2 Macabeo 7
7
Yapti kum luhpia 7 kira alki ikan ba
1Sim baku piua kum ra takan, yapti kum ai luhpia nani 7 bri kan ba sut kira alki silak ra mangkan. King ba want kan baha nani ra klala saura bara bîp bul taya nani wal wipi muni taiban lâka ra kwirku wîna saura pali kulkan ba yaka piaia. 2Witin nani ai tila wina kum takan bara alsut nina ra naku aisan: “¿Dîa pali nu takaia want sma, naku taibi wan munisma ba wal? Yang nani sut wilin banhwisna kainara pruaia, almukki nani lâka krikaia ba wal.’’ 3King baha walan taim ai kupia sauhkan, bara pauta klauhan tila nani ra brit angkaia pânka bara dikwa nani dingkaia adarka yaban. 4Pânka bara dakawa nani ba lapta karna takan taim, king bui adar yaban baha wahmika ai muihni nani sut nina ra sturi aisan ba twisa dakbaia, taya nani sin takbia, baku sin mina bara mihta nani sut dakbia win ai yaptika bara ai muihnika wala nani sut mawanra. 5Wahmika ba wîna pîska sut klaki dakban ningkara, king bui adar yaban pauta aswi ba lamara brih waia, witinka kau pruras raya kaka, brit angkaia pânka ba ra lulki dingkaia. Bara brit angkaia pânka ami ba tila wina kiasma kum takan bara tawan bîla aiska bâk lui wan kata, muihnika nani baku sin ai yaptika ba pana pana aisi lilia taki kan, witin nani sin ai kupia karna lâka wal pruya dukiara. Bara naku aisi banhwata: 6“Dawan Gâd naha dukia sut taki na kaikisa, bara kasak pali yawan nani ra latwan wan kaikisa. Baha sika Moses bui ai lâwanka ra aiwani wan win ba, upla nani ai saurka dauki kan param mawanra win ba taim: ‘Dawan ba ai uplika nani ra umpira kaikbia.’ ’’#7.6 Kli S 32.36. 7Naku sika wahma pas ba ikan kata.
Ningkara muihnika wala ba brih balan panis wahwanka ra, bara taya aiska takbi muni, naku makabi walan:
—¿Man kwirku wîna sunu apia ba piaia want sma, apia kaka wînam tara ba pîs ra baman daukbia want ki?
8Witin ai yapti bîla aisanka kat naku win:
—¡Apia!
Baku bamna ai muihni wala kan ba baku, pauta klauhan ra dingki ikan kata. 9Sakuna kau ami luras, raya kan bara lâs ai wingka puhbi, naku aisata:
—Man, upla âikra, naiwa wan rayaka sakisma. Sakuna tasba aiska Kingka ba bui yang nani ra kli ai bukbia, raya ban kaia pliska ra ai brih wabia,#7.9 Dn 12.2; 2 Mac 12.43-45; Mt 22.23-40; Jn 5.29; Ap St 23.6; 2 Ko 15.12-27. kan ai lâka nani ba kulkanka yabi yang nani pruisna.
10Naha wahmika pruan kaiki si, muihnika wala brih balan, panis saura nani munan, makaban ai twisa latara sâkbia; isti pali sakan, bara ai mihta nani sin laki yaban, 11bara ai kupia karna wal naku aisi, win: “Dawan Gâd bui yang wîni tara pîska nani na briri, sakuna ai lâka nani tâwan bahki kulkisna, bara bîla kaikisna baha nani ba kli brimna. Gâd bui baha nani sut ba kli paski aikbia.’’ 12King bara upla sut baha pliska ra kan ba, naha bîla nani aisan ba wali sirang iwan, bara luki banhwan nahki wahma kum prura sîa âpu, sturi nani aisi ba.
13Naha pruan ningkara, muihnika walhwalka ba alki brih balan, bara panis saura munan. 14Pat pruaia baila kan taim, naku aisan: “Yang waitna mihta ra pruaia wilin sna, baku Gâd pramiska ba kaikaia, yang ra kli raki ai bukbia dukiara. Sakuna man lika kli rawi buma apia.’’
15Muihnika matsipka ba brih balan bara panis muni banhwan. 16Bara witin king mawan ra kaiki si, naku win: “Man ba upla kum pruikira sma sakuna, karnika nani brisma upla nani purara, bara dîa daukaia sip sma ba daukisma. Sakuna lukpara Gâd bui yawan uplika nani ra lulki wan swin sa. 17Wirâ bîla kaiki bas, bara kaikma nahki Gâd karnakira ba bui man bara kiamkam nani sut ra klala saura maikbia ba.’’
18Naha pruan bara muihnika matlalkahbika ba brih balan, sim baku mahka pruaia baila kan taim, naku aisan kata: “Lukankam ra diara bahki nani daukpara; yang nani silp watawanki tâka naha pâtka nani na brisna, kan yang nani Dawanki mawanra saura yabi banhri; baha mita sika naha sut na yang nani ra ai takisa. 19Sakuna man, Gâd mapara aiklabaia lukram ba, luki kapara klala brima apia.’’
