2 Macabeo 9
9
Antíoco Epífanes pruanka ba
(1 Mac 6.1-17; 2 Mac 1.11-17)
1Baha piua nani ra, Antíoco ba Persia tawanka wina tanis baman taki plapan kata. 2Tawan kum nina Persépolis mâki kan ba ra wih diman, bara baha pliska ra trai munan tempel bilara diara nani bâra ba implikaia, baku sin tawanka aiska ba dakbi briaia lukan. Sakuna upla nani ba ai mapara karna taki buan, Antíoco ba kaikan sip pura luras muni kan, bara baha pliska wina mahka ai ninara taki wan. 3Ecbatana tawanka ra kan taim, nu takan Nicanor bara Timoti aiklaklabrika daknika nani ra dîa takan ba sut. 4Uba ai kupia baiwanka wal, Ju nani sut ra alki saura pali munaia lukan, Persia uplika nani bui munan plapan ba mana aibapbia dukiara. Bara ai karka waki waitnika ra makaban kan karna plapbia, ris âpu, impakanka ba tnata alkbia ba kat.#9.4 Dn 11.44. Sakuna Dawan klalka ba witin ai nina bliki kan. Ai kupia baiwanka ra, Antíoco ba naku aisan kata: “Jerusalem ra wamna taim, baha tawanka ba raiti tara kum daukamna, Ju nani raitika.’’ 5Sakuna, Israel Dawanka Gâd karnikira, diara sut kaiki ba, siknis saura kum yaban, rawaikas bara sip sin kaikras kata; naha sturka aisan wal baman, biara latwan takan. Sîka sâtka sut yus munan, sakuna sip rawras kan; biara sirpika sut ba klauhi kan. 6Naha ba klala kum Dawan bui witinka ra yaban kata, aima ailal witin bui baku upla wala nani ra biara pali kat saura muni kan bamna. 7Baku latwan saura nani bri ba lukras witin ai daukanka saura nani ba swiras ban luki dauki kata, Ju nani mapara prautkira bara misbara luki ba wal, waki waitnika ra kli adar yaban kau karna plapbia dukiara. Bara kau karna plapi ba pura wina swakwi kauhan, bara dusa nani kriwan, nina dusa sin kriwan, bara sip wapras takaskan kata. 8Naku sika naha waitnika karnika tara brisa wisi puli kan ba, kabu ripka nani ra adar yabaia sip sa luki kan ba, bara Gâd baku il kau tara nani pura bâk lui waia, kar pura ba wina kauhan, bara ai uplika nani bui krikri kum purara tniki brih auya kan ba, naku sika upla sut bui kaikan kan Gâd karnika tara bri ba. 9Waitna uba karnakira puli kan ba, nanara nakra bîla sut liwa dimi kan, kau pruras kupia raya kan latwan saura pali bri kan wîna pîska wala nani ba sukwi pîs ra dakwi taki kan; bara wîna tara aiska ba sukwan, bara kîa saura pali wauhi kan, war daknika ba ai lamara waras kan, uba bisbaya ba tâka mita. 10Uba taya bisbaya takan ba mita, ai uplika nani bui kau sin brih taukras kata, naha waitnika slilma nani sut nina bliki alkaia luki kan ba.
11Naku ai wîna ra Gâd karnika bui yan takan ba kaiki, bara minit ra kau latwan muni kan, Antíoco lukanka karna nani bri kan ba sins munaia trai munata, bara baha wirâ sin ai tânka brin kata. 12Witin silp sin ai wîna bisbaika ba kîa tan munras kata, bara naku aisan:
“Gâd lâka nani alki brih daukaia ba aitani pali sa, bara upla kum ba witin baku takaia lukaia apia sa.”
13Naha waitnika upla âikra kan ba, Dawan ra mahka makaban; sakuna Gâd bui witin ra umpira kaikras kata. 14Trabil nani kau ai wîna ra balras kan piua ra witin istikira pali, tawan holikira ra sauhki tiki dimi raiti kum baku daukaia luki kan, bara nanara lika Gâd ra pramis takan baha tawanka ba pri swiaia. 15Kainara aisi kan, Ju nani ba prubia taim bikaia nit âpu sa, swika tnawira nani pibia, apia kaka ai luhpia nani sut kira lulkka daiwan wail nani bui pibia, bara nanara pramis takan Ju nani ba Atenas uplika baku raitka nani yabi kulkaia. 16Kainara tempel tara ba kriki dukia nani sut impliki kan, bara nanara lika wisa tempel ba prana kau pain nani wal sakahkaia, prisantka nani manis yabaia, tempel kapka nani kainara implikan ba kli laki yabaia, baha wina kau pura praki yabaia, baku sin silp ai lalahka nani wal sakripais sut daukbia ba mana aibapaia pramis taki kan; 17lâs kat witin ba Ju kum takaia lukanka brin ba, tawan ailal nani upla iwi ba ra impaki tauki kan baha pliska nani sut ra Gâd karnika tara bri ba mayuni aisi kaiki kata.
18Latwan tara bri ba sip dasras kan bamna, Gâd klalka kasak ba ai purara kan ba mita, kaikan saura pali kan, bara Ju nani sut ra wauhtaya kum ulbi blikan wan, witinka nani ra bik taki, naku win kata:
19“King bara aiklaklabra nani sut lalka Antíoco bui Ju nani ra lamkula blikisna, man nani sut lika upla pain nani sma, bara yamni iwi kama makabisna. 20Yang brinki sa man nani luhpiam sut kira pain banhwi kama, bara diara sut ba man nani brinkam ba kat dauki kabia. Gâd ra bîla kaikanka mangki, 21man nani wina yang diara pain nani lan taki kapri ba kupi kat pain brisna. Persia kuntrika wina kli tawi balri taim, siknis saura kum wal prawri, bara baku lika upla sut dukiara lukaia kapri. 22Uba saura sna ba dukiara yang uya luki tânka lika apia, kau ni, bîla kaikanka tara brisna naha sikniska wina yang rawamna. 23Kupi krawisa, yang aisiki ba Éufrates tani ra war aiklaban taimka ra, ai sirka ra upla wala swi kan ba, 24baku ba ra dîa kum saura takbia sa kaka, ai uplika nani ba kupia kumi kabia, ya pali ba naha warkka tara nani ai mihta ra alki bri ba. 25Nu sna diara sut purkara, wan tawanka lamara lalka nani ba bîla kaikisa yua kum yamni nani bara dîa takbia ba bîla kaikisa. Baha mita, luhpi Antíoco ba king baku wahbi swiri sa, witinka lika Éufrates lalma tani ra impaki taukisa piua ra, man nani sut kainam sunbia dukiara swiri kan.#9.25 Cf. 1 Mac 6.14-17. Witin ra sika wauhtaya kum ulbri sa, baha ba tâura aisi kaikbia. 26Man nani ra mamkabisna, diara sut yang bui man nani ra daukri ba, luki bri bas, luhpi ba wal pain bas, yawan aikuki pain kata ba baku. 27Yang lukisna witinka ba yang dîa lâ nani bapri ba baku daukbia, bara man nani sut kira pain kabia.’’
28Baku bamna, naha waitnika upla âikra ba, Gâd mapara sin kan ba, pruanka saura pali tila kat ai rayaka tikan, ai tasbaya wina laihura, il tara nani bilara, panis saura tara tila kat; witin bui upla pâtkas ailal ra baku natka ra ikan, bara sim sât klalka witin brin kata. 29Filipo witin ai pânika pali kan ba bui ai wîna tara pat pruan ba saki bikan, sakuna Antíoco luhpia ra kasak lukras kan ba tâka, Idsip tasbaya ra dimi yukuwan king Tolomeo bara Filométor wal kira.
Currently Selected:
2 Macabeo 9: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua