Génesis 14
14
Lodo a lä dälefälöno wejei tä a̦
1Ö̦jö däjä, bada bä bluca toujublaliyoma. Sinalateli Alafele a bada ma cui, Elasalateli Alioco a bada ma cui, Elamateli Quedolaomo a bada ma cui, Coimiteli Didala a bada ma cui, 2ö̦jö bä bada fa toujublalunö, bada 5 bä mö feduwä lä cui, bä nabä quequemaje. Ö̦jö bä nabä lä quequeno wejei bä lä cui, abinaja bä a̦fa bada cuo mö feduoma. Sodomateli bada a lä cui, Bela a wa̦fa cuoma. Comolateli a bada mö feduwä lä cui, Bilisa a wa̦fa cuo mö feduoma. Amateli a bada mö feduwä lä cui, Sinaba a wa̦fa cuoma. Seboimiteli a bada mö feduwä lä cui, Semebelo a wa̦fa cuoma. Belateli a ca̦i bada cuoma. Belateli bä lä cui, Soalateli bä a̦fa ca̦i cuoma.
3-5Abinaja bä jaba fa cuaanö, bä ishoma. Ö̦jö bä bada 5 lä cuinö, Quedolaomo a wa̦ bada juaö showaoje däjä, lasha 12 a bluca ma famaleno wejei ma cui, ai a faö co̦o däjä bä mojiblaliyoma. Ai a lasha faö co̦o däjä, Quedolaomo a bada nosiemou co̦oma ma cui, a wa̦ juaö co̦o fa mlacujenö, a bada jushudaliyoma. Bada ai bä lä cui bä fa nacayolunö, bä waitelimou cuaabä, bä co̦camoma. Ö̦jö 5 bä bada mö feduwä lä cuinö, a wa̦ juaö lä mlaono wejei bä bada lä cuinö, Sidimö tä fe yalö ja, bä nö dao mö feduoma, Mojodi u cuobä tä mashi jamö.
Quedolaomonö bä ca̦i bada lä waitelimono wei bä lä cuinö, ai täbä shäö cuaaö fa balöimadujenö, bä shäö shoqueafälömaje. Ö̦jö bä lä cuinö, Atalocanaimi tä ulifi jamö, lefaida bä nö bleaamaö fa balöicujenö, Camö tä ulifi jamö, susida bä nabä quea fa nomöjöicujenö, Sabequiliataimi tä ulifi jamö, emida bä nö ca̦i bleaamaö nomöjöquemaje.
6Ö̦jö däjä, Seili mabä jamö, Seiliteli bä nabä quea fa nomöjötojolujenö, Balana tä fe yalö jamö bä yashua yafeliaquemaje, tä ulifi lä bloqueono wei tä casö jamö. 7Ö̦jamö bä bluca fa tamalöjenö, bä mö yabaö fa co̦imanö, Emibada tä ulifi jamö bä ishou nomöjöoma, ö̦jö Cadesi tä a̦fa ulifi ca̦i lä cule jamö. Amalecoteli bä jödödöwä lä bälöono wei, bä nabä quea fa nomöjöalujenö, amoleo bä nö ca̦i bleaamaö mö feduo showaomaje, Asesodama tä ulifi jamö bä jilao mö lä feduono wei bä lä cui.
8Ö̦jö lä däjä, bada 5 bä lä co̦camono wei bä fa jocäcädalunö, Sidimö tä fe yalö ja, bä nö dao mö baoma. Abinaja täbä bada cuoma. Sodomateli a bada, Comolateli a bada mö feduwä, Amateli a bada mö feduwä, Seboimiteli a ca̦i bada mö feduwä, Belateli a bada ca̦i. Belateli bä lä cui, Soalateli bä a̦fa ca̦i cuoma.
9Bei. Ö̦jö bä bada 5 lä cuono wei bä lä cuinö, cama ebä ca̦i wawäa mö balayomaje. Bä nabä lä juimano wejei bä bada 4 mö feduwänö, ai tä mashi mö feduwä jamö, cama ebä ca̦i ayablou mö fedulayomaje.
Bä nabä lä juimano wejei, abinaja bä a̦fa bada cuoma. Elamateli Quedolaomo a wa̦fa bada cuoma, ai a mö feduwä lä cui, Coimiteli Didala a wa̦fa bada cuo mö feduoma. Ai a lä cui, Sinalateli Alafele a wa̦fa bada ca̦i lä cuono wei, ö̦jö a. Ai a mö feduwä lä cui, Elasalateli Alioco a wa̦fa bada cuo mö feduoma.
10¿Ö̦jö tawä? Sidimö tä fe yalö lä cui, tä ulifi dodijidaonomi. Shoniqui toubä lä didiono wei täcabä bluca cublamou dodijioma. Ö̦jö däjä, Quedolaomo a badanö, cama ebä nö ca̦i wa̦lojaö fa dodijiicunö, bä yashublalemaje. Sodomateli a bada lä cuinö, cama ebä ca̦i docufälöbä jamö, ö̦jö täcabä lä cublamono wei jamö ai ebä queobefälöma. Comolateli a bada mö feduwä lä cuinö, cama ebä ca̦i docuu cuaaö mö feduobä jamö, ai ebä ca̦i queo mö feduolaliyofälöma. Jefu bä jamö, ai bä shee lä cui, bä docua culayoma.
11Bä fa yashublalöjenö, Sodomateli bä yafibö jamö, Comolateli bä ca̦i yafibö jamö bä wayu lucäblou cuaaö fa jädalunö, bluca täbä lä tabono wejei, täbä däalalemaje. Yanowamö täbä ma cui, täbä bluca däaquemaje. Cama bä niibö ca̦i däa fa showadaalalöjenö, bä ca̦i co̦oquemaje. 12Lodo a ma cui, a ca̦i dälefälömaje, Ablamö a lä ijilumono wei a lä cui. Sodomateli bä nija a co̦caoma yalo, camanö bä bluca lä tabono wei, bä bluca fa däalalöjenö, bä ca̦i bluca co̦layomaje.
13¿Ö̦jö tawä? Mamle efibä bada lä ublajaono wei jamö, Ablamö a mojodi bälöoma, ebleo a wa̦fa lä jilabono wejei Ablamö a lä cui. Ö̦jamö lä a mojodi bälödalou däjä, ai a lä doculayono wei e a̦ ca̦i fa co̦blalunö, a yömölajaloma. Ö̦jö efibä bada lä ublajaono wei a Mamle lä cui, amoleo a cuoma. Esecolo a mashi cuoma, Anelo a mashi ca̦i. Wayu bä ja Ablamö a nowamabeje bä li cuo mö feduoma.
14Ablamönö cama e mashi lä dälefälöno wejei tä a̦ fa ji̦lilänö, camanö bä ca̦i lä jilaono wei bä ca̦i itoblou showalayofälöma. Cama Ablamönö bä ca̦i lä cuono wei, 318 ebä wayu cublaliyofälöma. Lodo a lä däleno wejei bä lä cui, bä nosi däa fa showalöfälöjenö, Dani nodiwä ebä ulifibö jamö bä nabä blacälayomaje.
15Ö̦jamö, bä didi fa blacälönö, cama ebä shömaö shedecoma, bä fe fa̦yoabä. Bä nabä didi quea showaa fa jalutojenö, bä yashublaö showadalayomaje. Ö̦jö bä fa yashublalöjenö, bä docublobä jamö bä nosi fa däacöjenö, Oba tä ulifi jamö ma cui, bä walomaquemaje, Damaco tä lu̦locu jamö, motoca a faö lä mlai jamö.
16Ö̦jö däjä, bä lä däalaleno wejei bä lä cui, bä fa co̦alalöjenö, bä ca̦i co̦quemaje. Ablamö nija a lä fö̦ömono wei a ca̦i co̦lema, Lodo a wa̦fa lä cuono wei. Lodo a ma cui, cama ebä bluca lä tabono wei bä ma cui, Ablamönö bä bluca co̦a co̦alalema. Wa̦lo bä ma cui, suwä bä ma cui, yanowamö täbä bluca lä dälefälöno wejei, bä bluca fa co̦alalönö, bä ca̦i co̦a showadalayofälöma.
Bada täcöbö icua mö
lä baqueno wei tä a̦
17Quedolaomo a bada ma cui, ai bä bada lä nocamabono wei bä ma cui, ö̦jö bä nö bluca bleaa fa waiquimalalönö, Ablamö a co̦a co̦layoma, bä bluca lä co̦leno wei bä sho. A jo̦wa ajedou co̦a fa ji̦lilänö, Sodomateli a bada lä cui, a icua mö baquema.
18Salemiteli bada Mequisedeco a lä cui, ö̦jö a ca̦i icua mö feduquema. Täbä nii dodobou mö baoma, uba nashiwä toubä ca̦i. Ö̦jö a lä cui, Yai Bada tä Bada lä ayai a nija a ojodamou ja, täbä nofi showadi bäyäboma. 19Yai Bada tä nija, Ablamö a bayeliblamaö bufima. Abinaja a cuma.
—Yai Bada a Bada lä ayai a nija, showadi wa bayeliblamobä, judu mösö ma cui, bita a ma cui, täbä bluca lä bädamaleno wei a lä cui nija. 20Ö̦jö Yai Bada a Bada lä ayai a lä cuinö, wa nö wa̦lojoblamaö fa ayalonö, bä nö lä nabämono wei, wa bä nö bleaamabodayoma. Cafä nija bä noshi ö̦jödaboma cudeenö, showadi cama a nofi shino doablamobä —a cuma.
Ö̦jö däjä, täbä lä co̦leno wei täbä ja, Ablamönö Mequisedeco a dobälema. Täbä bluca lä co̦leno wei, fe usucuwä 10 täbä fa shedequeblalönö, ö̦jö ai moli täbä ja, Mequisedeco a dobälema.
21Mequisedeco a dobäa waiquileno wei ja, Ablamö nija, Sodomateli bada a lä cui a wa̦ falayoma.
—Bei. Camiyäteli wa bä bluca lä co̦leno wei, ö̦jö wa bä shino co̦amabä, ¿ö̦jö tawä? Ai wa bä bluca lä däleno wei, afä täbä li da talä —a cuma.
22A ma cuno wei ma cui, abinaja Ablamönö Sodomateli bada a nowa taa mö fedulema.
—Mlaicätä. Ya jolemoimi. Jeobaa a malä cule, a lä bufiblamou wei a lä cui. Ö̦jö a Bada lä ayai a lä cuinö, judu mösö ma cui, bita a ma cui, täbä bluca lä bädamaleno wei a. Ö̦jö nija ya wa̦ faö malä waiquiono wei. 23Afä ya tä nia madofi däaimi. Shinalu u wai femata ma cui, bei wa mamicö lä didio wei bei tä nata ma cui, moli ya tä nia däaö buomi. “Iba bä madofinö, Ablamö a nö madofiböblou bälayou lä cufe”, wa cuu dicoblaobä tai. 24Camiyänö ya bä nia taboimi. Iba bä lä cui, bä fiya lä iyalayono wei, ö̦jö waiquiwä. Anelo a lä cui, Esecolo a ca̦i lä cui, Mamle a ca̦i lä cui, ö̦jö bä sho, yama bä bluca lä co̦leno wei bä lä cuinö, ö̦jö bänö bä shino mashi tabobeje —a nowa tama.
Currently Selected:
Génesis 14: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
