Aiseya 26
26
Pura luanka lawana
1Baha yua ra naha aiwananka na, Juda tasbaya ra aiwanbia:
“Tawan tara karna yang nani brisna;
bahara swak takaia,
Gâd mita wan swaki sakaia kutbanka karna nani buki wankan.
2Man nani dur ba kwâks,
upla kasakkira nani ba dimbia,
kasakka lâka ra iwi nani ba.#Law 118.19-20.
3Man mita baha uplika kupia kumi lâka aihwa pali bri ba main kaikma,
witin ai kupia lukra man kat piua bani mangki bri ba;
kan witin bui man ra kasak luki ba mita.
4Man nani lika Dawan ra kasak luki ban bas,
kan Dawan ra baman sika
wan yukuwaika ban kaia ra bâra sa.
5Witin daukisa tara puli nani ba kauhaia,
tawan tara praut puli ba tasba kat bataki yan bawisa,
6bara baku yaka bawikira nani ra
umpira nani ba mita ai mina ra
baha nani ba ai mina nani ra taibaia.”
7Man Dawan sika,
yabal nani ba wapni mangkisma ba,
kasakkira nani yabalka ba wapni pali sa.
8Dawan, man lâ daukisma ba yabalka ra,
yang nani bîlam kaikri:
man ninam ra wan kupia kraukaia lâka ba briaia,
baha baman sika yang nani sulki brinka pali ba.
9Sulki tihmia ra mai brin daukisa,
spiritki yang wîni ra ba mai plikisa,
man lâmka tasba ra daukisma bara
tasba ra iwi uplika nani ba,
kasakka lâka daukaia lan takisa.
10Watawikira nani ra,
kupiam pihni lâka ba marikisma sakuna,
kasakka lâka ba sip lan takbia apia;
wapni iwi nani tasbaya ra saurka lâka daukisa
bara Dawan prana ba kat kaikbia apia.
11Dawan, man upla nani klala yabaia ridi sma,
sakuna witin nani baha kaikaia brin daukras;
man upla nani ra latwan kaikisma ba ra,
witin nani lawaska kakikra takisa.
¡Man kupiam baiwanka pata klauhi mita,
angki tikaia pan si!#Hib 10.27.
12Dawan, man bui yawan ra wan kupia kumi lâka ba wankma;
kan man sika yawan wan warkka nani sut daukisma.
13Dawan wan Gâdka,
dawan wala nani man tnamya ra
yawan wan dawanka aimakan,
sakuna yang nani lika man baman wan Dawanka mai brisni.
14Witin nani ba pruan sa,
kli sin rawbia apia;
witin nani ba rayaka âpu,
kli raiti wina bubia apia;
man bui witin nani ra klala yaram,
witin nani ra lukaia lukra nani ba sin sut man mita sauhkram;
15upla nani ba man mita ailal daukram,
Dawan, man upla nani ba ailal daukram,
witin nani man pramna dukiara,
tasba aiska lainka nani kat
man bui upla nani ba yakabi lakram.
16Yang nani trabil tara ra dimisna ba ra
Dawan, man mai plikisna,
klala wankisma ba ra
yang nani ini puri sunra ba mamwanra aisisna.
17Dawan, yang nani mamwanra
mairin kwihra baku,
ai luhpia baikaia piua ba baila taki bara
ai mamna lulkisa,
inisa ai wîna latwanka nani tilara,
yang nani baha baku sna,
Dawan, man mawanra.
18Yawan kwihra tiwan,
luhpia baikaia latwanka brin,
yawan pâsa luhpia baikan.
Pri lâka sin tasba ra daukras,
tasba ra iwbia nani ba sin kau aisubras.
19Man pruankam nani ba kli raya takbia;
pruan nani ba kli raiti wina bubia.
Tasba ra yapi nani ba rawi bubia
bara aiwani banhbia.
Kan man ingnikam blikisma,
diara mangkan wahia purara diwas laya buski ba baku,
bara tasba ra pruan nani ba kli rawi bubia.#Isi 37.
20Impaks, yang upliki nani,
wamtla rumka ra dims,
durkam nani ba ninamra praks.
Wirâ yukuwi bas,
piua wiria lupia baman,
Dawan kupia baiwanka ba lui wabia ba kat.
21Kan nanara Dawan ai watla tara wina taki aula,
tasba ra iwi uplika nani ra ai saurka mana klala yabaia,
watawika lâka witin ai mapara daukan ba tâwan;
tasba ra pruan nani ba
witin kau yukuki bri kabia apia,
sut param marikbia.
Currently Selected:
Aiseya 26: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
