Smasmalkra 7

Tânka kau yamni nani ba tâura daukaia

1Kau yamni sa, wan nina pain mayunanka ba#Sins 1 22.1; Ecl 41.12-13.

wihki, isint kîa painka ba wal.

Kau yamni sa prura yua ba

wihki, aisubi taki yua ba wal.

2Kau yamni sa, pruan kum bikaia waia ba wihki

lilia pliska ra wih lilia briaia ba wal,

kan prura ba sika upla sut yua tnata lâska ba

bara raya nani ba, aitani sa sin ai kupia kraukaia.

3Kau yamni sa inaia, kikaia ba wal,

sip sa upla mawanra saura baku kaikaia,

sakuna kupia ra lika yamnika yabisa.

4Sinskira ba prura ra lukisa,

sakuna sinskas nani ba, lilia takaia baman lukisa.

5Kau yamni sa sinskira mita lawi dauki ba walaia

wihki, sinskas nani mayunra ba wal.

6Sinskas nani kikra ba,

pauta klauhan kiaya ra ami bin ba baku sa,

bara sin bahki baman sa.

7Taiban lâka ba sinskira ra sauhkisa,

bara sauhkanka lâka ba, ai daukanka natka ra sauhkisa.

8Kau yamni sa, diara kum danh daukaia

tâ krikaia ba wal.

Kau yamni sa wan kupia alki takaskaia ba

wihki wan kupia karna briaia ba wal.

9Kupiam sauhkanka mita yarka mai brih wabiara,#Je 1.19. kan kupia sauhkanka ba, upla sinskas nani dukia sa.

10Aima kumi sin makabi walpara, dîa kan piua luan ba kau yamni kan, baha makabi walanka ba, sinskira apia sa.

11Yamni bara hilp lâka kum sa, sins lâka briaia ba, naha tasba ra iwi uplika nani ra, baha purkara ai almukka nani prapatika kum wal auya sa kaka. 12Kan sins lâka ba, lalah wal baku wan kaina sunisa, sakuna sins lâka yamnika ba sika, sinskira nani ra rayaka yabisa.

13Kasak pali kaiks, Gâd diara daukan ba: ¿ya sip sa witin warha daukan ba wapni daukaia? 14Ahkia man ra diara yamni taki ba, baha yamnika wal liliam bas, sakuna saura takbia sa kaka, luki kaiks kumi bani ba dukiara, kan baha nani ba Gâd wina sa, kan upla sip ai dahra walbia apia, ai kainara dîa brih aula ba.

15Naha nani sut na rayaki bahki na tilara kaikri, upla yamni nani pruisa, ai kupia yamnika brisa kuna, bara saurakira nani ai saurka ba tilara ban raya sa.

16Yamni sma ba wina kau yamni kaia lukpara,

baku sin sins brisma ba kau sinskira takaia lukpara.

¿Dîa muni silp tawi aisawaisma?

17Saura wina kau saura kaia lukpara,

baku sin sinskas lâka ba wina sin kau sinskas kapara.

¿Dîa dukiara piuam kau ba ra pruaia?

18Kau yamni sa naha na dutki pali alkaia

wan mihta alkan ba wina baha ba lanhkaia apia.

Gâd ra kulki ba

naha diara nani sut na wina pain takbia.

19Sins lâka ba kau karnika yabisa,

sinskira ra, wihta tara matawalsip tawan kum bilara ba wal.

20Ban sakuna tasba ra upla wapnikira kumi sin âpu sa, diara yamni baman piu sut ra dauki ba, bara aima kumi sin saura daukras ba.#1 Jn 1.8-10.

21Upla diara sut mai wi ba, bîla wali daukpara, bara man walma apia albikam ninamra aisi piua ra. 22Baku ba ra, man sin kasak damra walisma aima ailal ra, man sin uplikam dukiara saura aisaram ba.

Sins lâka plikanka ba

23Naha nani sut na, sins lâka wal laki kaikri, sinskira kaia ai daukan; sakuna yang alkaia ba wina laihura kan. 24¡Yang alkaia sna ba wina laihura baman sa, diara nani sut naha tasba ra ba! ¡Tihu pali sa, upla kumi sin tânka bribia apia!

25Bara yang sins lâka plikri, diara tânka briaia sin, bara stadi munaia bara plikaia sins tânka kum wal prakaia. Bara daihra walri sinskas kaia ba yamni apia sa, sinskas kaia ba saura pali sa.

26Diara kum wal prawri ba prura wal kau tahpla sa: mairin ai kupia wal warbanka dauki ba, bara ai klahkla wal wilki bri ba. Dawan kupia lâka uplika nani baha wina swakbia saurakira nani ba ai sînka bilara kauhbia.#S L 5; 7.

27Yang trai muni plikisna diara nani ba dîa muni daukaia ba. 28Yang, Smasmalkra sna ba, naha ni pliki sakri sa, kan yang plikisna pali ba dukia wal prawras. Tausin tila wina waitna kumi sakri sa, sakuna baha sut tila wina mairin kumi sin sakras. 29Naha baman yang sakri sa: Gâd ba upla ra kasak pain paskan sa,#Bla St 1.26-31. sakuna witin ai rayaka ba sauhkan sa.

Currently Selected:

Smasmalkra 7: MSKTU

Highlight

Copy