Smasmalkra 8

1¿Ya sip sa ki sinskira wal praki kaikaia? ¿Ya kaikisa ki diara nani sinska tânka ba? Sins lâka ba upla mawanra ingni yabisa, mawan karna ba mapla wala yaban takisa.

King bîla walaia ba

2King adarka nani ba dauks, man baku Gâd nina mâki âu takram. 3Witin mawan wina istikira takpara, upla diara saura dauki ba tilara dimpara, kan king ba dîa daukaia lukbia ba daukaia sip sa. 4King bîla ba tnata prakaia karnika brisa, bara upla kumi sin baha daukanka dukiara makabi walbia apia.

5Upla kum adar kat dauki ba, saura kumi sin takbia apia, upla sinskira ba sin tânka brisa, aihka bara nahki win ba kat daukaia. 6Kasak pali, piu kum bâra sa, bara natka kum sin bâra sa nahki daukaia ba, sakuna upla pâtka tara ba sika, 7ai dahra walras pali sa dîa takaia ba, bara upla kumi sin âpu sa baha dukiara smalkaia ba.

Upla kumi sin karnika âpu sa, rayaka bara prura wal purara

8Upla kumi sin âpu sa, rayaka purara karnika briaia, bara sin alki takaskaia ba, bara sin upla kumi âpu sa, prura mapara karnika briaia, upla âpu sa naha aiklabanka wina swak takaia, watawikira nani ra sip ai watawika lâka ba mita swaki sakan kabia apia.

9Naha dukia nani na sut kaikri ba ra, kupi aiska ni tânka pliki kaikri, naha tasba ra dîa dauki ba, bara upla ba nahki karnika bri ba, ai walka ra saura munaia dukiara.

Diara nani bâra sa tânka âpu ba

10Baku sin, watawikira nani ra kaikri, holi pliska ba wina laihura kan, sakuna pruan bikaia ra mayuni kata; bara baha tawanka ra saura daukan ba, upla kumi sin ai kupia kraukras. Bara naha na tânka âpu sa, 11kan alki klala yaras ai saurka daukan ba mana, naha tâka mita upla kupia ra tuskisa saura daukaia baman. 12¡Baku takisa, ya saura dauki bara kau ban dauki auya ba sin, mani ailal raya sa! (Kan yang daira walisna ba lika, ya Gâd ra kulki ba, bara mayunra yabi ba yamni auya sa; 13bara kau ni, watawi dadaukra nani ra saura baman auya, bara ai rayaka ba dista kum baku lui auya, kan Gâd ra mayunra yaras bamna.) 14Bara baku natka ra naha tasba ra daukisa, tânka âpu sa upla yamni nani pât wahwi ba saura dauki kan baku; bara upla saura dadaukra ba ai liliaka brisa yamni kan baku.#Law 73; Jir 12.1-4; Ab 1.2-4,12-17. ¡Yang wisna naha sin tânka âpu sa!

15Baha mita yang lilia ba dukiara tâ baikisni. Bara upla kau yamni daukaia ba naha tasba ra ba lika piaia, diaia bara lilia briaia, kan baha baman sa, ai warkka wina bal taki ba, ai rayaka aiska, Gâd mita yaban ba piua ra.

16Kau aiska pali dimi kaikri, lan takaia, tânka briaia, bara laki kaikaia diara sut naha tasba ra dauki ba, piua kum bal sa upla ba minit kumi sin sip yapras sa. 17Kau pali tânka briri upla ba sip ai tânka briras sa, Gâd bui dîa dauki ba bara sin dîa tasba ra taki ba, nahki kat tânka briaia pliki kama sin. Ban sinskira bîla wibia, witin tânka brisa, sakuna kasakka pali ba, witin sin kau tânka pliki sakras sa.

Currently Selected:

Smasmalkra 8: MSKTU

Highlight

Copy