Aiseya 48
48
Dawan aisisa diara raya nani bal takbia
1“Jekob watla uplika,
man nani naha na wals,
Israel nina ni mâki ninam mâkan ba,
bara man nani ba Juda kiamka,
Dawan nina ra swer taki nani sma ba;
bara puram suni daukisma ba, Israel Gâdka dukiara,
sakuna wapni lâka ra apia,
kasakka lâka ra sin apia;
2dîa wisma tawan holikira uplika nani,
bara tâ baikaia Israel Gâdka ra;
witin ai nina ba karnika sut bri Dawanka:
3Patitara wina, diara luan nani dukia ba pat mai wîri;
yang pali mita sika baha nani ba man kaikaia aisari.
Tit bûi daukri bara baku
dukia nani ba pain takan.
4Yang pat kaiki kapri man ba lamla karna sma,
karna ayan baku sma,
bras daukan baku, sip bulras sma,
5pat mai wîri kan piua nani luan ba wina,
kau baha bal takras kan ba ra
pat maisam pakri kan.
Bamna man nanara naku aisama apia dukiara:
‘Yang aidul warkka daukri,
lilka nani karbi bara slilki daukri
ba mita naha diara nani na blikan.’
6Man naha nani sut walram ba;
pain laki kaikram,
witin nani ra bâra kasak wiaia sma.
Bamna nanara mai wisni,
diara raya nani yukuwan ra nani ba man kau tânka briras kapram ba,
baha kaikaia sma.
7Diara nanara paskan nani ba,
yu nani pat luan ba piua ra paskan ba lika apia.
Naha yua nani sin man nani kau walras kapram ba,
bamna baku man nani sip wima apia:
‘Yang nani baha tânka pat bri kapri.’
8Âu, man naha tânka kau walras kapram,
man sin kau baha kakaira apia kapram;
kan piu bani ra, kiamam prakan bara ilingkras bri katma.
Yang kaiki katna man na kasak apia sma ba
bara bîla walras lulki swiram kan ba,
baha mita ninam mâkri man ba mapara babura,
kau mai baikras kan ba wina.
9“Yang nini latwanka ba tâwan,
kupi baiwanka ba alki takaskri,
yang maiyunra ba dukiara
ban mai sauhki tikaia lukri.#Isi 20.22; 36.22-23.
10Yang sunu mai sakri,
sakuna silbar ra dauki ba baku lika âpu,
sakuna kubus tara ra baku pât wahwaia.
11Yang laitwanka lâka ba mata baku daukri,
kan yang nini ba tâski dauki bahki kulkan kaia sip apia,
praina ba yang bui upla wala ra yamna apia.#Ais 42.8.
Dawan bui ai uplika nani swaki sâkbia
12“Israel, man nani bui yang ra wals,
Jekob uplika nani, man nani ra yang mai paiwri ba;
yang sika Gâd kumi, wala âpu,
sut tâura ba yang lâs ra sin yang baman.#Ais 41.4; 44.6; Par M 1.17; 22.13.
13Tasba playka na sin yang mihti ni bapri,
bara mihti aihkika ba, mihti sirpika bilara
kasbrika pura nani ba kulki kaikan;
yang bui witin nani ra winri
bara bal asla taki maiwanra buan.
14Man nani sut asla aidrubi bal bara wals:
¿Ya man nani tilamra bâra sa
naha diara nani takaia kan ba dukiara:
baha uplika yang bâk saki briri ba daukbia dîa luki ba,
baha witin ai kupia kat daukbia Babilon uplika nani wal
bara Caldea uplika nani masraka purara sin bâra kabia?
15Yang, yang sika aisari ba,
yang bui witin ra winri balaia,
yang yabri balan
bara ani anik wabia sut ba yamni man takan kabia.
16Man nani laimara bal, naha wals:
Blasi pali ba wina yang yukuki aisaras kapri;
baha warkka nani daukan ba wina,
yang baha tilara ban sna.
Bamna nanara yang, Dawan,
karniki witin ra yabri
witin ba blikri balaia.”
17Dawan bui man ra atki mai sasakra ba, naku win,
Israel Gâdka Holikira ba:
“Yang sika man Dawan Gâdkam;
yamnika uya man ra takaia ba mai smalkisni,
yabal bâk wapaia tâm brisna.
18¡Bamna man, yang lâika bîla nani ra walram kan kata!
Bâra lika man ra kupia lâka ba awala kum baku kaia kan,
bara yamnika nani man ra taki ba kabu ripka nani baku kaia kan.#Kli S 29.5; Law 23.3; 27.11.
19Man kiamkam nani ba ailal kabia,#Bla St 22.17.
sip kulkras kabia, kabu auhika baku ba mita;
yang aima kumi sin sauhki mai tikamna apia,
baku sin yang maiwan wina sin mai slingbi sakamna apia.”
20Babilon wina man nani bal taks,#Jir 50.8; 51.6,45; Par M 18.4.
Caldea uplika nani tila wina plaps,
liliakira wal naha sturka nani wis
upla sut ra,
bara brih was tasba tâ wala pali kat.
Wis: “Dawan ba pri sakan
ai dukia dadaukra Jekob ra.”
21Upla iwras tasbaya bâk witin nani ba brih wan kan,
bara lî din daukras kan;
witin nani ai dukiara walpa wina lî yan plapan;
walpa ba kwâkan, lî nani ba laiwan.#Imp St 17.1-7.
22Saurakira nani ba dukiara
kupia kumi lâka ba âpu sa.#Ais 57.21.
Dawan baku aisin.
Currently Selected:
Aiseya 48: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
