2 Macabeo 15
15
Nicanor war lus tiwan bara pruanka dahra
(1 Mac 7.39-50)
1Nicanor ba nu takan Judas ai uplika sut kira Sameria tasbaya pîska kum ra sa, bara baha nani mapara sibrin âpu kira dimi war aiklaban, ris yua kulkanka bri kan ba sanska ra. 2Ju nani manis ra Nicanor bui taiban lâka wal ai tilara brih wan nani ba bui naku aisi win kata:
—Man Judas uplika nani ba wal prawma taim, witin nani ra daiwan ra baku rau muni ikpara; Gâd diara sut kakaira ba bui yua nani tila wina kum saki holi daukan ba, man rispik muns.
3Sakuna, Nicanor upla saurakira pali kan ba bui makabi walan, heben purara ya waitnika kum bâra sa ki, naha ris yua kulkan kaia adarka yaban ba. 4Pana tawi witin nani naku ansika yaban:
—Dawan ban kaia ra raya iwi ba, karnika tara sin heben purara bri ba bui sika wik yua lâs liliaka tara daukaia ba adarka yaban sa.
5Baha wali, Nicanor naku aisata:
—Yang lika tasba purara karnika tara brisna, baku bamna adar lakisna, raks nani ba mihtam ra brima, king dîa adar lakan ba bîla wali.
Sakuna Nicanor dîa ai brinka saura bri kan ba, sip daukras munan kata. 6Witin luki kan ai prautka bara ai kwalhwanka wal, Judas aiklaklabrika nani wal war tara aiklabi bara dîa dukia nani bri ba mihta dakbi, baha wal lilka tara kum daukaia luki kan upla sut mawanra. 7Sakuna Macabeo ba Dawan ra ban kasak luki kan, baku sin bîla kaikanka nani bri kan bui witin nani ra lulki swibia apia ba, 8baku ba mita ai aiklaklabrika nani ra kupia lilia daukan bara makaban, sibrin âpu kira gâd bahki ra lalukra nani ba mapara aiklabaia. Win ai kupia krauki banhbia, kaina piua ra Dawan bui pat hilp munan kan ba, bara bîla kaikanka brisa, naha pâtka aula ba tilara sin, Dawan bui aima kum kli hilp yabia, bara baha sut ba pura luaia. 9Ai aiklaklabrika nani ra kupia lilia daukan lâ bîla nani wal, baku sin prapit nani aisanka wal, ai sinska nani ra mangkan kaina piua ra war tara nani aiklaban ba tânka, baha wali witin nani kau lilia taki banhwan kata. 10Alsut kupia karna pali takan ba ningkara adar nani yaban, bara smalkan sin, nahki gâd bahki ra luki uplika nani lukanka nani saura bri ba tânka, diara pramis munan nani ba kulkras pali sa.
11Naha sât aisanka nani wali, upla sut ba raks nani ai mihta ra brin, ai kan suni aiklabaia dukia nani ra lukras pali kata. Witin nani ra yaprisauhkan ra sain aihka nani kaikan ba tânka sin kli aisi kupia kraukan, baha wali witin nani kau lilia tara taki banhwan kata. 12Yaprisauhkanka tânka ba naku kata: Onías, piua luan ra prîs tara pali kan ba, upla uba pain kan ba, bawikira waitna, latwankira, upla sut wal pain baman kan ba, naha lukra tuktan wina bri kan ba, kaikan witin ai klahkla sakbi brih, Ju nani sut ba dukiara ai pura suni kan. 13Baha sim minitka ra waitna wala kum bal takan, tâwa aiska pihwan pali kan, daukanka nani painkira bri kan, upla sut bui kulkanka tara yabi kan, bara sip kata kaikaia witin ba upla tara kum ba tânka. 14Onías buan bara naku bîla nani aisata: “Naha waitnika kaikisma na sika Jirimaya, Gâd prapitka tara kum sa,#15.14 2 Kr 36.12; Jir 1.1. upla sut pânika sa, ai uplika dukiara ai pura sunaia laik pali sa, tawan holikira ba dukiara sin kasak ai pura suni ba.’’ 15Jirimaya ai klahkla aihkika sakban, bara Judas ra gul isparka kum yaban bara naku aisata: 16“Naha isparka gul ni paskan na bris, Gâd bui maikisa, baha wal waihla nani sut ba iki tikma.’’