20Sakuna diara kum kau tara bara pranakira luki kaia ba sika yapti mairin daukan ba ai luhpia wahma nani 7 ai mawan kat iki banhwan yu kumi bilara, baha latwanka ba ai kupia kat brin Dawan bui ai karnika yaban bamna. 21Ai luhpia nani kumi bani ra sturi painkira nani aisi ai bîla aisanka kat maisa nihki kan bara tânka kasakkira nani wal, bara yapti baku ai lukanka nani bri kan ba purara waitna kupia karnika kum praki, witin nani ra naku aisi kata: 22“Yaptikam baku, daihra walras katna man nani ba nahki wina yang biaira bilara bal aimaki banhram ba, yang bui sin man nani rayakam bara wingkam puhbra ba maikras katni, baku sin wînam tara pîska ba yang bui paski maikras katna. 23“Witin sika tasba aiska bara bilara diara nani sut ba paskan ba, baku sin upla ba tâ pali wina paski ba. Witin bui ai kupia pihnika lâka wal man nani wingkam puhbra bara rayakam sin kli maikbia, kan man nani lika Gâd lâka nani tâwan, silp wînam ra luki banhras sma.’’
24Antíoco lukan ai lawaska kikisa bara witin ai swira paskisa. Kau wahmika ba kau raya kan bamna, king bui kupia alkaia baman lukras kata, sakuna pramis nani taki kan lalahkira daukaia, kulkanka tara nani sin yabaia, king ai tila kat bri kaia, wark kau pain nani sin yabaia, ani taim naha wahmika lupia ai almukka lâka nani ba ra kulkras takbia taim. 25Sakuna wahma ba ai bîla walras kata. Bara king ba makaban yaptika ra ai luhpia ba smalki kupia alkbia, witin dîa wi ba ai bîla walbia bara baku ai rayaka swaki sâkbia dukiara. 26Uba bik taki banhwi kan kaiki, yapti ba ai luhpia wal aisaia trai munan. 27Ai luhpia lamara wih ai lal makupi, king saura ra kulkanka yabras pali, naku ai bîla kat win: “Luhpi, yang ra kasak ai luks, yang bui sika man ra kati 9 biaira bilara mai twilkri, mani yumhpa tiala laya mai dakakri, bara mai paki sinska lâka maikri naiwa wahma takram ba kat. 28Luhpi, mamkabisna purara kaikma bara naha tasba aiska na sin laki kaikma, diara sut baha pliska nani ra kaikisma ba, tânka bris, kainara âpu kan wina Gâd bui aiska sut paskan, yawan upla na sin witin bui wan paskan sika. 29Naha waitnika saura na sîa bripara, muihkam nani sut ikan ba ra kasak luks, bara pruaia ba wilin bas, bara Gâd kupia pihnika mita yu kum yang yaptikam baku, man nani sut asla laimara kli mai brimna.’’
30Yapti ba kau aisi kan, luhpia wahma ba naku aisan: “¿Man nani dîa bîla kaikisma? Yang lika king dîa adarka laki ba bîla walras sna; yang Gâdki lâka nani Moses bui almukki nani ra yaban ba, baha ra kulkisna. 31Bara man, king saura Ju nani ra naha pâtka sut dauki sari yabisma ba, lukpara man lika Gâd karnakira ba mihta wina swakma. 32Yang nani lika silp saurki tâka pât brisna. 33Dawan ba yang nani ra klala aiki wapniki mangkaia dukiara minit kum ai kupia sauhkan sa kaka, kli ai dukia dadaukra nani sna ba wal witin padin wan munbia. 34Man, waitna saura, upla sut tila kat kau upla rayaka tatikra sma ba, tânkas ban uba tara pulpara, bahki ra diara nani bîla kaikpara Gâd luhpia nani rayaka tikisma ba wal. 35Man kau Gâd karnakira lâka nani wina pri takras sma, witin lika diara sut kakaira ba. 36Muihki nani ba, minit kum pât saura nani wal prawan, sakuna nanara raya ban kaia pliska ra sa, Gâd bui dîa pramis takan baku; ban sakuna, man lika Gâd klalka nani brima wînam kat aimayunanka nani briram ba tâwan. 37Yang sin muihki wala nani pruan ba baku, wîni tara bara rayaki sut na prura mihta ra mangkisna almukki nani lâka ra dîa kulkan ba tânka kat, bara Dawan ra makabisna, isti pali ai uplika nani ra latwan kaikbia, bara klala saura nani maikbia bara taibi sin mai munbia, tânka aisama dukiara witin ba Gâd kumi baman ba. 38¡Yang bara muihki nani sut wîna ra Gâd karnikira lawanka tara bal diman ba takaskbia, baha lika tânka ba kat wan tawanka aiska purara kahban ba!’’
39King ai dahra walan naha wahmika bui kau witin ra sturi karna bara swira lâka nani aisan sa, baku ba mita wala nani wal witin ra kau panis saura nani muni ikan kata. 40Naku natka ra tuktika ba pruan wînka saura ba piras, bara Gâd ra baman kasak luki kan. 41Wahma nani ba sut iki luan ningkara, lâs kat ai yaptika ba sin ikan kata.
42Naku wan aisanka ba danh takisa, plun sunu apia piaia tânka nani, baku sin king bui nahki pitka kat diara saura pali nani daukan ba.
Currently Selected:
2 Macabeo 7: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua