2 Macabeo 8
8
Judas Macabeo war bukan ba
1Baha piua ra Judas Macabeo ba ai pânika nani dakni kum aikuki, tawan bilara yukuwan natka ra bal diman, bara ai pamali nani, baku sin ya ya nani kau Ju nisanka ra luki bâra nani kan ra, paiwi asla daukan, alsut ba ra 6,000 waitna nani asla daukan kata. 2Witin nani Dawan ra ai pura suni makaban, kaikbia nahki upla saura nani bui Ju nani ra nina bliki rau muni ba, tempel ra umpira kaikbia, baha lika upla saurakira nani bui sunu apia daukan kata ba, 3baku sin tawan sauhki tikan bara danh âpu daukaia ba dukiara ai kupia kat latwanka bribia makabi kan, upla pâtkas nani kau ikan tâlia ba bui lâ kasak kum daukbia makabi ba witin walbia, 4tuktan sirpi nani ailal pâtkas ikan ba dukiara lukbia makaban, Dawan mapara bûi saura pali dauki kan ba, saurka lâka sut ba witin bui misbara kaikbia makaban.
5Macabeo ba war aiklabaia daknika tara nani ridi takan ba tâura aimakan, bara gâd bahki ra kakulkra nani sut mapara karna bapi bûi aiklaban kan, kainara Dawan bui witin nani ra klala yabi kan sakuna nanara lika ai latwanka aiska witin nani tilara kan. 6Upla nani ai dahra walras kan, Macabeo ai suldiarka nani wal tawan tara bara sirpi nani bilara dimi wi kan, aiklabi mihta dakbi angkan lui kan bara waihla nani ailal ba plapi yukuwi kata, 7kan witin nani ba tihmia ra kau war aiklabaia laik kan ba tâka mita. Bara Macabeo karnika tânka ba, tasba aiska ra plapi tawan kata.#8.5-7 1 Mac 3.3-9.
Nicanor bara Gorgias wal Juda tawanka ra aiklabi dimi wan ba
(1 Mac 3.38-45)
8Filipo ba kaikan Judas Macabeo ba piua bani kau karna takisa, war aiklabuya bani win takisa, bara Tolomeo, Celesiria bara Fenicia wal purara aiklaklabra nani lalka kan ba ra wauhkataya kum ulbi blikan wan, king ra hilp munaia balbia dukiara.#8.8 Cf. 2 Mac 5.22. 9Tolomeo ba sim minitka ra Nicanor,#8.9 1 Mac 7.26-27. Patroclo luhpia waitna king pânika pali kan ba wahbi sakan, bara blikan war daknika nani 20,000 tawan bani wina wahbi saki asla daukan ba lalka baku, bara witin nani ai impakanka ba Ju sut kaikbia ba iki banhwaia adarka wal blikan kata. Gorgias ba sin witin nani wal auya kan, naha sika war lalka tara kum kan, war tânka manis bri kata. 10Nicanor ai kupia kat ban luki kan, war aiklabi muni Ju nani sut alkbia ba, atki king traska tara kum Roman nani wal bri kan ba aibapaia, baha lika silbar 66,000 kilo nani kan. 11Bara Nicanor bui istikira auhya un ra iwi uplika nani ra wauhtaya kum blikan wan, adar yabi kan baha nani sut witin ai adarka ra hilp munbia, bara Ju nani war piua ra alkbia ba atkan kaia sa, Ju yumhpa bani silbar kilo kum mana atkan kaia, sakuna Nicanor ai tânka briras kan Gâd karnakira bui dîa sât klalka yabaia ridi daukan kan ba.
12Judas Macabeo ba walan Nicanor pat ai lamara dimi aula sa, bara ai suldiarka nani asla dauki maisa pakan ai wailhka nani war daknika ba pat lamara sa. 13Baha nani tilara sasibrira nani kan ba, Gâd lâka ra kasak lukras nani ba, plapan bara plis lamara nani ra wih yukuwan. 14Tila wala nani ba dîa ai prapatika bri kan ba sut atkan wan, bara Dawan ra makabi kan, Nicanor upla saura witin nani ai mapara aula ba mihta wina pri sâkbia, kan kainara naha waitnika saura na bui pat witin nani ra alki atkan wan kan bamna; 15Dawan ra makabi kan, witin nani ra luki daukras kabia sin, ai almukka nani wal lâ aisi daukan ba nina ra luki daukbia, apia sa kaka, witin ai nina holikira bara baku sin pranakira bri ba ra luki daukbia makabi kan.
