Éxodo 2

Moisesi a oshe lä

cublaliyono wei tä a̦

1Bei. Lewi nodiwä ai e lä cuinö, bei suwäbö e ca̦i cuoma. Bei suwäbö e ma cui, Lewi a ca̦i suwä nodiwä cuo mö feduoma. 2Ö̦jö bä suwäbö lä cui, a shibönaböa fa co̦lunö, bei ijilubö wa̦lo a tablalema. A wai liyäjäwä fa dalalönö, bä nöö enö a jo̦yaboma. A jo̦yabou showao däjä, belibo 3 bä lublaliyoma ma cui, a jötäbou showaoma.

3Ya̦cumö, a jo̦yabou nö doblobimi ja, a befi ca̦i ca̦abä, jai wöö a cuwä tä dälema. Dulucama a̦casibä ja tä diyäblalemaje tä cuoma. Mau ubä faö mlaobä, sho̦liqui toubänö tä sibo jölöcölema. Fii defi shuu ma cuinö, tä ca̦i ya̦lelema. Ö̦jö däja, bei ijilubö a fa didicönö, bei u casö jamö dulucama acasibä cuobä jamö a befi ca̦i ca̦quema. 4Bei amiyobönö a nö nia fa daanö, a ublao bayäcäo juoyoluma.

5¿Ö̦jö tawä? Bada bä tää e lä cui, a ya̦lömou ja, mau u jamö a itoquema. A nosie juamobä bä moco lä tabono wei, mau u casö jamö bä juadaloma. Ö̦jö däjä, bada bä tää enö, jai wöö a cuwä tä ca̦a fa dalalönö, a nosie juamobä a moco nija, tä nabä shömöquema.

6A befi ca̦i fa co̦länö, tä caloblalema. Ijilu a wai daa showalalema. A lä didiono wei jamö, bei a wai ijilu ö̦cöma. A nofi ojodabou yalo, a wa̦ falayoma.

—¡Shädayai! ¡Ei ebleo cä a nofi wai ijilu! —a cuma.

7Ö̦jö däjä, ijilu a lä cui, bei amiyobö a fa blacäliyonö, bada bä tää e nija e a̦ fama.

—Afä a shadimabobä, ¿ebleo a suwä ijilubö ca̦i lä cule, ya nacajalayobä tawä? —a cuma.

8—Awei, a da nacaajalu —bada bä tää e lä cuinö a nowa tama.

Einaja a fa cunö, a nacaabä, a moco alayofälöma. Ö̦jö a ijilu lä cui, bei bä nöö e cadidiwä nacalema. 9Bä nöö e fa icuicunö, bada bä tää e lä cuinö, abinaja a nowa tama.

—Bei. Ei ijilu a ca̦i da co̦jamö. Iba wa fa shadimabonö, wa badamaleno wei ja, ya tä nowa co̦amaö weicätä —a cuma.

Inaja tä cuoma yalo, ö̦jö a suwä lä cuinö, ijilu a co̦a fa co̦lufälönö a badamama. 10A fa badamalönö, bada bä tää e lä cui nija a ca̦i fa icuicunö, a comaquema. Bada bä tää enö cama e yai däa showadalema. A nofi ijiluama yalo, bei a wa̦fa jilaquema. “Mau u jamö ya co̦lema”, a bufi cuma yalo, Moisesi bei a wa̦fa jilaquema.

Moisesi a lä docuno wei tä a̦

11Abinaja tä cublaliyoma. Moisesi a fa yawälönö, cama ebä mashi möbä, a julayoma. Bä nö bleaaö dalalema, cama ebä ebleo mö feduwä lä cui. A mamo showao däjä, cama ai a nija Ejidoteli a fa ishonö, a si yafelimaö dalalema. 12Tä möö cuaaö fa balöonö, ai täbä juimi ja, Moisesinö a nö yua showadalema. Ejidoteli a nabä fa queicunö, a shälema. A fa shälönö, mlaca mlaca a ja, a nomawä batelia showadaquema.

13Ö̦jö tä fena ja, a aa fa co̦lufälönö, cama ebleo cäcöbö showawä ma cui, cäcöbö shäyou daa nomöjölalema. A yai lä ishole a wasöbä, a wa̦ fama.

—Cafä wafäcö bluca ma cui, ¿wedi wa tä tabä, aifä wa li shäö dicoa cule? —a cuma.

14A lä ishou wei a lä cuinö a wa̦ lafujolanö, abinaja a cuma.

—Camiyä yamacö bada wa malä mlai, wale wasöö bashiobä. Ejidoteli wa shäa lä taleno weinaja, ¿wale nia shaö cuo nomöjöo daanö? —a cuma.

Ö̦jö tä a̦ fa ji̦lilänö Moisesi a quililaliyoma. “Ya da isholui tä a̦ jo̦wa ji̦liaö nö cudujei”, a bufi fa cudalunö, a quililaliyoma. 15¿Ö̦jö tawä? Inaja showawä tä cublaliyoma. Bada a ma cuinö tä a̦ ji̦lilema. Tä a̦ lä ji̦lilei wei, Moisesi a shäbä, a dayäö showadaoma.

Bada a lä cuinö a dayäama ma cui, a shäö mlaobä, Madianateli bä ulifibö jamö Moisesi a docua culayoma. Ö̦jamö a fa waloicunö, mau u lä bale täca casö jamö a loquema.

16Bei. Madianateli bä nofi lä bäyäbono wei a bada lä cui, bä tää 7 ebä cuoma. Ö̦jö bä suwä lä cuinö, bä fö̦ö yalo ebä amishi co̦amabeje, mau u lä bale täca jamö yalo bä ca̦i blacäimamaje. Mau u nia fa yaquejenö, bä shömoyoluma. Yalo bä amishi co̦amabeje, showadi mau ubä lä löblaamou wei tä ja, ubä nia löblaama ma cujei, 17wa̦lo shomi bänö, cama oweja ebä ca̦i waloa fa nomöjöicujenö, bä suwä bayäcamamaje. Inaja bä ma cuaano wei ma cui, Moisesinö suwä bä nia fa bayeliblanö a icua läquema. Suwä bänö oweja bä ca̦i lä juno wejei, bä amishi co̦amaö fe yadioma.

18Bä fö̦ö Jedolo nija bä tää ebä co̦a fa co̦bonö, ö̦jönö bä wa̦lii mö baoma.

—¿Wedinaja wamacö li fa cuaanö, wamacö li co̦a jaödabei cufe? —a cuma.

19Bä a̦ nö wäquema.

—Oweja bä ca̦i lä juu wejei bä nija, Ejidotelinö yamalecö nowamaö fa cuicunö, a läblaliyoma. Mau u ma cui ja, yamalecö bayeliblalema. Oweja bä amishi bluca co̦a fe yadiamalema —bä cuma.

20—¿Wedi jamö bei a li, ö̦jö lä? —bä tää ebä nija a cuma—. Ö̦jö wa̦lo a lä cui, ¿wama a li lulubou showadao mlai? Äyämö a ni liyobä, a nacaö da showadaoje —a cuma.

21Ö̦jö a wa̦lo nija Moisesi a bälöo bufi fa doblaonö, a bälöquema. Ö̦jö nija a fa bälöalunö, bä tää Sefola e dämalema. 22Sefola nija, Moisesi bei ijilubö e fa cuicunö, bei a wa̦fa jilaquema. “Shomi täbä ulifibö jamö ya bälöa bäa lä cule”, a bufi cuma yalo, Jesono a wa̦fa jilaquema.

23Tä nö fa dedelönö, Ejidoteli a bada lä cui, a nomalayoma. Ö̦jö ma cui, Isaeli ebä a̦ nö la̦awä bleaamaö juo showaomaje. Bä nofi ojode tablamobä, bä a̦ lä fano wei däjä, Yai Bada tänö bä a̦ ji̦liledayoma. 24Bä a̦ nö lä bleaaö wei bä a̦ ji̦lilema. Cama a wa̦ nö wäo lä balöono wei tä ca̦i daö showaoma. Ablaamö a ma cui, Isaacö a ma cui, Jacobo a ma cui, ö̦jö bä nowa jaba lä tano wei tä nofi jaducubou showaoma. 25¿Ö̦jö tawä? Yai Bada tänö Isaeli ebä nö bleaaö fa dalalönö, bä nofi jalujuboma.

Currently Selected:

Éxodo 2: GUU

Highlight

Copy