Impakan Sturka 6
6
1Bara Dawan pana witin ra win:
—Nanara man kaikma king fero wal yang dîa daukamna ba, yang bui witin ra taibi munrika ai tasbaya wina upliki nani ba swika taki wabia; bara kau ni, witin mita uplika nani ba kangbi sâkbia.
Dawan bui Moses ra kli winisa
2Dawan Gâd ba Moses kat aisi, win:
—Yang sika DAWAN.#DAWAN. Blasi pali Ju nani naku ulbi kan YHWH, kristian nani ba naha ulbanka nina bliki ba wina lakan, bara nanara yawan aisi ba baku ulban: Dawan. 3Ebraham ra, Aisak ra bara Jekob ra latan takri bara witin nani ra wîri, yang nini ba Gâd karnika sut pali bri ba, sakuna nini pali ‘DAWAN’ ba lika wiras kapri.#Imp St 3.13-15. 4Baha purkara sin, witin nani wal lâ kum daukri, pramis munri Kenan tasbaya ba witin nani ra yabaia, baha tasbaya ra witin nani tringsar baku pat piua wiria lupia iwi kata ba. 5Nanara Israel luhpia nani ba pât wahwisa, Idsip uplika nani mita taiban lâka ra wark daukaia yabi ba kaikisna, nanara kupi krawisa witin nani wal lâ aisi pramis daukri ba. 6Bamna Israel luhpia nani ra wih wis yang, Dawan mita witin nani alba lâka ra ba wina pri sakaisna, Idsip uplika nani mita wark karna yan taki ba wina sin. Yang karniki ba mariki witin nani ba swaki sakamni, warkki karnakira lâ wapni daukisna lâka ba wal; 7bara man nani ba yang upliki nani mai brimni, bara yang na man nani Gâdkam kamni. Baku mika man nani kaikma yang sika Dawan Gâdkam sna ba, Idsip uplika nani mita wark karna mai dingki kan ba wina pri mai sakri ba. 8Ebraham ra, Aisak ra bara Jekob ra yaia pramis munri ba tasbaya ra mai brih wamna, bara tasbaya ba man nani dukiam maikamni. Yang sika Dawan.
9Moses bui Israel luhpia nani ra naha bîla nani kli win, sakuna witin nani lika witin ai bîla walras kan, ban kra witin nani kupia kriwan alba lâka mununhtara wark karna pali taki kan ba mita. 10Bara Dawan bui Moses ra win:
11—King fero ra wih wis Israel luhpia nani ba swika Idsip wina mahka taki wabia.
12Ban sakuna, Moses pana Dawan ra win:
—Israel luhpia nani pali sin yang bîli walras sa; ¿bara nahki king fero lika yang bîli walbia, yang aisaia kat sin sip pain aisaras sna na?
13Bara Dawan bui Moses bara Eran ra win:
—Was, Israel luhpia nani ra, king fero ra sin wis, man nani adar karna brisma upla nani ba nanara pali mahka Idsip wina bri sakaia.
Moses bara Eran almukka nani nina
14Naha nani sika Ruben, Israel luhpia tawahkia ba luhpia nani: Hanoc, Falú, Hesrón, bara Carmí. Naha nani na Ruben taika almuk nani kata. Baha nani sin ai damika nani watla bîla wihtka nani takan.
15Simian luhpia nani ba: Jemuel, Jamín, Óhad, Jaquín, Sóhar bara Saúl, Saúl ba Kenan mairka kum luhpia kata. Naha nani sut na Simian masraka kumi wina takan.
16Naha nani lika Libai masraka nani, almukka wina ban sirpika nani kat: Guersón, Quehat bara Merarí. Libai ai manka lika 137 mani tasba ra iwan. 17Guersón luhpia nani lika, naha nani almukka wina ningka nani ba kat: Libní, bara Simí wal. 18Quehat ba 133 mani tasba ra iwan, witin luhpia nani ba naha nani: Amram, Ishar, Hebrón bara Uziel. 19Merarí luhpia nani ba: Mahli bara Musí wal. Naha nani ba sika Libai masraka nani, ai kiamka sakan ba kulkanka ba kat.#Kul K 3.17-20; 26.57-58; 1 Kr 6.16-19.
20Amram lika ai antika Jocabed wal ai maya takan, witin sika Moses bara Eran wal yaptika ba. Amram lika 137 tasba ra ai rayaka brin.
21Ishar luhpia nani nina lika: Coré, Néfeg bara Zicrí.
22Uziel luhpia nani lika: Misael, Elsafán bara Sitrí.
23Eran lika Aminadab luhpia mairin Elisabet wal marit takan, baha sin Nahasón lakrika mairin kata, wal ai luhpia nani baikan ba: Nadab, Abihú, Eleazar bara Itamar.
24Coré luhpia nani lika Asir, Elcaná bara Abiasaf. Naha nani lika Coré masraka nani ba.
25Eran luhpia nani kumika Eleazar, witin lika Futiel luhpia mairin nani kum wal ai maya takan bara Finees baikan. Baha nani ba Libait nani watla bîla wihtka nani kata, ai taya nani tilara.
26Naha Eran bara Moses wal ra sika Dawan mita wisata ba Israel luhpia nani ba Idsip wina brih sakaia, war aiklaklabra daknika tara kum baku asla dauki. 27Naha Moses bara Eran wal sika king fero Idsip kingka ra wih aisi kata ba, Israel luhpia nani ba baha tasbaya wina brih sakaia dukiara.
Dawan bui Moses bara Eran paiwan ba
28Dawan bui Idsip ra Moses wal aisata yua ba, 29witin ra win:
—Yang sika Dawan. Bara king fero Idsip kingka ra wis, diara sut yang bui man ra mai wisna na.
30Sakuna Moses pana aisin:
—Dawan, yang bîli skalwi aisisna na, ¿bara nahki king fero yang bîli walbia?
Currently Selected:
Impakan Sturka 6: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
