2 Macabeo 12
12
Judas bui tawan lamara kan nanira aiklabanka daukan ba
1Wal aisi kaikanka nani dauki luan ningkara, Lisias ba mahka tawi balan king takaski ba pliska ra, bara Ju nani lika ai natka baku insla mangkaia warkka nani dauki kata. 2Ban sakuna aiklaklabra nani kum kum lalka nani, wibia sa kaka, Timoti, Apolonio, Geneo luhpia kan ba, baku sin Jerónimo bara Demofón, Nicanor, Chipre ra aiklaklabra nani sut lalka tara kan ba sin dingkaia sa, naha nani bui Ju nani ra kupia kumi swiras, piua bani trabil muni kata.
3Baku taki kan tila kat, Jope uplika nani sin saurka tara kum daukan kata. Baha nani bui Ju nani bahara iwi ba ra paiwan, ai mairka nani bara tuktan sirpi sut ra makaban but nani wilkan ba ra aimaki banhbia, Jope uplika nani ai daukanka nani mariki kan sim Ju nani wal pât âpu pitka, 4sakuna tawan uplika nani wal lâ bapanka kum daukan ba kulkaia dukiara baman. Ju nani ba, dîa lâka bapi ba kulkanka yabi, bara diara sin lukras butka nani ba ra aimaki banhwan; sakuna but ba plapi kabu tihu ra taki wan taim, Jope uplika nani bui butka nani ba abakan. Butka nani bilara Ju nani 200 prais bâra kan.
5Judas naha sturka saura ai uplika nani ra munan na walan taim, ai aiklaklabrika nani bri kan ba ridi daukan, 6bara Gâd kasakkira ra ai pura suni banhwan, ningkara ai muihni nani rayaka kabu tara ra tikan uplika nani mapara dimi wan. Tihmia iwan taim, tawanka ba ra harbar bâra kan ba angkan, but nani baha pliska ra wilkan kan ba aiska angkan, upla nani bâra kan ba sut ikan kata. 7Tawan bilara dimras kan, durka nani ba prakan kan ba tâka mita bara kli mahka tawi bali banhwan. Sakuna ai lukanka kat brin kan kli baha pliska ra tawi balaia, bara Jope uplika sut ba rayaka tikaia dukiara. 8Baha tila bâk nu takan Jabnia tawanka uplika nani sin, Ju nani ra sim baku dauki ikaia luki kan ba, 9bara tihmia iwan taim pliska ba ra wan, harbarka ba angkan luan, but nani wilkan kan ba sut sin angkan, ingni tara nani buki kan bara sip kata Jerusalem wina param kaikaia, Jabnia wina Jerusalem kat 43 kilumita bri ba.
Galaad ra aiklabanka nani daukan ba
(1 Mac 5.9-68)
10Judas ai aiklaklabrika nani aikuki pliska ba wina wirâ tnaya ra taki wan, kilumita kum pura bakriki prais, baku dauki Timoti ra pliki kan. Bara witin nani wal prawan kata Arabia uplika nani 5,000 ai mina ra wapi aula kan ba, baku sin 500 nani ba aras purara uli aula kan. 11War karna pali aiklabi banhwan, sakuna Judas aiklaklabrika nani ba, Dawan karnika wal, baha nani ra aiklabi pura luan kata, Arabia uplika nani ba kaikan lus tiwan kan, bamna Judas ra makaban kupia kumi lâka daukaia; pramis takan bîp nani yabaia Ju nani ra bara ai tâura hilp nani yabi kaia pramis takan kata. 12Judas tânka brin, Arabia uplika nani ba witin nani ra diara manis ra hilp takaia sip kan, bara aikuki kupia kumi lâka daukan. Naha aisanka daukan ba ningkara Arabia uplika nani ba ai watla nani ra tawi balan.
13Judas bui Caspín tawanka ra sin war aiklaban, naha lika uba pain karna paskan kan, tnaya kutbanka nani tara pali kan, nisan sâtka ailal baha pliska ra iwi kan. 14Caspín uplika nani ba, ai kutbanka nani kan kahbaika bri ba ra kasak luki, baku sin plun bara diara wala nani ailal bri ba ra luki, Judas bara ai aiklaklabrika nani mapara karna takan, bîla tâski nani aisi wini kan, Gâd mapara sin saura aisi kan, bîla saura manis aisi banhwi kata. 15Judas bara ai aiklaklabrika nani aikuki Dawan ra makaban, witin lika tasba aiska kingka ba, bara war aiklabaia dukia nani pain âpu kata, sakuna Jeriko tawanka aiska ba sauhki tikan Jasua piua ra, bara ai karnika aiska mangki, paskanka tara bri kan ba krikaia dimi wan.#12.15 Jas 6.1-20. 16Gâd want kan baha pliska ba dakbi bribia, kan bahara sika upla ailal pali iki tikan ba, baha lamara lî alkaika pliska tara kum paskan bâra kan 360 mita nani bri kan bîla yahpika ba, baha pliska ba upla tâlia ni aibanhwan kata.
