Éxodo 4

Tä nö lä quilijii tä nia

lä wawämano wei tä a̦

1Ö̦jö däjä, Moisesi a wa̦ faö majöoma.

—Inaja cafä wa ma cuu wei ma cui, wale a̦ bejedi nia bufiimije. ¿Ö̦jö tawä? Wale a̦ ji̦liaö mlajeicätä. Abinaja wale nowa nia shino taöje. “Cafä nija, ö̦jö Jeobaa wa tä a̦fa lä jilaö wei tä wawäblono mlaicätä”, wale nowa taö cuqueije —Moisesi bei a cuma.

2Ö̦jö däjä, Jeobaanö a wa̦lima.

—Miji ¿wedi bei wa tä li bou cule? —a cuma.

—Fii ya defi bou lä cule.

3—Defi da shäyäblacö.

Inaja a cuu ja, defi fa shäyäblacönö, olu cäcö cublaliyoma. Cäcö fa dalalönö, Moisesi a docublaliyoma. 4Ö̦jö ma cui, abinaja Jeobaanö Moisesi a nowa tama.

—Lobe cäcö shina däa da co̦lä —a nowa tama.

Inaja a nowa taö ja, lobe cäcö shina däa co̦lema. Cäcö däa fa co̦länö, fii bei fi cublou co̦layoma.

5—¿Ö̦jö tawä? —Jeobaa a cuma—. Aminaja wa nia cuaaö, wa wa̦ bejedi bufibeje. “Nö badabö Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija tä lä bufiblamou wei tä lä cui, ¡Moisesi nija bä tä bejedi wawäa nodilayoma lä!” wa nofi tabobeje —Jeobaa a cuma.

6Abinaja Jeobaa a ca̦i cuma.

—Bei wa balöcö ja, imicö si da ilulublaicu —a cuma.

Imicö si fa ilulublaicunö, imicö ucäa fa co̦lonö, ¡Jo! Imicö mömou jode fe balojooma, täbä sicö lä jodemaö wei tä wayunö. 7Ö̦jö däjä, Yai Bada a wa̦ faö co̦oma.

—Bei wa balöcö jamö, inaja imicö cublaa da co̦icu —a cuma.

Ö̦jö cudeenö, Moisesi imicö lucäa fa co̦lunö, imicö ucäa co̦layoma. ¡Shädayai! ¡Demi imicö cublou co̦layoma! Cama ya̦jicö dodijidawä lä cuono weinaja, imicö shomli cublou co̦layoma.

8—¿Ö̦jö tawä? —Yai Bada a cuma—. Wa wa̦ ji̦liblaimije ja, abinaja wa cuaabä. Fii defi nö lä quiliafe wa tä ma taö wei ma cui, wa wa̦ bejedi bufiimi showaweje ja, wa imicö nö quiliwä lä damolalufe, wa tä taö nomöjöobä. Wa tä taö bolacadou ja, bä bufi jaimou fe yadio wä. 9Tä nö lä quilijii wa tä taö ma bolacale ma cui, wa wa̦ bejedi bufiimi showaweje ja, wa wa̦ ji̦liblaimi showaweje ja, abinaja wa cuaaö nomöjöobä. Nilo u jamö mau wa u fa jiquelänö, mashita wejediwä jamö wa u löabä. Ö̦jamö Nilo u jamö mau wa u lä yaqueleno wei u lä cui, mashita wejediwä ajamö u nia i̦yäblou —Jeobaa a cuma.

Moisesi a wa̦ bayeliblabä Aaloni a nia lä shömano wei tä a̦

10Ö̦jö ma cui, Jeobaa nija abinaja Moisesi a cuma.

—Shädayai. Cafä Bada wanö, wale ma yömölale ma cui, ya aca jaba jayublou lä mlainaja, fei däjä ma cui, ya aca cuwä showawä. Ya aca bolebö showawä dicowä —a cuma.

11Ö̦jö däjä, abinaja Jeobaa a cuma.

—Yanowamö a lä cui, ¿wedinö bei caficö li tablalema, ö̦jö lä? Yanowamö aca lä bolebö wei a ma cui, yömöcacö lä comi wei a ma cui, mamocu lä dodijidai a ma cui, a lä jubäbö wei a ma cui, ¿wedinö inaja bei bä li tablamaö? ¿Camiyä Jeobaa ya lä cuinö mlai daanö? 12Camiyänö ö̦jö ya tä bluca daö yalo, quilii mlai, a da alufälö, ö̦jö lä. Bäfä a̦ bayeliblaö weicätä. Wa wa̦ fabä, bäfä a̦ bälaö weicätä —a cuma ma cui, 13abinaja Moisesi a cuma.

—Shädayai. Cafä Bada wanö, ai a da shömölö, ¿ö̦jö tawä? —a cuma.

14Ö̦jö däjä, Jeobaa a jushudou fe balojolayoma, Moisesi nija. A nowa taö ja, abinaja a cuma.

—Uo. A̦iyofä Aaloni a lä cui, Lewi nodiwä e mö feduwä lä cui, a malä cule. Ö̦jö aca lä jayu wei ya daö. Wa mö baamabä, a juu mö fedua waiquia lä cuimi, ¿ö̦jö tawä? Wa fa dalalönö, a bufi nia doblalou. 15Cafänö wa fa yömölalönö, tä a̦ yai wäyäö fe dolemobä, wa wa̦ nia bälaö. Bäfäcö a̦ bayeliblaö wä. Wafäcö nia lä cuaaö wei tä ja, bäfäcö damafälöö wä. 16Yanowamö täbä nija wa wa̦no wäyäö fe dolemobä, a̦iyofä Aaloni a nia cuo. Aaloninö wa bufiblabä, cafä wa nia cuo mö feduo. 17Ei fii defi lä cui, wa defi fa däläfälönö, wa defi ca̦i juu showadaobä. Ei definö, tä nö lä quilijii tä bluca wawämamobä —a cuma.

Bä shö̦ö e nija Moisesi a

shömamou lä bufiono wei tä a̦

18Moisesi a co̦a fa co̦bonö, bä shö̦ö Jedolo nija abinaja a cuma.

—Ejido jamö iba bä cuo juobä jamö, wale shömöa da co̦lu. ¿Ö̦jö tawä? Ya bä demi da mö —a fa cunö, bä shö̦ö e a̦ juoma.

—Ja̦o. Wa jubä lä.

19Madiana jamö Moisesi a cua showalanö, abinaja Jeobaanö a nowa ca̦i tama.

—Bei. Ejido jamö a cuaaö da co̦ofälö. Wa nia lä shäno wejei, bä bluca mladou malä waiquilayono wei —a nowa tama.

20Ö̦jö cudeenö, bei suwäbö, bei ijilubö ecöbö, ö̦jö bä nacaa fa showaläfälönö, cama yalo bulo e jamö bä bluca döcämalefälöma. Ö̦jö däjä, Yai Bada tänö defi nabä lä shömano wei defi fa showaläfälönö, Ejido jamö bä ca̦i co̦a co̦layofälöma.

21Ö̦jö däjä, Moisesi nija abinaja Jeobaa a cuma.

—Ejido jamö wa waloo co̦o däjä, bada a mamo showao däjä, a nö quiliaö da dodijio. Bäfä da damablei wa tä tabä, bäfä nö wa̦lojamaö waiquia lä cule. ¿Ö̦jö tawä? Ö̦jö ma cui, Isaeli ebä shömaö co̦o mlaobä, ya bufi nia lojododamaö.

22’Ei ya wa̦ lä cui ja, bada wa nia yömölaö. “Jeobaa ya wa̦no wäyäö lä cule”, wa nowa taö dodijio. ¿Ö̦jö tawä? Isaeli ya nofi ijilumaö. Iba jaba bei a. 23Bä fö̦ö ya e lä cui, yale nosie shino yai juabä, a shömaö co̦o da bufi. ¿Ö̦jö tawä? Inaja ya ma cuu wei ma cui, ijiluyä a noshi umabou dicoo ja, cama bei ijilubö jaba a lä cui, ya nia shäö. Einaja bada a nija wa cubä —Jeobaa a cuma, Moisesi nija.

24Moisesi a shäbä, cama ebä ca̦i miofälöbä ja, Jeobaanö a mö bamalema. 25Bei fe̦yalobö e nija a ishou mlaobä, Moisesi bei suwäbö Sefola a lä cui, a läblaliyoma. Bei ijilubö mosi sicö joyabä, a nabä icua läquema. Molu a fa dälönö, bei ijilubö mosi sicö janöblaö showalayoma. Ö̦jö mosi sicö i̦yänö, Moisesi mamicö bacäjamalanö, e a̦ fama.

—Bei. Ö̦jö lä waiquiwä. Fe̦yaloyä wa lä cuinö, camiyä nija i̦yä i̦yä wa bä nabä malä shömaö wei —a cuma.

26Bei ijilubö mosi sicö joyalema cudeenö, einaja e cuma. Inaja a cuaama cudeenö, Moisesi nija Jeobaa a bufi asimolayoma.

Ejido jamö Moisesi a lä

co̦layono wei tä a̦

27Aaloni nija abinaja Jeobaa a cuma.

—Ulifi bloque a jamö a da alufälö, fääshäfä Moisesi wa mö baamadayobä —a cuma.

Ö̦jö cudeenö, a fa alufälönö, Yai Bada etä balöcö jamö a mö bamalema. Cäcöbö fa̦locayoma. 28Ö̦jö däjä, bei a̦iyobö Aaloni nija, Moisesinö Jeobaa a wa̦no wäyäö showadaoma. Jeobaanö tä a̦ bluca wäyämaö lä bufino wei tä a̦ ma cui ja, tä nö lä quilijii tä nabä bluca lä shömöqueno wei tä ma cui ja, a yömölaö showadaoma. 29Ö̦jö däjä, Ejido jamö Moisesi, Aaloni sho cäcöbö aa fa showaläfälönö, Isaeli ebä bada lä cui, bä co̦camobömalema.

30Moisesi nija Jeobaa a wa̦no bluca lä ji̦lileno wei, Aaloninö a wa̦no fe dolemaö showadaoma. Täbä mamo showao däjä, tä nö lä quilijii tä bluca ca̦i wawämaö showadaoma. 31Ö̦jö däjä, tä a̦ bejedi bufia showadalemaje. Jeobaanö Isaeli ebä nofi lä jaducubono wei tä a̦ ji̦lilemaje. Cama nija bä nö bleaaö lä dablamono wei tä a̦ ca̦i ji̦lilemaje. Ö̦jö tä a̦ bluca fa ji̦liläjenö, bä möfe fa boolalunö, Jeobaa a wa̦fa Bada doblao tamaje.

Currently Selected:

Éxodo 4: GUU

Highlight

Copy