Aiseya 24
24
Dawan tasba aiska purara lâ daukan kabia ba
1Man nani kaikma,
Dawan mita tasba bilara diara âpu swibia,
diara nani ba sauhkbia,
lulki bataki swibia,
upla nani ba sut plapaia.
2Bara baku takbia upla sut ra,
prîs ra taki ba baku,
tawan uplika ra sin,
alba nani ra, dawanka ra sin,
alba mairin ra, ai dawanka mairin ra sin,
diara lin muni ba, diara lin taki bri ba ra sin,
diara atki brih bara kli bri si atki ba ra sin,
tras dimi ba ra, tras yabi ba ra sin.
3Tasba aiska pali ba bîla man swibia,
dukia sut pali mihta dakban kabia.
Kan naha bîla na
Dawan aisin ba mita.
4Tasba ba lâwi bara srawbia,
tasba aihka ba lâwbia bara sut srawbia,
kasbrika purara bara tasba ra sin,
sari lâka baman kabia.
5Tasba ba upla nani ba mita sauhkan sa,
kan witin nani, lâ purak luan bamna,
wapni lâka ba wali daukras lâ ban kaia ba krikan.
6Baha tâka sika,
lahtubanka kum mita tasba na âpu daukan,
iwanka watla nani ba sut bîla man swin,
baha tâka mita,
upla nani bahara iwi kan ba sin sut âpu daukan.
Upla nani ba maura man swin.
7Wain ba tiwan,
wain dusa ba sin siknis alkan,
kupia lilia nani kan ba sut ai mamna lulkan.
8Kungbi pruki lilia dauki kan liliaka ba takaskan,
lilia tara binka dauki kan ba sin takaskan,
arp binka liliaka ba sin takaskan.
9Witin nani aiwani wain dibia apia,
wain piawi kisni takan ba,
witin nani dibia bara tahpla kabia.
10Bahki lâka ba mita tawan ba krikan sa,
utla nani sut ba witin nani mita prakan,
upla kum sin dimaia apia dukiara.
11Wain âpu ba dukiara,
yabal tara nani ra upla ba inisa;
liliaka nani sut ba sari takan,
tasba liliaka ba sut tiwan.
12Tawan tara ba bîla man swin,
sauhki tikanka ba wal getka ba batakan.
13Baha baku kabia tasba bani ra upla nani tilara,
oliv dusa yahban baku, apia kaka
mâ dakban ba ningkara
kau kum nakra luan ba sin kli pliki ba baku.
14Baha nani pruras swak takan kabia ba
lilia aibanhwan mita wini banhbia,
muna wina sin witin ai bîla baikra blîkbia
Dawan king tara ba kaikbia ba ra.
15Baku sin lalma tani ra
bara kabu un ra iwi kuntrika
Dawan ra mayunra pranakira yabia,
Israel Gâdka ra.
16Tasba tâ wala wina
aiwananka nani yawan walan:
“¡Kasakkira ba mayunra kabia!”
Bara yang wîri:
¡Ay, dîa kan uba umpira uba umpira sa!
Upla kuninkira nani ba kunin lâka ra
ai uplika ra atkisa.
17Tasba ra upla nani ba daiwan baku kabia,
âikra nani ba mita nina bliki kabia,
unta kum bilara kauhbia,
apia kaka mina alkaika ra alkbia.
18Upla âikra wina swak takbia ba
unta kum ra kauhbia,
unta wina bal takbia ba
mina alkaika ba ra alki priskan kabia.#Jir 48.43-44.
Pura wina windar nani ba kwâkan kabia,
lisamra tara bal tasba ba nikban kabia.
19Tasba aiska ba nikban kabia,
tasba aiska ba baikanka sirpi ra daukan kabia.
20Tasba ba upla bla kum parwi baku nikban kabia,
mani watla lupia baku yahbi kabia.
Saurka wirhika mita
kau wirha taibi kabia bara kauhbia,
baha kli sip bubia apia.
21Baha yua ra ban takbia,
aiklaklabra daknika kasbrika purara bâra ba,
tasba kingka nani tasba ba sut
Dawan mita klala yabia.
22Witin nani ba tasba mununhta sialaka watla ra silak ra mangkan kabia,
silak ra mangki nani ba durka praki swin kabia,
bara yu ailal lubia ba ningkara klala yan kabia.
23Karnika sut bri Dawanka ba,
witin king baku ai warkka daukbia ba ra
Saion ilka ba ra, Jerusalem ra.
Kati, lapta tihmia takbia
bara wihta nani ba Dawan prana ba kaikbia.
Currently Selected:
Aiseya 24: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
