Aiseya 49
49
Dawan napakanka ba, nisan nani ingnika
1Kabu un ra iwi nani sma ba,
man nani laihura iwisma ba sin sut,
aman yang ra wals:
Dawan ai paiwan, kau yang aisubi takras kapri piua wina;
kau yang yaptiki biara ra kapri nini mâkaia ba ai kupia lukra ra brin.#Jir 1.5.
2Bara yang twisi ba
sord malira baku mangkan,#Hib 4.12; Par M 1.16.
ai mihta distika ni ai bikan;
bara trisba lipni baku ai daukan,
trisba watla ra ai mangki main ai kaikan.
3Bara ai win:
“Israel, man ba yang duki dadaukra sma,
man ra ni yang praina daukamni.”
4Bara yang pat luki kaikatna:
“Yang bahki ra wark takri,
diara sin sakras,
yang karniki nani ban tikri
diara bahki ra.”
Sakuna yang dîa daukri ba lika Dawan mihta ra sa,
bara yang maina ba Gâdki ai karnika brisa.
5Yang Dawan Gâdki mawanra kulkanka briri,
kan witin ba sika yang karniki.
Dawan ba ai paskan kan yaptiki biara ra kapri wina
witin ai dukia dadaukra kaia dukiara
bara yarka Israel ba, Jekob uplika nani ba,
kli balbia bara witin ra asla takbia.
6Witin wisa:
“Baha ba aitani apia sa,
man ba yang duki dadaukra baman kaia
Jekob kiamka ba bukaia baman
bara sin Israel tâka kau bâra ba,
kli bri balaia baman ba dukiara apia;
yang mai daukamni man ba nisan nani ingnika kaia,#Ais 42.6; 60.1-3; Lk 2.32; Jn 8.12; Ap St 26.23.
yang bui upla swaki sakisna ba lâka,
man tasba aiska ra brih waia sma.”#Ap St 13.47.
7Dawan, Israel Gâdka holikira,
pri sasakra ba
wisa tawan nani aiska pali lulki swin ba ra
upla wala nani bri misbara kaiki ba,
upla tataibra nani albika nani takan ba:
“King nani ba bara king luhpia nani sin mai kaikbia ba ra,
witin nani ba bal mamwanra bawbia,
kan yang, Dawan, Israel Gâdka Holikira,
bâk mai sakri yang dîa daukaia ba sut man ra aimakbia.”
Jerusalem ba kli mâkan kabia wisa
8Dawan ba wisa:
“Piua nani balan sa
yang kupi yamnika lâka ba mamrikaia,
bara mai aisari;
swak takan lâka ba balan sa,
bara hilp mai munri.#2 Ko 6.2.
Yang kainam kahbri
man dukiamra tawan wal lâ daukri ba,
kuntri ba kli paskaia,
yabrika tasba sauhkan bîla man ba kli ai mihta ra bribia dukiara.
9Silak ra mangkan uplika nani ra wiaia:
‘Man nani pri taks’,
bara tihmia tara ra bâra nani ra:
‘Swis man nani mai kaikbia.’
Yabal nani sut tnaya ra
man nani twi sâkma, ani ani ilka ra diara pâwras ba ra
daiwram nani pata bâra brima.
10“Witin nani kli plun daukbia apia, diran sin daukbia apia,
yu laptika mita sin bara lapta bitnika mita
sin munbia apia,
kan yang bui witin nani ra latwan sna tâ brisna bamna,
bara lî kârma nani ra brih wamna.#Par M 7.16-17.
11Bara yang ilki nani ba tilak yabal kum daukamni,
yabalki tara nani ba sin langni daukan kabia.”
12¡Man nani kaiks!
Naha nani na witin nani laih wina aula:
tila yahbra wina, bara tila muna wina,
bara Asuán tasbaya wina sin.
13¡Kasbrika laih purara, mayunra lawana nani aiwans!
