Impakan Sturka 4

Gâd mita Moses ra diara aihkakira nani daukaia karnika yabisa

1Moses kli pana aisin:

—Ban sakuna, Israel luhpia nani ba yang ra kasak lukras ai walras kabia kaka, kli maipara aisabia: ‘Dawan lika man ra latan takras ai wibia kaka.’

2Bara Dawan pana aisin:

—¿Baha mihtam ra brisma ba dîa sa?

Moses win:

—Kîn kum.

3Dawan win:

—Tasba ra lulks.

Bara Moses ai kînka ba nan tasba ra lulkan ba ra, dusa kata ba piuta takan. Bara Moses sibri plapan, 4sakuna Dawan bui witin ra win:

—Mihtam sakbi wâika ra alks.

Moses ai mihta sakbi wâika ra alkan, bara piuta kata ba kli kîn takan.

5—Naha ni witin nani kasak mai lukaia sa, Dawan ba man ra latan takan, damikam nani Gâdka, Ebraham, Aisak bara Jekob Gâdka ba.

6Bara Dawan kli win:

—Nanara mihtam lamam bilara dingks.

Bara Moses ai mihta ai lama bilara dingkan, bara kli sakan ra, kaikan ai mihta aiska lipar sikniska ni pihni takan kan wahmuk pinhka baku. 7Bara Dawan kli witin ra win:

—Mihtam ba kli lamam bilara dingks.

Moses kli baku daukan, bara kli sakan ra kaikan, ai mihta ba sut yamni takan kan ai wîna tara aiska ba sim baku. 8Baha ningkara, Dawan bila witin ra win:

—Sain pas daukma ba wal kasak mai lukras bara mai walras kabia kaka, kli sainka wala daukma ba wal kra kasak mai lukbia; 9sakuna baha sainka wâl ba wal witin nani kasak mai lukras bara bîlam sin walras kabia kaka, Nilo awalka wina lî wiria bris, bara tasba ra laiks. Bara nan tasba ra laikma ba wal baku, lî ba tala takbia.

10Sakuna Moses pana win:

—¡Ay, Dawan! Yang sip bîli pain aisaras sna, yang trabilki na lika nahwala bara naiwa wina lika apia sika, sakuna patitara wina yang sip pain aisaras ban sna, sturi aisisna bani twisi ba alkisa.

11Sakuna Dawan pana witin ra win:

—¿Ya mita upla ra bîla ba dauki yan? ¿Bara ya mita sin upla bîlas, kiama prawan, nakras, nakra yamni bri nani ba sin daukan? ¿Yang mita baman daukri apia ki? 12Bamna was, yang lika man wal kamna aisisma piua ra, bara mai smalkamna dîa aisaia sma ba sin.

13Sakuna Moses kau ban tuswi aisin:

—¡Ay, Dawan, mamkabisna, pliskam, upla wala kum blîks!

14Baku bamna, Dawan kupia baiwan Moses mapara, bara win:

—¡Ban kaka, man muihkam Eran Libait ba bâra ki! Yang kaikisna witin lika twisa skalwi aisaras. Ba purkara witin sin taki aula sa man wal prawaia, bara kaikisna witin lilia pali kabia mai kaikaia. 15Witin wal aisas, man dîa aisaia brisma ba sut witin ra pain wis, yang lika witin wal bara man wal sin kamna, witin wal sin aisi banhwisma piua ra, bara dîa daukaia sma ba sut yang mai smalki kamna. 16Man mita Eran ra aisi kama yang pali mita mai aisisna ba baku, bara Eran mita tawi upla nani ra aisi kabia man mita dîa wisma ba. 17Naha kîn na brih was, kan baha ni diara aihkakira sirang wan ikaia dukia nani daukaia sma bamna.

Moses kli Idsip ra tawi wan ba

18Bara Moses kli ai dapna Jetró watla ra tawi wan bara win:

—Yang na kli Idsip ra tawi waia sna, bahara yang muihki nani bara masraki nani sin ailal sa. Brin pali ai daukisa wih kaikaia witin nani ba kau raya sa sapa.

Jetró yamni lukan bara win:

—Aisabi, yamni was.

19Moses kau Madián tasbaya bilka ra kan ba ra, Dawan mita win:

—Man Idsip ra kli tawi was, kan baha nani man ra mai ikaia luki kan uplika nani ba sut prui luan sa bamna.

20Bamna Moses ai maya bara ai luhpia nani ba brin, biriku kum purara sunan bara kli tawi wan Idsip ra. Gâd mita kîn briaia win ba sin ai mihta ra bri impakan. 21Baha ningkara, Dawan bui Moses ra win:

—Man Idsip ra wama ba ra, kasak damra wals, king fero mawanra wark aihkakira nani daukaia karnika maikri ba sut pali daukaia. Yang tani lika, yang munamna king fero kupia ba kau karna taki kaia, bara Israel luhpia nani ba swika taki wabia apia. 22Bamna man king fero ra naku wima: ‘Dawan naku wisa: Israel ba sika yang luhpi taiwahkia ba. 23Bara yang pat mai wîri luhpi ba swis taki wabia, bara witin nani bui yang ra maiyuni warkki daukbia; ban sakuna, man bui witin ba swirka taki waia apia lukisma bamna, yang bui man luhpiam waitna tamwahkia ba ikaisna.’#Imp St 12.29.

24Bara Moses yabal ra auya kan ba ra, yapaia pliska kum ra takaskan, ai maya ai luhpia nani sin aikuki tihmia bahara luaia, bara Dawan ba Moses ra bal takan bara Moses ra ikaia munan. 25Sakuna ai maya Séfora skiru kum walpa ni daukan ba brin, bara baha ni ai luhpia waitna ra wîna tâ taya ba pîs klaki dakban, bara baha wal Moses mina ra kangban bara win: “Kasak pali man ba tala ni mai daukan sa.”

26Bara Dawan bui Moses ra ikras swin wan. Bara Séfora aisin: “Man ba tala ni mayi mai daukan waitnika sma.” Witin baku aisin Aisa sainka dauki ni Moses ra rakan ba mita baha dukiara luki.

27Baha pali piua ra sin Dawan bui Eran ra win: “Upla iwras tasbaya tani ra taki was Moses wal prawaia.” Eran taki wan bara Dawan ilka kat Moses wal prawan. Bara mawan kiawali lakula daukan. 28Bara Moses ai dahra ba Eran ra sut win, Dawan mita witin ra win ba, wark aihkakira nani daukbia win ba dukiara sin win. 29Baha ningkara, witin wal wan bara Israel tâ uplika nani sut asla paiwan. 30Bara Eran mita witin nani ra Dawan bui Moses ra aisin bîla nani ba sut pali win, baha purkara diara aihkakira nani dauki marikbia win ba, baha sin sut witin nani mawanra dauki marikan.

31Bara upla nani ba sut kasak lukan, baku bamna witin nani sin ai dara walata Dawan ba witin nani ai inanka ba walan, bara sut ai pura suni mayunan.

Currently Selected:

Impakan Sturka 4: MSKTU

Highlight

Copy