2 Macabeo 11
11
Lisias aiklabanka pas ba
(1 Mac 4.28-35)
1Naha diara nani takan wina piua wihka apia kan, Lisias, king pamalika bara ai lamara takaski kan ba, baku sin gabamint lalka tara warkka bri kan ba,#11.1 1 Mac 3.32-33; 6.17; 2 Mac 13.2. ai kupia ra wirha lukan, nahki kat diara nani takan ba ra luki. 2Witin waitna nani 80,000 pitka asla daukan, baku sin aras pura wina aiklabi uplika nani bri kan ba sut sin asla dauki brin, bara Ju nani mapara aiklabaia dimi wan, ai lukanka ba Jerusalem tawanka ba, Grik pliska nani daukan. 3Baku sin luki kan daukaia, tempel holikira bilara lal mana nani ba yaka aibapaia, kuntri wala tempelka nani ra dauki baku, mani bani smasmalkra tara kulkanka bri ba mâyara lahbaia. 4Sakuna witin nani Gâd karnika bri ba ra kasak lukras kan, ban sakuna aiklaklabra nani bri ba wal, aras nani bara daiwan elepant nani 80 bri kan ba karnika ra ai lukanka ba pura lubia luki kan.
5Judia kuntrika ra dimi wan bara Bet-sur pliska lamara wan, baha lika kan kahbaika pliska kum Jerusalem wina 25 kilumita prais laihura kan ba, bara baha pliska mapara aiklaban. 6Macabeo walan Lisias ba ai aiklaklabra nani aikuki kan kahbaika pliska mapara aiklabisa, bara witin isti pali tawan uplika nani sut kira asla taki Dawan ra ai pura sunan, bara makabi kan insal yamni kum blîkka balbia, Israel luhpia nani ra swaki sakaia dukiara. 7Macabeo witin pas tâura raks ba ai mihta ra brin, bara ai walka nani ra makaban asla baha pâtka saura aula ba mapara aiklabaia, bara ai muihni wala nani trabil ra sa kaka hilp munaia sa. Baku lukanka wal, ai kupia liliakira baha nani mapara dimi wan. 8Jerusalem tawanka lamara auya kan taim, kaikan waitna kum prâk pihni dimi, aiklaklabra nani ba tâura aimakan, aras purara uli gul rakska nani alki nikbi kan kaikan. 9Baha kaikan taim, Macabeo suldiarka nani sut ba ai kupia aiska kira pali Dawan ra mayunan. Witin nani sut ba uba pali karna takan sa ai dahra wali banhwan, bara upla nani ra mapara baman aiklabaia wilin takras kata, sakuna daiwan wail kau kras nani mapara sin, walpa tara ni paskanka sut ba sin krikaia wilin pali taki banhwan kata. 10War aiklabaia tânka kat asla wapi dimi wan, ai tâura ban auya kan. Waitna holikira kaikan ba, Dawan latwanka tara ba witin nani ai tilara kan, baku ba ra hilpka tara bri kata. 11Ai waihla nani mapara sim layan aiklaklabra nani baku dimi wan, bara tasba ra wapi aiklabi suldiarka nani ra 11,000 pura ikan, baku sin aras pura wina aiklabi nani ra lika 1,600 nani ra ikan bara wala nani kan ba lika yaban plapan. 12Uplika nani aihkika ba latwan saura brih ai mihta bîla baman plapi banhwan, bara Lisias lika ai swira tara taki plapi yukuwan kata.
Ju nani aikuki kupia kumi takan ba
(1 Mac 6.55-63)
13Lisias ba sinskas apia kata, witin ai dahra walan pat lus tiwan kan ba, baku sin ai tânka brin Hibru nani ra sip pura lubia apia kan ba, baha nani ba Gâd karnika nani wal asla taki aiklabi kan. Bamna witin nani ra lengstar nani saki blikan wan, 14laman lâka dauki kupia kumi takaia dukiara, baku pramis takan witin king wal aisi kupia alki witin nani wal pânika daukaia dukiara. 15Macabeo, upla sut painka dukiara, Lisias dîa makabi ba âu takan bara king dîa dukia sut Macabeo bui Lisias ra ulbi makabi ba, Ju nani hilpka dukiara âu takan kata.
16Lisias bui Ju nani ra naku bîla nani wal wauhtaya ulban kata:
“Lisias ba, Ju nani ra lakula blikisa. 17Jan bara Absalón man nani bui yang ra ai blikram ba bui mihti ra aikan sa wauhtaya blikram ba, bara baha ra makabisa dîa ulban ba karnika yabia, 18yang aisi kaikri, bara king bui alki daukaia sip ba laki yabri, baku sin yang dîa sip daukaia sna ba, alki daukri. 19Man nani kuntri hilpka dukiara ban pain lukisma kaka, kau naika piua ra man nani yamnikam dukiara wark pain nani daukamna. 20Man uplikam nani wahbi sakram ba bara baku sin yang upliki nani sakri ba wâl ra, adar yabri sa, naha tânka nani ba man nani asla taki laki kaikma dukiara. 21Kasak pain banhwi kama.
“Dióscoro katka 24 yua, Kraist balaia kainara 164 manka ra ulban sa.’’
22King wauhkataya ba naku ulban kata:
“King Antíoco bui ai muihni Lisias ra lakula blikisa. 23Nanara yang aisiki ba gâd nani ra lakan bamna, yang brinki sa kingki tasbaya uplika sut ba pain banhwi kabia, bara baku lika witin nani dîa daukaia bri ba daukbia. 24Sakuna yang walri Ju nani ba, Grik uplika nani natka, baku sin lâka nani ba alki daukaia want apia wîsa, baku aisiki want kan ba. Sakuna witin nani silp ai lâka kat iwisa, bara witin nani kau ni makabisa sans yabia silp ai lâka kat iwaia dukiara. 25Baha kuntrika nani sut pain iwi kabia dukiara, lâ baku bapisna witin nani ai tempelka ba kli laki yabia bara ai almukka nani natka kat iwi banhwi kabia. 26Mamkabisna upla nani kum kum saki ai blîkma baha lâka nani ba aisi wapnika mangkbia dukiara, witin nani balbia bara baku lika yang lukanki ba tânka bribia, bara baku wina trabil âpu kira ai warkka nani daukbia.’’
27King bui Ju nani ra ulbi blikan wauhkataya ba, naku win kata:
“King Antíoco bui almuk nani daknika ra, baku sin Ju nani aiska ra lakula blikisa. 28Yang brinki sa man nani sut ba pain banhwi kama; yang lika wîni tara mapa ra yamni sna. 29Menelao#11.29 Menelao: 2 Mac 4.24. ai win man nani ba kli wamtla nani ra tawi balaia want sma. 30Baku bamna lâ kum ulbi swiri sa, upla nani silak ra bri ba tila wina ailal nani ba pri sâkbia, baha ba Xántico katka yua 30 ra kabia. 31Ju nani ba ai natka kat sip kabia ai pata pi nani ba piaia, baku sin ai lâka nani ba kaina piua ra baku alki daukaia. Witin nani ra upla kumi bui sin trabil munbia apia kaina piua ra mistik nani daukan ba dukiara. 32Baku ba mita Menelao sin blikri aula sa man nani kainam sunaia. 33Pain banhwi bas.
“Xántico katka yua 15, Kraist balaia kainara mani 164 ra ulban sa.’’
34Roman nani bui sin Ju nani ra wauhtaya kum naku natka ra ulbi blikan kata:
“Quinto Memio bara Tito Manio, Roman nani bui blikan ba, Ju nani ra lakula yabisa. 35Lisias king taika waitna ba bui dîa man nani dukiamra daukan ba, yang nani bui sin baha ba tâ baikisna. 36Sakuna man nani baha ulbanka ra dîa wi ba tânka pain laki kaiks, dîa king ra aisaia makaban sapa, baha wina upla kum saki ai blîks, baha uplika wal king ra dimi kau tânka param aisi banhwamna man nani dukiamra, kan nanara lika yang nani Antioquía ra taki auna. 37Baku bamna, isti pali upla kum kum wan blîks, bara wan marikbia man nani lukankam ba dîa sa. 38Pain banhwi bas.
“Xántico katka yua 15, Kraist balaia kainara 164 manka ra ulban sa.’’
Currently Selected:
2 Macabeo 11: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua