Lawana Nani 28
28
LAWANA 28 (27)
Wan pura sunra nani ba Dawan walisa
Debit lawana.
1Dawanki, kaini kakahbra,
man ra mai winisni,
¡winanki na walras kapara!
Man bui yang ra pana ai aisaras kama kaka,
mahka upla pruan nani ba tilara wamna.
2Man ra diara makabi, karna wini puri sunisna ba wals,
mihti nani sakbi man wamtla holikira ra winisna ba.
3Upla watawikira nani aikuki ai raski ai brih wapara,
saura dadaukra nani ai mana briaia ba wal sin apia,
lata wina kaiki ba wan uplika baku wan marikisa,
sakuna ai kupia bîla watawi lâka ni banhwan sa.
4Ai warkka mana ba yas,
dîa witin nani briaia ba,
ai daukanka saura ba mana;#Jir 50.29; Par M 18.6.
upla wala ra dîa munan mana ba ni kli aibaps,
saurka nani daukan ba kulkanka mana ba kat.
5Witin nani lika Dawan paskanka ba dukiara lukras sa,
ai mihta nani daukanka tânka sin lukras bamna,
¡witin nani ba sauhki tikbia, bara kli
alki sin bukbia apia!
6¡Dawan ba yamni pali kabia,
diara nani makabri ba
bîli baikra walan bamna!
7Dawan sika yang karniki,
yang kaini kahbaika sin;
kupi witin ra luki tniwan,
bara witin hilp ai munan.
Baku ba ra kupi ba lilia pali sa;
aiwanamni bara Dawan ra tingki wimni.
8Dawan ba ai uplika nani karnika sa,
witin hilp munisa baha ai kingka bâk sakan ba.
9Dawan, uplikam nani ba swaki sâks;
yamni muns, witin nani ba man uplikam sa.
Sepad yamni kum baku witin nani ra main kaiks;
¡klamhkla ra alki ban kaia ra bri bas!
Currently Selected:
Lawana Nani 28: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
