Miqueas 6
6
Gâd bui Israel mapara blahwisa
1Dawan nanara dîa aisi ba, man nani wals:
“¡Man nani bus,
lâmka daukisma ba il tara nani ra mariks,
il nani ba yas bîlam baikra ba walbia!”
2Il tara nani, tasba playka karnika bapanka nani sin,
Dawan lâ aisi dauki ba man nani wals;
Dawan lika ai uplika nani mapara lâ aisi daukaia brisa,
Israel mapara karna blahwaia sin brisa.#Ais 3.13; Os 4.1; 12.2.
3Naha na Dawan aisisa:
“Upliki nani, ¿man nani mampara yang dîa daukri,
diara aihka pali sin mai munri sa ki? ¡Ai wis!
4Yang lika Idsip tasbaya wina mai saki bri balri,#Imp St 12.50-51.
alba lâka wina sin mai swaki mai sakri.
Yang mita Moses, Eran,#Imp St 4.10-16. Meri#Imp St 15.20. sin
man nani tâm briaia blikri.
5Nanara, upliki nani, naha na âmya ra bri bas:
Moab kingka Balac, man nani ra daukaia luki kan ba,
bara Beor luhpia Balaam sin pana aisin ba.#Kul K 22—24.
Âmya ra sin luki bas,
Sitim wina Guilgal kat impaki kapram yabalka ra
diara nani takan ba tilara#Jas 3.1—4.19.
yang bui man nani dukiamra daukri ba kupiam krauki bas.”
Dawan upla wina bîla kaiki ba
6¿Yang dîa pali mihti ra bri Dawan purara ba mawanra bal
witin ra puri sunamna, bara ai nina sin mayunamna?
¡Bîp lupia mani kum alkan ba bri balamna,
baha aiska angki mayunaia dukiara!
7¿Sîp nani 1,000 yang bri sal yabamna kaka,
apia kaka oliv batanka laya,
awala nani 10,000 baku yabamna kra,
Dawan baha dukia nani brih lilia takbia ki?
¿Apia kaka, yang luhpi taiwahkia ba yabamna,
Dawan mapara buri ba saurki mana aibapaia?
8Dawan bui man ra pat mai win,
dîa ba yamni daukaia tânka
bara dîa man wina bîla kaiki ba.
Bamna naha pali sika, man daukaia witin mamkabi yaba:
kasakka lâka daukma,
kupia pihni lâka ba, latwan kaikma,
bara Gâdkam mawanra bawikira kaia sma.#1 Sa 15.22; S L 21.3; Os 2.19-20; 6.6; Em 5.22-24; Sak 7.9-10.
9Dawan bîla baikra ba, upla nani ra winisa;
bamna aitani pali sa bawikira witin ra ai bîla wali kaia:
“Tawan tâ uplika nani, upla sut sin,
naha na aman wals:
10Watawikira nani, ai watla bîla ba
impliki brin dukia nani ni banhkisa;
bara yang kau saura pali kaikisna ba,
witin nani paun ra diara paun muni impliki ba.
11¿Baha uplika paun ra diara mangki bara tawan ra impliki ba,
baha saurka dauki ba nahki ban pali pâtkas kulkamna ki?#Lib 19.35-36; Kli S 25.13-16; Em 8.5.
12Yuyakira nani naha tawanka ra iwi ba
upla umpira nani ra tataibra pali man sa;
kuninkira nani bara upla ra kunin mamunra baman nahara iwisa.
13Baha saurka nani daukisma ba mita,
yang klala maikaisna;
sauhki mai tiki diara âpu mai daukaisna.
14Plun pi kama,
sakuna aitani âmyapah taki kama apia,
plun mai dauki ba ban kabia;
patam wahbi kama sakuna ban alki bri kama apia.
Bara ban kra wiria pan apahki swima kaka,
baha sin war aiklabi ba mita sauhki tikan kabia.
15Saumuk mangki kama,
sakuna mâ krikma apia;
oliv mâ nani sin taibi kama,
sakuna baha batanka laya ba,
man nani dukiam kabia apia;
wain mâ ba sin taibi kama,
sakuna laya ba man nani dima apia.
16Man nani king Omrí lâka nani kat, baku sin
Ahab kiamka warkka saura nani lâka kat
nina bliki saura daukram.#1 Ki 16.23-34; 21.25-26.
Witin nani dîa daukan baku man sin daukram.
Bahamna man nani ba upla sâtka sut nakra ra
diara saura mai kaikaia mai daukamna,
bara bahki mai kulki lamwaska kiki kabia;
upliki nani swira lâka kaia ba sut,
man nani puramra kauhbia.”
Currently Selected:
Miqueas 6: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
