Impakan Sturka 5
5
Moses ba Eran wal king fero ra aisisa
1Baha ningkara Moses ba Eran wal king fero mawanra wan wiaia:
—Dawan, Israel luhpia nani Gâdka ba, naku aisata: ‘Upliki nani ba swis upla iwras tasbaya ra taki wabia, bahara yang nini yamni kulkaia maiyunaia dukiara lilia tara daukbia.’
2Sakuna king fero aisi pana win:
—¿Bara ‘Dawan ba’ yamna? ¿Bara dîa muni yang bui witin ai bîla wali Israel luhpia nani ba swirka taki wabia? Baha purkara, yang sin Dawan ba kakaira apia. Bamna Israel luhpia nani ba swirka taki wabia apia.
3Bamna witin nani kli king fero ra win:
—Hibru nani Gâdka ba yang nani ra param takan; bamna aikrika yang nani taki wapamna yu yumhpa wapaia upla iwras tasbaya ra, bahara Dawan yang nani Gâdki ra sakripais dauki yabamna, baha apia kaka siknis saura nani ni bara sord ni sin yang nani sut ai ikbia.
4Sakuna Idsip kingka aisi, Moses bara Eran wal ra win:
—¿Dîa muni upla nani wark taki kaia kata ba wina kupia turbi takaskisma? ¡Man nani sut was wark taki kaia!
5Baha purkara king fero sin witin nani ra win:
—Naha tasbaya ra Israel luhpia nani ba kau ailal takan sa, ¿bara man nani bui witin nani ba munrika wark taki ba wina takaskaia wisma ki?
6Baha pali yua ra sin king fero mita wark pura kakaira wihtka nani ra, dakni pura kakaira wihtka nani ra sin adar yaban:
7—Israel luhpia nani ra kli inma lâwan nani bri si yapara, slaubla tasba wal abalki blok paskaia dukiara, witin nani ra hilp muni dauki kata ba baku; ¡swis witin nani silp wih inma lâwan nani ba klaki wahbi bri kabia! 8Sakuna kau karna aisas witin nani kau wark takaia, blok nani an paski kata ba kulkanka ba kat ban paski kaia, ¡baha wina kumi sin mâyara ikaia apia! Witin nani wark aitani âpu sa, baha mita ini makabisa: ‘¡Aikrika yang nani taki wih Gâdki ra sakripais dauki yabamna!’ 9Uplika nani ba kau wark karna pali daukaia yas; wark takan pali man kabia, ris briaia taim âpu kabia, baha mita kunin aisi nani bara witin nani ai lukanka mangkbia apia.
10Bara wark pura kakaira wihtka nani ba, dakni pura kakaira wihtka nani sin taki wan bara upla nani ra naku win:
—King fero yang nani ra adar aikan sa, man nani ra kli twi lâwan nani bri si maikamna apia. 11Nanara man nani taki waia kama ani anira twi lâwan ba klaki wahbi bri balaia. Sakuna baha wisi lika blok paskaia kulki maikan ba wina kumi sin mâyara ikan kabia apia.
12Israel luhpia nani lika Idsip aiska ra diara klakan lâwan nani ba pliki taki wan, baha ni inma lâwan nani twi lâwan baku yus munaia dukiara. 13King fero uplika pura kakaira wihtka nani ba mita yu bani Israel luhpia nani ra wark kau ailal daukaia yabi kan, witin nani mita hilp munras kuna munan blok nani an paskaia kan ba praiska ba kat ban paski kaia. 14Tnaya sait baha purkara Israel luhpia nani tilara dakni sirpi nani purara wark pura kakaira nani mangkan, bara witin nani ra pruki muni wi kan:
—¿Nahki kan man nani nahwala bara naiwa sin man nani blok nani paskaia kapram praiska ba kat paskras sma ba, kainara dauki katma ba baku?
15Bara Israel wark pura kakaira uplika nani ba king fero ra wan, bara Idsip wark wihtka nani dahra saki, win:
—¿Dîa muni man albikam nani ra naku munisa? 16Nanara inma lâwan nani bri sal wanki kan ba kli wankras takaskan, bara kau ban taibi wan munisa blok nani ba ban paski kaia, baha purkara ai prukisa. Sakuna baha pâtka ba sika king uplikam nani ba ai pâtka brisa.
17King fero aisi pana win:
—Man nani sringwaskira nani, wark takaia want apia sma ba mita sika baku aisi taukisma ba: ‘Kaisa yawan bui Dawan ra sakripais dauki yabaia waia.’ 18¡Man nani wark takaia was! Twi lâwan nani bri si maikras kabia sin, sakuna blok nani an paskaia maikan ba kulkanka ba kat paski kaia sma.
19Israel tâ uplika nani ba kaikan witin nani ra karna taibisa naha bîla win ba mita, sakuna blok nani ba lika an paski kaia yaban ba kulkanka ba kat paski kaia sa. 20Witin nani king fero wal aisi si takan ba ra, Moses bara Eran lata ra witin nani ai bîla kaiki kan aikuki prawan. 21Bara witin nani bui Moses bara Eran ra win:
—Dawan kaikisa man nani daukisma ba, man nani tamka mita king fero ai uplika nani aikuki yang nani ra saura ai kaikan sa, man nani mita sin witin nani mihta ra sord mangkram yang nani ra ai ikaia mata.
Moses pura sunra ba
22Bara Moses bui Dawan ra ai pura suni, win:
—Dawan, ¿dîa kan naha uplika nani ra ban saura munisma? ¿Dîa dukiara man ai blikram? 23Yang nahara bal man ninam brih king fero mawanra aisari ba piua wina, witin bui man uplikam nani ra kau saura munisa, sakuna man lika diara kumi sin daukras witin nani ba swaki sakaia.
Currently Selected:
Impakan Sturka 5: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua