Aiseya 23
23
Tiro bara Sidón wal mapara dahra aisin ba
1Tiro#Isi 26.1—28.19; Jl 3.4-8; Em 1.9-10; Sak 9.1-4; Mt 11.21-22; Lk 10.13-14. mapara dahra aisin:
Tarsis dwarka tara nani ai mamna lulkisa,
duri tara praki wilkaika nani ba sut sauhkan bamna.
Chipre wina duri tara nani bal dimi bahara wilki kata âpu daukan.
2Tiro wina uplika nani ba
Sidón wina diara âiatkra nani kata ba,
sâp taki banhwan.
Lalka nani sin kabu wala ra lui diara kwahki kan ba,
3lî tara purak lui.
Witin nani diara bri ba kau pura praki saki kan,
mâ nani Sihor dâki kan ba brin,
Nilo awala dâkan kan ba brin,
baha ni nisan nani sut aikuki pana pana atki kan.
4Sidón, swiram tara bris,
kabu karnika tara sma ba,
kan man wiaia sma:
“Luhpa baikaia latwanka yang briras sna,
yang luhpa kau baikras sna.
Luhpa waitna pakaia âpu sna,
luhpa mairin smalkaia sin âpu.”
5Naha sturka Idsip uplika nani ra walbia ba ra,
Tiro sturka ba dukiara sari bribia.
6Witin nani wibia:
“Man nani Tarsis ra lui was;
puram mata ini yauhs,
kabu un ra iwi uplika nani.”
7¿Naha na apia, man nani tawankam tara liliakira kata ba,
blasi pali yua kankika wina?
¿Baha tawanka tara ba apia,
laih tasba wala nani ra impaki kata,
bahara takaski iwaia dukiara?
8¿Ya naha lâka na naku Tiro purara daukan,
witin sika king tawanka kata ba,
ai wihtka tara nani ba,
diara âiatkra nani kan,
witin ai dukia âiatkra nani ba,
tasba ra upla tara karna nani kan ba?
9Karnika sut bri Dawanka ba lâ daukan,
prana nani, kulkanka tara,
praut lâka bri ba swira daukaia dukiara,
tasba ra sinskira tara kulkan nani sut ba batakaia.
10Tarsis uplika nani,
tasba ra saumuk mangkaia warkka dauks,
duri tara papaskra nani ba danh âpu sa.
11Dawan ai mihta ba kabu purara sakban,
king tasbaya nani ba yan tatatwan,
Dawan adar win Kenan dukiara,
witin karnika nani ba slingban kabia.
12Witin Sidón ra win:
“Lilia lâka ba swis,
taibi saura mai munan tiarika sma ba.
Chipre kat lui wama sin sakuna, bahara sin
ris brima apia.”
13Naha tasbaya na man nani kaiks,
Caldea uplika nani mita tasbaya na ra tawer nani paski
Sidón ra utla tara nani ba batakan,
slingbi swin, but nani ra mangki brih waia baman.
Witin nani ba pâtkira sa,
Asiria uplika nani ba pâtkas.
14Tarsis dwarka tara nani, puram mata ini yahwi banhs,
kan ai kan kahbaika pliska ba slingwan sa.
15Baha yua ra ban takbia, Tiro ba aiawi tiki swin kabia, 70 mani, king rayaka yua nani bri ba baku, 70 mani ba ningkara, Tiro purara kahbia, sin rug mairin lawana aiwani ba baku:
16“Rug mairin, aiawi tiki mai swin ba,
arpkam ba bris,
tawan tara ba kir watauks;
miusik binka painkira nani dauks,
lawana ba kli kli aiwans,
bara kaikaia witin nani kli man ra
ai kupia kraukbia sa sapa.”
17Baku ban takbia 70 mani ba ningkara, Dawan kli Tiro ra bal kaikbia. Bara witin kli diara atkaia warkka daukbia, bara kli tasba sut aikuki rug takbia. 18Sakuna ai bisniska nani wina diara pura praki saki ba Dawan ra yabia; witin nani swibia apia, kuki sin bribia apia, sakuna Dawan mawanra dukia dauki nani bâra yan kabia, baha wina pi aibanhbia ba kat, bara kwala pranakira nani sin atki dimbia.
Currently Selected:
Aiseya 23: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
