2 Macabeo 6
6
Lalukra nani nina blikanka bara idan nani mayunra ba
(1 Mac 1.41-64)
1Piua wirâ luan ningkara, king bui Atenas almukka kum saki blikan wan, Ju nani ra taibi munaia ai almukka piua wina lâka nani bri ba krikaia bara iwanka natka nani raya paskaia Gâd lâka mapara sa kaka, 2Jerusalem tempelka ba sunu apia daukaia, bara baku Zeus Olímpico ra holi dauki yabaia, Guerizim ilka tempelka ba Zeus Hospitalario nina ra lakaia,#6.2 Makabi banhwan kan: teks rait kaia sip ba. Gr. nani kan. baha pliska uplika nani makaban ba mita.
3Tawan uplika nani ba, naha dukia sut taki kan kaiki ai swira tara bri banhwi kan, bara naku sât dukia nani kau kaikan daukras kata. 4Tempel watla ba gâd wala kakulkra uplika nani pliska kum takan, bara witin nani ba sunu apia liliaka nani dauki, plun pih bara rum dih bla taki banhwi kan, bara mairin rugkira nani aikuki sin saurka dauki kata. Baku sin tempel bilara diara nani kum kum lâ wina brih balaia apia kan ba bri sal dingki kan, 5bara tibil holikira ba purara daiwan wîna sunu apia nani ba suni swi kan.#6.5 Lib 11.7-8. 6Ris yua nani ba sip tânka briras kata,#6.6 Imp St 20.8-11. tawan liliaka nani kainara dauki kan ba sip daukras takaskan, upla nani ba sip witin ba Ju sa sip wiras kata.#6.6 Cf. 1 Mac 1.45-51. 7Upla nani ra taibi muni kan kati bani, king aisuban yua liliaka ra daiwan nani sakripais daukan ba wîna nani yaka piaia.#6.7 1 Mac 1.59. Gâd bahki Baco yua alkuya taim upla sut ba taiban lâka wina asla dihwi yabal bîla nani bâk yaban wapi kan, ai lal purara tangni nani kraunka kum suni brih.
8Tolemaida tawanka uplika nani makabanka wal#6.8 Uplika nani ba...Tolemaida wina: blasi ulbanka nani kat. Gr. Tolomeo. lâ wauhkataya kum ulbi sakan bara win kata, Grik tawanka lamara nani ra Ju nani iwi ba mapara, daukanka saura nani plis ailal ra dauki aula ba baha nani ra sin baku daukan kaia sa, taibi munka daiwan wîna sunu apia nani sakripais daukan ba piaia;#6.8 1 Mac 5.15; 12.48; 2 Mac 13.25. 9ya nani Grik uplika nani daukanka ba alki brih daukras sa kaka, nana dakbi ikan kaia sa. Naha sât lika pât nani ai purara aula ba tukinka kum mariki kata.
10Samplika kum kaikbia sa kaka, yapti wâl ra lâ tara mawanra brih wan, ai luhpia nani ra ai natka ba kat wîna lupia klakan ba tâwan baman; bara yabal bîla aiska ra brih wapi taukan ningkara kutbanka kum pura wina tukbi bataki iki banhwan kata, ai luhpia sut kira. 11Dakni wala nani walpa tara untika ra dimi, yukuwan ra ris yua liliaka daukaia trai munan ba, Filipo ra dusa kuhban, bara baha nani ra alkan, raya kan alsut asla pauta ra angki iki banhwata, witin nani ris yua kulkanka ba mita, diara kumi sin daukras prui banhwan kata.#6.11 1 Mac 2.32-38.
12Ya nani sut naha ulbanka ra aisi kaikma ba, kupiam kraukisna sari brima apia dukiara, kan pâtka na tara pali kaikisna, sakuna luks baha sut ba Dawan wina klalka nani sa, upla saurka nani ba wapnika mangkaia dukiara, sauhki tikaia lika apia. 13Naha pâtka nani sut taki na, Dawan latwanka lâka nani sa, upla saura dauki nani ba ban swika ai tâura wabia apia dukiara sa, bara isti klala yabi baha lâka saura ba tikisa; 14nisan wala nani ra Dawan bui klala yabaia ba bîla kaikisa, ai saurka nani ba kau tara takbia ba kat, sakuna yawan ra lika 15wan saurka nani ba tara takras kan, pat pali klala wankisa. 16Dawan yawan wan tila wina ai latwanka lâka ba sakras sa, klala wanki wan iwanka nani ba sins munisa, baha sut purkara lulki wan swiras sa. 17Naha kat aitani sa baha takan ba dukiara aisaia, nanara wan kainara aisanka wala nani bri ba aisi wabia.