17Judas sturi nani aisan ba wal aitani ai dahra wali banhwan, baha bîla nani ba upla sut kupia bilara karnika tara yaban, wahma nani ailal ra kupia karna daukan, bara naku daukanka nani wal, Ju nani lukanka kum bri banhwan, witin nani kiamp pliska ra takaskaia apia, sakuna kupia karna lâka wal waihla nani ba mapara dimi waia, bara baha nani wal sibri âpu kira wîna kat kat alki aiklabaia, baku dauki trabil nani ai purara aula ba klir takaia, kan Jerusalem ai kasakka lukanka nani bara tempel holikira ba pât saura nani bîla kaikisa bamna. 18Ai maya mairin nani, ai luhpia nani, ai muihni nani bara baku sin ai pamali nani sut purara, pât saura nani balbia ba dukiara uya lukras kan, sakuna witin nani kau luki kan ba lika tempel holikira bisi pali sunu daukan kan ba dukiara. 19Tawan tara bilara upla nani takaski sarka lâka kau sirpi apia kan, kainara war tara aiklabaia ridi taki ba wal prakbia sa kaka. 20Waitna nani sut ba mahka war tara ba tâ krikbia want sa, waihla nani ba, ai uplika sut asla dauki brin kata, aiklaklabra nani ba war ra dimi waia ridi pali takan kan, daiwan elepant nani ba war aiklabaia natka kat bapi swin bûi kata, bara war araska nani sut ba sin ridi pali daukan sa. 21Macabeo kaikan aiklaklabra kwâra nani ba ai lamara impaki aula, war aiklabaia dukia tulska sâtka ra brisa, daiwan elepant karna nani sin brih dimi aula, naha sut kaiki Macabeo ai klahkla pura tani ra sakbi bara Dawan ra makaban, witinka sika sain aihka nani dauki mariki ba, upla nani hilp makabi taim tâ baiki Dawanka ba, raks nani karnika wal apia, sakuna witin baku want taim dauki ba. 22Dawan ra naku aisi makaban: “Dawan, man sika Ezequías, Juda kingka ba piua ra insal kum blikram balan, bara upla nani 185,000 ikan Senaquerib kiampka bilara;#15.22 2 Ki 19.35; Ais 37.36; 1 Mac 7.41; 2 Mac 8.19. 23nanara sin man ra mamkabisna, man heben ra takaskisma ba, baha sim insalkam yamnikira ba wan blîkma, yawan nani wan tâura aimakbia, baku lika sibrin lâka tara nani ba baha nani tilara dingkbia. 24Man klamhkla karnika wal, gâd bahki ra luki uplika nani mampara saura aisi nani ba, man uplikam sunu daukram nani ra rau muni nani ba, baha nani sut ra iki tikbia.’’ Baku aisi tnata alkan.
25Nicanor aiklaklabrika nani ba, trumpit binka bara war lawana aiwani impaki wan. 26Judas ai suldiarka nani aikuki lika, Dawan ra ai pura suni makabi baha nani mapara dimi wan. 27Witin nani ai mihta bîla baman aiklabi banhwan, sakuna ai kupia bilara Dawan ra makabi kan; baku daukan bamna, ai waihla nani 35,000 ra iki banhwan, bara lilia ni aibanhwan kata Dawan bui hilp tara yaban ba dukiara. 28War aiklabi tnata alkan taim, liliakira mahka aidrubi banhwan taim, Nicanor ba war aiklabaia kwalka dimi pruan kan saki banhwata. 29Baha sut kaiki uba lilia taki banhwan bara Dawan ra mayunan, ai bîla aisanka ba kat. 30Judas ai wîna tara, baku sin ai spiritka aiska wal war tara tâura aimaki aiklaban ba ai uplika nani yamnika dukiara, witin kau tuktan wina ai tawanka ra baha lukanka nani bri kan ba, adar yaban Nicanor ba nana dakbia bara klahkla aihkika sin, bara Jerusalem ra brih balbia win kata.
31Judas witin ai wîna pali Jerusalem ra balan, bara ai uplika nani, baku sin prîs tara nani sut ra paiwi asla daukan ningkara, sakripais tibilka tâura tawi buan, bara kaina kahbaika pliska ra banhwi kan uplika nani ra paiwan balan, 32bara Nicanor upla saurakira lal dakbi brih balan ba marikan, klahkla aihkika ba sin, naha wal sika Gâd mapara saura yabi kan ba, ai prautka tara wal Gâd tempelka holikira nani kriki tiki kan ba.#15.32 Cf. 2 Mac 14.33. 33Baha sut ningkara Nicanor upla saurakira twisa ba dakban, pîs ra irbi daukbia adarka yaban bara tnawira nani ra yan pin, Nicanor klahkla ba tempel watla kainara pami swibia win, tukin kum baku sinskas puli kan ba tâwan. 34Upla nani baha pliska ra kan ba, pura tani ra kaiki, Dawan ra mayunra nani daukan witin nani ai tilara balan ba dukiara, bara naku aisi mayunan kata: “¡Dawan ra mayunanka tara yaban kabia, ai tempelka sunu ban bri ba dukiara!”. 35Judas bui Nicanor lal ba kan kahbaika pliska lilapas kat bri si pami swin, Dawan bui hilp tara munan ba tukinka param kum baku, 36bara upla sut lukanka kumi takan, baha yua ba kulkaia lilia tara nani dauki, baha lika Aram uplika bîla ra Adar mâkisa, katka 12 yua 13 ra kabia, Purim kulkanka kainara.#15.36 Purim Liliaka: baha bîla kat. Mardoqueo yua. Cf. Est 9.1,17-32; 1 Mac 7.48-49.
Prakanka
37Naku sika Nicanor mapara diara nani sut takan ba; baha piua wina tawan tara ba Hibru nani karnika lâka munhtara sa.
Yang naha kat aisi danh takisna. 38Ulbanka nani ba pain asla dauki ulbri sa kaka, ba kat yang sip katna daukaia. Ban kra uya pain ulbras kapri bara tânka klir apia sa kaka, bamna ba kat baman sip katna. 39Man nani nu sma sika, wain ba, apia kaka lî wîna kat baman diaia ba, pain apia sa, kuna wain lî wal miks munan taim lika wan kârma ra auhni pali sa; sim baku sika ulbanka nani kum kum ba, prana dauki ulban sa kaka, upla nani kiama ra pain walisa. Naha wal aisanki na tnata mangkisna.
Currently Selected:
2 Macabeo 15: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua