Aiseya 47
47
Babilon lâka daukan ba
1“Bal iws, Babilon tiarika mairin,#Ais 13.1—14.23; Jir 50.1—51.64.
kau mayam âpu sma ba,
bara tasba pukpuka ra iws;
iwaikam wina iws, Caldea wina tiarika mairin,
bara tasba ra iws,
kan kli mai wibia apia
man ba swap lupia painkira.
2Plawar mâ taya sakaia walpaya ba bris,
bara plawar sakaia wauhs;
lamla mangkaika ba daiki sâks,
prâmka wâika ba alki buks,
kuhmam susu taks,
awala nani ba wapi lui was;
3yabrika wînam ba
kwala luha kaprika mai kaikbia,
âu, dîa susu pali kama,
kan pana mana aibapaia daukamni
bara upla kumi sin ai takaskbia apia.”
4Yawan atki wan sasakra ba,
ai nina karnika sut bri Dawanka,
Israel ra Holikira ba, witin aisisa:
5“Bîlam praki sâp iws,
tihmia, ingni wal lilapas ra dims,
Caldea tiarika mairin,
man na ‘nisan nani kwinka’ kli mai wibia apia bamna.
6Yang upliki nani mapara kupi baiwan kan,
bahki lâka mihta ra mangkri nisanki nani pali ra bara swiri man karnikam munhtara kauhan,
man bui witin nani ra umpira kaikras kapram
bara almukkam nani pahpaya ra wirhika nani sunram.
7Man wiram:
‘Yang na kwin ba ban kamna’;
sauhki tikras kapram baha dukiara,
bara sin lukras kapram nahki tnata alkaia kan ba.
8Baha mita, naha na nanara wals,
diara lalihkra nani mairka,
âuyapah iwaikam ra iwisma ba,
lukankam ra lukisma ba:
‘Yang, bara yang wina kau walan âpu sa;
yang piarka takamna apia,
luhpias sin takamna apia.’
9Damra walras kira, yu kumi bilara,
diara saura wâl ba man ra takbia:#Par M 18.7-8.
piarka bara luhpias takma,
ban sukia warkka smaya kaikaia bara
yapi kaikaia warkka tnata âpu daukram sakuna.
10Kan man watawikam lâka ra lukankam mangki briram bamna,
man wiram:
‘Upla ai kaikras sa.’
Man sinskam lâka ba, man diara tânka kaikaia lâka brisma ba mita kunin mai munan.
Bara kupiam ra wiram:
‘Yang baman, kau wala âpu sa yang wina.’
11Sakuna diara saura ba ban man puramra balbia,
sukia warkka daukisma ba mita
sip takaskbia apia;
diara saura tara kum man puramra kauhbia,
man mita sip takaskma apia;
pât kum man bîla kaikras sma ba
damra walras kira aihni puramra balbia.
12Nanara ban bâra kupiam yabaki bas,
sukika lâka ailal pali ba sin ban dauki bas,
baha nani tilara, man lan takram ba wahma kapram ba yua wina;
ban kra baha nani tâm baikbia,
waihlam nani ra sirang ikbia.
13Lâ smalki, kupiam krauki nani ailal bri katma tilara,
ban swapni takram.
¡Witin nani nanara bal bubia bara tâmwan aisabia,
kasbrika pura tânka plaplikra nani ba mawanra,
diara nani puramra aula ba kaikan dahra mai wiaia dukiara!
14Sakuna kaiks witin nani ba kapan taya yuya baku sa;
pauta klauhan mita witin nani angkbia,
pauta klauhan karnika ba wina
ai rayaka nani ba sip swaki sâkbia apia.
Kan masku klauhan apia sa,
baha lamara iwi ailahki kaia.
15Bahara sukia nani brisma ba,
witin nani naha baha kat takaskan
baha nani wal rayakam ailal pali daukram ba.
Witin nani kumi bani ai yabalka kat wan
bara upla kumi sin âpu sa swaki mai sakaia.
Currently Selected:
Aiseya 47: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