¡Bara tasba sin lilia tara ni banhs!
¡Il nani, man nani mayunan binka tara dauks!
Kan Dawan lika ai uplika nani ba maisa nihkan bamna,
baha nani umpira ba dukiara luki kaikan bamna.
14“Saion aisisa:
‘Dawan ba yang ra lulki ai swin,
yang Dawanki ba ai âuya ai tikan.’
15¿Sakuna yapti kum ai luhpia ra ai âuya tikbia ki?
Apia kaka, ¿ai luhpia pali ba latwan kaikbia apia ki?
Kan ban kra witin ai âuya tikbia kra,
yang lika man ra sip âiya mai tikamna apia.
16Yang mihti nani bîla kat lilkam dauki brisna;
tawankam kutbanka nani ba piua bani ra maiwanra sa.
17Man nani kli mai mâkaia nani ba pat pali aula,
mai slingban nani ba wal;
danh âpu mai daukan nani ba mahka wan sa.
18Namkra nani buki tnamya kir kaiks,
bara kaiks, nahki witin sut asla taki,
man ra aula ba.
“Yang Dawan, rayaki wal swer takisna,
witin nani ba kwala baku man ra yamni mai kulki prâk mai dingkan kabia;
bara baha ni maisam wilkma tiara marit taki prâka dimi ba baku.
19Man kuntrikam ba sauhki tikan sa,
slingbi tikan bara bîla baman swin sa,
sakuna nanara tasbayam bîla sirpi takbia
kwâra tara nani bal iwbia ba mita.
Mai sauhki tatikra nani ba
laihura kitbi sakan kabia.
20Luhpiam nani tiwan baku luki katma ba,
witin nani kiamam kat mai wibia:
‘Naha kuntrika na sirpi pali sa,
yang nani iwaia;
plis kau aik yang bâra iwaia.’
21Bara man kupiam lukra ra wima:
‘¿Ya mita naha nani luhpia na aikan?
Yang luhpa âpu katna,
sip sin briras katma;
yang ai lulkan bara yang yakan katna,
¿ya mita pakan?
Yang ra yakan ai swin kan,
¿ansa wina balan?’ ”#Jir 31.15-17.
22Dawan ba naku wisa:
“Nisan nani ra yang adar yamni;
bara upla nani ra yang sain kum bukamni
bara ai klahkla ra buki luhpiam waitna nani ba bri balbia,
bara luhpiam mairin nani ba sin ai pahpaya ra bri balbia.
23King nani ba tasba ra man takan papikam nani kabia,
bara king luhpia mairin nani ba
luhpiam main kaiki kabia.
Ai mawan tasba ra bawi witin nani mamwanra mamyunbia,
tasba yuya minam wina, ai twisa ni dabia.
Bara man kaikma yang sika Dawan sna ba,
baha nani yang bîli kaiki ba
swira daukan kabia apia.”
24¿Kupia karna war ra aiklabi diara dakbi brin
waitnika bara dukia nani ba mihta wina dakbi bribia sip sa ki?
Apia kaka, ¿silak ra waitnika kum sip sa ki
tataibra kum mihta wina plapaia?
25Dawan kasak aisisa:
“Âu, waitna karnakira dîa dakbi brin ba,
kli mihta wina dakbia,
upla tataibra diara brin ba,
kli dakbi bribia.
Man mampara unsabaia pliki nani ba
mapara yang buamna;
yang mita luhpia nani ba swaki sakamna.#Ais 61.1; Jir 30.8-10; 31.11.
26Mai tataibra nani ra taibi munamna
ai wîna ba piaia,
ai tâlia ba sin wain baku di bla takaia.
Baku upla sut tânka bribia
yang, Dawan, yang bui man mai swaki mai sasakra sna ba;
yang, karnakira ba Jekob wina,
yang sika man pri mai sasakra.”
Currently Selected:
Aiseya 49: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