17Naha tawanka wina 135 kilumita impaki wan, bara Cárax tawanka ra diman, Ju nani ai nina tubiano mâki kan ba baha pliska ra iwi kan. 18Baha tawanka ra Timoti âpu kata, kan witin ba ban ai tâura impaki auya kan sip pura luras kan ba tâka; sakuna Timoti ba plis kum ra aiklaklabra daknika tara kum karna pali kan swin kata. 19Baha kaiki, Dositeo bara Sosípatro wal, Macabeo lalka tara nani kan ba, Timoti aiklaklabra nani 10,000 waitna nani kan kahbaika pliska ra swin kan ba mapara aiklabaia dimi wan bara aiklaklabra nani kan ba aiska iki banhwan. 20Macabeo, witin tani ra lika, war daknika bri kan ba baiki sakanka nani ra daukan, lalka nani mangkan, baha wina Timoti mapara aiklaban, baha lika aiklaklabra nani ailal bri kan ba 120,000 nani pura tasba purak wapi aiklabi nani ba, baku sin 2,500 nani ba aras pura wina aiklabi sâtka nani bri kata.
21Judas dimi auya kan ba Timoti walan taim, isti pali mairin, tuktan bara diara nani sut ba plis kum nina Carnáin mâki kan ba ra blikan wan, yukuwaia pliska pain kum ra, baha pliska ra dimi waia ba karna pali kan, yabalka nani ba uba wihka ra takaski kata. 22Judas aiklaklabra daknika pas bal takan kaiki, ai waihla nani ba sîa tara brin, kan diara sut kaiki ba Gâdka bui witin nani lukanka ra sibrin tara dingkan bara tanis baman plapi banhwan kata. Baku sin, minit bani pana pana ai tila kat latwan brih banhwi kan, bara silp ai isparka tara nani wal ai wîna tara ra sabi prui kata. 23Judas bui baha aiklaklabra nani ai karnika aiska wal nina blikan, skiru ni baman sabi ailal ra ikan, sut ba ra 30,000 waitna saurakira nani ra iki banhwan kata. 24Timoti pali sin Dositeo bara Sosípatro aiklaklabrika nani mihta ra kauhan; sakuna smat lâka tara wal witin pri swibia wisi makaban kan ai aisika bara ai muihka nani manis alki silak ra bri ba, baha nani rayaka ba kulkras iki banhwan kabia win. 25Piua wihka aisan ba ningkara, aisi pramis takan Ju nani ailal alki bri ba rayaka tikras kli pri swiaia, Timoti bui baku kupia alkan, bara witin ra diara munras pri swin ai muihni wala nani rayaka swaki sakaia dukiara.
26Baha wina Judas ba Carnáin tawanka ra wan, bara gâd mairin bahki Atargatis tempelka ra dimi wih waitna nani 25,000 ra alki nana dakban kata. 27Nahara aiklabi pura luan, baku sin upla ailal nani iki tikan ba ningkara, Efrón tawanka paskanka tara bri kan mapara impakan, bahara Lisias iwi kan, baku sin upla ailal plis wala nani wina bahara iwi kan. Wahma nani wîna karna nani ba, kutbanka tara ba kainara bapi swin bara kaina suni kata ai kupia karna wal. Baha kutbanka bilara lika war misinka nani ailal bri kan, war aiklabaia bulitka tara nani sin manis pali baha bilara kata. 28Sakuna, Dawan ra makaban ningkara, ai karnika tara nani wal waihla nani karnika kriki kan, Ju nani ba sip kan baha pliska ba dakbi briaia, bara upla nani 25,000 pura nani bahara ba iki banhwan. 29Ban ai tâura impaki wan bara Escitópolis tawanka ra dimi wan,#12.29 Escitópolis: Bet-seán tawanka nina Grik bîla ra. 1 Mac 5.52. baha ba Jerusalem wina 108 kilumita prais bri kan ba. 30Judas naha tawanka ra dimi wan taim, Ju nani bahara iwi kan ba bui ai maisa pakan, Escitópolis tawanka uplika nani lukanka pain nani brisa, baku sin Ju nani trabil brisa piua ra, tâ baikisa. 31Judas bara ai aiklaklabrika nani aikuki baha uplika nani ra tingkika yaban, bara makaban kata ai kainara Ju nani aikuki asla kupia kumi iwi kabia. Jerusalem ra wan, pat Wik nani Liliaka daukaia baila kan piua ra.#12.31 Wik nani liliaka: Baku sin Pentikus nina bri kata. Imp St 34.22; Lib 23.15-21; Kli S 16.9-11.
Gorgias mapara aiklaban ba
32Baha liliaka tara luan ningkara, Gorgias, Idumea tasbaya pîska ra aiklaklabra nani lalka tara kan ba mapara aiklabaia dimi wan kata.#12.32-36 1 Mac 5.55-68. 33Witin nani war ra dimi wan, tasba purak wapi aiklabi aiklaklabra nani 3,000 nani aikuki, baku sin aras pura wina aiklabi nani ba 400 nani bri kan. 34War ba mahka aiklaban, bara Ju nani tila wina manis pruan kata. 35Bamna Dositeo ba, Ju tubiano mâki nani wina kum kan, aras pura wina uli war aiklabi waitnika kan,#12.35 Ju tubiano mâki ba: tekska rait kaia sip ba; Gr. Bacenor uplika nani tila wina. Cf. 2 Mac 12.17. witin bui sika Gorgias ra prâka wina alkan, raski brih auya kan raya alkaia dukiara, sakuna tila ba wina Tracia wina aiklaklabra kum bui Dositeo ra alki klahkla klaki dakban, bara baku lika Gorgias ba Maresá tawanka ra plapi wih yukuwan kata.
36Azarías aiklaklabrika nani ba, piua wihka pali war aiklabi aula kan, baha mita swapan pali kata. Baku ba mita Judas ba Dawan ra makaban, witin ai tâura aimaki war tara ba tâ bribia. 37Ai bîla aisanka kat lawana nani aiwanan, war ra dimi waia winanka nani winan, baha ningkara Gorgias aiklaklabrika nani purara kauhan, bara baha nani sut plapan.
Upla pruan nani dukiara sakripais daukan ba
38Judas ba ai war daknika ba asla daukan, ningkara Adulam tawanka ra dimi wan. Wik yua 7 ba baila kan, witin nani ai natka kat ai wîna nani sunu daukan, bara ris yua liliaka daukata. 39Yua wala ingwan bara Judas aiklaklabrika nani ba taki wan, upla pruan nani ba wîna tara wahbi bara ai pamali raitka nani ra bikaia dukiara. 40Sakuna pruan nani ba wahbi kan piua ra, witin nani ai kwalka tilara bri kan, Jabnia aidulka nani ra mayunaia dukia sâtka nani, baha ba lâ wina Ju silp briras kan ba.#12.40 Kli S 7.25-26 ulbanka kat, naha dukia nani na blestu angkaia kan. Baku sip kata kaikaia witin nani dîa trabil pruan ba. 41Alsut asla taki, Dawan ra mayunan, witinka kasak ba, bara diara kaikaia apia nani ba param ra saki ba, 42bara baha ningkara Gâd ra ai pura suni makaban, baha nani ai saurka daukan ba sut padin munbia dukiara. Judas kupia karnika ba bui ai uplika nani ra makaban, bara win ai wîna nani klin bri kabia, kan pruan nani ba ai wîna sunu apia ba tâka baku takan sa bamna. 43Ningkara silbar mâ 2,000 prais wahbi asla dauki, Jerusalem ra blikan wan, saurka nani dukiara sakripais kum daukbia wisi.#12.43 Lib 4.13-21. Daukanka pain nani marikan, kli rawi buaia ba dukiara. 44Witin ba aiklaklabra nani pruan ba kli rawi bubia ba ra kasak lukras kan sa kaka, baha nani dukiara pura sunan ba aitani apia kaia kan. 45Sakuna ya nani kasak lukan lâka wal pruan ba, ban sin lukisa ai kainara bîla kaikanka yamni brisa, baha mita ai lukanka nani ba holikira pali kata. Baha mita sika naha sakripaiska nani daukan sa pruan nani ba dukiara, Dawan bui ai saurka nani wina pri munbia dukiara.
Currently Selected:
2 Macabeo 12: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua