2 Macabeo 10
10
Tempel sunukira daukan ba
(1 Mac 4.36-61)
1Macabeo bara ai uplika nani aikuki, Dawan bui ai tâ brin bamna, tempel ba kli dakbi brin; sim baku Jerusalem tawanka ba dakbi brin kata.#10.1 Cf. 1 Mac 4.36-61. 2Idan uplika nani bui tibil holikira wisi paskan kan ba krikan,#10.2 1 Mac 1.54. bara asla takaia pliska nani kan ba sin sauhkan kata. 3Tempel ba aima wala kli sunukira daukan, ningkara tibil holikira wala paskan kata bara walpa nani wâl wahbi brih, pana pana pruki pauta klauhan sakan bara baha purara daiwan nani angki sakripais daukan, sîka mâka kîa pain nani angkan, lamp nani sin angkan bara brit holikira ba brih balan, kan pat mani wâl pura alkan sa, sakripais nani tempel bilara daukras kan bamna. 4Tempel ba kli sunu daukan, dîa wala nani sut daukaia ba daukan ningkara, asla taki ai lula kriki, Dawan ra makabi banhwan naku pali kli witin nani ra panis munbiara sîa, ban kra kli mistik taki banhbia sa kaka, tânkira ai mistikka nani ba wapnika mangkbia, sakuna idan nani mihta ra lika swibia apia makabi kan, baha nani sika Gâd mapara uplika nani sa. 5Tempel kli sunu daukan ba lika, Quisleu katka 25 yua ra kata, naha sim piua ra sika baha ba sunu apia daukan kata ba. 6Naku dukia nani takan ba kaiki, witin nani asla taki yu 8 lilia brih banhwan, baku sin Utla Papakni liliaka dauki baku ai kupia krauki banhwi kan, nahki il tara nani tilara walpa untika ra yukuwan ra lilia dauki kan ba, baha pliska ra daiwan wail baku iwi kan ba. 7Baku bamna, witin nani laimus mâ bara papta wahia nani klaki brih prana nani daukan bara Dawan ra lawana nani aiwani mayunanka daukan, tempel ba kli sunu daukan ba dukiara. 8Baku sin, lâ uplika sut ba bui lâ kum karnika yabi ulbi sakan baha ulbanka ra mariki kan, Ju nani sut ba mani bani naha liliaka dauki kaia ba.
Judas bui pura luanka wala nani brin ba
9Antíoco, Epífanes mâki kan ba pruanka dukiara mai aisari ningkara, 10nanara lika Antíoco Eupátor, witinka lika Antíoco Epífanes saurakira luhpia kan ra dîa witinka ra takan ba dahra nani mai aisi kamna, ai saurka nani tâka mita war tara nani brih balan ba.#10.10 1 Mac 6.17.
11Eupátor king lâka tara ba ai mihta ra brin piua ra, Lisias ra gabamint warkka tara ba yaban,#10.11 1 Mac 3.32-33. naha waitnika sika suldiar nani sut lalka kan ba, baku sin Celesiria bara Fenicia wal gabamintka uplika sin kata. 12Witinka kainara Tolomeo, Macrón mâki kan ba, baha warkka sut dauki kan, witin lika Ju nani aikuki pain sa baku daukanka nani mariki kan, ban kra witin nani ra saura kra munbiara sîa, bara asla iwi banhwi kata. 13Naku ai daukanka nani bri kan ba tâka, king pânika nani bui Eupátor ra dusa kuhban. Filométor ra#10.13 Antíoco V Eupátor, seléucida kingka; Tolomeo VI Filométor, Idsip kingka. kulkanka yabi, Chipre gabamintka lalka mangkan, sakuna naha plapi bara Antíoco Epífanes wal ai pânika takan; baha tâka upla sut bui mapara babura kulki kan. Bara kaikan sip ai warkka nani pain daukaia apia kan, bamna puisin laya dih ai rayaka tikan kata.
Gorgias bara Idumea uplika nani mapara buanka
(1 Mac 5.1-8)
14Gorgias ba tasba pîska baiki sakan nani ra aiklaklabra nani bâra ba lalka mangkan piua ra, upla saura nani dakni kwâra asla dauki, war aiklabaia uplika nani paski brih, bara yu bani Ju nani mapara war dauki kata,#10.14 1 Mac 3.38. 15sim taimka ra, Idumea uplika nani ba kan kahbaika pliska tara nani manis ai mihta ra bri kan, witin nani sin Ju nani ra saura muni kan, bara baha nani Jerusalem wina plapi ba alki ai tilara dingkan bara war ba kau karna daukaia lâka nani bapi kata. 16Ya nani Macabeo wal kan ba, Dawan ra ai pura sunan upla sut mawanra, makaban witin nani ra ai tâ baikbia war ra auya ba dukiara, baku daukan ba ningkara, Idumea uplika nani kan kahbaika pliska nani bri ba mapara aiklabaia dimi wan kata. 17Kupia karna nani wal aiklaban, bara tasbaya pîska aiska ba dakbi brin; kutbanka tara nani bîla wina aiklabi kan nani ra kangbi sakan, bara ani uplika witin nani ai mihta ra kauhi ba, nana dakbi kata, sut ba ra upla 20,000 nani pruan kata. 18War tara aiklabi kan ba tila wina, 9,000 aiklaklabra nani ba, aihwaki kaikaia pliska tara wâl kan kahbanka karna bri kan ba ra dimi pain pali yukuwan kan. 19Macabeo bui Saiman,#10.19 Saiman lika Judas muihnika. Josep bara Zaqueo kat ra wahbi sakan baha pliska ra dimi aiklabi yukuwan nani ra alkbia, witin lika plis wala nani ra ai nitka taki kan ba ra tawi wan. 20Sakuna Saiman wal aiklaklabra nani takaskan ba, lalah uba laik kan, baha mita aihwaki kaikaia pliska tara bilara waihla nani ba mita, baha nani ra 70,000 lalah mâ nani wal kupia alki bara pri pali plapi banhwan kata. 21Naku takan ba Macabeo walan taim, war daknika lalka nani ba asla daukan, bara baha nani ai muihni ra lalah mana atkan bara waihla nani ra pri pali swin plapan ba ra, pâtka sut purara kahban kata. 22Baha ningkara watawikira baku, alsut ra iki banhwan, bara aihwaki kaikaia pliska tara nani wâl kan ba sut dakbi brin kata. 23Aihwaki kaikaia pliska tara nani ba dakbaia trabil uya takras kata, sakuna aiklaklabra nani waihla tila wina 20,000 kum pruan kata.
Timoti ra pura luan baraGuézer dakbi brin ba
24Timoti ba, kainara Ju nani bui pat aiklabi rau munan kan,#10.24 2 Mac 8.30,32. bara witin war daknika lalah mana aiklabi ba sâtka waitna nani ailal asla daukan, bara Asia tawanka nani wina sin, aras ra uli aiklabi waitnika nani ailal brih balan bara ai lukanka brin raks wal aiklabi, Judia tawanka ba dakbi briaia.#10.24-38 1 Mac 5.28-34. 25Macabeo ai uplika nani kira kaikan, waihla nani ba pat lamara dimi aula kan, bara Dawan ra wini makaban, ai lal pura nani ra yamhpus yakaban, bara krukus kwalka nani sin diman kata. 26Tibil holikira ba lamara ai lula kriki banhwan, bara Dawan ra makaban witin nani ra latwan kaikbia dukiara bara sin makabi kan ai waihla nani dimi aula ba ra lika saura munbia. Baku sin karna pali makaban ai uplika nani wailhka nani mapara bubia, lâ wauhkataya ra dîa ulban ba baku.#10.26 Imp St 23.22 dukiara aisisa, Semti nani Grik bîla ra ulbanka ba kat (LXX).
27Ai pura sunra nani daukan ningkara, raks nani ba ai mihta nani ra brin, bara tawan wina laihura taki wan, bara ai waihla nani lamara prawan taim takaskan. 28Titan ingwan taim war daknika wâl ba prawan bara war aiklabanka ba tâ krikata. 29War ba karna pali aiklabi kan awarka ra, waihla nani ba kasbrika purara kaikan waitna tara nani matsip aras una mangka gul baman kan purara uli, Ju nani tâura aimaki tâ baiki kan. 30Macabeo lamara bal, ai rakska nani wal kan suni kan kaikan, waihla nani bui rau munbia apia dukiara. Baku sin kaikan langsa nani imyula buki kan, bara waihla nani ba nakra blain baman taki tanis baman plapi kan. 31Aiklaklabra nani ai mina ra wapi 20,500, baku sin 600 wala nani aras pura wina aiklabi nani kan ba nana dakban kata. 32Timoti ba Guézer tawanka ra dimi yukuwan, kan kahbaika pliska pain kum Quereas mihta ra kan ba ra. 33Macabeo ai uplika sut kira baha pliska ra yu walhwal nani war aiklabi kata. 34Bilara nani kan ba, lukan pliska ba pain paskan sa, bara baha wina Dawan mapara bîla tâski nani aisi kan. 35Yu matsip ba ingwan taim, Macabeo war daknika tila wina 20 wahma nani kum kaikan, uplika nani ba Dawan mapara uba sturi saura nani aisi kan, bara ai kupia sauhki pliska ba ra dimi wan, bara ya sut wal prawi kan ba iki kata. 36Baku naha wahma 20 nani aiklabi kan kaiki pânika wala nani kan ba, tani wala bâk dimi wan, ai waihla nani mapara aiklabaia dukiara, tawan tara ba durka nani krikan bara pauta ni angkan luan, ya nani Dawan mapara aisi kan ba alki pauta ra angkan. Wala nani lika durka nani ba krikan war daknika tâka ba dimbia dukiara, baku aiklabi pliska ba mihta dakbi brin. 37Timoti tank tara kum bilara dimi yukuwi kan ba, nana dakban ai muihni Quereas wal ra, bara Apolófanes ra sin baku munan kata. 38Naha sut daukan ba ningkara, witin nani Dawan ra mayunan, Israel luhpia nani ra tâ baikan ba dukiara bara sin yaban win takan bamna.
Currently Selected:
2 Macabeo 10: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua