̦i ulifibö ma cui, feleseo bä ca̦i ulifibö ma cui, lefaida bä ca̦i ulifibö ma cui, 21amoleo bä ca̦i ulifibö ma cui, Canaanateli bä ca̦i ulifibö ma cui, jejeseo bä ca̦i ulifibö ma cui, jebuseo bä ca̦i ulifibö ma cui, ö̦jamö afä bä nia bälöo nodio —a nowa tama.
Currently Selected:
Génesis 15: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
