Aiseya 27
27
Israel pri sâkbia ba dahra
1Baha yua ra
Dawan mita klala karna yabia
ai sordka tara, karnakira ba ni,
Leviatán ra,#Job 3.8; 41.1; Law 74.14; 104.26. piuta plaplapra ba,
Leviatán piuta âuya mâira ba,
bara dragun ba ikbia kabu ra bâra ba.
2Baha yua ra Dawan aisabia:
“Man nani aiwans wainki damnikira nasla ba lawana.
3Yang, Dawan nasla ba main kaikisna,
piua bani lî laikisna.
Tihmia ra kakna ra main kaikisna,
upla kumi mita sin saura munaia apia ba mata.
4Kupi baiwanka witin mapara âpu sna.
Sakuna kiaya, rahra maipara bâra sa kaka,
taki wih war dauki, angki âpu daukamna.
5Man brin mai daukisa kaka,
yang mita kan kahbamna,
yang wal kupia kumi lâka dauks.”
6Yua nani balbia,
Jekob ai wakia nani bribia,
tangnika baiwbia Israel slaunhka urhwi takbia,
bara tasba mawan âpu mâ nani ni banhbia.
7Israel tataibra nani ra,
Gâd mita klala yan ba baku
Israel ra lika klala yaras,
Israel ra ikan nani ra
ikan ba baku sin witin bui Israel ra lika ikras.
8Gâd uplika nani ra klala yaban
tasbaya wina saki tasba wala ra blikan
witin ai wingka puhbra ni sirang saura ikan,
lalma pâsa karna krawi ba baku.
9Sakuna, Jekob watawanka nani ba ban swih tikan kabia,
bara naha nani taki ba tilak,
witin ai saurka nani daukan ba
ban swih tikan kabia:
gâdkas nani altarka ba sut sauhki yuya baman daukbia.
Kal walpaya akbi ba baku,
Aserá lilka baha altarka ra kîa yamni angki yabi ba sut, âpu daukbia.
10Tawan tara karnakira nani ba bîla man swin kabia,
utla kum upla dimras watla ba baku,
upla âpu baku bîla man kabia.
Bîp lupia nani ba bahara twi pi kabia,
bahara bawi wakabi kabia,
tnawa nani ba sin sut kriki âpu daukbia.
11Dus kum tnawa nani ba lâwan bara kriwisa;
bara mairin nani aula baha nani ba angkaia.
Kan baha uplika nani ba
diara tânka bri uplika nani apia sa.
Baha mita, witin ra papaskra ba mita umpira kaikras,
ai kupia sin swapni takbia apia.
12Baha yua ra Dawan ai warkka daukbia
Éufrates wina Idsip awala kat
plawar mâ kriki baku;
sakuna man nani, Israel luhpia nani,
asla mai kukan kabia kumi mai wahbi.
13Baha yua ra sin trumpit binka tara puhbi kabia,#Mt 24.31; 1 Tes 4.16.
baha nani Asiria tasbaya ra yakaban nani ba balbia,
tasbaya wina kangban Idsip ra wan nani ba sin,
bara witin nani Dawan ra mayunbia,
Jerusalem ra baha il holikira sa purara.
Currently Selected:
Aiseya 27: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
