Éxodo 3

Fii defi wacö lä waono wei tä a̦

1Bei. Moisesi bä shöö e lä cui, Madianateli bä nofi lä bäyäbono wei a cuoma. Jedolo a wa̦fa cuoma. Moisesinö ö̦jö oweja ebä nowamaö ja, tä ulifi lä blocoono wei tä lu̦locu jamö ebä lululefälöma. Ö̦jamö lä bä fa lululäfälönö, Olebe cäcö jamö bä ca̦i waloquema, Yai Bada etä balöcö jamö. Sinai cäcö a̦fa ca̦i jilabouje.

2Ö̦jamö lä, Moisesi nija Jeobaa etä a̦jele wawälayoma. Fii defi wacö lä wao wei tä möamo jamö a wawälayoma. Moisesinö cowa wacö wao fa dalalönö, tä mödalema. Defi ö̦shöö ma dodijiono wei ma cui, defi waicanomi. 3Abinaja Moisesi a cuma.

—¡Joo! ¡Wacö ma waole ma cui, defi nofi waicaö lä mlai! Ya fa ajedeblalunö, ya tä möblaaö da dodijio sho —a cudaliyoma.

4Jeobaanö a bao fa dalalönö, fii defi ja culanö, Yai Bada tä a̦ bädaliyoma.

—¡Moisesi, Moisesi!

—¡Aö!

5Ö̦jö däjä,

—A ajedoyolu dijä. Wa mamicö lä didile täcö da jayublalö. Eja camiyä ya li cua yalo, miji wa tä ulifi lä cabale, tä ulifi yaia.

6Abinaja a ca̦i cuma.

—Faafä nija ya lä bufiblamou wei, ö̦jö ya. Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya lä bufiblamou wei ya—a cuma.

Yai Bada tä möö fa quilinö, Moisesi a mö jö̦cöoma. 7Ö̦jö däjä, Jeobaa a wa̦ faö co̦oma.

—Ejido jamö iba bä nö lä bleaale ya bä dablaö waiquia. Bada bä lä lämou wei bänö, bä shömaö fe blacäjouje ja, ya bä a̦ nö bleaaö ji̦liaö waiquia. Bä nö lä bleaale ya tä daö. 8Ejidoteli bä nija ya bä jucäaö co̦obä, ya itou waiquia lä cule. Ö̦jamö ya bä fa co̦länö, tä ulifi dodijidawä lä blaucui jamö ya bä ca̦i cuaaö co̦ofälöbä. Tä ulifi nö lä niji wei jamö ya bä nia lulubou, tä nö ofi lä mlai jamö. ¿Ö̦jö tawä? Canaanateli bä ulifibö ma cui ja, idida bä ulifibö ma cui ja, amoleo bä ulifibö ma cui ja, feleseo bä ulifibö ma cui ja, ebeo bä ulifibö ma cui ja, jebuseo bä ulifibö ma cui ja, ö̦jamö bä bälöo nomöjöobä, ya bä ca̦i nia cuaaö co̦ofälöö.

9’Bei —a cuu co̦oma—. Camiyänö Isaeli ya ebä a̦ nö bleaaö ji̦liaö waiquia. Ejidoteli bänö bä nö lä bleaamalajei, ya bä nö bleaaö dablaö waiquia. 10¿Ö̦jö tawä? Bada a nija cafä bäfä nia shömaö. Isaeli ebä lä cui, iba lä cäbä. Ejido jamö ö̦jö iba bä lä cui wa bä nia co̦aö —a nowa tama.

11Moisesi a ma shömano wei ma cui, abinaja Yai Bada tä nija a cuu dicooma.

—Ma. Camiyänö mlai. Bada a lä cui nijamö camiyä ya jubä ya malä mlai. Ejido jamö Isaeli ya ebä co̦abä yami —a cuma.

12Ö̦jö ma cui, abinaja Jeobaa a cuma.

—Camiyänö bäfä nia ca̦i cuo. Cafä bäfä lä shömaö wei tä ja, wa bufi wedinajamou mlaobä, tä nia lä cublou wei ya tä a̦fa wäaö balöa waiquia lä cule. ¿Ö̦jö tawä? Ejido jamö wa bä fa co̦lönö, ei tä balöcö showawä ja, wamale nofi nia co̦camoayoluu.

Jeobaa a wa̦fa lä

wämoqueno wei tä a̦

13Ö̦jö däjä, Yai Bada nija abinaja Moisesi a cuma.

—Isaeli ebä nija ya fa waloicunö, ¿wedinaja ya li cuu dodijiobä tawä? “Cafä wamacö nö badabö nija tä lä bufiblamou wei tä lä cuinö, ö̦jönö wale shömölema”, ya cuu ja, wa wa̦fa nia wa̦liije. ¿Wedinaja ya li cubä? —Moisesi a cuma.

14Abinaja Yai Bada tänö Moisesi a nowa tama.

—Ya lä cule cä ya —a cuma—. Abinaja Isaeli wa ebä nowa tabä. “Yacua tä a̦fa lä jilou wei tä lä cuinö, cafä wamacö nija wale shömölema.” Einaja wa bä nowa tabä —Yai Bada a cuma.

15Yai Bada tänö abinaja Moisesi a nowa ca̦i tama.

—Ei ya wa̦ lä cui, Isaeli ebä nija wale a̦no wäyäbä. Cafä wamacö nö badabö nija, camiyä Jeobaa ya lä bufiblamou wei ya lä cuinö bäfä shömaö a lä cule. ¿Ö̦jö tawä? Ablaamö nija ma cui, Isaacö nija ma cui, Jacobo nija ma cui, ö̦jö bä nija ya lä bufiblamou wei ya. Ö̦jö ya wa̦fa cua shi wa̦lia waiquia lä cule. Cafä wamacö nodiwä ma cuinö, inaja wale a̦fa jilabou cuo fa showaojenö, wale nofi jaducubou nodiablalobeje, ya wa̦ malä cui.

16’A da jufälö —a cuma—. Isaeli wa ebä bada fa co̦camomalönö, ö̦jö bä nija wale a̦no wäyäbä. Cafä wamacö nö badabö nija Jeobaa ya lä bufiblamou wei ya. ¿Ö̦jö tawä? Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya lä bufiblamou wei ya. Cafä nija ya wawäö lä läono wei, wa tä a̦ wäyäbä. Ei ya wa̦ lä cui, wale a̦no tabä. Cama bä nija ya mamo fa showadionö, Ejido jamö bä nö lä bleaamaö wejei ya tä dablaö waiquia lä cule.

17’Ejido jamö bä nö lä bleaale, ya bä nia co̦aö —a cuma—. Ö̦jö ya wa̦ nö wäo waiquia lä cule. Shomi täbä ulifibö jamö ya bä bälöamaö läobä, ya bä ca̦i nia cuaaö nomöjöofälöö. Tä ulifi nö lä niji wei jamö bä nia bälöo, tä nö ulifi ofi lä mlai jamö. Canaanateli bä ulifibö ma cui, idida bä ulifibö ma cui, amoleo bä ulifibö ma cui, feleseo bä ulifibö ma cui, ebeo bä ulifibö ma cui, jebuseo bä ulifibö ma cui, ö̦jö lä bä ulifibö jamö ya bä nia bälömabou nomöjöo.

18’Isaeli ebä bada lä cuinö wa wa̦ fa ji̦liläjenö, Ejidoteli bada a lä cui nija, ö̦jö wa bä ca̦i nia icuo —a cuma—. Ö̦jö nija abinaja wamacö nia cuu. “Ebleo yamacö nija Jeobaa yama a lä bufiblaö wei a wawälayoyoluma. ¿Ö̦jö tawä? Ulifi bloque jamö yamalecö da shöma. Bolacabö yamacö fa miicufälönö, yamacö nia weyade waloo. Ö̦jamö yama tä lä bufiblaö wei tä Jeobaa nija, yalo yama bä fa shänö, yama bä ö̦shö dodobobä.” Einaja bada wama a nowa tabä.

19’Ö̦jö Ejidoteli bada a lä cuinö wamacö a̦ nia ji̦liaimi —a cuu co̦oma—. Ö̦jö ya fe blacäjou daö waiquiwä. Tä yai lä lojode wei tänö a quilimaö showao mlao däjä, wamacö nia shömaö co̦omi. 20Ö̦jö cudeenö, camiyä ya boco yalejea nö lä quilile tänö, Ejido ya tä ulifi nia wa̦liaö. Ya tä ulifi wa̦liablaö waiquilayono wei ja, ya̦cumö wamacö nia shömaö co̦o.

21’Wamacö jublou däjä, camiyänö bämacö bayeliblaö yalo, bloque wamacö nia juimi. Wamacö dobäbeje, Ejidoteli ya bä shi nia ö̦jödablamaö. 22Cafä wamacö suwä bluca lä cuinö, ai bä bälöa lä boale bä nija bä nia nacou. Bä lä bälömabolajei bä nija bä ca̦i nia nacou. Olo bä ja bä baushi lä tablamou wei bä ma cui ja, blada bä ja bä ma cui ja, camishi bä ma cui ja, ö̦jö bä bluca fa nacaalalöjenö, bei ijilubö bä befi tabeje. Bä tää ebä befi ca̦i tabeje. Inaja wamacö suwä cuaaö ja, Ejidoteli wama bä nia blocoblamaö dodijio —a cuma.

Currently Selected:

Éxodo 3: GUU

Highlight

Copy