Eleazar ra alki ikan ba
18Eleazar ba Lâ Smasmalkra tara kum kan, pat sin almuk kata, ai kulkanka lâka nani manis bri kan bara witin ra alkan, taibi munan ai bîla ba kwâkbia kwirku wîna sunu apia ba pibia dukiara.#6.18 Lib 11.7-8. 19Sakuna witin ai kulkanka aiska wal pruaia lukan, ai rayaka ra lukras, mahka witin silp yakan upla nani ra rau muni iki ba pliska ra impaki wan kata, 20kwirkuka wîna ra yabalaya tuhban ningkara. Ai daukanka nani karna marikan, pata saura ba mapara karna bapi buan, ai rayaka pali ra sin kulkras daukanka marikan kata. 21Upla nani naha pata saura Eleazar ra dakakaia trai muni kan nani ba, kaina piua wina witin nani ba Eleazar ra kaiki kan, bara paiwi tnaya ra laki witin ra win wîna pain sunu nani ridi dauki brih balbia ai watla wina, bara kwirku wîna saura sunu apia ba pîsa baku dauki, sakuna utla wina brih balan wînka ba pibia win. 22Baku daukbia sa kaka lika king bui witin ai rayaka ba pri munan kabia, bara witin nani aikuki pâna lâka piu wihka wina bri ba mita latwan lâka ra iwi kabia. 23Sakuna Eleazar ba ai wîna tara kat kulkanka tara brin, ai manka nani alkan ba ra lukan, witin pat almuk bara ai tâwa nani sut pihwan sa, baha ba ai warkka yamni nani daukan ba sainka nani sa, bahamna ai mayunra nani brisa, tuktan sirpi kan ba wina almuk takan ba kat diara pain nani manis daukan sa, kau pali ba Dawan lâka kasak nani ba alki brih dauki aula, bara baha sut ra luki, naku win: “Man nani bui yang ra ai ikaia lukisma ba, takaskras kira mahka pali ai iks. 24Yang pat almuk takri sa, manki nani alkri na wal sip pulras; want apia sna wahma bara tiara ailal nani ba yang Eleazar 90 mani alkri ba gâd bahki natka tanis nani tilara dimi, wark yamni apia nani daukri lukbia. 25Bara baha tâka, witin nani ai purara trabil nani bal iwan, bahamna yang almuk takri na, kulkanka tara nani brisna ba lus tiwaia want apia sna, baku sin mayunra nani brisna ba ban alki bri kamna. 26Naha piua ra waitna klalka nani wina nanara pri takamna sin, sakuna raya, apia kaka pruamna sin, Dawan Karnakira ba mihta wina lika swakwi takamna apia. 27Baha ba mita naha rayaka ra kupi karna dauki lulki swisna, baku yang almuk takri ba kulkanki ban bri kaia dukiara, 28bamna baku wahma bara tiara nani sut ra daukanki pain samplika nani marikamna, witin nani sut ai tânka bribia, yang almuk sakuna, wan Dawan lâka kasak nani ba tâwan aisi pruaia sip sna ba.’’
Naha sut aisi win ningkara, upla nani ra panis saura muni iki ba pliska ra wapi wan. 29War aiklaklabra witin ra brih auya kan nani ba, naha sturka aisan nani ba walan bara sin luki kan, Eleazar ba lal saura takan bara ai latwanka lâka kainara bri kan ba swih kau karna witinka ra munan kata. 30Sakuna Eleazar ba klala nani yaban ba wal pat pruaia baila kan, bara ai wingka karna puhbi, naku aisata: “Dawan ba diara sut kaikisa, mistik âpu kira. Witin nu sa, prura mihta wina pri takri, sakuna wîni tara aiska ra latwan tara nani brisna upla bui ai wipi ba wal; baku sin witin nu sa, kupi bilara lilia tara brisna ba, witin ra kasak kulkisna ba wal.’’ 31Eleazar ba naku pruan, bara witin ai pruanka wal wahma bara tiara nani ra baman apia, sakuna kuntri aiska mawanra waitna kum kasak kulkan lâka wal pruan ba samplika nani swin kata.
Currently Selected:
2 Macabeo 6: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua