Smasmalkra 9
9
Rayaka bara prura wal tânka lukaia
1Naha nani sut ra, yang piui aiska yabri baku tânka nani briaia dukiara; kan upla yamni bara sinskira nani warkka sut ba, Dawan mihta ra sa.#S L 16.1,9; 19.21. Upla ba diara kumi sin tânka briras, latwan lâka bara misbara lâka dukiara sin, kau ban kaikisa sakuna. 2Tnata piua ra, sut ra sim baku bîla kaikisa, kasakkira bara kasak apia ra, upla yamni ra bara upla saura ra, sunu ra bara sunu apia ra, sakripais dauki nani ra, daukras nani ra, baku sin upla pain nani ra, upla saurakira ra, pramis dauki nani ra bara daukras nani ra sin.
3Naha sika saurka sut ba, naha tasba ra diara sut taki ba wina, sut ra sim dukia bîla kaikisa, tani wala ra kaikri, upla lukanka sut ba, saura ni banhwan sa, sinskas lâka mita ai sinska ra taibi brisa, ai rayaka aiska ra; bara tnata piua ra lika, ¡raiti kat wabia!
4Bîla kaikanka kau brisa, baha nani kau raya iwi kaia sanska yaban ba, kan kau yamni sa, yul raya kum ba wihki layan pruan kum ba wal.#9.4 Naha wauhkataya âiulbra ba, nâra Aram uplika nani aisinka kum, kakaira kan ba ulban sa. 5Baha purkara raya nani ba ai dahra walisa, witin nani pruaia ba, sakuna pruan nani ba diara tânka sin briras, diara sin win takras, witin nani diara sut âuya tiwan sa. 6Bahara tnata alkan sa, ai latwanka lâka, misbara kaiki lâka, bara ai brinka swapni nani sin, bara aima kumi sin diara tilara dimbia apia naha tasbaya ra.
7¡Bamna, kaisa! Plun pisma ba piua ra, wain disma ba piua ra liliam bris; kan Gâd bui yamni kaikan man daukankam nani ba. 8Piu sut ra kwalkam pihni dimi bas; lamla ra sin isint kîa pain nani ba mangki bas. 9Rayakam ra lilia bri bas, baha mairka latwan kaikisma ba wal,#S L 5.15-19. wan nakra klipan baku, yu bani ba naha rayaka tânka âpu, Gâd mita naha tasba ra maikan ba baha baman man sâkma wark kasak takma ba wal, naha tasbaya ra. 10Bara diara sut man mihtam ra ba mahka alki dauks, karnikam aiska ba wal; kan raiti ra wama lika bahara diara kumi sip daukras, bahara diara kumi sin man lukras, diara tânka briaia âpu bara sins lâka sin âpu.
Kasak lâka apia ba wan rayaka ra
11Naha tasba ra kau diara kaikri: plaplapra nani ba sika plapi pura luras ba, baku sin kupia karnira nani ba war ra pura luras ba, ban sin sinskira nani piu bani ra plun ba briras sa, bara sinskira nani sut yuyakira apia, bara diara tânka brabrira nani ra sin yamni briras; kumi bani ba ai piua sirpi kumi ra yamnika lâka brisa. 12Tani wala ra, upla kumi sin ai dahra walras, ahkia pali ba ai piua kabia; baku sin inska nani ba ilis ra aimaki sip takras, bara piawira nani ba sin ai dara walras daiwan alkaika ra diman sip takras ba, baku sin upla ba bîla kaikras kan pat pât ra dimisa.
13Bara sin naha tasba ra diara kum kaikri, baha ba smalkanka tara kumi ai smalki ba. 14Tawan sirpi kum, upla kulki man iwi ba, king karnakira kum mita, war daukbia ai tnaya kir ba aiklabaia masinka ni kutbia. 15Bara baha tawanka ra upla umpira kumi iwisa, sakuna sinskira sa, ai sinska lâka wal sip sa baha tawanka ba swaki sakaia, ¡bara witinka ai dukiara upla kumi sin ai kupia kraukras sa!
Diara nani sut purara sins lâka ba
16Ban sakuna, yang wisni kau yamni sa sinskira kaia wihki kupia karnira kaia ba wal,#S L 24.5. baha tilara upla umpira sinska lâka bri ba alki briras kabia sin, aisi ba walras kabia sin.
17Kau pain bîla walisa
sinskira nani ai aisanka tawa aisi ba,
sinskas nani kingka
karna kisbi wini aisi ba wal.
18Sins lâka ba kau yamni sa,
war aiklabaia dukia nani ba wal.
Swakwanka kumi baman
mita sauhkanka tara brih aula.
Currently Selected:
Smasmalkra 9: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