Ju nani bui Nicanor ra pura luanka pas ba
(1 Mac 3.46-60)
16Macabeo ai uplika nani asla daukan, baha lika 6,000 waitna baman kata, baha nani ra smalkan waihla saura nani aula ba mapara sîa briaia apia, baku sin gâd bahki ra lalukra nani ailal asla taki witin nani pâtkas kan ai mapara aiklabaia aula ba mapara kupia karna wal aiklabaia makaban, 17bara sin ai kupia ra bri banhwi kabia, naha uplika saura nani bui Tempel Holikira ra tawanka sauhki tikan ba, gâd bahki ra lalukra nani bui tawan ba mapara saurka nani daukan ba, bara ai almukka lâka nani sut krikan, baha dukia nani ra luki aiklaban kabia. 18Macabeo bila: “Waihla nani ba ai rakska bri ba ra kasak kulkisa, baku sin ai karnika nani ra sin. Yawan lika wan Dawan karnika ra baman kasak lukisa, wan kupia aiska wal witin adar lakbia ba wal baman baha nani sut wan mapara aiklabaia aula ba lus tiwbia, bara ban sin sip sa tasba aiska ba sauhki tikaia.’’ 19Witin nani ra kupia kraukan nahki ai almukka piua ra kan sunanka nani brin ba, Senaquerib piua ra dîa takan ba, baha taim 185,000 war daknika nani pruan ba,#8.19 Cf. 2 Ki 19.35; Ais 37.36; 1 Mac 7.41. 20baku sin Babilon warka ra takan ba, Galacia uplika nani mapara war aiklabi kan piua ra. Baha warka ra Ju nani 8,000 bara baku sin Macedonia uplika nani 4,000 asla taki aiklaban kata, bara Macedonia uplika nani ai tânka briras kan taim, Ju nani 8,000 ba Dawan hilpka wal, 120,000 waihla nani ra pura luan bara war dukia nani ailal dakbi brin kata.
21Naku aisi maisa nihkan ningkara, yaban alsut ba wilin takan ai tasbaya bara ai lâka nani kan suni pruaia ba aitani lukan taim ai war daknika nani ba, baiki sakanka walhwal ra daukan kata. 22Daknika bani tâura ai muihni kum mangkan kata, Saiman, Josep bara Janatan kat, kumi bani ra waitna nani 1,500 yaban kata. 23Ningkara Azarías ra makaban buk holikira ba kwâki aisabia,#8.23 Azarías adar yaban aisi kaikbia: blasi ulbanka nani kat. Gr. tihmu. bara war sainka baku kumi bani ra yaban kata: “Dawan yawan ra hilp wan munbia”, bara witin war daknika nani tâ pali ra aimakan bara Nicanor mapara aiklabi dimi wan. 24Dawan karnikira ba witin nani wal kan bara waihla nani 9,000 baha nani ra ikan, bara Nicanor war daknika wala ailal nani ra latwan saura yaban, bara baha nani sut ba yan plapi banhwan. 25Baha purkara, upla nani lalah brih balan kan ba, Ju nani silak ra kauhbia taim atkaia dukiara,#8.25 2 Mac 8.11,34. baha lalahka sut dakbi brin bara baku sin uplika nani ra nina blikan, bara tutni alkan taim mahka swih balan kata. 26Yu wala ingwan ba ris yua kan, baha mita kau nina blikras swin kata. 27Ai waihla nani sut kauhan ba rakska bara dukia nani ba wahbi brin ningkara, ris yua lilia tara brin, Dawan ra mayunan bara tingki sin win witin nani ai lamara kan bamna bara ai latwanka tara nani mahka marikan ba dukiara. 28Ris yua luan ningkara, diara nani wahban ba sir muni yuan, pîska kum ba upla pât brin nani ra, piarka mairin nani ra, rau nani ra bara tâka kau dîa takaskan ba, witin nani ai tila kat bara ai luhpia nani kira sir muni brin kata. 29Naha sut dauki luan ningkara witin nani asla takan bara Dawan kupia pihnikira ra ai pura suni banhwan, ai uplika sut kira kli asla takbia dukiara.
Báquides bara Timoti ra pura luan ba
30Báquides bara Timoti wal aiklaklabrika nani mapara aiklaban piua ra, waitna nani 20,000 pura ikan kata, baku sin kan kahbanka purara nani ba mihta dakbi brin. Ningkara diara dakban nani ba wal baku sir muni brin kata, kumi ba witin nani pali dukiara bara wala ba lika upla pât bri nani ra, rau nani ra, piarka mairin nani ra, bara almuk nani ra sin. 31Waihla rakska nani ba, tânkira wahbi brin, ningkara plis kum pain ra bri si yukukan, tâka wala nani kan ba Jerusalem ra brih balan kata. 32Timoti bui war lalka kau tara kum sakan kan ba alki iki banhwan, witin ba upla saurakira bara sin witin bui sika Ju nani kau sarka paski kan ba. 33Jerusalem ra war aiklabi pura luan liliaka dauki kan piua ra, ani uplika tempel durka kriki angkan ba alki, pana sin raya kan angki banhwan,#8.33 Cf. 2 Mac 1.8. baku sin Calístenes utla kum ra yukuwi kan ba alkan bara baha ra sin ikan kata; naku witin klala brin, tempel ra kriki dimi implikan ba tâka.
Nicanor plapan bara ai dahra aisanka
34Nicanor waitna saura, kupia âpu baku puli kan ba, witin bui sika âiatkra nani 1,000 kum purkara paiwi brih balan kan ba, Ju nani silak ra kauhbia taim alki alba baku brih waia dukiara,#8.34 2 Mac 8.11,25. 35witin ba mâyara kulkan kata Dawan hilpka wal bara witin bui saura pali kulki kan na mita, ai kwalka painkira ba sut daikan, yakan plapi tauki, il nani tila bâk plapi ai war daknika nani sut ikan kaiki si, Antioquía ra wih yukuwan. 36Witin sika Roman nani ra pramis takan kan ba, Ju nani alki Jerusalem ra alba muni tras bri ba aibapaia dukiara, sakuna witin lika upla sut mawanra param wini aisan, Ju nani ba kaina sasunra kum brisa, sip pura luras pali sa, kan baha nani ba Gâd bui yaban ai kaina sunaia lâka nani ba nina blikisa.
Currently Selected:
2 Macabeo 8: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua