Génesis 13
13
Ablamö nija, Lodo a lä sheleleblono wei tä a̦
1Ejido jamö a culanö, Ablamö a shömöa fa co̦lunö, bei suwäbö e ca̦i co̦a co̦layoma. Bä bluca lä tabono wei bä ca̦i bluca co̦a fa co̦lunö, Neque jamö bä bluca dolequea co̦befälöma. Ö̦jamö lä Ablamö a lä ijilumono wei e ca̦i yauquema, Lodo a wa̦fa lä cuono wei.
2Ablamö a nö madofiböo fe balojooma. Blada bluca bä taboma, olo bä ca̦i. Yalo ebä ca̦i blucao fe balojooma. 3Neque tä ulifi fa dacöjenö, Ablamönö cama ebä ca̦i jocäadalou culayofälöma. Bedele jamö bä waloa co̦aliyoma, bä jaba lä bälöblaquefälöno wei jamö. Bedeleteli bä lä cui, Ayeteli bä ca̦i lä cui, ö̦jö bä lä bälöono wei jamö, bä möamoa co̦a majölayofälöma.
4Jeobaa nija a nö bayeli nacaobä, maa mabä jaba lä yododamano wei jamö, tä nabä lobe waloblaa co̦quema. Ö̦jamö lä, Ablamö a nö bayeli nacao co̦oma.
5Ablamö nija a lä yauono wei a Lodo lä cuinö, cama ebä ca̦i bluca cuo mö feduo showaoma. Yalo bluca bä ca̦i tabou mö feduoma. Oweja bä ma cui, shibo bä ma cui, baca bä ma cui, ö̦jö bä bluca lulubou showao mö feduoma. 6Ö̦jö cudeenö, täbä yalo bluca iyabä täbä cuo fa mlacunö, ya̦cumö bä ca̦i co̦cao doblonomi. Cama ebä ca̦i blucao mö feduo waiquioma yalo, bä coyocoo doblonomi.
7Ö̦jamö Canaanateli bä sho, feleseo bä sho, bä bluca ca̦i bälöjömou showao mö feduoma. Ya̦cumö Lodo ebä yalo lä lulubono wejei bä lä cui sho, Ablamö ebä yalo lulubou mö lä feduono wejei bä sho, bä nofi wa̦liayoma. Cama bä yalobö iyabä, tä nö ulifi lä niji wei, tä ulifi noshi umabou ayamomaje.
8Ö̦jö tä a̦ fa ji̦lilänö, abinaja Ablamö a cuma, Lodo nija.
—¡Ushu, U̦asi! Inaja mlai. Moli bäfäcö mashi waiquiwä malä cui. Inaja bäfäcö nowa tayobä bäfäcö malä mlai. Iba yalo bä lä lulubou wejei bä sho, afä bä ca̦i lulubou mö lä feduo wejei bä sho, bäfä bä shäyomaö dicoobä mlai. 9Tä ulufi malä blaucui, ¿ö̦jö tawä?
’¿Wedi jamö tä lä cui wa tä ulifi bufii, U̦asi? —a cuma—. Motoca a lä juimaö wei jamö, afä wa bä ca̦i cuo bufi doblao ja, tä mö weyaö lä cuaaö wei jamö, iba ya bä ca̦i jilao mö feduo weicätä. Ö̦jö ma cui, tä mö weyaö lä cuaaö wei jamö, wa tä bufii ja, ö̦jamö afä bä ca̦i da cualu, U̦asi. Motoca a lä juimaö wei jamö, iba ya bä ca̦i bälöo mö feduo weicätä —Ablamö a cuma.
10Ö̦jö däjä, Lodonö tä ulifi möö fa cuaanö, Jodana u sibo lä cui, tä yalöwä dodijidawä dalalema. Tä ulifi jäläläoma yalo, Jeobaa etäca liyäo lä cuono weinaja, inaja showawä tä mömou cuoma. Ejidoteli bä ulifibö ca̦i liyäo lä cuono weinaja, inaja showawä tä cuo mö feduoma. Soalateli bä bälöo ma blajaono wei ma cui, ö̦jamö tä liyäjäwä fe wädöblamoma. Jeobaanö Sodomateli bä ulifibö wa̦liaö showaono mlai ja, Comolateli bä ulifibö ca̦i wa̦liaö showaono mlai ja, ö̦jö tä ulifi liyäjäwä jödödöoma.
11Ö̦jö däjä, Lodonö cama etä nofi tabobä, Jodana u sibo lä yalöi tä däa jödödölema. Cama etä ulifi fa yailönö, a jocäa fa showalönö, Ablamö sho cäcöbö sheleleblou showalayoma. 12Canaana tä ulifi ja Ablamö a bälöo juo däjä, Jodana u sibo lä yalöi jamö bä lä bälöjömono wei bä nijamö, Lodonö cama ebä ca̦i bluca bälöaö fa culofälönö, Sodoma jamö cama ebä ca̦i waloaliyoma.
13¿Ö̦jö tawä? Sodomateli bä yai doblonomi. Bä nofi yai jushuama yalo, Jeobaa a nö waiblaö fe balojoomaje.
Ablamö nija tä a̦fa ulifi
lä wäqueno wei tä a̦
14Lodo a lä cuinö, Ablamö a daa waiquiquefälöno wei ja, Jeobaanö a yömölaö juoma.
—Mijamö culanö, tä ulifi möablalaö da cuaa. Motoca a lä juimaö wei jamö ma cui, tä mö lä weyaö wei jamö ma cui, motoca a faö lä mlai jamö ma cui, tä mö weyaö mö feduo lä mlai jamö ma cui, tä möö da cuaa. 15Cafä nija ma cui, afä bä nia lä nodiblou wei bä nija ma cui, ya tä ulifi nia lä jöböaö wei, wa tä ulifi bluca dablabä, ö̦jö lä. Wama tä nofi ulifi tabou shi wa̦libä. 16Coshi coshi bä lä̦cashi bluca lä culenaja, afä ijilufä ya bä nodiwä bluca tablamaö wä. Coshi coshi bä nö wabamou doblobimi lä culenaja, inaja showawä, ijilufä bä nodiwä lä cui, bä nia wabamou dobloimi cuo mö feduo.
17’Bei. A da alufälö. Wa tä ulifi bluca jödödöwä möö cuaaö showadaobä. Colo jamö ma cui, ola jamö ma cui, wa tä ulifi jödödöwä blaucuwä möbä. Cafä nija ya tä ulifi nia malä jöböaö wei —Jeobaa e cuma.
18Inaja Jeobaanö Ablamö a nowa fa tanö, a shu̦lucou showadaoma. A jocäa fa co̦lunö, Eblono jamö a waloquema, Mamle efibä bada lä ublajaono wei jamö. Ö̦jamö a bälöa fa yanöcöicunö, Jeobaa nija bä yalo lä dodoblamou wei bä maqueblamobä etäcö i̦taquema.
Currently Selected:
Génesis 13: GUU
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
©2012, All Rights Reserved