Éxodo 1
1
Ejido jamö Isaeli ebä bälöa
lä nomöjöaliyono wei tä a̦
1Ejido jamö Jacobonö bei ijilubö ebä ca̦i waloaliyoma, Isaeli a wa̦fa ca̦i lä cuono wei a lä cuinö. Bei ijilubö ebänö cama ebä ca̦i waloa mö fedua showaquemaje. Isaeli bei ijilubö ebä lä waloaliyono wei, abinaja ebä a̦fa cuoma. 2Lubeni, Simeoni, Lewi, Judawä, 3Isacala, Sabulono, Bejamino, 4Dani, Nefitali, Cadö, Aselo. 5José a lä cui, Ejido jamö a cuo waiquioma. Jacobo bä ijilubö ebä ma cui, bä fääshä ebä ma cui, 70 ebä bluca cuoma.
6Tä nö fa dedelönö, José a fa nomalönö, cama ebä mashi ma cui, ai bä bälöblamou mö lä feduono wei bä ma cui, bä bluca nomaa mö fedulaliyoma. 7Öjö ma cui, Isaeli ebä balaa fe balojoa jälayoma. Bä nö fa wa̦lojoblalunö, bä ca̦i bälöo lojodooma. Bä balaa dodijilayoma cudeenö, Ejidoteli bä ulifibö jödödöblalemaje.
Isaeli ebä nö jaba
lä bleaamano wejei tä a̦
8Bei. Tä nö fa dedelönö, ya̦cumö Ejidoteli bä nija José a wa̦fa ji̦libou lä mlai a bada läa nomöjöquema. 9Cama ebä fa yömölanö, abinaja ebä nowa tama.
—Bei. Isaeli ebä fa balalönö, fei däjä bä bluca fe balojowä dicowä. Bä nö wa̦lojaö dicowä. Bämalecö doblamaö mlaobeje bä li waiquiwä. 10Wamale a̦ da ji̦lilä. Bämacö bufi daolanö, bäma bä da bälömabo. Bäma bä balamaö dicoo mlai ja. Tä ulifi wa̦lidiblou bädao ja, bä nö lä nabämou wei bä nija bä fa co̦cablalunö, bämalecö nabä quea bädaquemaje. Bämalecö nabä fa queicujenö, bä docublou showadao dicoo mlaobä. Bä ojodamobä bäma bä malä tabole —bä nowa tama.
11Ö̦jö cudeenö, Isaeli ebä nosiemaö fe blacäjobeje, bada bä lämaquemaje. Bä ojodamobä jamö bä fe fa blacäjamajenö, bä nö bleaamamaje. Bada a wa̦ ja, shabono bolacabö cäcöbö bada tablamalemaje, nii bä shi̦liqui shömomabeje. Ai a shabono lä cui, Bidono tä a̦fa shabono cuoma. Ai a mö feduwä lä cui, Lamesei bei tä a̦fa shabono cuo mö feduoma.
12Ö̦jö ma cui, bä nö bleaamaö fe ma balojoono wejei ma cui, bä yai shino balaö fe yadio dicooma. Bä ca̦i bälöjou blaucublaliyoma. Inaja bä cuaama yalo, Ejidoteli bä fa quilinö, bä nofi wa̦libou fe balojoomaje. 13Ö̦jö cudeenö, bä shino yai nosiemaö fe blacäjou dodijiomaje. 14Showadi bä nosiemamaje yalo, bä bufi nö bleablalamamaje. Yafi bä i̦tamabeje, mashita cofibö bä taamamaje. Mashita bä lä sudimamou wei toubä ja, bä ca̦i ojodamomamaje. Ficali ca jamö bä ca̦i nosiemamaje. Bä nofi ojodabou mlajei, showadi bä nosiemaöje ja, bä nö bleaamamaje.
Ebleo cäbä ijilubö wai
shämaö lä bufino wei tä a̦
15Ö̦jö däjä, Ejidoteli a bada lä cuinö, suwä cäcöbö nija a wa̦ fama. Ai a suwä lä cui, Sifla a wa̦fa cuoma. Ai a mö feduwä lä cui, Fua a wa̦fa cuo mö feduoma. Ebleo bä suwä ninimou däjä, showadi bä lä bayeliblaböno wei cäcöbö suwä cuoma. Bada anö, abinaja cäcöbö nowa tama.
16—Ebleo bä suwä ninimou däjä wafä bä bayeliblaö cuaabä jamö, abinaja wafäcö cuaabä. Ijilu wa̦lo bä tablaöje ja, wafä bä shäö showadaobä. Suwä bä tablaöje ja, ö̦jö bä shino demi cuobä —a cuma.
17Ö̦jö ma cui, ö̦jö cäcöbö suwä lä cuinö, Yai Bada nija cäcöbö fa quilinö, Ejidoteli a wa̦ bada juabönomi. Cäcöbö nosiemaö ja, a lä cuno weinaja, tä tabönomi. Ijilu wa̦lo bä ma cui, bä demi tamaboböö fe yadioma. 18Ö̦jö cudeenö, Ejidoteli bada a lä cuinö cäcöbö nacaa co̦lema.
—¿Wedi wafä tä tabä, ijilu wa̦lo ya bä shämaö ma bufino wei, wafä bä li demi yacamabou dicoo? —cäcöbö nowa tama.
19—Wedi tabä mlai —bada a nowa taböma—. Ejidoteliyoma bä nö bleaaö lä cuaaö weinaja, ebleo bä suwä cuaaimi. Ö̦jö bä yai shino lojode dodijiwä. Yafä bä bayeliblabä, yafäcö ajea showaa mlai ja, lobe bä nofi ijilu fa tablajenö, bä li yacabou waiquioje däjä, yafäcö li waloo nomöjöo —cäcöbö cuma.
20-21Inaja cäcöbö suwä cuaama yalo, Yai Bada tänö dodijidawä cäcöbö tamaboma. Yai Bada nija cäcöbö quilima yalo, ijilu bä ja, cäcöbö bayeliblaö dodijioma. Isaeli ebä bluca lä cui, bä balaö fa showaofälönö, bä bälöa lojodoa fe balojoaliyoma.
22Ö̦jö däjä, bada a lä cuinö, cama ebä bluca nija, ebleo bä ijilubö nabä shömaö nomöjöoma.
—Bei. Ebleo bä suwä nija ijilu wa̦lo bä cublou ja, Nilo u jamö bä queamaö da showadaoje. Suwä bä shino demi tabobeje —a cuma.
Currently Selected:
Éxodo 1: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
