2 Macabeo 14
14
Judas bara Nicanor wal lâ kum aisi daukan ba
(1 Mac 7.1-38)
1Mani nani yumhpa luan ningkara, Judas nu takan, Demetrio, Seleuco luhpia waitna ba, Trípoli harbarka ra war daknika karnikira kum sal sunan, baku sin kabu purak aiklabaia butka nani, 2bara pliska ra dimi wan, Antíoco bara Lisias wal ra alki ikan ningkara, naha lika witin ra main kaiki kan ba, tawanka aiska ba dakbi brin kata.
3Alcimo ba, kaina piua ra prîs tara kum kan ba,#14.3 Cf. 1 Mac 7.5. aidul lâka ra dimaia apia kan ba baha lâka nani alki daukan bara ai tânka brin witin raya kabia apia ba, baku sin tempel ra kli dimi kli sin smalkbia apia ba, 4witin king Demetrio wal aisi kaikan Kraist balaia kainara 161 manka ra; baha piua ra prisantka nani yaban kata, gul kraunka kum, papta wahia nani, batana mâ dusa tnawka nani naha ba ai natka baku tempel ra yabi kan ba, sakuna sturi lika aisaras kata.
5Ban sakuna, yua kum saki brin kan dîa witin daukaia luki ba sanska briaia dukiara: bara Demetrio bui ai lâ uplika daknika nani sut ra paiwan balan bara makabi walan, Ju nani ba dîa pali daukaia lukisa, baku sin dîa wala pali daukaia ridi takisa sapa. Alcimo tawi naku win: 6“Ju hasideo nani mâki ba, ai lalka baku brisa Judas Macabeo ba, witinka sika war tara nani aiklabi aula ba, baku sin tawan iwanka bara natka nani tiki aula ba, bara kingkam lâka ba pri pali apia sa, baku dauki ba tâka. 7Yang karnika nani bri kapri ba ai dakban sa, prîs tara warkka bri kapri ba sin ai dakban, sakuna naha pliska ra balri na, diara wâl dukiara sa: 8kumika ba, king ra tâ baikanka tara yabaia dukiara balri; wala ba, tawanki uplika nani pali ba dukiara, kan saura pali takan sa Ju nani mâkri ba tâka mita, bara baha nani hilpka pliki balri sa. 9Wan Kingka sma ba ra kupiam kraukisna, naha tânka aisisna ba pain pali laki kaikma, bara dîa sip ba daukma wan kuntrika dukiara, baku sin wan tawanka nani trabil ra dimaia baila ba kan sunma, king baku kupiam pain brih ki upla sut ra yamni kaikisma ba kat; 10kan Judas ba ban raya iwisa kaka, wan kuntrika ra laman lâka bribia apia.’’
11Alcimo sturi aisi danh takan taim, king pânika wala nani Judas ra saura luki kan ba, Demetrio ra kau kupia tuski banhwan. 12Demetrio ba baha minitka ra Nicanor ra wahbi sakan, daiwan elepant daknika tara bri kan ba tâura lalka kan ba, bara sin Judia ra aiklaklabra nani bâra kan ba lalka tara mangki ningkara blikan taki wan. 13Nicanor adar kum brih auya kan, Judas rayaka tikaia, baku sin ya nani witin wal asla kan ba sut slingbi tikaia, Alcimo ra karnika tara yabaia prîs tara baku tempel nani sut tila wina kau tara ba bilara. 14Judia ra gâd bahki ra lalukra nani sut Judas sîa plapan nani kan ba, Nicanor tnaya ra bal asla taki banhwan, lukanka kum brih banhwi kan, ban kra Ju nani ra aiklabi pura lubia taim, diara kum pan alkaia dukiara.
