Miqueas 7
7
Israel ba aisawan pali takan
1¡Alai! Upla dus mâ nani sut dakbi brin ba ningkara
wala kum bal mâ dakbaia pliki ba baku sna;
dus mâ pain pawan nani ba âpu sa,
baha mâ nani pin ai dauki kan ba.
2Naha tasba ra upla kasakkira nani,
Gâd wal wapni ba âpu takan sa,#Law 12.1.
sakuna kumi bani ba,
upla tâlia laikaia baman aihwaki kaikisa;
kumi bani ai muihni mina ra alki batakaia kiwka nani mangkisa.
3Witin nani lika,
diara saura daukaia smasmalkrika nani sa;
wark lalka tara nani ba,
pana yabia dukiara taibi munisa,
lâ dadaukra nani ba
ai mana tara kulki implikisa;
upla tara karnika bri ba sin,
ai kupia brinka ba kat baman lâ nani ba daukisa,
bara tawan uplika nani sin
witin nani dauki ba wal warha daukisa.
4Witin nani tilara upla kanra yamni nani kan ba
lika, kiaya dusa baku takan sa,
upla kau wapnikira nani kan ba
sin, rahra pali man baku takan sa.
Sakuna witin nani klala briaia yua aula;
baha aihwawakra aisin yua ba,
baha taim sika,
tanis turban kaia lâka witin nani tilara takbia.
5Walkam ra kasak lukpara,
witin nani ra sin luki tniwpara,
mayam tnamya ra prawi ba ra sin
kasak aman kaiki bas,
witin wal dîa aisisma ba.
6Kan luhpia nani bui ai aisika nani ba bahki kulkisa,
luhpia mairin ba sin ai yaptika mapara buisa,
mula yaptika ba sin ai dapna mairin mapara buisa;
bamna upla ai watla bilara aikuki iwi nani ba
sika ai waihla nani sa.#Mt 10.35-36; Lk 12.53.
7Sakuna yang lika Dawan ra baman bîla kaikamna;
Gâdki swaki ai saki ba bîla kaikamni,
kan Gâdki ba yang ra ai walbia.
Israel pura lui win takanka pali ba
8Nisan nani sut waihli nani sma ba,
man nani laiwaska kikpara
yang kauhri ba dukiara,
kan yang kli buamna;
yang kra tihmia tara tilara iwisna,
ban sakuna, Dawan ba yang ingniki kabia.
9Dawan mapara saura daukri bamna,
witin kupia baiwanka tilara ban bapi bûi kamna,
witin mita yang lâika aisi dauki wapni ai sâkbia ba kat.
Witin mita ingni ra ai sâkbia,
bara yang lika witin kasakka lâka tânka ba kaikamni.
10Yang waihli baha ba kaikbia bara ai swira lukbia;
witin bui yang ra ai wi kata ba:
“¿Dawan Gâdkam ba anira sa?”#Law 79.10; Jl 2.17.
Sakuna yang naikra ni
witin nani ba kaikamna,
nahki yabal ra, slaubla wan mina ni taibi ba baku
taiban kabia ba ra.
11Jerusalem tawanka kutbanka nani ba,
kli paskan kaia yua ba aula sa;
bara baha yua ra Jerusalem tawanka bîla ba
kau tara kitbi brih wan kabia.
12Baha yua ra Asiria tasbaya wina
ban Idsip tasbaya kat,
Nilo awala wina Éufrates awala kat,
kabu kum wina kabu wala kat,
il nani wina il wala nani kat,
baha uplika nani sut ba,
Jerusalem tawanka ba kat balbia.
13Bara baha tasbaya nani ba
lika sauhki tikan,
upla iwras tasbaya baku takbia,
upla nani bahara iwi kan ba saura daukan ba tâka mita.
14¡Dawan, uplikam nani ba aihwaki kaiki bas,
witin nani sika man sîpka daknika nani pali sa bamna!
Il tara nani tilara yakan iwisa,
tasba disang nani tilara.
Basán, Galaad twiya tasbaya ra
brih was kaina piua ra kata baku.
15Man bui diara aihka painkira tara nani,
witin nani ra dauki mariks,
Idsip tasbaya wina sakram yua ra dauki marikram ba baku.
16¡Nisan wala nani sut yarka baha ba kaikbia,
bara ai karnika tara bri ba kaiki,
witin nani ai swira lukbia!
¡Âu, witin nani bîlas,
kiama prawan baku man takbia!
17¡Witin nani piuta baku
tasba pukpuka ra sambia;
ai biara lama taya ra kwasi tauki
daiwra nani wala baku!
¡Ai watla bilara dimi yukuwi ba wina,
tatatwi takbia,
kli man ra plapi balbia
sibrin tara kira ni,
Dawan wan Dawanka!
Dawan bui ai uplika nani pâtka swih tikisa
18Man wal baku Dawan wala âpu sa,
kan uplikam kau swin ba mampara buan ba bara
saurka ba sin ban swih tikisma.
Man kupiam baiwanka ban pali alki briras sma,
sakuna lilia sma kupiam pihni lâka ban mariki kaia.
19Man bui yang nani ra kli umpira ai kaiki kama,
saurki nani daukri ba, tasba ra minam ni taibi bikma,
bara yang nani watawi daukri ba sut,
man mita kabu tihuka ra rungki tikma.
20¡Jekob kiamka wal man kasak tânka aiska sut daukma,
Ebraham kiamka ra sin umpira kaikma;
baku yang nani damiki nani ra blasi pali piua wina
daukaia wisatma ba, man bîlam kat daukma!#Bla St 12.1-3; 17.6-8; 28.13-15; Lk 1.55,73.
Currently Selected:
Miqueas 7: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