15Nicanor bara baku sin gâd bahki ra luki uplika nani ailal aikuki asla taki aiklabaia aula ba sturka walan taim, Ju nani yamhpus brin bara ai lal purara yukan bara Dawan ra wini makaban, ai tawanka uplika nani ban kaia ra pain asla dauki bapi swin ba, baha nani Dawan ra piua bani kasak luki bara witin bui dîa yabaia ba dukiara lukan ba. 16Ai lalka ba bui adar yaban taim, pliska bâra kan ba wina mahka taki wan baha nani mapara, bara waihla nani wal prawan, war karna pali aiklaban Hadasá tawanka ra.#14.16 Hadasá: aisi kaikanka sip ba (cf. 1 Mac 7.40). Gr. Desau. 17Saiman, Judas muihnika kan ba, Nicanor mapara aiklabi kan, sakuna baha nani dahra walras dimi wan ba tâka, mistik sirpi kum takan kata. 18Nicanor kaikan nahki pitka kat Judas bara ai uplika nani aikuki karnika tara bri kan ba, baku sin ai tasbaya dukiara wilinkira aiklabi kan ba. Kanra lukan raks nani wal aiklabaia apia, bara war âpu ni ai pâtka nani ba wapnika mangkaia lukan. 19Baha lukanka wal, Posidonio, Teodoto bara Matatías kat saki blikan wan, Ju nani wal aisabia kupia kumi takaia dukiara.
20Lâka nani bapan ba tânkira laki kaikan ningkara, Judas bui war daknika ra marikan, baha nani pain lukan bara pri lâka makabi ba wal asla takaia win kata. 21Yua kum wahbi sakan, lalka tara nani ba asla taki aisaia dukiara. War daknika bani tila wina truk kum tâura wan, bara iwaika pain nani ba pliki brih balan. 22Aisi kaikaia awarka ra Judas ba lika plis pain kum pliki aiklaklabra uplika nani swin kata, ban kra waihla nani ba bui alki saura kra munbiara sîa. Aisi kaikanka ra, lalka tara nani ba lâ bapanka kum ra wi banhwan kata.
23Nicanor ba piua wiria kum Jerusalem ra takaskan kata, bahara witinka lâ kat tauki kan. Witin ai tilara aiklaklabra wala nani diman kan ba sut sin kangban kata. 24Judas ra yu bani ai lama kat bri kan, witin ra latwan tara bri kan bamna. 25Makaban baha pliska ra mairin brih luhpa sauhbia. Bara Judas ba marit takan bara pain baha pliska ra takaski kata.
War aiklabanka nani kli tâ krikan ba
26Alcimo kaikan, Nicanor ba Judas wal uba ai pânika pain takan kan, bara witin wal aisi kupia kumi takan ba wauhkataya kum ai mihta ra brin, bara Demetrio ra plikaia wan, dusa kuhbaia mata Nicanor ba kuntri lâka mapara sa, baha mita Judas ra ai sirka ra mangki swin sa, witinka ba king wailhka pali kan ba. 27King ba ai kupia sauhkan, baha uplika watawikira kupia tuskanka brih wan ba tâka, bara wauhtaya kum Nicanor ra ulbi blikan wan, bara Nicanor ra param win kan, witin king baku aitani kaikras sa Judas wal aisi pâna takan ba, bara adar yaban baha sim minitka ra Judas Macabeo ba silak ra mangki, Antioquía ra blîkbia. 28Nicanor naha wauhkataya alkan taim ai kupia sauhkan, sakuna minitka ra diara kumi sin daukras kata, witin Judas wal dîa lâka nani daukan ba krikaia want apia kan, Judas ba diara saura kumi sin daukras kan bamna. 29Nicanor ba king lâka pura luaia apia wisi, ai smatka ba wal natka kum pliki kan nahki baha adarka blikan ba alki daukaia.
30Sakuna Judas Macabeo ba ai dahra walan, Nicanor ba baha wina ai daukanka nani sins muni auya kan, lâ karna nani ai mapara bapi kan, kainara wal asla kan ba, nanara baku apia takan, Judas kaikan baha daukanka Nicanor bri ba wal witin ra diara yamni nani takbia apia, bara ai uplika nani bri kan ba asla dauki ridi daukan, bara plis kum pliki bahara wih Nicanor sîa yukuwi banhwan kata. 31Nicanor nu takan Judas ba ai tânka brin witin dîa daukaia luki kan ba bara baha dukiara yukuwan sa, bara tempel holikira ra prîs tara nani sakripais nani yabi kan taim, witin nani ra makaban Judas baha bilara ba saki yabia. 32Prîs tara nani bui pana win kata, baha waitnika Nicanor bui pliki ba, bahara âpu sa. 33Baku win taim, Nicanor ba ai mihta aihkika ba buki tempel ra kulki, swer taki, naku win kata: “Man nani naiwa yua Judas ba yang mihti ra mangkras sma kaka, yang bui naha Gâd tempelka tara na sauhki tikamna, baku sin tibil holikira ba kriki tikamna, bara sirka ra gâd bahki Baco tempelka kum pliska na kat paskamna.’’ 34Naha sturka nani win ningkara, Nicanor ba mahka taki wan. Prîs tara nani ba ai mihta purara buki Dawan ra makaban, piua bani Gâd bui ai tâ baiki karnika yabi bamna: 35“Dawan, man diara sut brisma ba, man bui sika tempelka na, man takaskaikam pliska dauki briram ba, yang nani tili kat.#14.35 1 Ki 8.27-30; Ap St 17.25. 36Baku bamna, nanara naha pliska na sunu ban main kaiki bri bas, yabrika upla saura nani bui bal sauhki tikbiara, kan sunu daukan ba wina wihka apia sa bamna.’’#14.36 2 Mac 10.1-8.
Razís pruanka ba
37Baha sut taki kan tilara, Jerusalem almukka kum Razís wi kan ba, ai uplika nani dukiara sin uba pain luki kan ba, ai nina tara pali bri kan bara ai daukanka yamni pali kan ba tâwan “Ju nani aisika” nina yaban kata ba, witinka mapara dusa kuhbanka nani daukan Nicanor mawanra. 38Kainara war tara aiklabi kan piua ra, Razís ra pat dusa kuhbanka nani daukan kan, Ju nani kaina sunisa wisi, sakuna baha piua ra witin dîa sip ba kat sibrin âpu bara ai wîna tara pali sin mangki, baha saurka nani pura luan kata. 39Nicanor, Ju nani ra saura luki kan ba latan marikaia dukiara, aiklaklabra nani 500 kum asla dauki, Razís bâra ba pliska ra wan, alki silak ra mangkaia dukiara, 40kan Nicanor ba luki kan, Razís ra silak ra mangkbia wal, Ju nani karnika tikisa. 41Aiklaklabra nani ba Razís takaski aihwawakra pliska ra wan, bara lata durka tara ba krikaia trai muni kan, dur nani ba angkaia adarka brin kata, bara baha minitka ra witin silp ai isparka saki muni ai wîna tara ra sabaia trai muni kata, 42kan witin lukan waitna baku pruaia, sakuna waihla nani mihta ra lika kauhaia apia, bara panis munanka wahwaia apia. 43Sakuna, aiklabanka istikira ba mita, isparka wauhan ba swak takan kata; bara kau tauki kan minitka ra aiklaklabra nani ba pat dimi auya kan kaiki, isti pali plapi kutbanka tara ba purara uli, baha wina aiklaklabra nani ba purara kauhaia trai munan. 44Sakuna istikira aiklaklabra nani ba, Razís ai purara kauhaia kan kaiki tnaya ra tawan bara tasba kat witin kauhan. 45Razís kau pruras ban ai wingka puhbi kan minitka ra, latwan saura brin, tala tilara sakuna, aiklaklabra nani tila bâk plapi taki wih, walpa tara purara kum ra ulan, 46bara pat prui kan tala biara, sakuna ai biara ba kalki ai biara sirpika nani ba ai mihta wâl ra brih, bara aiklaklabra nani ba mapara lulkan wan kata. Razís makabi kan Dawan ra kli ai rayaka ba yu kum kli yabia. Baku natka ra Razís ba pruan kata.
Currently Selected:
2 Macabeo 14: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua